གསར་འགོད་པས་ལྷ་སའི་འགག་སྒོ་ལས་ཁུངས་ནས་ཤེས་རྟོགས་བྱུང་བ་ལྟར་ན། ད་ལོའི་དུས་ཚིགས་དང་པོ་ནས་གསུམ་པ་བར་བོད་རང་སྐྱོང་ལྗོངས་ཀྱི་ཕྱིར་གཏོང་དང་ནང་འདྲེན་བསྡོམས་འབོར་ཨ་སྒོར་དུང་ཕྱུར་༥ཟིན་པ་དེ་ལོ་གོང་མའི་དུས་མཚུངས་ལས་༣.༩%འཕར་ནས་ཕྱིར་གཏོང་ནང་འདྲེན་གྱི་ཚོང་དོན་ཐད“ཕྱིར་གཏོང་ཚོང་དོན་གྱིས་གཙོ་ཁྲིད་གནས་བབ་བཟུང་བ་དང་ནང་འདྲེན་ཚོང་དོན་གྱི་འཕེལ་རྒྱས་བརྟན་པོ་མེད་པའི”འཕེལ་ཕྱོགས་མངོན་པ་རེད།
ལྷ་སའི་འགག་སྒོའི་ལས་ཁུངས་ཀྱིས་བསྡོམས་རྩིས་བྱས་པའི་གྲངས་གཞི་གསར་ཤོས་ལས་ད་ལོའི་དུས་ཚིགས་དང་པོ་ནས་གསུམ་པ་བར་བོད་ཀྱི་ཕྱིར་གཏོང་སྤྱི་འབོར་ཨ་སྒོར་དུང་ཕྱུར༤.༥ཟིན་ནས་དུས་མཚུངས་ལས་༦༨.༩%འཕར་བ་དང་།ནང་འདྲེན་གྱི་སྤྱི་འབོར་ཨ་སྒོར་དུང་ཕྱུར་༠.༥ཟིན་ནས་དུས་མཚུངས་ལས་༡༢༩.༡%འཕར་བ་མཚོན་ཞིང་།གྲངས་གཞི་དེ་ལ་བོད་ཀྱི་ཕྱི་ཕྱོག་ཚོང་དོན་ནང་ཕྱིར་གཏོང་གིས་གཙོ་བོ་བཟུང་བ་མཚོན་ཡོད།
བོད་ལྗོངས་ཀྱི་ཕྱིར་གཏོང་དང་ནང་འདྲེན་ཚོང་དོན་ཐད་ཟླ་འཁོར་མོའི་འཕེལ་རྒྱས་དོ་སྙོམ་མེད་པ་དེའི་ནང་ནང་འདྲེན་གྱི་ཚོང་དོན་དེ་གཙོ་བོ་ཟླ་༡ནས་༣བར་གཅིག་སྡུད་བྱས་ཡོད།
དུས་ཚིགས་དང་པོ་ནས་གསུམ་པ་བར། བོད་ལྗོངས་ཀྱི་ཕྱིར་གཏོང་ཚོང་ཟོག་གཙོ་བོ་འཁལ་འཐག་ཐོན་རྫས་དང་།འཕྲུལ་གློག་ཐོན་རྫས།ཞིང་ལས་ཐོན་རྫས་བཅས་ཡིན་པ་དང་ཐོན་རྫས་རིགས་གསུམ་པོ་དེས་ཕྱིར་གཏོང་སྤྱི་འབོར་གྱི་༧༠%ཡན་བཟུང་བ་དེའི་ནང་འཁལ་འཐག་ཐོན་རྫས་ཕྱིར་གཏོང་བྱས་པར་དངུལ་འབོར་ཨ་སྒོར་དུང་ཕྱུར་༡.༩ཟིན་ནས་དུས་མཚུངས་ལས་༡༠༤.༡%འཕར་བ་དང་།འཕྲུལ་གློག་ཐོན་རྫས་ཕྱིར་གཏོང་བྱས་པར་དངུལ་འབོར་ཨ་སྒོར་ཁྲི་༨༡༩༧.༩ཟིན་ནས་དུས་མཚུངས་ལས་༥༢.༥%འཕར་བ།ཞིང་ལས་ཐོན་རྫས་ཁག་ཕྱིར་གཏོང་བྱས་པར་དངུལ་འབོར་ཨ་སྒོར་ཁྲི་༤༤༧༤.༡ཟིན་ནས་དུས་མཚུངས་ལས་༥༧.༢%འཕར་བ་བཅས་རེད།གཞན་ཡང་དབྱར་རྩྭ་དགུན་འབུ་དང་སྒོག་པ་སོགས་ཁྱད་ལྡན་ཐོན་རྫས་ཕྱིར་གཏོང་བྱས་པའི་དངུལ་འབོར་ཆེན་པོ་འཕར་ཡོད་པ་རེད།