༄༅།།བོད་ལྗོངས་ཀྱི་སྨན་བཅོས་རོགས་སྐྱོབ་ཐད་གྲོང་ཁྱེར་དང་གྲོང་གསེབ་གཞི་གཅིག་ཅན་དུ་འགྱུར་ཐུབ་པ་བྱུང་བ།

        ཉེ་ལམ། གསར་འགོད་པས་བོད་རང་སྐྱོང་ལྗོངས་དམངས་སྲིད་ཐིང་གི་འབྲེལ་ཡོད་སྡེ་ཚན་ནས་ཤེས་རྟོགས་བྱུང་གསལ། གྲོང་ཁྱེར་དང་གྲོང་གསེབ་སྡོད་དམངས་ཀྱི་སྨན་བཅོས་ཐད་ཀྱི་དཀའ་གནད་ཐག་གཅོད་བྱ་རྒྱུར་ཤུགས་སྣོན་བརྒྱབ་ནས། གྲོང་ཁྱེར་དང་གྲོང་གསེབ་ཀྱི་ཡུལ་མིར་ན་ཚ་བྱུང་ཚེ་ནད་བཅོས་བྱེད་ས་ཡོད་པར་འགན་སྲུང་བྱ་ཆེད། རང་སྐྱོང་ལྗོངས་དམངས་སྲིད་ཐིང་དང་ནོར་སྲིང་ཐིང་། འཕྲོད་བསྟེན་ཐིང་། མི་ཤུགས་ཐོན་ཁུངས་ཐིང་། སྤྱི་ཚོགས་འགན་སྲུང་ཐིང་བཅས་ཀྱིས་མཉམ་འབྲེལ་ཐོག་ནས《གྲོང་ཁྱེར་དང་གྲོང་གསེབ་ཀྱི་སྨན་བཅོས་རོགས་སྐྱོབ་ལམ་ལུགས་མུ་མཐུད་དུ་འཐུས་ཚང་དུ་གཏོང་བའི་བོད་རང་སྐྱོང་ལྗོངས་ཀྱི་བསམ་ཆར》ཞེས་པ་བཏོན་ནས། བོད་ལྗོངས་ཀྱི་གྲོང་ཁྱེར་དང་གྲོང་གསེབ་སྨན་བཅོས་རོགས་སྐྱོབ་ལམ་ལུགས་མུ་མཐུད་དུ་འཐུས་ཚང་དུ་གཏོང་རྒྱུ་ཡིན་པ་རེད།

        སྲིད་ཇུས་གསར་པ་དེའི་ནང་། སྨན་བཅོས་རོགས་སྐྱོབ་ཀྱི་ཁ་གཏད་ས་ནི་བོད་ལྗོངས་ཀྱི་གྲོང་ཁྱེར་དང་གྲོང་གསེབ་ཀྱི་རྒྱུན་སྡོད་ཐེམ་ཐོ་ཡོད་པའི་གྲོང་ཁྱེར་དང་གྲོང་གསེབ་ཀྱི་ཡུལ་མི་དང་། བོད་ལྗོངས་ནས་ཞིང་ཆེན་གཞན་དུ་བདེ་འཁོད་གནང་མཁན་གྱི་ལས་འཁྱུར་མི་སྣ་བཅས་ཡིན་ཞིང་། དེ་དག་གིས་གྲོང་རྡལ་ཡུལ་མིའི（ལས་བཟོའི）གཞི་རྩའི་སྨན་བཅོས་འགན་སྲུང་དང་ཞིང་འབྲོག་ཁུལ་གྱི་སྨན་བཅོས་ལམ་ལུགས། དེ་བཞིན་ཁ་གསབ་སྨན་བཅོས་འགན་སྲུང་གཞན་པ་བཅས་ལོངས་སུ་སྤྱད་ན་ཡང་། ད་དུང་ཁྱིམ་ཚང་གི་གཞི་རྩའི་འཚོ་བ་འཁྱོལ་བར་དཀའ་བ་རྣམས་ལ། ཞིབ་ཕྲའི་གནས་ཚུལ་ལ་གཞིགས་ནས། སྨན་བཅོས་རོགས་སྐྱོབ་སྤྲོད་རྒྱུ་གཏན་འབེབས་བྱས་ཡོད་པ་རེད། དེ་ཡང་། མི་རེར་ལོ་འཁོར་སྨན་བཅོས་རོགས་སྐྱོབ་མཐོ་ཤོས་ལ་སྒོར༦༠༠༠༠ཟིན་རྒྱུ་ཡིན་ཞིང་། རོགས་སྐྱོབ་དངུལ༡༠༠༠༠མན་ལ་རྫོང（གྲོང་ཁྱེར། ཁུལ）དམངས་སྲིད་སྡེ་ཚན་གྱིས་ཞིབ་མཆན་གནང་རྒྱུ་དང་། སྒོར༡༠༠༠༠ཡན་དང་སྒོར༣༠༠༠༠མན་ལ་རྫོང（གྲོང་ཁྱེར། ཁུལ）མི་དམངས་སྲིད་གཞུང་ནས་ཞིབ་མཆན་གནང་རྒྱུ། སྒོར༣༠༠༠༠ཡན་དང་སྒོར༦༠༠༠༠མན་ལ་ས་ཁུལ（གྲོང་ཁྱེར）དམངས་སྲིད་དང་ནོར་སྲིད་སྡེ་ཚན་ནས་ཞིབ་མཆན་གནང་རྒྱུ་མ་ཟད་བོད་རང་སྐྱོང་ལྗོངས་དམངས་སྲིད་ཐིང་དང་ནོར་སྲིད་ཐིང་ལ་ཐོ་འགོད་སྙན་སེང་ཞུ་དགོས་པ་རེད།

       བོད་རང་སྐྱོང་ལྗོངས་དམངས་སྲིད་ཐིང་གི་འབྲེལ་ཡོད་འགན་ཁུར་མི་སྣས་ངོ་སྤྲོད་གནང་བར་གཞིགས་ན། ཐེངས་དེའི་སྲིད་ཇུས་གསར་པ་བཏོན་པ་ལས། བོད་ལྗོངས་ཀྱི་སྔར་ཡོད་གྲོང་ཁྱེར་དང་གྲོང་གསེབ་ཀྱི་སྨན་བཅོས་རོགས་སྐྱོབ་སྲིད་ཇུས་མུ་མཐུད་དུ་འཐུས་སྒོ་ཚང་དུ་ཕྱིན་ཡོད་པ་རེད།