༄༅།།ད་ལོའི་ཟླ་བདུན་པའི་ནང་དུ་བོད་ལྗོངས་མངའ་རིས་དགུན་ས་གནམ་གྲུ་འབབ་ཐང་དངོས་སུ་ཤར་གཏོང་ཐུབ་རྒྱུ་ཡིན་པ།

      ཉིན་འགའི་སྔོན་ལ་གསར་འགོད་པས་དམངས་འགྲུལ་ཅུད་ཀྱི་བོད་ལྗོངས་ཡན་ལག་ཅུད་ནས་ཤེས་རྟོགས་བྱུང་བ་ལྟར་ན། མངའ་རིས་དགུན་ས་གནམ་གྲུ་འབབ་ཐང་ནི་བོད་ལྗོངས་ཀྱི་“ལོ་ལྔ་ཚན་བཅུ་གཅིག”གི་འཆར་འགོད་རྣམ་གྲངས་གཙོ་བོ་ཞིག་ཡིན་པའི་ཆ་ནས།  ད་ལྟ་ཨར་ལས་སྤྱིའི་འཕེལ་རིམ་གྱི་བརྒྱ་ཆའི༩༥ལེགས་འགྲུབ་བྱུང་ཡོད་ཅིང་།   ཟླ་བདུན་པའི་ནང་དུ་དངོས་སུ་ཤར་གཏོང་ཐུབ་རྒྱུ་ཡིན་པ་རེད།

       དམངས་འགྲུལ་ཅུད་བོད་ལྗོངས་ཡན་ལག་ཅུད་ཀྱི་ཅུད་ཀྲང་ཞི་པའོ་ཡིས་འདི་སྐད།   མངའ་རིས་དགུན་ས་གནམ་གྲུ་འབབ་ཐང་ལ་ཁྱོན་བསྡོམས་མ་དངུལ་སྒོར་དུང་ཕྱུར༡༧བཏང་ཡོད་ཅིང་། ༢༠༢༠ལོར་ཡུལ་སྐོར་བ་འཇུག་ལྡོག་བྱེད་ཚད་ཁྲི༡༢ལ་སླེབས་པ་དང་། ལོ་རེར་དངོས་འདྲེན་འཇུག་ལྡོག་བྱེད་ཚད་ཏུན་༣༥༠ལ་སླེབས་པའི་འདུན་པ་ཡོངས་སུ་སྐོང་བར་བྱེད་པའི་འཆར་འགོད་ཇི་བཞིན་འཛུགས་སྐྲུན་བྱེད་བཞིན་ཡོད། ལས་གཞི་དེ་༢༠༠༧ལོའི་ཟླ༥པའི་ནང་དུ་ལས་འགོ་ཚུགས་ཤིང་། འཛུགས་སྐྲུན་གྱི་བསྐྲུན་བྱ་གཙོ་བོ་དག་གཞི་རྩའི་སྟེང་ནས་ལེགས་འགྲུབ་བྱུང་ཡོད་པ་དང་། དེང་སྐབས་སྒྲིག་ཆས་ནང་འཇུག་སྙོམ་སྒྲིག་ཚོད་ལྟ་བྱེད་བཞིན་པའི་སྒང་ཡིན་ཞེས་གསུངས་པ་རེད།

མངའ་རིས་དགུན་ས་གནམ་གྲུ་འབབ་ཐང་ནི་རྒྱ་མཚོའི་ངོས་ལས་མཐོ་ཚད་ལ་སྨི༤༢༧༤ཡོད་པ་དང་།   རྒྱུག་ལམ་གྱི་རིང་ཚད་ལ་སྨི༤༥༠༠དང་ཞེང་ཚད་ལ་སྨི༤༥ཡོད།   རྒྱ་ཁྱོན་ལ་ངོས་སྙོམས་གྲུ་བཞི་མ་ཁྲི༥.༡ཡོད་པའི་གནམ་གྲུ་འབབ་ཐང་དེར་གནམ་གྲུ་བཞི་ཙམ་བཞག་ཆོག་པའི་ཇུས་འགོད་གནང་ཡོད་པ་རེད།