བསང་ཆུ་གནམ་གྲུ་ཐང་གི་རྨང་གཞི་འདིང་བའི་མཛད་སྒོ་དེ་བསང་ཆུ་རྫོང་ཨ་མཆོག་ཁུག་བསིལ་ཐང་སྡེ་བའི་ཉེ་འདབས་སུ་གཟབ་རྒྱས་ངང་སྤེལ།

  ཟླ 9 བའི་ཚེས7 ཉིན། ཀན་ལྷོ་ཁུལ་ཡོངས་ཀྱི་མི་དམིངས་མང་ཚོགས་ཀྱིས་དོ་སྣང་ཆེན་པོ་བྱེད་པའི་བསང་ཆུ་གནམ་གྲུ་ཐང་གི་རྨང་གཞི་འདིང་བའི་མཛད་སྒོ་དེ་ཀན་ལྷོ་བོད་རིགས་རང་སྐྱོང་ཁུལ་བསང་ཆུ་རྫོང་ཨ་མཆོག་ཁུག་བསིལ་ཐང་སྡེ་བའི་ཉེ་འདབས་སུ་གཟབ་རྒྱས་ངང་སྤེལ་བ་དང་། ཀན་སུའུ་ཞིང་ཆེན་ཏང་ཨུའི་ཧྲུའུ་ཅིའམ་ཞིང་ཆེན་དམངས་ཆེན་ རྒྱུན་ཨུ་ཁང་གི་ཀྲུའུ་རེན་ལུའུ་ཧའོ་མཛད་སྒོར་ཞུགས་ནས་ལས་འགོ་རྩོམ་པའི་བཀའ་བསྒྲགས་ཤིང་། ཀན་སུའུ་ཞིང་ཆེན་གྱི་ཏང་ཨུའི་ཧྲུའུ་ཅི་གཞོན་པའམ་ཞིང་ཆེན་སྲིད་གཞུང་གི་འགོ་གཙོ་ཚབ་མ་ལིའུ་ཝེ་ཕིན་སོགས་ཞིང་ཆེན་གྱི་འབྲེལ་ཡོད་འགོ་ཁྲིད་དང་། ཀན་ལྷོ་བོད་རིགས་རང་སྐྱོང་ཁུལ་གྱི་ཏང་སྲིད་དམག་གསུམ་གྱི་འགོ་ཁྲིད་པ་མཛད་སྒོར་ཞུགས་ཤིང་།ཀན་སུའུ་ཞིང་ཆེན་སྲིད་གཞུང་གི་འགོ་གཙོ་གཞོན་པ་ཧྲེ་ཅུན་གྱིས་མཛད་སྒོར་གཙོ་སྐྱོང་གནང་བ་དང་།ཀན་སུའུ་ཞིང་ཆེན་འགྲིམ་འགྲུལ་ཐིན་གྱི་ཐིན་ཀྲང་དབྱང་ཡུན་ཀྲུང་གིས་བསང་ཆུ་གནམ་གྲུ་ཐང་གི་བཟོ་སྐྲུན་ལས་གཞིའི་གནས་ཚུལ་མཚམས་སྦྱོར་མདོར་བསྡུས་བྱས་པ་དང་། ཀན་སུའུ་ཞིང་ཆེན་ཏང་ཨུའི་རྒྱུན་ཨུའམ་རྒྱུན་ལས་འགོ་གཙོ་གཞོན་པ་ཧྥུན་ཅན་ཧྲེན་གྱིས་ གཏམ་བཤད། ཀན་ལྷོ་ཁུལ་ཨུའི་ཧྲུའུ་ཅི་ཁྲེན་ཅན་ཧྭ་ཡིས་ཤིས་ཚིག་ཕུལ་བ་རེད།ཀན་ལྷོའི་བསང་ཆུ་གནམ་གྲུ་ཐང་ནི་རྒྱལ་ཁབ་ནུབ་བྱང་ས་ཁུལ་དང་ཀན་སུའུ་ཞིང་ཆེན་གྱི“ལོ་ལྔའི་འཆར་གཞི་ཨང་བཅུ་གཅིག་པའི”ནང་བཀོད་པའི་དམངས་སྤྱོད་གནམ་གྲུའི་འཕེལ་རྒྱས་འཆར་འགོད་ཀྱི་གནད་སའི་ལས་གཞི་ཞིག་ཡིན་ཞིང་། ལས་གཞི་འཛུགས་སྐྲུན་བྱས་པ་ལས་ཀན་ལྷོའི་གྲངས་ཉུང་མི་རིགས་ས་ཁུལ་ལ་དམངས་སྤྱོད་གནམ་གྲུ་ཐང་མེད་པའི་ལོ་རྒྱུས་བསྒྱུར་རྒྱུ་མ་ཟད། ད་དུང་ཀན་ལྷོ་ཁུལ་གྱིས་གཞུང་ལམ་གཅིག་པུར་བརྟེན་ནས་སྐྱེལ་འདྲེན་འགྲོ་འོང་བྱེད་པའི་རྣམ་པའང་བསྒྱུར་རྒྱུ་རེད།བསང་ཆུ་གནམ་གྲུ་ཐང་གི་ལས་གཞིའི་སྤྱིའི་དངུལ་གཏོང་སྒོར་ཁྲི72000ཡིན་ཞིང་། བསང་ཆུ་རྫོང་དང་གཙོས་གྲོང་ཁྱེར་སོ་སོར་བར་ཐག་སྤྱི་ལེ 72 དང་སྤྱི་ལེ 56 ཡོད་པ། འཛུགས་སྐྲུན་གཞི་ཁྱོན་དེ་འཕུར་སྐྱོད་ས་ཁུལ c4 ཡི་ཚད་གཞི་ལྟར། རིང་ཚད་སྨི3200 ཡི་རྒྱུག་ལམ་འཛུགས་སྐྲུན་བྱེད་རྒྱུ་དང་། 2020 ལོར་ཡུལ་སྐོར་བ་མི་ཐེངས་ཁྲི14ནང་འདྲེན་ཕྱིར་གཏོང་བྱེད་པའི་ཚད་གཞི་དང་།ཡུལ་སྐོར་བ་དང་དངོས་པོ་ཏུན560ཐེག་པའི་ཚད་གཞི་ལྟར་འཛུགས་སྐྲུན་བྱེད་རྒྱུ།འཕྲིན་གཏོང་དང་ཕྱོགས་སྟོན། གནམ་གཤིས། གློག་འདོན། ཆུ་འདོན། སྣུམ་འདོན། མེ་གསོད་རོགས་སྐྱོར་སོགས་གཞོགས་འདེགས་ཐོན་སྐྱེད་སྒྲིག་ཆས་སྡེབ་སྒྲིག་བྱེད་རྒྱུ་དང་།ལས་གཞི་ལ་ས་ཞིང་མུའུ 2600མཁོ་བ་རེད། འཛུགས་སྐྲུན་བྱས་རྗེས་སུ་པུ་དབྱིན737 དང་ཁུང་ཁོ319 དབྱིབས་ཅན་གྱི་གནམ་གྲུ་འབབ་འཕུར་གྱི་དགོས་མཁོ་བསྐང་ཐུབ་པ་རེད།བསང་ཆུ་གནམ་གྲུ་ཐང་བཀོལ་སྤྱོད་བྱས་རྗེས།དམངས་སྤྱོད་མཁའ་འགྲུལ་ཅུས་ཀྱིས་ལས་རིགས་དོ་དམ་བྱ་རྒྱུ་དང་ས་གནས་ཀྱིས་ཚོང་གཉེར་དོ་དམ་གྱི་འགན་ཁུར་རྒྱུ། ཚོང་གཉེར་ཁྱབ་ཁོངས་དེ་ཀན་ལྷོ་ཁུལ་དང་ལིན་ཞྭ་ཁུལ་བཅས་ཀྱི་གྲངས་ཉུང་མི་རིགས་ས་ཁུལ་ལ་ཁེབས་པ་དང་།བསང་ཆུ་གནམ་གྲུ་ཐང་འཛུགས་སྐྲུན་བྱེད་ན་ནུས་པ་ལྡན་པའི་སྒོ་ནས་ཀན་སུའུ་ཞིང་ཆེན་གྱི་ལྷོ་ཕྱོགས་ས་ཁུལ་གྱི་དམངས་སྤྱོད་མཁའ་འགྲུལ་སྐྱེལ་འདྲེན་གྱི་སྟོང་ཆ་བསྐང་ཐུབ་པའོ།