ཚེས་16ཉིན་ཚོང་དོན་པུའུ་ཡིས་ཆེད་དོན་གསར་འགྱུར་ཡོངས་བསྒྲགས་ཚོགས་འདུ་འཚོགས་ཤིང་། འབྲེལ་ཡོད་ལས་ཁུངས་ཀྱིས་ལག་ཐོགས་ཁ་པར་དང་ངོས་ལེབ་གློག་ཀླད། རིག་ནུས་ལག་འདོགས་ཆུ་ཚོད(ལག་གདུབ)བཅས་གསར་པ་ཉོ་བའི་ཁ་གསབ་དང་ཁྱིམ་སྤྱོད་གློག་ཆས་རྙིང་ཚབ་གསར་བརྗེའི་སྲིད་ཇུས་དང་འབྲེལ་བའི་གནས་ཚུལ་ངོ་སྤྲོད་བྱས་པ་རེད།
ཟླ་1ཚེས་20ཉིན་ནས་བཟུང་རྒྱལ་ཡོངས་ས་གནས་ཁག་ཏུ་ལག་ཐོགས་ཁ་པར་སོགས་གློག་རྡུལ་ཐོན་རྫས་གསར་པ་ཉོས་ན་ཁ་གསབ་སྤྲོད་རྒྱུ་དེ་གཅིག་རྗེས་གཉིས་མཐུད་ངང་ལག་བསྟར་བྱ་རྒྱུ་ཡིན་ཞིང་། ཞིབ་ཕྲའི་ལག་བསྟར་དུས་ཚོད་ས་གནས་དེ་གའི་བརྡ་ཐོར་གཞིགས་དགོས།
འཛད་སྤྱོད་པ་མི་སྒེར་གྱིས་ལག་ཐོགས་ཁ་པར་དང་ངོས་ལེབ་གློག་ཀླད། རིག་ནུས་ལག་འདོགས་ཆུ་ཚོད(ལག་གདུབ)སོགས་གློག་རྡུལ་ཐོན་རྫས་རིགས་3ཉོ་བའི་ཁ་གསབ་ཚད་གཞི་ནི་ཅ་དངོས་གཅིག་གི་ཕྱིར་འཚོང་རིན་གོང་སྒོར་6000ལས་མི་བརྒལ་བའི་ཐོན་རྫས་ལ་ཐོན་རྫས་ཀྱི་ཕྱིར་འཚོང་རིན་གོང་གི་15%ལྟར་ཁ་གསབ་སྤྲོད་རྒྱུ་དང་། འཛད་སྤྱོད་པ་རེ་རེར་ཐོན་རྫས་རིགས་རེ་རེའི་ནང་གི་ཅ་དངོས་གཅིག་ལ་ཁ་གསབ་སྤྲོད་རྒྱུ་དང་ཅ་དངོས་རེའི་ཁ་གསབ་སྒོར་500ལས་བརྒལ་རྒྱུ་མིན་པ་རེད།
ལག་ཐོགས་ཁ་པར་སོགས་གློག་རྡུལ་ཐོན་རྫས་རིགས་གསུམ་གྱི་ཁ་གསབ་ནི་གསར་པ་ཉོ་བའི་ཁ་གསབ་ཡིན་པ་ལས་རྙིང་ཚབ་གསར་བརྗེའི་ཁ་གསབ་མིན་པས། སྔོན་ལ་རྙིང་པ་ཚུར་སྤྲོད་དགོས་ཀྱི་མེད།
འཛད་སྤྱོད་པས་ལག་ཐོགས་ཁ་པར་སོགས་ཐོན་རྫས་ཉོ་སྐབས། དྲ་ཐོག་སྟེགས་བུའམ་དྲ་འོག་ཚོང་ཁང་གང་ཡིན་རུང་ཐད་ཀར་དངུལ་གཅོག་འཕྲི་བྱ་ཐུབ།
ཚོང་གཉེར་བས་ཕྱིར་འཚོང་བརྒྱུད་རིམ་ཁྲོད་གཅོག་འཕྲི་རྫུན་བཟོ་དང་རིན་གོང་དམའ་མོ་རྫུན་བཟོ། རིན་གོང་དམ་བཅའ་ལག་བསྟར་མི་བྱེད་པ་སོགས་རིན་གོང་མགོ་སྐོར་གཏོང་བའི་བྱ་སྤྱོད་སྤེལ་མི་ཆོག སྔོན་ལ་རིན་གོང་སྤར་བ་དང་དེ་རྗེས་ཁ་གསབ་སྤྲོད་པའི་བྱ་སྤྱོད་ཤེས་རྟོགས་བྱུང་ཚེ། དུས་ཐོག་ཏུ་འབྲེལ་ཡོད་སྡེ་ཁག་ལ་རྩིས་སྤྲད་ནས་རྒྱལ་ཁབ་ཀྱི་སྲིད་ཇུས་དོན་ཐོག་ཏུ་འཁྱོལ་རྒྱུར་འགན་ལེན་བྱ་རྒྱུ་རེད།
