༄༅།།བོད་ལྗོངས་སོགས་ལྗོངས་ཞིང་དྲུག་ཐའེ་ཝན་དུ་ཡུལ་སྐོར་ལ་འགྲོ་ཆོག་པའི་ས་ཁུལ་སྐོར་གསུམ་པའི་གྲས་སུ་ཚུད་རྒྱུ་ཡིན་པ།

མཚོ་འགག་ངོགས་གཉིས་ཀྱི་ཡུལ་སྐོར་འབྲེལ་འདྲིས་མཐུན་ཚོགས་ཀྱི་ཐའེ་པེའི་དོན་གཅོད་ཁང་ཚེས་༧ཉིན་དབུ་བརྙེས་ཤིང་། ཆེད་དུ་དབུ་བརྙེས་པའི་མཛད་སྒོར་ཕེབས་པའི་ཕྱི་རྒྱལ་ཡུལ་སྐོར་ཚོགས་པའི་ཚོགས་གཙོ་ཧྲའོ་ཆི་ཝེ་ཡིས་དབུ་བརྙེས་པའི་མཛད་སྒོའི་སྟེང་ཤིས་ཚིག་འབུལ་སྐབས་མཚོ་འགག་ངོགས་གཉིས་ཀྱི་ཡུལ་སྐོར་ལས་རིགས་གོང་དུ་སྤེལ་བའི་སྐོར་གྱི་ཕུགས་འདུན་༦བཏོན་པ་རེད།

ཕུགས་འདུན་དང་པོ་ནི་ཐའེ་ཝན་དུ་འགྲོ་བའི་སྐམ་སའི་ཡུལ་སྐོར་བ་ལོ་འདིར་ཁྲི་བརྒྱ་ལས་བརྒལ་རྒྱུ་དང་། ཕུགས་འདུན་གཉིས་པ་ནི་སྐམ་སའི་སྡོད་དམངས་ཐའེ་ཝན་དུ་ཡུལ་སྐོར་ལ་འགྲོ་ཆོག་པའི་སྒོ་འབྱེད་ས་ཁུལ་གྱི་ཁྱབ་ཁོངས་ཇེ་ཆེར་གཏོང་རྒྱུ་སྟེ། མི་འགྱངས་པར་ནང་སོག་དང་བོད་ལྗོངས། ཀན་སུའུ། མཚོ་སྔོན། ཉིང་ཞ། ཤིན་ཅང་བཅས་ལྗོངས་ཞིང་དྲུག་སྐམ་སའི་སྡོད་དམངས་ཐའེ་ཝན་དུ་ཡུལ་སྐོར་ལ་འགྲོ་ཆོག་པའི་སྒོ་འབྱེད་ས་ཁུལ་སྐོར་གསུམ་པའི་གྲས་སུ་ཚུད་པར་འགྱུར་རྒྱུ་ཡིན་ལ།  སྒོ་འབྱེད་པའི་ཁྱབ་ཁོངས་དེ་ལྗོངས་ཞིང་དང་གྲོང་ཁྱེར་༣༡བར་ཇེ་མང་དུ་གཏོང་རྒྱུ་ཡིན་པ་རེད། ཕུགས་འདུན་གསུམ་པ་ནི་སྐམ་སའི་མི་སྒེར་ཐའེ་ཝན་དུ་ཡུལ་སྐོར་ལ་ཡོང་བར་གྲ་སྒྲིག་བྱེད་རྒྱུ། བཞི་བ་ནི་སྐམ་སའི་འགྲུལ་ཁུངས་ས་ཁུལ་གཙོ་བོ་དང་ཐའེ་ཝན་གྱི་ཡུལ་སྐོར་ལས་རིགས་བར་ཕན་ཚུན་འབྲེལ་འདྲིས་ཡོང་བར་སྐུལ་འདེད་གཏོང་རྒྱུ། ལྔ་བ་ནི་མཉམ་གཅིག་ཏུ་མཚོ་འགག་ངོགས་ཀྱི་ཡུལ་སྐོར་གྲགས་རྟགས་གཏོད་རྒྱུ། དྲུག་པ་ནི་མཚོ་འགག་ངོགས་གཉིས་ཀྱི་ཡུལ་སྐོར་དེ་ཐོན་ལས་ཅན་དུ་གོང་འཕེལ་གཏོང་རྒྱུ་བཅས་རེད།

　　ཁོང་གིས་ད་དུང་འདི་སྐད། ཟླ་འདིའི་ཚེས་༤ཉིན། ཐའེ་ཝན་གྱི་མཚོ་འགག་ངོགས་གཉིས་ཀྱི་ཡུལ་སྐོར་མཐུན་ཚོགས་ཀྱི་པེ་ཅིང་ཡན་ལག་ཁང་དངོས་སུ་དབུ་བརྙེས་ཤིང་།  མཚོ་འགག་ངོགས་གཉིས་ཀྱིས་ཐེངས་དང་པོར་ཕན་ཚུན་གྱི་ས་ཆར་རྒྱུན་སྡོད་ཡུལ་སྐོར་དོན་གཅོད་ཁང་བཙུགས་པ་དང་། དེ་ནི་མཚོ་འགག་ངོགས་གཉིས་བར་བྱུང་བའི་མཚོན་བྱེད་རང་བཞིན་ལྡན་པའི་དོན་ཞིག་ཡིན་ལ་ལོ་རྒྱུས་རྡོ་རིང་ལྟ་བུའི་དོན་སྙིང་ལྡན་ཡོད་པ་དང་། ཕྱོགས་གཉིས་ཀྱིས་ཕན་ཚུན་བཙུགས་པའི་ཡུལ་སྐོར་དོན་གཅོད་ཁང་དེ་གཉིས་མཚོ་འགག་ངོགས་གཉིས་ཀྱི་ཡུལ་སྐོར་ལས་རིགས་བར་ཕན་ཚུན་འབྲེལ་འདྲིས་བྱེད་པའི་ཟམ་པ་དང་ཞབས་ཞུ་སྒྲུབ་པའི་སྒེའུ་ཁུང་ལྟ་བུར་འགྱུར་རྒྱུ་རེད།