༄༅།།སྤྱི་ཟླ་༤པའི་ཚེས༡ཉིན་ནས་བཟུང་བོད་ལྗོངས་ཀྱི་གནམ་གྲུ་ཐང་ཚང་མར་བདེ་འཇགས་བརྟག་དཔྱད་ཐེངས་གཉིས་པ་མེད་པར་བཟོ་རྒྱུ་རེད།

         སྤྱི་ཚེས༣༠ཉིན། གསར་འགོད་པས་ཀྲུང་གོའི་དམངས་སྤྱོད་མཁའ་འགྲུལ་བོད་ལྗོངས་དོ་དམ་ཅུས་ནས་ཤེས་རྟོགས་བྱུང་བ་ལྟར་ན། དཔྱིད་དུས་ཀྱི་འགྲུལ་པ་སྐྱེལ་བསུའི་ལས་དོན་མཇུག་བསྒྲིལ་ནས་ཟླ་ཕྱེད་ཙམ་ཕྱིན་ཡོད་ཅིང་། ལྷ་སའི་གོང་དཀར་གནམ་གྲུ་ཐང་དང་། ཉིང་ཁྲིའི་སྨིན་གླིང་གནམ་གྲུ་ཐང་། ཆབ་མདོ་སྤང་མདའ་གནམ་གྲུ་ཐང་བཅས་སུ་སྤྱི་ཟླ༤པའི་ཚེས༡ཉིན་ནས་བཟུང་བདེ་འཇགས་ཐད་བརྟག་དཔྱད་ཐེངས་གཉིས་པ་བྱ་རྒྱུ་མེད་པར་བཟོས་ཏེ། འགྲུལ་པ་རྣམས་ལ་གནམ་གྲུར་སྡོད་པ་དང་འབྲེལ་ཡོད་འགྲོ་ལུགས་གཞན་དག་བསྒྲུབ་པའི་དུས་ཚོད་མང་ཙམ་སྤྲོད་རྒྱུ་ཡིན་པ་རེད།

       གཞན་ཡང་། ཀྲུང་གོའི་དམངས་སྤྱོད་མཁའ་འགྲུལ་བོད་ལྗོངས་དོ་དམ་ཅུས་ཀྱིས་བོད་ནས་ཕྱིར་ཐོན་མཁན་གྱི་འགྲུལ་པ་རྣམས་ལ་དྲན་སྐུལ་ཞུས་ཡོད་པ་ནི།   བདེ་འཇགས་ཐད་བརྟག་དཔྱད་བྱེད་ཐེངས་གཅིག་ཙམ་ཉུང་དུ་བཏང་ཡོད་ཀྱང་། རྒྱ་ཆེའི་འགྲུལ་པ་རྣམས་སྔོན་ཚུད་ནས་གནམ་གྲུ་ཐང་དུ་འབྱོར་བར་བྱས་ཏེ། དུས་ཐོག་ཏུ་གནམ་གྲུར་སྡོད་པར་ནོར་འཛོལ་མི་ཡོང་བ་བྱ་རྒྱུ་ཡིན་པ་དེའོ།