༄༅།།ལོ་ངོ་སུམ་ཅུའི་འཕེལ་རྒྱས་ལས་ཚེར་སྨད་གྲོང་དུ་ཤེས་དཔལ་མེ་ཏོག་བཞད།
སྤེལ་དུས 2008-12-19
ཡོང་ཁུངས། 《བོད་ལྗོངས་ཉིན་རེའི་ཚགས་པར》
རྩོམ་པ་པོ། འབྲུག་མོས་ཞུ་དག་བྱས།
ལྷོ་བྲག་གྲོང་རྡལ་ཚེར་སྨད་གྲོང་ཚོ་ནི་ལྷ་བྲག་རྫོང་གི་ལྷོ་ངོས་སུ་གནས་པའི་དབུལ་པོའི་གྲོང་ཞིག་ཡིན་ཞིང་། དེ་གར་ཁྱོན་དུད་ཚང་༥༢དང་མི་གྲངས༢༢༤ལས་མེད་རུང་ཡུལ་མི༤༠‰ནི་ལོ་རབས་ལྔ་བཅུའི་ནང་ཡུལ་གྱར་གཞིས་ཆགས་ཀྱི་སྤྲང་འཁྱམས་དུ་འགྲོ་མཁན་ཤ་སྟག་ཡིན། སྒྱུར་བཅོས་སྒོ་དབྱེ་མ་བྱས་གོང་གྲོང་དེའི་མང་ཚོགས་རྣམས་ཀྱི་བསམ་བློ་སྔར་བཞིན་རྙིང་ཞེན་བག་ཁུམ་གྱི་གནས་སུ་ལྷུངས་ནས་ཉིན་རེའི་ལྟོ་གྲོད་པ་རྒྱགས་ཙམ་བྱུང་ན་འགྲིག་སྙམ་པའི་རྗེས་ལུས་ཀྱི་བསམ་པ་ཤུགས་ཆེན་པོ་གནས་སྟབས་དབུལ་ཞིང་ཕོངས་པའི་ཁར། ཉིན་མོ་གང་འཁྱོལ་དང་། ཕན་ཚུན་གང་བྱུང་དུ་རྡུང་རེས་གཏོང་བ། རྐུ་མ་བརྐུ་བ་སོགས་ཀྱི་གནས་ཚུལ་རྒྱུན་དུ་ཐོན་གྱི་ཡོད། དེ་ལྟར་ན་རྣམ་ཀུན་ཕྱི་མི་ཚོ་འཁྱམ་མིའི་གྲོང་ཚོ་དེར་ཡོང་མི་ནུས་པར་ཕྱོགས་གཞན་ནས་བསྐོར་འགྲོ་གི་ཡོད་པ་རེད། ༡༩༧༨ལོའི་གོང་དུ་གྲོང་དེའི་མི་རེའི་ཆ་སྙོམས་ཡོང་འབབ་སྒོར༥༠ཡང་མ་ཟིན་པར་ད་དུང་དུད་ཚང་མི་ཉུང་བ་ཞིག་རྒྱལ་ཁབ་ཀྱི་སྐྱོབ་གསོར་བརྟེན་དགོས་ཀྱི་ཡོད།
ཏང་གི་ཀྲུང་ཨུ་ཚང་འཛོམས་གྲོས་ཚོགས་ཐེངས་གསུམ་པ་འཚོགས་ནས་སྒྱུར་བཅོས་སྒོ་དབྱེ་བྱེད་འགོ་ཚུགས་རྗེས་ཏང་གི་ཡང་དག་སྲིད་ཇུས་བཟང་པོའི་དྲིན་ལས་རི་སྟེང་ལུང་ཤུར་དུ་གནས་པའི་ཚེར་སྨད་གྲོང་ཚོའི་མང་ཚོགས་རྣམས་རྨོངས་གཉིད་ལས་སད་པ་དང་གྲོང་མི་ཨུ་ཡོན་ལྷན་ཁང་གི་འགོ་ཁྲིད་དང་ཏང་ཡོན་དཔུང་ཁག་གིས་སྣེ་ཁྲིད་ཀྱི་ནུས་པ་འདོན་སྤེལ་ཧུར་ཐག་བྱས་ཏེ་མང་ཚོགས་ཚོ་སྐུལ་སློང་གིས་དབུལ་བཅོས་ཕྱུག་འགྱུར་ཧུར་ཐག་བྱས་རྐྱེན་ཞིང་ལས་ཐོན་འབབ་འཕར་བ་དང་དངུལ་སྨར་ཡོང་འབབ་འཕར་ཏེ་ཡང་དག་པའི་ལྟོ་གོས་ཀྱི་འཚོ་བ་སྐྱེལ་འགོ་ཚུགས། ལྷག་པར་དུ། ༡༩༧༨ལོའི་སྐབས་སུ་མི་རེའི་ཆ་སྙོམས་ཡོང་འབབ་སྒོར༥༠ལས་མེད་པ་དེ༢༠༠༧ལོར་མི་རེའི་ཆ་སྙོམས་ཡོང་འབབ་སྒོར༢༨༡༧ཟིན་པ་དང་གྲོང་མི་ཨུ་ལྷན་གྱི་གཏན་འཇགས་རྒྱུ་ནོར་སྒོར་ཁྲི༩༥ཟིན་ནས་དེ་སྔ་གང་སར་སྐད་གྲགས་ཆོད་པའི་དབུལ་བོ་དང་། རྗེས་ལུས། ཟང་ཟིང་བཅས་ཡིན་པའི་གྲོང་མི་ཨུ་ལྷན་དེ་ད་ཆ་རང་ལྗོངས་ཀྱི་མདུན་གྲལ་དུ་སྐྱོང་བཞིན་ཡོད་པ་མ་ཟད། ད་དུང་ཉེ་བའི་ལོ་ཤས་ནང་སྔ་རྗེས་སུ་རང་སྐྱོང་ལྗོངས་ཀྱི་སྔོན་ཐོན་གྲོང་མིའི་དཔེ་མཚོན་དང་སྔོན་ཐོན་གཞོན་ནུ་སྡེ་ཚོགས་ཚན་པ་སོགས་ལྗོངས་དང་ས་ཁུལ་རིམ་པའི་མཚན་སྙན་ཁག་ལྔ་ཐོབ་མྱོང་བའི་གྲོང་ཚོ་ཞིག་ཏུ་གྱུར། མིག་སྔར་བསྔགས་བརྗོད་ཀྱི་མེ་ཏོག་གང་སར་ཁྱབ་པའི་གྲོང་ལྷན་དེའི་མཚན་སྙན་ལ་དམིགས་ཏེ་འཕྲིན་སྤེལ་བས༢༠༠༡ལོར་ལྗོངས་རིམ་པའི་ངལ་རྩོལ་དཔེ་བཟང་བ་དང་། ༢༠༠༥ལོར་རྒྱལ་ཁབ་རིམ་པའི་ངལ་རྩོལ་དཔེ་བཟང་བ། གྲོང་ལྷན་དེའི་ཀྲུའུ་རེན་བཅས་ཡིན་པའི་དབང་འདུས་ལགས་ལ་ལོ་ངོ་སུམ་ཅུའི་འཕེལ་རྒྱས་ཀྱི་བརྒྱུད་རིམ་ཙམ་ཞིག་ངོ་སྤྲོད་གནང་རོགས་ཞུས་པ་ལྟར་ཁོང་གིས་སྦ་གསང་མེད་པར་གསུངས་བྱུང་།
ཐོན་ཁུངས་ལེགས་ཆར་བརྟེན་ནས་འཕེལ་རྒྱས་ཀྱི་སྒོ་མོ་ཕྱེ་བ།
ཚེར་སྨད་གྲོང་མི་ཨུ་ཡོན་ལྷན་ཁང་གིས་ཞིང་འབྲོག་མང་ཚོགས་ལ་འབབ་འཕར་ཡོང་བ་བྱ་རྒྱུ་དེ་དམངས་རྣམས་འབྱོར་འབྲིང་ཕྱོགས་སུ་སྐྱོད་པའི་ལས་དོན་ཨང་དང་པོར་བརྩིས་ནས་ཡུལ་གྱི་ཐོན་ཁུངས་ལེགས་ཆར་བརྟེན་པ་དང་། ངལ་རྩོལ་ནུས་ཤུགས་ཕྱིར་གཏོང་ལ་ཤུགས་སྣོན་རྒྱག་པ། ཞིང་འབྲོག་པར་ལག་རྩལ་གྱི་རྩལ་ནུས་སྦྱོང་བརྡར་སྤྲོས་རྒྱུ་བཅས་ལ་དམ་འཛིན་ལྷོད་མེད་བྱས་ཤིང་། དེ་ཡང་ཐོག་མར་རྡོ་གཤག་གི་ཐོན་ཁུངས་ལེགས་ཆར་བརྟེན་ནས་ཏང་ཡོན་གྱིས་སྣེ་ཁྲིད་པའི་རྡོ་གཤག་རུ་ཁག་གཅིག་བཙུགས་ཏེ་དེའི་ནང་ཞུགས་མཁན་ལག་རྩལ་མཐོ་བའི་ལས་མི་རེར་ལོ་གཅིག་ལ་དངུལ་སྨར་ཡོང་འབབ་སྒོར་༩༠༠ཡན་ཟིན་ཡོད། ས་ཁུལ་དང་རང་སྐྱོང་ལྗོངས་རིམ་པའི་ཆོག་མཆན་ཐོབ་པ་བརྒྱུད་གཞོན་ནུ་སྡེ་ཚོགས་ཀྱིས་གཙོ་བོར་བྱེད་པའི་ཞིང་འབྲོག་པའི་དོན་གྲུབ་ཨར་ལས་རུ་ཁག་དེ་༢༠༠༦ལོར་དངོས་སུ་བཙུགས་པ་དེས་གྲོང་ལྷན་དེའི་ངལ་རྩོལ་ནུས་ཤུགས་ལྷག་མ་རྣམས་ཀྱི་ལས་ཞུགས་གནད་དོན་ཐག་གཅོད་བྱུང་ཚད༩༧‰ཟིན་པ་རེད། ཞིང་ལས་དང་འབྲོག་ལས་གོང་འཕེལ་གཏོང་རྒྱུ་དེ་ཚན་རྩལ་འཕེལ་རྒྱས་ལ་བརྟེན་ནས་སྣེ་མང་གཉེར་སྐྱོང་གོང་འཕེལ་གཏོང་བའི་ལམ་སྲོལ་སྟེང་སྐྱོད་པར་བརྟེན་དེ་སྔོན་འབྲུ་དང་པད་ཁ་རང་ཁ་རང་གསོ་མི་ཐུབ་པ་ནས་ད་ཆ་རང་ཉིད་ལ་ལོངས་སུ་སྤྱོད་རྒྱུ་ཡོད་པ་ཕུད། ད་དུང་ཁྲོམ་རའི་ཐོག་ཕྱིར་ཚོང་བྱེད་ཐུབ་པའི་ཐད་འཕེལ་རྒྱས་ཆེན་པོ་བྱུང་ཡོད་པ་རེད།
འཕྲུལ་ཕུགས་གཉིས་ལ་ཕན་པའི་བདེ་སྡོད་ལས་གྲྭའི་འཆར་འགོད་ལེགས་པར་བརྩམས་པ།
སྒྱུར་བཅོས་སྒོ་དབྱེའི་ལག་ལེན་དངོས་ནང་ཐོན་པའི་སྤྱི་ཚོགས་རིང་ལུགས་ཀྱི་གྲོང་གསེབ་གསར་པ་འཛུགས་སྐྲུན་བྱེད་པའི་མཛད་ཕྱོགས་སྲིད་ཇུས་ནི་ཡང་དག་པ་ཞིག་དང་། དུས་སུ་བབ་པ་ཞིག གནད་དུ་འཁེལ་བ་ཞིག་བཅས་རང་རེད། 2006ལོ་ནས་གྲོང་གསེབ་གསར་པའི་བདེ་འཁོད་ལས་གྲྭ་འཛུགས་སྐྲུན་བྱས་པ་ནས་བཟུང་ཞིང་འབྲོག་མང་ཚོགས༨༠‰ཡན་སྡོད་ཁང་གསར་པའི་ནང་སྤོས་ཟིན་པ་དང་དེ་འཕྲོས་རྣམས་ད་ཆ་སྡོད་ཁང་གསར་པ་རྒྱག་པའི་ལས་ལ་བྲེལ་བཞིན་ཡོད། ཀྲུའུ་རེན་དབང་འདུས་ལགས་ཀྱིས་འགོ་ཁྲིད་ལས་བྱེད་པ་ཞིག་གི་ངོས་ནས་བརྗོད་ན། མང་ཚོགས་ཀྱི་དགོས་མཁོ་ཆེ་ཤོས་དང་སེམས་ཁྲལ་ཆེ་ཤོས་བྱེད་པའི་དོན་དག་དེ་དག་ཡག་པོ་སྒྲུབ་མི་ཐུབ་ཚེ་དམངས་དོན་དུ་སྲིད་སྐྱོང་རྒྱུ་དང་སྤྱི་ཚོགས་རིང་ལུགས་ཀྱི་གྲོང་གསེབ་པ་འཛུགས་སྐྲུན་བྱ་རྒྱུ་ཟེར་བ་ནི་སྟོང་གཏམ་ཞིག་རང་རེད། ཚེར་སྨད་གྲོང་ལྷན་གྱིས་ལོ་ངོ་སུམ་ཅུའི་ནང་སྒྲུབ་པའི་ལས་དོན་ལ་ཐོབ་པའི་གྲུབ་འབྲས་དེ་དག་ནི་དུས་རབས་གསར་པའི་ལས་འགན་དང་། སྤྱི་ཚོགས་རིང་ལུགས་ཀྱི་གྲོང་གསེབ་གསར་པ་འཛུགས་སྐྲུན་བྱེད་པའི་སྲིད་ཇུས་དང་ཡོངས་སུ་མཐུན་པ་ཞིག་ཡིན་པ་གསལ་བཤད་གང་ལེགས་ཐུབ་པ་བྱུང་ཡོད་ཅེས་གསུངས་བྱུང་།
ཞིང་འབྲོག་མང་ཚོགས་ཀྱི་འཚོ་བར་མཁོ་ཆེ་བའི་རྨང་གཞིའི་སྒྲིག་བཀོད་འཛུགས་སྐྲུན་ལེགས་པོ་བྱས་པ།
ལོ་ངོ་སུམ་ཅུའི་ནང་གྲོང་ལྷན་དེས་འཕྲལ་ཕུགས་གཉིས་ཀར་ཕན་པའི་རྨང་གཞིའི་སྒྲིག་བཀོད་ལས་གྲྭ་འཛུགས་སྐྲུན་བྱེད་པའི་ནང་དམངས་ཀྱི་འཚོ་བ་དང་ཁ་མི་བྲལ་བ་བྱེད་རྒྱུ་གཙོ་བོར་བཟུང་སྟེ་འཐུང་ཆུ་དང་། གློག་བརྙན་རླུང་འཕྲིན་བརྙན་འཕྲིན། ཁ་པར་བཅས་ཤར་གཏོང་ཐུབ་ཚད༡༠༠‰ཟིན་པ་རེད། ལྷག་པར་དུ་ཚེར་སྨད་གྲོང་ཚོའི་ཞིང་འབྲོག་མང་ཚོགས་ཚོ་ད་ཆ་དཀར་ཆ་དོད་ལ་གུ་ཡངས་པའི་སྡོད་ཁང་གསར་པའི་ནང་དགའ་སྐྱིད་དཔལ་ལ་རོལ་བའི་འཚོ་བ་གསར་པ་དང་། འཕེལ་རྒྱས་གསར་པ། འགྱུར་ལྡོག་གསར་པ་བཅས་མྱོང་སྤྱོད་བྱེད་བཞིན་ཡོད་པ་རེད། གྲོང་ཚོ་དེའི་མང་ཚོགས་ཚོས་མྱོང་ཚོར་ཆེན་པོ་ལྡན་པའི་ངང་ད་ལྟའི་བདེ་སྐྱིད་འཚོ་བར་མིག་འབྲས་ལྟར་གཅེས་འཛིན་གྱིས་ཁ་ཕྲལ་ལ་ངོ་རྒོལ་དང་། དུས་བབ་བརྟན་ལྷིང་། གོང་འཕེལ་ལ་སྐུལ་འདེད། མེས་རྒྱལ་གོང་བུ་གཅིག་གྱུར་དང་མི་རིགས་མཐུན་སྒྲིལ་ལ་སྲུང་སྐྱོང་ཧུར་ཐག་བཅས་བྱེད་བཞིན་ཡོད་པ་རེད།
