བོད་ཀྱི་སྒྱུ་རྩལ་པ་གྲགས་ཅན་སྨན་བླ་སྐྱབས་ལགས་ཀྱི་བཅར་འདྲི།

བོད་ཀྱི་སྒྱུ་རྩལ་པ་གྲགས་ཅན་སྨན་བླ་སྐྱབས་ལགས།

　༡  ཁྱོད་ཀྱིས་རང་ཉིད་ཐོག་མར་སྒྱུ་རྩལ་གྱི་ལས་ལ་ཇི་ལྟར་ཞུགས་པ་ལས་འཕྲོས་ཏེ་རང་ཉིད་ངོ་སྤྲོད་མདོར་བསྡུས་ཤིག་བྱེད་རོགས་གནང་།
　སྨན་བླ་སྐྱབས། ངའི་སྐྱེས་མིང་ལ་སྨན་བླ་སྐྱབས་དང་། སྨྱུག་མིང་ལ་གངས་བུ་དགའ་སྐྱེད་དམ་འབར་རྡེའུ་ཟེར་གྱི་ཡོད། འབར་རྡེའུ་ནི་ང་རང་ཆུང་དུས་ཀྱི་གཅེས་མིང་ཡང་ཡིན། ང་ཨ་མདོ་མང་འབའ་བྱ་གསུམ་གྱི་ཡ་གྱལ་མང་ར་ཡི་འཇག་རི་སུམ་མདོའི་འབྲོག་ཁྱིམ་ཕལ་པ་ཞིག་ཏུ་སྐྱེས་ཤིང། སྔ་གཞུག་ཏུ་མཚོ་ལྷོ་མི་རིགས་དགེ་ཐོན་སློབ་གྲྭ་དང་། ཧྲང་ཧེ་ཟློས་གར་སློབ་གླིང་། མཚོ་སྔོན་དགེ་འོས་སློབ་ཆེན་བཅས་སུ་འགྲིམས། གློག་བརྙན་སྐད་སྦྱོར་པ་དང་། འཁྲབ་འཁྲིད་པ། འཁྲབ་གཞུང་རྩོམ་པ་པོ། གར་སྟེགས་འཁྲབ་སྟོན་པ་དང་མདོ་འཛིན་པ། སྒྲ་བརྙན་རྩོམ་སྒྲིག་པ་སོགས་ཀྱི་ལས་ཀ་གཉེར་མྱོང་། དུས་རབས་སྔོན་མའི་ལོ་རབས་བརྒྱད་བཅུ་བ་ནས་བཟུང་སྟེ་ད་ལྟའི་བར་དུ། སྒྲུང་གཏམ་ཁ་ཤས་དང་། ལྷུག་རྩོམ་དང་འབོལ་རྩོམ་བཅུ་ལྷག སྙན་རྩོམ་བརྒྱ་ལྷག ཁ་ཤགས་སུམ་ཅུ་ཙམ། གར་ཆུང་ངམ་བཞད་གད་ཟློས་གར་འདུ་བའི་འཁྲབ་གཞུང་སུམ་ཅུ་ལྷག སྒྲ་སྙན་རྡུང་ལེན་གྱི་གླུ་ཚིག་བརྒྱ་ལྷག་དང་གླུ་དབྱངས་ཀྱི་གཞས་ཚིག་ལྔ་བཅུ་ལྷག  ཁ་ཤགས་དང་གར་ཆུང་སོགས་ཆེད་བསྒྲིགས་སྒྲ་ཐག་གམ་འོད་འཁོར་བཅུ་གཅིག་ཙམ།  སྙན་ངག་གི་དེབ་ཆུང་གཅིག་བཅས་པར་སྐྲུན་འགྲེམ་སྤེལ་བྱས་ཡོད་ལ། དེ་མིན་རླུང་འཕྲིན་ལས་འཁྲབ་བརྗོད་བརྩམས་ཆོས་དྲུག་ཅུ་ལྷག་དང་། གློག་བརྙན་འཕྲིན་བོད་འགྱུར་མ་སྟོང་ཕྲག་ལ་ཉེ་བ། རྩོམ་སྒྲིག་བྱས་པའི་སྒྲ་བརྙན་ཐག་དང་འོད་འཁོར་སྐོར་གཅིག་བཅས་ནི་ལྟོ་རྒྱབ་ཀྱི་དོན་དུ་མ་ལས་ན་མི་ཆོག་པའི་གཞུང་ལས་སུ་གཏོགས། གཞུང་ལས་ཀྱི་ཞོར་དུ་ད་ལྟ་ད་དུང་སྙན་ངག་དང་འབོལ་རྩོམ། བཞད་གད་ཟློས་གར། གཞས་ཚིག་བཅས་གསར་རྩོམ་གྱི་རྒྱུན་སྐྱོང་གིན་ཡོད། འོ། རེད། ང་གནས་སྐབས་སུ་མཚོ་སྔོན་མི་རིགས་གློག་བརྙན་འཕྲིན་སྒྱུར་སྐྲུན་ལྟེ་གནས་སུ་གློག་བརྙན་འཕྲིན་བོད་འགྱུར་མ་དག་བཤེར་གྱི་ལས་སྒོ་གཉེར་བཞིན་ཡོད། ང་རང་དང་ཐོག་ལས་ཁུངས་འདིའི་གློག་བརྙན་སྐད་སྦྱོར་པ་ཞིག་ཏུ་གྱུར་པ་དང་དེ་ནས་བཟུང་སྟེ་ངའི་སྒྱུ་རྩལ་དང་རྩོམ་རིག་གི་ལས་ཀ་འགོ་ཚུགས་སོང་། 
༢ ཁྱོད་རང་གིས་དང་པོ་ཁ་ཤགས་བཤད་རྒྱུའི་གོ་སྐབས་གང་ནས་རག་པ་དང་ཁ་ཤགས་ཅི་ཞིག་བཤད་པ་ཡིན།
　སྨན་བླ་སྐྱབས། ཁ་ཤགས་ཐོག་མ་དེ་མཚོ་སྔོན་བོད་སྐད་རླུང་འཕྲིན་ལས་བཤད་པ་ཡིན། དེ་དུས་བོད་ལ་བརྙན་འཕྲིན་སོགས་བརྒྱུད་ལམ་གཞན་དག་ཡོད་པ་མ་རེད་ལ་རླུང་འཕྲིན་གྱི་དགོང་ཚོགས་ལ་ཞུགས་མཁན་ཡང་ལས་ཁུངས་ནང་གི་ལས་མི་རྐྱང་རྐྱང་ཡིན། སྐབས་དེར་ངའི་དགེ་རྒན་རྡོ་རྗེ་རིན་ཆེན་ལགས་ནི་སྒྲུང་གཏམ་རྩོམ་པ་པོ་ཙམ་དུ་མ་ཟད། ཁོང་སྙན་སྒྲོན་པ་གྲགས་ཅན་ཕུར་བ་དང་མཉམ་དུ་ཁ་ཤགས་ཀྱང་འགའ་རེ་བཤད་མྱོང་ཡོད། དཔལ་དོན་གྲུབ་རྒྱལ་མཆོག་གིས་བརྩམས་ཤིང་ཁོང་རྣམ་པ་གཉིས་ཀས་བཤད་པའི་ཁ་ཤགས《བོད་ཀྱི་གཏམ་དཔེ》སོགས་དང་། སྒྲུང་གཏམ་འཁྲབ་རྗོད་པ་གྲགས་ཅན་ཆོས་མོ་མཚོ་ལགས་ནས་འཁྲབ་བརྗོད་གནང་བའི་སྒྲུང་རིང་འགས་ང་ལ་སློབ་གྲྭ་མ་ཐོན་གོང་ནས་བག་ཆགས་ཟབ་མོ་བཞག་ཡོད་སྟབས། ངས་རྒན་ལགས་ཀྱི་བཀའ་ཟློག་མ་ནུས་པར་བྲིས་པའི་ཁ་ཤགས་ཐོག་མ་དེའི་མིང་ལ《སྒྱུ་རྩལ་པ》ཟེར་གྱི་ཡོད་ལ་རྒན་ཆོས་མོ་མཚོ་ལགས་ནས་གདེང་འཇོག་མི་དམན་པ་གནང་སོང་། དེ་ལྟར་ཁོང་ཚོས་ང་རང་ལམ་ཁ་དེར་བཙན་གྱིས་བརྫངས་པ་རེད། རིམ་བཞིན་ངའི་བརྩམས་ཆོས་དེའི་ཁ་བྱང་ནི་ང་རང་གི་ཚབ་མིང་དང་ཆོ་ལོ་གཉིས་ཀར་གྱུར་སོང་།
༣ ཁ་ཤགས་བཤད་མཁན་ཞིག་ལ་མཚོན་ན་ཁ་ཤགས་བརྩམས་ཆོས་ཡག་པོ་ཞིག་རག་རྒྱུ་ནི་གལ་ཆེན་པོ་ཡིན་རྒྱུ་རེད། ཁྱོད་ལ་མཚོན་ན་ཁ་ཤགས་བརྩམས་ཆོས་མ་རག་པའི་དཀའ་ངལ་ཡོད་དམ། ད་དུང་ཁ་ཤགས་བཤད་གྲོགས།
　སྨན་བླ་སྐྱབས། ངའི་ཁ་ཤགས་དང་གར་ཆུང་ཕལ་ཆེ་བ་ང་རང་གིས་བྲིས་པ་ཤ་སྟག་ཡིན། དང་ཐོག་མི་གཞན་དང་མཉམ་འབྲེལ་གྱིས་བྲིས་པའི་ཁ་ཤགས་གཅིག་གཉིས་རེ་ཡོད་ཀྱང་། རྒྱ་ནག་དང་ལྷ་སའི་ཁ་ཤགས་བཤད་མཁན་ཚོ་ལྟར་རྩོམ་མཁན་དང་བཤད་མཁན་སོ་སོ་མ་ཡིན་པ་འདི་ཅུང་དམིགས་བསལ་རེད་སྙམ། དེའི་ཕྱིར་ཁ་ཤགས་བརྩམས་ཆོས་རག་དང་མ་རག་གི་སྐད་ཆར་ལན་གདབ་རྒྱུ་མི་འདུག འོན་ཀྱང་ཁ་ཤགས་དང་གར་ཆུང་བཤད་གྲོགས་དང་འཁྲབ་རོགས་ཀྱི་ཐད་ནས་ནམ་རྒྱུན་དཀའ་ངལ་འབྱུང་། སྐབས་འགར་གསར་རྙེད་འཁྲབ་སྟོན་པའི་ལྷན་སྐྱེས་ཀྱི་ཆ་རྐྱེན་དང་བསྟུན་ནས་འཁྲབ་གཞུང་འབྲི་དགོས་འབྱུང་བའི་དུས་ཀྱང་ཐེངས་མང་པོར་བྱུང་སོང་།
༤ རྟ་རྫི་ཞེས་པའི་ཁ་ཤགས་བཞད་གར་དེའི་རྒྱབ་ལྗོངས་བཤད་ན་འགྲིག་གམ།
　སྨན་བླ་སྐྱབས། གསལ་བཤད་ཞུ་དགོས་པ་ཞིག་ལ། 《གེ་སར་རྟ་རྫི》སོགས་ནི་གར་ཆུང་ངམ་བཞད་གད་ཟློས་གར་ཡིན་པ་ལས་ཁ་ཤགས་མིན། དེ་གཉིས་རྩ་བའི་ཆ་ནས་གཏམ་གྱི་སྒྱུ་རྩལ་ཡིན་པ་དང་། བཞད་གད་ཀྱི་སྒྱུ་རྩལ་ཡིན་པ་དང་། ཟུར་ཟའི་སྒྱུ་རྩལ་ཡིན་པ་འདྲ་སའམ་ཉེ་ས་ཡོད་ན་ཡང་། སྒྱུ་རྩལ་གྱི་རྣམ་པའི་ཆ་ནས་སོ་སོའི་མཚོན་སྟངས་ཀྱི་ལྗིད་ཤུགས་འགེལ་ས་ཐ་དད་པར་མ་ཟད། ནང་དོན་གྱི་ཆ་ནས་བསྡུས་བརྗོད་ཀྱི་ཤོང་ཚད་ཀྱང་བསྡུར་ཐབས་ཡོད་པ་མ་རེད། སྒྱུ་རྩལ་གྱི་རྣམ་པའི་འབྱུང་ཡུལ་དང་ཁུངས་གཏུགས་ས་ཡང་ཤར་དང་ནུབ་རེད། དེའི་ཕྱིར། ངས་བོད་རང་གི་ཁ་ཤགས་ཟེར་བའི་རང་སྐྱ་ཐུབ་ཙམ་ཞིག་རྣམ་པ་རྐྱང་བཤད་ནས་ཚོགས་བཤད་ཀྱི་བར་དུ་ལག་ལེན་བྱས་ཚར་བའི་མུར་རང་དང་རང་གི་རིགས་ཀྱི་གནས་བབ་སྒྱུ་རྩལ་གྱིས་མཚོན་པར་གར་ཆུང་ཞེས་པའི་རྣམ་པ་འདི་ལས་འཚམ་པོ་ཞིག་རྙེད་མ་སོང་། 《གེ་སར་རྟ་རྫི》 ཡི་ལེའུ་ཡང་དེ་ལས་མ་འདས། གཏམ་གྱི་གདོང་རིས་ཙམ་དེད་པས་ཀྱང་དུས་དབང་གི་ཉེར་འཚེ་དང་རིག་གནས་ཀྱི་གདོང་གཏུག རང་གཞན་གྱི་སོ་མཚམས་དང་ཆག་སྡང་གི་ས་བོན། ཡ་བྲལ་གྱི་ལྕེ་དང་མི་སེམས་ཀྱི་འོད་སོགས་དེ་ག་ཙམ་རེ་སུས་ཀྱང་མཐོང་ཆོག་ཆོག་ཡིན། གནས་སྐབས་སུ་བློ་རབ་འབྲིང་ཐ་གསུམ་པོས་རང་རང་གིས་ལོན་ཚད་རེ་བླང་ན་ཅི་དགའ། རྒྱབ་ལྗོངས་ནི་རིག་པས་དཔྱད་ན་ཤེས་སླ་པོ་ཡིན།