༄༅།།བོད་ལྗོངས་སུ་གློག་བཀོལ་བའི་མི་གྲངས་དེ་ཁྲི༢༡༠ལ་སླེབས་ནས་སྤྱིའི་མི་གྲངས་ཀྱི་བརྒྱ་ཆའི༧༣ཡན་ཟིན་ཡོད་པ།

    གསར་འགོད་པས་བོད་ལྗོངས་གློག་ཤུགས་ཚད་ཡོད་ཀུང་ཟི་ནས་ཤེས་རྟོགས་བྱུང་གསལ་ལྟར་ན། ད་ལྟའི་བར་དུ་བོད་ལྗོངས་ཀྱི་གློག་བཀོལ་བའི་མི་གྲངས་དེ་ཁྲི༢༡༠ལ་སླེབས་ཤིང་། སྤྱིའི་མི་གྲངས་ཀྱི་བརྒྱ་ཆའི༧༣ཡན་ཟིན་ཡོད་པ་རེད།   བོད་ལྗོངས་གློག་ཤུགས་ཚད་ཡོད་ཀུང་ཟིས་ངོ་སྤྲོད་གནང་བ་ལྟར་ན། ཀྲུང་དབྱང་གི་བོད་ལྗོངས་བཞུགས་མོལ་ཚོགས་འདུ་ཐེངས་བཞི་བ་འཚོགས་པའི་ཚུན་ལ། རྒྱལ་ཁབ་གློག་དྲ་ཀུང་ཟི་དང་། བོད་རང་སྐྱོང་ལྗོངས་ཏང་ཨུ་དང་སྲིད་གཞུང་གི་ཡང་དག་པའི་དབུ་ཁྲིད་གནང་བར་བརྟེན་ནས། བོད་ལྗོངས་ཀྱིས་གློག་ཤུགས་ཐད་ནས་གཡུར་དུ་ཟ་བའི་གྲུབ་འབྲས་བླངས་ཡོད་ཅིང་། བོད་ལྗོངས་གློག་ལས་ཀྱི་འཕྲུལ་ཆས་ཤོང་ཚད་དེ༢༠༠༡ལོའི་སྟོང་ཝ་ཁྲི༣༦ནས་དེང་སྐབས་ཀྱི་སྟོང་ཝ་ཁྲི༧༢ལ་འཕར་ཡོད། ཀུང་ཟིས་གློག་འདོན་ཚད་སྟོང་ཝ་དུང་ཕྱུར༧.༣༤ནས་སྟོང་ཝ་དུང་ཕྱུར༡༦.༨༧ལ་འཕར་ཡོད་པ་རེད། བོད་ལྗོངས་ཀྱི་རྫོང་སོ་སོ་གནས་སའི་ས་གནས་སྲིད་གཞུང་དང་ཞང（གྲོང་བརྡལ）སྲིད་གཞུང་དུ་གློག་ཤར་གཏོང་ཐུབ་ཡོད་ལ། སྲིད་འཛིན་གྲོང་ཚོར་གློག་ཤར་གཏོང་བྱུང་ཚད་བརྒྱ་ཆའི༦༠ལ་སླེབས་ཡོད་པ་རེད།