༄༅།།བོད་ཀྱི་ཞིང་འབྲོག་དམངས་ཀྱིས་ལོ་བརྒྱད་སྔ་བསྣུར་དུ་གྲོང་གསེབ་ཀྱི་སྤྱི་ཚོགས་རྒན་གསོའི་འགན་སྲུང་ལམ་ལུགས་གསར་པའི་ལོངས་སྤྱོད་མྱོང་ཐུབ་རྒྱུ་ཡིན་པ།

         བོད་རང་སྐྱོང་ལྗོངས་མི་ཤུགས་ཐོན་ཁུངས་དང་སྤྱི་ཚོགས་འགན་སྲུང་ཐིང་ནས་ཤེས་རྟོགས་བྱུང་བ་ལྟར་ན། སྤྱི་ལོ༢༠༡༢ལོར་སླེབས་སྐབས་བོད་ལྗོངས་ཀྱི་གྲོང་གསེབ་ཀྱི་སྤྱི་ཚོགས་རྒན་གསོའི་འགན་སྲུང་ལམ་ལུགས་གསར་པ་དེ་ཞིང་འབྲོག་ཁུལ་གྱི་ལོ་ན་རན་པའི་སྡོད་དམངས་ཁྲོད་རྩ་བའི་ཆ་ནས་མངོན་འགྱུར་ཡོང་བར་བྱེད་རྒྱུ་ཡིན་ཞིང་། དེའི་ཐོག་ནས་བོད་ལྗོངས་ཀྱི་ཞིང་འབྲོག་དམངས་ཀྱིས་ལོ་བརྒྱད་སྔ་བསྣུར་དུ་གྲོང་གསེབ་ཀྱི་སྤྱི་ཚོགས་རྒན་གསོའི་འགན་སྲུང་ལམ་ལུགས་གསར་པའི་ལོངས་སྤྱོད་མྱོང་ཐུབ་རྒྱུ་ཡིན་པ་དེ་མཚོན་ཐུབ་ཡོད།
        སྤྱི་ལོ༢༠༠༩ལོར། གྲོང་གསེབ་ཀྱི་སྤྱི་ཚོགས་རྒན་གསོའི་འགན་སྲུང་ལམ་ལུགས་གསར་པ་རྒྱལ་ཡོངས་སུ་ཚོད་ལྟ་བྱེད་འགོ་ཚུགས་རྗེས། རྒྱལ་ཡོངས་ཀྱི་གྲོང་གསེབ་ཀྱི་སྤྱི་ཚོགས་རྒན་གསོའི་འགན་སྲུང་ལམ་ལུགས་གསར་པ་ཚོད་ལྟ་བྱེད་པའི་སྐོར་གྱི་རྒྱལ་སྲིད་སྤྱི་ཁྱབ་ཁང་གི་གཅིག་གྱུར་བཀོད་འདོམས་དང་བླང་བྱ་གཞིར་བཟུང་ནས། བོད་རང་སྐྱོང་ལྗོངས་ཀྱི་འབྲེལ་ཡོད་སྡེ་ཚན་གྱིས་དུས་ཐོག་ཏུ་དེའི་སྐོར་གྱི་ལས་དོན་སྤེལ་བ་དང་འབྲེལ་བོད་ལྗོངས་ཀྱི་རྫོང（གྲོང་ཁྱེར་དང་ས་ཁུལ）༧དུས་བཀག་དང་པོའི་ཚོད་ལྟའི་ཁྱབ་ཁོངས་སུ་བཅུག་པ་རེད།
         བོད་རང་སྐྱོང་ལྗོངས་མི་ཤུགས་ཐོན་ཁུངས་དང་སྤྱི་ཚོགས་འགན་སྲུང་ཐིང་གི་ཐིང་ཀྲང་ཡའོ་རུའེ་ཕེང་ནས་ངོ་སྤྲོད་གནང་བ་ལྟར་ན། བོད་ལྗོངས་ཡོངས་ཀྱི་གྲོང་གསེབ་ཀྱི་སྤྱི་ཚོགས་རྒན་གསོའི་འགན་སྲུང་ལམ་ལུགས་གསར་པ་དེ་དུས་བཀག་དང་པོར་རྫོང་ཁུལ༧དུ་ཚོད་ལྟ་བྱས་པར་ཞིང་འབྲོག་པ་ཁྲི༢༠.༡༦ཟིན་ཡོད་ཅིང་། ད་ལོའི་ལོ་འགོར། བོད་རང་སྐྱོང་ལྗོངས་ཀྱིས་དེའི་ནང་ནས་ལོ་ན༦༠ཡན་གྱི་ཞིང་འབྲོག་པ་ཁྲི༢.༣༣ལ་དུས་བཀག་དང་པོའི་རྨང་གཞིའི་རང་བཞིན་གྱི་རྒན་གསོའི་འཚོ་དངུལ་སྒོར་ཁྲི༦༤༠སྤྲད་ཚར་བ་རེད།
         ཀྲུང་དབྱང་གིས་བོད་ལྗོངས་ཀྱི་ཞིང་འབྲོག་པའི་ཐོན་སྐྱེད་འཚོ་བའི་ཆ་རྐྱེན་ལེགས་བཅོས་ཡོང་བར་ཚད་མཐོའི་མཐོང་ཆེན་བྱེད་ཀྱི་ཡོད་ཅིང། ཀྲུང་དབྱང་གི་བོད་ཀྱི་ལས་དོན་སྐོར་གྱི་བཞུགས་མོལ་ཚོགས་འདུ་ཐེངས་ལྔ་པའི་སྟེང་“སྤྱི་ལོ༢༠༡༠ལོའི་གོང་དུ་གྲོང་གསེབ་ཀྱི་སྤྱི་ཚོགས་རྒན་གསོའི་འགན་སྲུང་ལམ་ལུགས་གསར་པ་གཞི་རྩའི་ཆ་ནས་ཁྱོན་ཡོངས་སུ་ཁེབས་ཐུབ་པ་བྱ་དགོས་པའི”བླང་བྱ་བཏོན་པ་དེའི་ཐོག་ནས། རྒྱལ་ཡོངས་སུ་གྲོང་གསེབ་ཀྱི་སྤྱི་ཚོགས་རྒན་གསོའི་འགན་སྲུང་ལམ་ལུགས་གསར་པ་ཁྱབ་གདལ་གཏོང་བའི“སྔོན་བཀོད་དུས་ཚོད་”དང་བསྡུར་ན། བོད་ལྗོངས་ཀྱི་རྒྱ་ཆེའི་ཞིང་འབྲོག་དམངས་ཀྱིས་ལོ་བརྒྱད་སྔ་བསྣུར་དུ་གྲོང་གསེབ་ཀྱི་སྤྱི་ཚོགས་རྒན་གསོའི་འགན་སྲུང་ལམ་ལུགས་ཀྱི་ལོངས་སྤྱོད་མྱོང་ཐུབ་རྒྱུ་ཡིན་པ་དེ་མཚོན་ཐུབ་ཡོད།
        ཡའོ་རུའེ་ཕེང་གིས“སྔོན་དཔག་ལྟར་ན། སྤྱི་ལོ༢༠༡༢ལོར་སླེབས་སྐབས་བོད་ལྗོངས་ཡོངས་སུ་མི་ཁྲི༡༤༠ཙམ་འགན་སྲུང་ནང་ཞུགས་ཐུབ་རྒྱུ་ཡིན་པ་དང་། དེའི་ནང་ནས་བརྒྱ་ཆའི༡༤ནི་ལོ༦༠ཡན་གྱི་བགྲེས་སོང་ཡིན་ཞིང་། ཀྲུང་དབྱང་ནས་ལོ་ལྟར་ཐད་ཀར་བཏང་བའི་དངུལ་རྩ་སྒོར་དུང་ཕྱུར༡.༦༥ཡན་ཟིན་རྒྱུ་རེད”ཅེས་གསུངས་པ་རེད།