༄༅།།ལོ་ངོ་༣༠རིང་གི་བོད་ལྗོངས་ཀྱི་སྤྱི་ལ་དབང་བ་མིན་པའི་ལམ་ལུགས་ཀྱི་དཔལ་འབྱོར་བྱ་གཞག
སྤེལ་དུས 2008-12-23
ཡོང་ཁུངས། ཀྲུང་གོའི་བོད་ལྗོངས་ཆ་འཕྲིན་ལྟེ་གནས
རྩོམ་པ་པོ། ལྷག་ཚེས་བསྒྱུར། ཟླ་གཞོན་ནས་ཞུས།
པར་རིས་འདི་ནི་བོད་ལྗོངས་ཀྱི་ཏང་ཕྱིའི་མི་སྣས་ཏང་གི་སྐབས་བཅུ་གཅིག་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་གསུམ་པ་ཚོགས་ནས་ལོ་ངོ་༣༠འཁོར་བར་དྲན་གསོ་ཞུ་བའི་བཞུགས་མོལ་ཚོགས་འདུ་ཞིག་སྐོང་ཚོགས་གནང་བཞིན་པའི་གནས་ཚུལ་ཡིན།
པར་རིས་འདི་ནི་བཞུགས་མོལ་ཚོགས་འདུར་ཞུགས་ཡོད་པའི་ཏང་ཕྱིའི་ལས་རིགས་ཁག་གི་འཐུས་མི་ཡིན།
ཉེ་དུས་གསར་འགོད་པས་བོད་ལྗོངས་ཀྱི་ཏང་ཕྱིའི་མི་སྣས་བསྒྱུར་བཅོས་སྒོ་དབྱེ་བྱས་ནས་ལོ་ངོ་༣༠འཁོར་བར་དྲན་གསོ་ཞུ་བའི་བཞུགས་མོལ་ཚོགས་འདུའི་ཐོག་ནས་ཤེས་རྟོགས་བྱུང་བར། ལོ་ངོ་སུམ་ཅུའི་རིང་དུ་བོད་ལྗོངས་འདི་ཉིད་ཀྱི་སྤྱི་ལ་དབང་བ་མིན་པའི་ལམ་ལུགས་ཀྱི་དཔལ་འབྱོར་ལས་དོན་དེ་མེད་པ་ནས་ཡོད་པ་དང་། ཉམས་ཞན་ནས་སྟོབས་ཆེར་འཕེལ་བའི་ལས་དོན་གྱི་གྲུབ་འབྲས་ལེགས་པོ་ཐོན་ཐུབ་པ་བྱུང་ནས། བོད་ལྗོངས་འདི་ཉིད་ཀྱི་སྤྱི་ལ་དབང་བ་མིན་པའི་ལམ་ལུགས་ཀྱི་དཔལ་འབྱོར་དེ་བོད་ལྗོངས་ཀྱི་དཔལ་འབྱོར་དང་སྤྱི་ཚོགས་འཕེལ་རྒྱས་གཏོང་བའི་སྟོབས་ཤུགས་གལ་ཆེན་ཞིག་ཏུ་གྱུར་ཡོད་པ་རེད། བོད་ལྗོངས་འདི་ཉིད་ཀྱི་སྒེར་གཉེར་ཁེ་ལས་ཀྱི་གྲངས་ཚད་དང་། མ་རྩ་ཐོ་འགོད་བྱེད་ཚད། ལས་མིའི་ཁ་གྲངས་བཅས་སོ་སོ་ཆ་སྙོམས་ལོ་རེར་བརྒྱ་ཆའི༦༠ཡན་འཕར་སྣོན་འགྲོ་བཞིན་ཡོད་པ་རེད།
༢༠༠༧ལོའི་ལོ་མཇུག་བར་དུ། བོད་རང་སྐྱོང་ལྗོངས་སུ་བཟོ་ཚོང་དུད་ཁྱིམ་རྐྱང་པ་ཁྲི༧.༧༦ཡོད་པ་དེ་དག་གིས་མ་རྩ་ཐོ་འགོད་བྱས་ཚད་དངུལ་དུང་ཕྱུར་༡༨.༦ཟིན་པ་དང་། སྒེར་གཉེར་ཁེ་ལས་༤༢༣༦ཡོད་པ་དེ་དག་གིས་མ་རྩ་ཐོ་འགོད་བྱས་ཚད་་དངུལ་དུང་ཕྱུར་༡༣༩.༦ཟིན་པ་བཅས་བྱུང་ནས། ལས་རིགས་དེ་དག་ནི་ཞིང་འབྲོག་དང་གྲོང་བརྡལ་གྱི་གཞོན་ནུ་ཚོའི་ལས་ཀ་བྱེད་ས་དང་། ངལ་ནུས་ཀྱི་ཡོང་འབབ་ལེན་སའི་གལ་ཆེའི་ཐབས་ལམ་བཟང་པོ་ཞིག་ཏུ་ཆགས་ཡོད་པ་རེད།
མིག་སྔར། ལྗོངས་ཡོངས་ཀྱི་སྤྱི་ལ་དབང་བ་མིན་པའི་ལམ་ལུགས་ཀྱི་དཔལ་འབྱོར་ལས་དོན་ནང་ལས་ཀ་བྱེད་བཞིན་པའི་མི་གྲངས་ཀྱི་ཟིན་ཚད་དེ་མི་ཁྲི༢༤.༣༦ཙམ་ལ་ཟིན་གྱི་ཡོད་ཅིང་། ལོ་རེར་ལས་མི་ཆིག་ཁྲིར་ལོན་པ་ལས་ཞུགས་ཐུབ་པ་ཡོང་བ་དང་། དུས་ཚིགས་མི་འདྲ་བ་དང་། དུས་ཐུང་གླ་ཆ་གསོག་མཁན་བཅས་ཀྱི་ཞིང་འབྲོག་པའི་ལས་ཞུགས་མི་གྲངས་དེ་མི་ཁྲི༢༠ཙམ་ལ་ཟིན་གྱི་ཡོད་པ་རེད།
བོད་ལྗོངས་སུ་ཐོ་འགོད་བྱས་པའི་ཚོང་རྟགས་དངོས་པོ་༡༠༩༨ཙམ་ཡོད་པའི་ནང་ནས་སྤྱི་ལ་དབང་བ་མིན་པའི་དཔལ་འབྱོར་གྱི་དངོས་པོ༧༦༢ཙམ་ཟིན་ཡོད་པ་དེས་བརྒྱ་ཆའི༤༧ཙམ་ཟིན་ཡོད་པ་དང་། བོད་ལྗོངས་ཀྱི་བཟོ་ཚོང་དུད་ཁྱིམ་རྐྱང་པ་དང་། སྒེར་གཉེར་ཁེ་ལས་དང་ཕྱི་རྒྱལ་མ་དངུལ་གྱི་ཁེ་ལས་བཅས་ཀྱིས་ཁྲལ་འབུལ་བྱས་ཚད་དེ་དངུལ་དུང་ཕྱུར༡༦.༠༣ཙམ་ཟིན་ནས་ལྗོངས་ཡོངས་ཀྱིGDPཡི་བརྒྱ་ཆའི༣༢. ༥ཙམ་ཟིན་ཡོད་པ་རེད།
