༼ ནང་དོན་གནད་བསྡུས། ༽ དཔྱད་རྩོམ་འདིའི་ནང་ལོ་ཆེན་དགེ་འདུན་ཆོས་འཕེལ་གྱི་ཐུན་མོང་མ་ཡིན་པའི་ཡིག་སྒྱུར་དགོངས་པ་ཁག་བཞི་སྟེ། ཡིག་སྒྱུར་གྱི་དགོས་པ་ཅི་ཡིན་སྐོར་གྱི་དགོངས་པ་དང་། ལོ་ཙཱ་བ་ཚད་ལྡན་ཞིག་ཇི་ལྟར་བྱ་དགོས་པའི་སྐོར་གྱི་དགོངས་པ། སྔ་འགྱུར་གྱི་ལོ་ཆེན་ཚོས་དོན་ཐོབ་གཙོ་བོར་བསྒྱུར་བ་དང་། ཕྱིས་ཀྱི་ལོ་ཆེན་ཚོས་འབྲུ་དོན་རེ་རེ་བཞིན་ཚིག་ཟིན་ལ་བསྒྱུར་བའི་སྐོར་གྱི་དགོངས་པ། ཞར་བྱུང་སྐད་དང་ཡི་གེའི་སྐོར་གྱི་དགོངས་པ་བཅས་ཀྱི་སྐོར་ཅུང་ཞིབ་ཙམ་གླིང་ཡོད། ༼བརྡ་ཆད་གཙོ་བོ།དགེ་འདུན་ཆོས་འཕེལ། ཡིག་སྒྱུར་དགོངས་པ། ༼ ཀྲུང་གོའི་དཔེ་དེབ་དབྱེ་རྟགས། ༽ H211.59〔ཡིག་ཚང་མཚོན་བྱང་།〕A〔རྩོམ་གྱི་གོ་རིམ་ཨང་སྒྲིག〕1002-946X（2009）01-082-10
དེ་ཡང་ལོ་ཆེན་དགེ་འདུན་ཆོས་འཕེལ་གྱི་ཡིག་སྒྱུར་དགོངས་པ་ནི་ཤིན་ཏུ་རྒྱ་ཆེ་ཞིང་གཏིང་ཟབ་པ་ཞིག་ཡིན། ཁོང་གིས་སྐབས་དེ་ཤེད་ཀྱི་སྲིད་འབྱོར་དང་། ཆོས་ལུགས། རིག་གནས། ཚན་རིག་སོགས་ཕྱོགས་གང་ཐད་ནས་དགོངས་པ་གསར་པ་མང་པོ་བཞེས་ཡོད་པ་མ་ཟད། ལེགས་སྦྱར་དང་། པྲ་ཀྲི་ཏི། དབྱིན་ཇི་སོགས་ཀྱི་སྐད་དང་ཡི་གེར་སྦྱང་པ་གནང་ཞིང་། མཛད་རྗེས་ཀྱང་བླ་ན་མ་མཆིས་པ་འཇོག་གནང་མཛད་ཡོད། འོན་ཏེ་ད་ལྟའི་བར་དུ་ལོ་ཆེན་འདི་པའི་སྐོར་གྱི་རྩོན་ཡིག་འབྲི་མཁན་ཚོའི་ཁྲོད་ན། ཁོང་གི་ཡིག་སྒྱུར་དགོངས་པར་ཞིབ་འཇུག་བྱ་མཁན་ཧ་མ་མེད་པ་ལྟར་དུ་སྣང་ཞིང་། ལོ་ཆེན་ཁོང་གི་ཡིག་སྒྱུར་དགོངས་པར་ཐུན་མིན་གྱི་ཁྱད་ཆོས་ལྡན་འདུག་པས། དེའི་སྐོར་ལ་རང་བློས་གང་དཔོག་གིས་དཔྱད་པ་བྱ་ཁུལ་ལགས།
དང་པོ། ཡིག་སྒྱུར་གྱི་དགོས་པ་ཅི་ཡིན་སྐོར་གྱི་དགོངས་པ།
དེ་ཡང་ད་ལྟའི་དུས་སུ་བོད་ཀྱི་ལོ་ཙཱ་བ་ཚན་ལྡན་ཞིག་བྱེད་པའ་ཐོག་མར་ཡིག་སྒྱུར་གྱི་དགོས་པ་ཅི་ཡིན་སྐོར་ལ་ངོས་འཛིན་གསལ་པོ་ཞིག་ཡོད་དགོས་པ་དང་། དེ་ཤེས་པ་བྱ་བར་ཕྱི་ནང་སྣོད་བཅུད་དམ། རང་གཞན་གནས་བབས་སམ། དུས་བབས་ལ་ངོས་འཛིན་གསལ་པོ་ཡོད་དགོས་པ་མ་ཟད། རང་མི་རིགས་ཀྱི་རྒྱུས་ལོན་པ་དང་མི་རིགས་གཞན་དག་གི་རྒྱུས་ལོན་པ་བྱ་རྒྱུ་ཤིན་ཏུ་ནས་གལ་ཆེའོ། དེ་ལ་རྒྱ་ཡི་ལའོ་ཙེའི་གཏམ་ལ་སྦྱར་ནས་སྨྲས་ན་འདི་ལྟ་སྟེ། གཞན་རྒྱུས་ལོན་ན་ཤེས་རབ་འཕེལ། །རང་རྒྱུས་ལོན་ན་མུན་པ་གསལ། །ཞེས་དང་། ཡང་རྒྱའི་སུན་ཙིའི་དམག་ཇུས་ནང་། རང་གཞན་གཉིས་ཀའི་རྒྱུས་ལོན་ན། །ལན་བརྒྱར་འཐབ་ཀྱང་ཕམ་མི་འགྱུར། །ཞེས་པ་ལྟར་རོ། །
དེའི་ཐད་ལོ་ཆེན་དགེ་འདུན་ཆོས་འཕེལ་གྱིས་“ཨ་ཙེ། ཨ་ཙེ། རྒྱ་གར་གྱི་པཎ་གྲུབ་ཉི་ཟླ་དང་འདྲ་བ་དེ་ཚོས་མདོ་སྔགས་རིག་གནས་དང་བཅས་པ་འདི་ག་ཙམ་མཛད་ན་ཡང་། རང་རེ་བོད་པ་ཚོ་ལ་ནི་ཆོས་རྒྱལ་ཚོ་དང་། ལོ་ཙཱ་བ་འཇིག་རྟེན་མིག་འབྱེད་དེ་ཚོ་བྱུང་མེད་ན། མདོ་སྔགས་རིག་གནས་དང་བཅས་པའི་གཞུང་འདི་ཚོ་རང་རེས་གདན་གྲུ་བཞི་གཅིག་གི་སྒང་ལ་བསྡད་ནས་ལྷོད་ཤིག་གེར་མཇལ་རྒྱུའི་གོ་སྐབས་ག་ནས་རྙེད།” ༡ ཅེས་རྒྱ་གར་ལ་ནང་པའི་ཆོས་དེ་ལྟར་དར་རུང་སྐབས་དེའི་རང་རེའི་ལོ་ཙཱ་བ་དེ་དག་མེད་ན། རང་རེར་ད་ལྟ་བཀའ་བསྟན་འགྱུར་གྱིས་གཙོས་པའི་གསུང་རབ་དེ་ཙམ་མཇལ་རྒྱུ་མི་ཡོང་བ་བསྟན་གནང་ཡོད།
གཉིས་པ། ཚད་ལྡན་གྱི་ལོ་ཙཱ་བ་ཞིག་ལ་ཚང་དགོས་པའི་ཆ་རྐྱེན་སྐོར་གྱི་དགོངས་པ།
དེ་ལ་ལྔ་སྟེ། བོད་ཡིག་དང་བོད་ཀྱི་རིག་གནས་ཀྱི་རྨང་གཞི་རྡོ་སྒྲིག་པ་ལྟ་བུ་ཞིག་དང་། རྒྱ་གཞུང་གི་ཁོག་པ་ལོན་པ་ཞིག་དགོས་པ་དང་གཅིག མ་བསྐུལ་དང་བླངས་ཀྱིས་ཡིག་སྒྱུར་བྱ་བར་སྤྲོ་བས་ཞུགས་དགོས་པ་དང་གཉིས། འབྲེལ་ཡོད་ཀྱི་སྐད་དང་ཡི་གེ་མང་པོ་ཤེས་དགོས་པ་དང་གསུམ། ཡི་གེ་བསྒྱུར་བའི་དམིགས་ཡུལ་གསལ་པོ་ཡོད་དགོས་པ་དང་བཞི། ཡུལ་དངོས་ལ་ངོ་བསྐྱོད་ཀྱིས་ཉམས་ཞིབ་མཐར་ཕྱིན་བྱེད་པའི་སྙིང་སྟོབས་ལྡན་དགོས་པ་བཅས་ཏེ་ལྔའོ།།
དེ་ཡང་བོད་ཡིག་དང་བོད་ཀྱི་རིག་གནས་ཀྱི་རྨང་གཞི་རྡོ་སྒྲིག་པ་ལྟ་བུ་ཞིག་དང་། རྒྱ་གཞུང་གི་ཁོག་ལོན་པ་ཞིག་དགོས་པའི་སྐོར་ལ་༼དགེ་འདུན་ཆོས་འཕེལ་གྱི་ལོ་རྒྱུས་༽ནང་ཁོང་གིས་“དེང་སང་མང་པོས་ཨིན་སྐད་ལ་དང་དོད་བྱེད་པ་སྐབས་སུ་བབས་པ་འདྲ་པོ་ཞིག་རེད། ཡིན་ན་ཡང་སྔོན་ལ་བོད་ཡིག་རང་མཐར་ཕྱིན་པ་ཞིག་སློབས། ང་རང་ཚོས་དངོས་གནས་བྱས་ན་བོད་སྐད་དང་བོད་ཡིག་ཁུངས་འཁྱོལ་ངེས་ཤིག་བསླབ་ན་ཡག་བགྱི་རེད། ཁྱེད་རང་གིས་བོད་ཡིག་མི་ཤེས་ཟེར་བ་མིན་ཡང་། དཔེ་ཆ་བསྐྱར་ཀློག་བརྒྱབ་ནས་དབུ་ཕར་མཛོད་འདུལ་ཚོ་ཞིབ་ཆ་མཇལ། དེའི་ནང་ནས་མངོན་པའི་གཞུང་ནས་བཤད་པའི་གྲངས་འདྲེན་མང་པོ་འདི་ཚོ་ལ་གཡེལ་ཆུང་མ་བྱེད་པར་སེམས་ལ་རྡོ་སྒྲིག་པ་ལྟ་བུ་ཞིག་མ་བྱུང་བར་དུ་བལྟ་དགོས་པ་རེད། གྲངས་འདྲེན་འདི་ཚོ་རྒྱ་གར་གྱི་པཎྜིཏ་ཚོ་ཉི་མ་མ་འཁྱོལ་བར་བཟོས་པ་མ་རེད། གྲངས་འདྲེན་བཞི་ཚན་ལྔ་ཚན་དྲུག་ཚན་སོགས་གང་འདྲ་ཞིག་འདུག་ཀྱང་རེ་རེ་ལ་སོ་སོའི་ཁྱད་ཆོས་ཤིག་ཡོད་པ་ཤེས་དགོས། དེ་བཞིན་སོ་སོའི་གོ་རིམ་ཡང་མ་འཆུག་པ་བྱས་ན་མ་གཏོགས། གང་ཡིན་ཟེར་ན་གོ་རིམ་སྒྲིག་སྟངས་ཚུན་ལ་གནད་འགག་ཆེན་པོ་ཡོད་པས། གྲངས་ཀ་ལོན་ཙམ་སེམས་ལ་ཁྱད་ཁྱོར་ངེས་པས་འགྲིགས་བསམ་ནས་བསྡད་ན། ཤེས་རྒྱུ་མང་པོ་ཞིག་ལུས་འགྲོ་ཞིང་། དོན་དང་ཐོབ་བྱའི་རིམ་པ་མང་པོ་འཆོལ་བསྡད་པ་ཞིག་སེམས་ལ་འཇགས་ནས་ཕུགས་སྐྱོན་ཆེན་པོ་ཞིག་ཆགས་འགྲོ་བ་ཡིན་པས་གཟབ་དགོས། ལྷག་པར་རྒྱ་གཞུང་ལ་གོ་བ་གཏིང་ཚུགས་པ་ཨེ་ཆགས་བལྟས་ནས་པོ་ཏི་ལྔ་སོ་སོའི་རྩ་བ་དང་རང་འགྲེལ། སོ་སོའི་ཐད་ཀྱི་རྒྱ་འགྲེལ་ལ་བལྟ་བ་སོགས་བྱས་ན། དང་པོ་ཁག་ཙམ་ཡོང་ངེས་ཀྱང་གང་མཚམས་ནས་གོ་བ་མེ་ནང་དུ་མར་ཁུ་བླུག་པ་ལྟ་བུ་ཡོང་རྒྱུ་འདུག དེ་བཞིན་བོད་སྐད་དུ་བསྒྱུར་བའི་རྒྱ་གཞུང་ཚོའི་ཚིག་གི་འགྲོ་སྟངས་ལ་ཡང་ཞིབ་ཚགས་བྱེད་དགོས་པས། དེ་ཚོའི་རིགས་ལ་སྐྱེས་རབས་དང་། འདུལ་བ་དང་། ཀླུ་ཀུན་ཏུ་དགའ་བའི་ཟློས་གར་ལ་སོགས་པ་མཇལ་ན། རྒྱ་གཞུང་གི་ཚིག་གི་ཁོག་ལྟ་བུ་ལོན་ནས་ཕན་ཚུན་གཅིག་གྲོགས་གཅིག་ལ་སོང་ནས་ཕན་པ་ཆེན་པོ་ཡོང་འདུག དགེ་བཤེས་ཤེས་རབ་ལགས་བོད་ཀྱི་མཁས་པས་རྩོམ་པའི་བསྟན་བཅོས་ལ་ཐུགས་འདྲིས་ཆེ་བ་མ་གཏོགས། རྒྱ་འགྲེལ་དང་རྩ་བ་སོགས་ལ་གཏུགས་དགོས་ན་དོན་རྩ་མཐིལ་ཕྱིན་ལོན་གནང་བགྱི་མེད། ཕྱོགས་གཞན་ཞིག་ནས་བལྟས་ན། ང་རང་ཚོའི་སྔར་གྱི་ལོ་ཙཱ་བ་ཚོས་ལུས་སྲོག་འབེན་ལ་བཙུགས། ལོ་ཡུན་མང་པོའི་རིང་ལ་པཎ་གྲུབ་ཚོའི་ཞབས་ལ་གཏུགས། དཀའ་སྤྱད་དེ་ཙམ་མཛད་ནས་སཾསྐྲིཏ་ནས་སྤར་ལ་སྤར་བཏབ་པ་ལྟ་བུར་བསྒྱུར་གནང་བའི་བཀའ་བསྟན་བཅོས་ཚོ་ལ་མདོ་སྔགས་རིག་གནས་དང་བཅས་པའི་རྨང་གཞི་དེ་ཡིན་བསམ་ནས་མིག་ཟུར་ཙམ་ཡང་མ་བལྟས་པར། ཡིག་ཆ་ཞིག་གི་ཕྱོགས་སུ་ལྷུངས། རྒྱབ་གནོན་ཡོང་ཆེད་ལ་རྗེ་ཡབ་སྲས་ཀྱི་གསུང་ཐོར་བུ་རེའི་ལུང་འདྲེན་བྱེད། ཡིག་ཆ་བདག་པོའི་གསུང་ནས་ལུང་དྲངས་ན། འདོད་ལན་མ་གཏོགས། དགོངས་གཞི་ཙམ་ཡང་ལེན་མི་ཆོག་པ་འདི་འདྲ་ཞིག་གིས། མ་རྟོགས་དང་ལོག་རྟོགས་ཀྱི་མུན་པ་ག་ནས་སེལ་ནུས།” ༢ཞེས་གསུངས་སོ། །
མ་བསྐུལ་དང་བླངས་ཀྱིས་ཡིག་སྒྱུར་བྱ་བར་སྤྲོ་བས་ཞུགས་དགོས་པ་དེ་ནི་ལོ་ཆེན་དགེ་འདུན་ཆོས་འཕེལ་གྱི་ཡིག་སྒྱུར་དགོངས་པ་གལ་ཆེན་ཞིག་ཡིན། ཡིག་སྒྱུར་གྱི་བྱ་བ་འདི་ལ་གཞན་གྱིས་བསྐུལ་ནས་གཞན་ངོར་བསྒྱུར་བ་ཞིག་དང་། མ་བསྐུལ་དང་དུ་བླངས་ཏེ་རང་འགུལ་གྱིས་བསྒྱུར་བའི་ལས་ལ་ཞུགས་པ་ཞིག་སྟེ་གཉིས་ཡོད་པ་ལས། དེ་གཉིས་དབར་ཕྱོགས་མང་པོའི་ཐད་ནས་དགེ་མཚན་ཤིན་ཏུ་མི་འདྲ་བ་ཐོན་ཐུབ།
འབྲེལ་ཡོད་ཀྱི་སྐད་དང་ཡི་གེ་མང་པོ་ཤེས་དགོས་པའི་ཐད་༼དགེ་འདུན་ཆོས་འཕེལ་གྱི་ལོ་རྒྱུས་༽ནང་། “ལར་ནས་ང་ཚོའི་ལོ་ཙཱ་བ་དེ་ཚོ་ག་འདྲ་རེད། ཆག་སྒོ་ཆག་སྒོ། འདུལ་བའི་ལོ་རྒྱུས་དེ་ཚོའི་ནང་མཇལ་དུས། དྲུག་སྡེ་དང་། བཅུ་གཉིས་སྡེ་དང་དགེ་སློང་མ་སྦོམ་དགའ་མོ་དང་། ཉེར་དགའི་བྱེད་སྟངས་དེ་ཚོ་མངོན་སུམ་མཐོང་རྒྱུ་ཡོད་པ་འདྲ་པོ། དེ་འདྲའི་བསྒྱུར་ལེགས་པོ། དེ་ཚོ་ལ་བལྟ་དུས་དེ་དུས་ཀྱི་ལོ་ཙཱ་བ་རྣམ་པས་སཾསྐྲིཏ་ཙམ་མ་ཟད། གང་དུ་ཕེབས་སའི་རྒྱ་གར་གྱི་ཡུལ་སོ་སོའི་སྐད་རིགས་ཀྱང་ཕུགས་འཕེར་མཁྱེན་ནས། རྒྱ་གར་བ་མཆོག་དམན་ཐམས་ཅད་ཀྱི་བསམ་ཚུལ་དང་སྤྱོད་ཚུལ་ཚང་མའི་སྡིངས་ལོན་ནས་མ་མཐའ་ཚིག་ཕལ་པ་ཡན་ལ་ཞིབ་ཚགས་མཛད་དེ། དེ་ཐོག་བོད་ཀྱི་སྐད་ཡིག་ལ་ཡང་བྱང་ཆུབ་པ་ཞིག་བསྒྱུར་གནང་བ་ཡིན་ཙང་། འགྱུར་སྤུས་དག་པོ་ཡོང་བའི་རྩ་བ་ཕྱི་ནང་གཉིས་ཀའི་སྐད་ཡིག་ལ་ཐོགས་པ་མེད་པ་ཡོད་པ་དེ་གས་རྒྱུ་བྱས་ནས་བྱུང་བ་རེད། དེ་འདྲའི་འགྱུར་སྟངས་མཁས་པ། དཔེར་ན། ཉེར་དགའི་བྱེད་སྟངས་དེ་ཚོ་ལ་བལྟ་དུས། ཁོ་དྲན་རྒྱུ་རྒོད་པོ། གཡོ་ཚ་པོ། ཁ་རྒོད་པོ་དེ་འདྲ་ལ་ཨང་སྙམ་པ་དང་། ཁོས་བུ་མོ་ཆུང་ཆུང་ཞིག་ལ་འོ་བྱས་ནས་རེག་པའི་སྟུང་བ་བྱུང་སྐབས། གཞན་པས་འཕྱ་དུས་ད་དུང་ཁོས་ཁ་རྒྱགས་པ་ག་ཚད་བཤད་འདུག་ཅེས། དེའི་ཐད་ཀྱི་བརྡ་རྙིང་ཤ་ར་ར་གསུངས་ནས། དེང་སང་བྱས་ན་ཁོའི་ལབ་སྟངས་འདི་འདྲ་ཞིག་རེད་པ་ཞེས་གསུངས།” ༣ཞེས་འཁོད་ཡོད།
ཡི་གེ་བསྒྱུར་བའི་དམིགས་ཡུལ་གསལ་པོ་དང་། སྤྱི་ཚོགས་སྤྱི་ལ་ཕན་འདོད་ཀྱི་བསམ་པ་རླབས་ཆེན་ཞིག་དང་། དེ་ལ་བརྟེན་ནས་བྲག་ལ་ཨི་ཁུང་འབིགས་པའི་སྙིང་རུས་དང་བརྩོན་འགྲུས་ཤིག་ཡོད་དགོས་པའི་ཐད་༼ དགེ་འདུན་ཆོས་འཕེལ་གྱི་ལོ་རྒྱུས་ ༽ ནང་། “གང་ལྟར་སིངྒ་ལར་ལོ་གསུམ་ཙམ་བཞུགས་རིང་བཀའ་བསྟན་བཅོས་མང་པོ་ལ་གཟིགས་རྟོགས་མཛད་དེ། གནས་བརྟན་པ་རྣམས་ལ་གྲགས་ཆེ་བའི་མདོ་མང་པོ་དང་། ལྷག་པར། བོད་ཙམ་མ་གཏོགས་གཞན་འཇིག་རྟེན་འདིའི་ཁྱོན་ལ་ནང་པ་སངས་རྒྱས་པ་ཡིན་ནོ་ཅོག་ཐམས་ཅད་ཀྱིས་སྟོན་པའི་བཀའི་ཉིང་ཁུ་ལྟ་བུར་བརྩི་བའི་ཚོམས་སམ། ཆོས་ཀྱི་ཚིགས་སུ་བཅད་པ་དེ་བོད་སྐད་དུ་བསྒྱུར་བར་མཛད།” ༤ཅེས་གསུངས་པ་ལྟར། ཆོས་ཀྱི་ཚིགས་སུ་བཅད་པ་དེ་བོད་ཡུལ་ཁོ་ན་ཕུད་པའི་འཇིག་རྟེན་འདིའི་སྟེང་གི་ནང་པ་སངས་རྒྱས་པ་ཐམས་ཅད་ཀྱིས་སྟོན་པའི་བཀའི་སྙིང་བཅུད་དུ་བརྩི་བ་དེའི་ཐད། བོད་པས་ངོས་འཛིན་གསལ་པོ་དེ་ཙམ་མ་བྱུང་བ་དེ་གསལ་པོ་ཡོང་བ་བྱ་ཕྱིར་བསྒྱུར་གནང་མཛད་པ་དེ་བསམ་བློ་བ་ཆེན་པོ་ཞིག་གི་མཛད་འཕྲིན་རང་དུ་སྣང་ངོ་། །
ཡང་༼དགེ་འདུན་ཆོས་འཕེལ་གྱི་ལོ་རྒྱུས་༽ནང་། “དེང་སང་རང་རེ་བོད་པ་མང་ཆེ་བའི་བསམ་བློའི་ནང་། ལོ་ཙཱ་བ་ཟེར་མཁན་དེ་ལ་རིག་པ་དང་། གསེར་དང་བརྩོན་འགྲུས་ཏོག་ཙམ་ཡོད་པ་དེ་འདྲ་ཅིག་གིས་འགྲིགས་ཀྱི་རེད་བསམ་གྱི་འདུག་ཀྱང་། ཁོང་རྣམས་ཀྱི་དམིགས་ཡུལ་དེ་ནི་བོད་ཀྱི་བསྟན་པ་དང་སེམས་ཅན་ཁོ་ན་ལ་མཛད། ལོ་ནས་ལོ་བཏུད་དེ་རྒྱ་གར་གནམ་གཤིས་ཚ་པོ་དེ་འདྲ་ཞིག་གི་ནང་དུ་བཞུགས་ཏེ་དཀའ་སྤྱད་མཛད། དེ་དུས་དེང་སང་གི་རྩིས་བྱས་ན། རེལ་ལི་དེ་ནི་གླང་གོག་སྒ་རིག་རེད། མོ་ཊོར་དེ་ནི་རྟ་སྒ་རིལ་རེད། ཆག་སྒོ་ཆག་སྒོ་དེ་འདྲའི་སྙིང་རུས་ཆེན་པོ་ཞེས་གསུངས་ནས་དབུ་དཀྲུག་དཀྲུག་གནང་ནས་བཞུགས་ཀྱི་འདུག” ༥ཅེས་འཁོད་ཡོད་པ་དེ་ནི་ལོ་ཙཱ་བ་ཕུལ་བྱུང་ཞིག་བྱེད་པར། དང་ཐོག་རླབས་ཆེན་གྱི་བསམ་བློ་པ་ཞིག་དང་དཀའ་ཐུབ་པ་ཞིག་ཡིན་དགོས་ཞེས་པའི་དོན་ནོ། གཞན་ཡང་ལོ་ཆེན་འདིས་ནག་མོའི་ཁོལ་གྱི་ཟློས་གར་གྱི་བསྟན་བཅོས་༼བྱ་ལེན་མ་༽བོད་སྐད་དུ་བསྒྱུར་དོན་ཡང་། འཛམ་གླིང་ཟློས་གར་གྱི་ཏོག་ལྟ་བུ་འདི་བཞིན་གཞན་གྱིས་བོད་ཡིག་ཏུ་བསྒྱུར་ན་ཁོང་རང་གིས་བསྒྱུར་བ་ནང་བཞིན་གྱི་ཚིག་སྙན་པོ་འདི་འདྲ་འབྱུང་མི་ཐུབ་དགོངས་ནས་བསྒྱུར་བ་ཡང་དགོངས་པ་ཅན་གྱི་མཛད་པ་རང་ངོ་། །
ཡུལ་དངོས་ལ་ངོ་བསྐྱོད་ཀྱིས་ཉམས་ཞིབ་མཐར་ཕྱིན་བྱེད་དགོས་པའི་དགོངས་པའི་ཐད། ལོ་ཆེན་དགེ་འདུན་ཆོས་འཕེལ་གྱིས་རྩི་ཤིང་དང་མེ་ཏོག་ལ་སོགས་པའི་མིང་བོད་སྐད་དུ་བསྒྱུར་དུས་རབ་བྱུང་ན་མ་ཡིག་གི་ནང་དུ་འཕྲད་པའི་མིང་དེ་འདྲ་ཐོན་སའི་ཡུལ་དེ་རང་ལ་ཕྱིན་ནས་དངོས་པོ་དེ་ཇི་འདྲ་ཞིག་ཡོད་པར་བལྟས་པས་མ་ཚད་དེ་ལ་ཉམས་ཞིབ་མཐར་ཕྱིན་པ་བྱས་རྗེས། འདིའི་དོན་འདི་རང་ལས་མ་འདས་སྙམ་པའི་ངེས་ཤེས་བརྟན་པོ་སྐྱེས་ཚེ་གཞི་ནས་བོད་སྐད་ལ་བསྒྱུར་དགོས་པར་བཞེད་པའོ། །
གསུམ་པ། དོན་ཐོབ་གཙོ་བོར་བསྒྱུར་བ་དང་ཚིག་ཟིན་ལ་བསྒྱུར་བའི་དགོངས་པ།
དེ་ཡང་ལོ་ཆེན་དགེ་འདུན་ཆོས་འཕེལ་གྱིས་ཡི་གེ་བསྒྱུར་བའི་རྩ་དོན་དང་། ཐབས་དམ་པ། དོ་སྣང་བྱེད་དགོས་པ་སོགས་ཀྱི་ནང་དོན་ཚང་མ་འབྲུ་རེ་རེ་བཞིན་ཚིག་ཟིན་ལ་བསྒྱུར་བ་དང་། དོན་ཐོབ་གཙོ་བོར་བསྒྱུར་བ་ཞེས་པ་གཉིས་ཀྱི་ནང་དུ་འདུ་གནང་མཛད་པ་ནི་ཁོང་གི་ཐུན་མིན་གྱི་དགོངས་པ་གལ་ཆེན་ཞིག་ཡིན་ཞིང་། དེ་ནི་དེང་རབས་ཡིག་སྒྱུར་རིགས་པའི་གཞུང་ལུགས་ནང་གི་同化དང་异化བྱ་བའི་ཐ་སྙད་གསར་པ་གཉིས་བྱུང་བ་དེ་གཉིས་དང་དོན་མཚུངས་ཡིན། ལ་ལས་同化ཞེས་པ་རང་འགྱུར་དང་། 异化ཞེས་པ་གཞན་འགྱུར་དུ་བསྒྱུར་འདུག་པ་ནི་ཡིག་སྒྱུར་གྱི་གཞུང་དོན་ལ་གོ་བ་མ་ལོན་པའི་རྟགས་ཡིན་པ་དང་། དེ་ལས་ལོ་ཆེན་དགེ་ཆོས་ཀྱིས་གསུངས་པའི་དོན་ཐོབ་གཙོ་བོར་བསྒྱུར་བ་དང་། ཚིག་ཟིན་ལ་བསྒྱུར་བ་ཞེས་པ་དོན་ལ་གནས་པར་སྣང་ངོ་། །
ཚིག་ཟིན་ལ་བསྒྱུར་ན་ཚིག་སྙན་པོ་ཡོང་ཡང་གོ་དཀའ་ཙམ་ཡོང་བ་དང་། དོན་ཐོབ་གཙོ་བོར་བསྒྱུར་ན་གོ་བདེ་བ་འབྱུང་བར་གསུངས་ཤིང་། བོད་ཀྱི་སྔ་བསྒྱུར་ལོ་ཆེན་རྣམས་ཀྱིས་དོན་ཐོབ་གཙོ་བོར་བསྒྱུར་བ་དང་། ཕྱིས་ཀྱི་ལོ་ཆེན་ཚོས་ཚིག་ཟིན་ལ་བསྒྱུར་བར་བཞེད། ཁོང་ནི་དོན་ཐོབ་གཙོ་བོར་བསྒྱུར་བ་ལ་མཉེས་པོ་ཡོད་ཀྱང་། དོན་ཐོབ་གཙོ་བསྒྱུར་དང་ཚིག་ཟིན་ལ་བསྒྱུར་བ་གཉིས་ཀར་མཁས་ཤིང་། ལོ་ཆེན་དགེ་འདུན་ཆོས་འཕེལ་གྱི་དགོངས་པ་འདིའི་དམིགས་ཡུལ་གཙོ་བོ་ནི་འགྱུར་དག་གོ་བདེ་པོ་ཡོང་ཕྱིར་ཡིན་པ་སྟེ། གོ་བདེ་པོ་ཡོང་བ་བྱ་རྒྱུ་དེ་ཁོང་གི་རྩ་བའི་དགོངས་པ་ཞིག་ཡིན། དེ་ཡང་ཁོང་གིས་“བརྩམས་པ་རྣམས་མངོན་བརྗོད་ཀྱིས་མང་པོ་བཅིངས་མི་ཉན། དོན་འདུས་ལ་ཁ་གསལ་གོ་བདེ་བ་ཞིག་དགོས། རྩོམ་རབ་ལན་གཅིག་གིས་གོ་ཟེར་བ་ཡིན་མོད། རྩོམ་ཟེར་བ་ཆགས་ལོའི་བདེ་སྨོན་འདྲ་བ་ཞིག་དགོས་ཨང་” ༦ཞེས་གསུངས་ཡོད་པ་འདི་ནི་ལོ་ཆེན་ཁོང་གིས་མཁས་པའི་བྱ་བ་རྣམ་གསུམ་གྱིས་གཙོས་པའི་བྱ་བ་མཐའ་དག་ལ་འཛིན་པའི་རྩ་བའི་དགོངས་པའི་གྲས་ཤིག་ཡིན་པ་ལས་ཡིག་སྒྱུར་གཅིག་པུའི་དགོངས་པ་མིན། འོན་ཏེ་ད་ཆ་རང་རེས་ཚིག་ཟིན་ལ་གཙོ་བོར་བསྒྱུར་ཁུལ་བྱེད་པ་དེ་ནི་སློབ་གྲྭའི་སྐད་ཡིག་དགེ་རྒན་གྱིས་ཚིག་འགྲེལ་བཀླགས་ནས་སློབ་ཚན་འཁྲིད་ཚར་བར་བརྩི་མཁན་ཞིག་དང་འདྲ་བར་མངོན་ཏེ། དགེ་རྒན་དེ་འདྲའི་སློབ་མས་ཚིག་ཙམ་ལས་གཞུང་རང་ལ་གོ་བ་ཆ་ཚང་བ་ཕར་ཞོག ཟུར་ཙམ་ཞིག་ཀྱང་ལོན་ཐབས་བྲལ། ལོ་ཆེན་དགེ་འདུན་ཆོས་འཕེལ་གྱིས་ལེགས་སྦྱར་བང་མཛོད་དུ། “སློབ་སྤྲིང་ལས།……ཟླ་བའི་དཀྱིལ་འཁོར་རྒྱས་པས་ཉེ་བར་བརྒྱན་བྱས་ཤིང་། །སྐེད་ཆིངས་ཆར་ཆེན་སྤྲིན་གྱིས་འཁྲིགས་པས་འཁྱུད་གྱུར་བ། །རི་རྩིའི་ནགས་ཀྱི་མཐོང་དེར་ཆགས་པ་མེད་པར་ནི། །རླུང་ལྟར་གཡོ་བའི་རང་བཞིན་ཚེ་གཏུགས་སྐལ་པ་ཆེ། །འདི་ཚིག་ཟིན་ལྟར་བྱས་ན། ཉེ་འཁོར་དུ་རི་བོང་ཅན་གྱི་དཀྱིལ་འཁོར་རྒྱས་པས་བརྒྱན་པ། ཆུ་ཡིས་ལྕི་བའི་ཆུ་སྟེར་གྱི་སྐེད་ཆིངས་ངལ་བསོ་བ། འདུ་འཛི་བྲལ་བའི་རི་བོའི་རྭ་སྟེང་། ནགས་ཀྱི་མཐོངས་ན། རླུང་གི་གཡོ་བའི་ངང་ཚུལ་ཅན་གྱི་ཚེ་འཁྲིད་པ་ནི་ཕྱུག་པོའོ། །བྱ་བ་འོ། །དེས་ན་སྔོན་གྱི་འགྱུར་རྣམས་ན་ཆུ་འཛིན། དབྱིག་འཛིན། རི་བོང་ཅན་སོགས་ཀྱི་མངོན་བརྗོད་རྣམས་སྤྲིན་དང་། ས་དང་། ཟླ་བ་སོགས་སུ་བསྒྱུར་བ་རྐྱང་ཡོད་པ་གོང་ཀུན་ཏུ་གསལ། ཡང་སློབ་སྤྲིང་ལས།……བུད་མེད་ཡན་ལག་དྲི་ང་རུལ་བ་མི་སྡུག་པ། །པད་མ་ཟླ་བ་ཨུཏྤལ་དག་ཏུ་སྙོམས་བྱེད་པ། །སྙན་དངགས་མཁན་གྱི་རྫུན་དེའི་འབྲས་བུ་མི་ཟད་པ། །དེ་དག་དེ་ཡི་མངལ་གནས་འཇུག་པ་དེ་ཡིན་ནོ། །ཡང་།……ཉེ་དུ་འཁོར་བའི་རྒྱ་མཚོའི་ཁོངས་སུ་ཆུད་གྱུར་པ། །ཀླུང་གི་ནང་དུ་ལྷུང་བ་ལྟ་བུ་སྣང་བཞིན་དུ། །སྐྱེ་ཤི་ཕོངས་པས་ངོ་མ་ཤེས་པ་དེ་བོར་ནས། །གལ་ཏེ་གཅིག་ཐར་བྱེད་ན་དེ་ལས་ཁྲེལ་བོར་མེད། འདིའི་རྐང་པ་གསུམ་པ་སྦྱོར་རྒྱུ་མི་གཏུབ། སློབ་སྤྲིངས་ཀྱི་ཚིག་འདི་རྒྱ་གར་བའི་རྣ་བ་ལ་ཤིན་ཏུ་མཛེས་པའི་རིགས་ཡིན། ཡང་།……ཉི་མ་རླབས་ཆེན་རྟ་བཞོན་རྒྱུ་བ་སྣང་བྱེད་གང་ཡིན་དང་། །ཁུར་ལ་མི་བརྩི་ས་ཡི་འཇིག་རྟེན་འདེགས་པ་གང་ཡིན་ཏེ། །རང་དོན་འགའ་མེད་ཆེན་པོ་རྣམས་ཀྱི་རང་བཞིན་དེ་འདྲ་སྟེ། །དེ་དག་འཇིག་རྟེན་ཕན་དང་བདེ་བའི་རོ་ལ་གཅིག་ཏུ་གཞོལ། །དེས་ན་སློབ་སྤྲིངས་ཀྱང་སྔོན་གྱི་འགྱུར་དོན་ཐོབ་གཙོ་བོར་མཛད་པ་དེའི་རིགས་ཡིན་ལ། ཚིག་འདི་འདྲ་ལ་ཕྱིས་ཀྱི་སྲོལ་བཞིན་འབྲུ་དོན་རེ་རེ་ནས་བསྒྱུར་ཏེ་གོ་རིམ་ཅུང་བསྣོལ་ཡང་གོ་ཐུབ་ཙམ་ཞིག་འོང་མཆི་སྟེ། དཔེར་ན།……རྟག་ཏུ་འཇིག་རྟེན་འདེགས་ལ་གང་གིས་ཁུར་དུ་མི་བརྩི་དབྱིག་ལྡན་མ། །དེ་ནི་རང་དོན་འགའ་ཞིག་མིན་གྱི་འདི་ཙམ་ཆེན་པོ་རྣམས་ཀྱི་གཤིས། །གང་གིས་འཇིག་རྟེན་ཕན་བདེའི་རོ་ནི་མཐའ་གཅིག་མྱོང་བ་དེ་དག་ཡིན། །ཅེས་པ་ལྟ་བུའོ། འདི་ལྟར་བྱས་ཚེ་ཚིག་འབྲུ་རེ་རེ་སྦྱོར་ཐུབ་ཅིང་། སྙན་དངགས་བཟང་དུ་སོང་བ་འདྲ་ཞིག་བྱུང་ཡང་། དོན་ལ་གོ་དཀའ་རུ་བཏང་བ་ལགས། ཚིགས་བཅད་འདི་སྔར་ལས་ཀྱང་གོ་བདེར་བྱས་པ་ཞིག པད་མ་བཀའ་ཐང་ཤེལ་བྲག་མར། རང་དོན་འགའ་མེད་ཆེན་པོའི་རྣམ་ཐར་ཏེ། །ཉི་མ་རླབས་ཆེན་རྟ་ཞོན་རྒྱུ་བར་བྱེད། །ཁུར་ལ་མི་རྩེགས་ས་ཡིས་འཇིག་རྟེན་འདེགས། །བྱ་བ་ཞིག་ཡོད། དེས་ན་རྙིང་མའི་མཁས་པ་འགའ་ཞིག་གི་གསུང་ལས། སྔོན་དུས་ཀྱི་སྤྲུལ་པའི་ལོ་ཆེན་དེ་ཀུན་རྩ་འགྲེལ་ཐམས་ཅད་ཀྱི་དགོངས་པ་ཐུགས་སུ་ཆུད་ནས་གང་བདེར་བསྒྱུར་བས། ཚིག་འཇམ་ལ་དོན་གསལ། ཕྱིས་ཀྱི་ལོ་ཙཱ་བ་བལ་ཡུལ་དུ་དགུན་ཐོག་བསྡད་པ་དག་གིས་འབྲུ་རེ་རེ་ལ་ཞིབ་ཚགས་ཆེ་བ་སྐད་བསྒྱུར་ཏེ། ཚིག་གྱོང་ཞིང་དོན་གྱི་ངོ་བོ་གོ་དཀའ་བར་སོང་ཞེས་བཤད་པ་ཡང་། རྣམ་པ་གཅིག་ཏུ་ན་ཐུགས་མད་པ་ཡིན་སྙམ། འདི་རྣམས་ཞིབ་ཏུ་བརྟགས་ན་འུ་ཅག་གིས་རྒྱ་དཔེ་མ་མཐོང་བཞིན་བོད་ཚིག་ལ་བལྟས་ནས་འདིའི་སྐད་དོད་འདི་འདྲ་ཡིན་ཅེས་མོ་བཏབ་པ་དེ་ཡང་མཐའ་གཅིག་ཏུ་བདེན་པ་མེད་ལ། དེ་ལས་ཀྱང་བོད་གཞུང་ལ་བལྟས་ནས་རྒྱ་སྐད་དུ་ཕར་བསྒྱུར་བ་སྐད་དུ་བྱ་བ་འདི་ལ་ཤིན་ཏུ་ཡང་ཉེན་ཆེ་སྟེ།” ༧ཞེས་གསུངས་སོ། །
འདིར་བོད་གཞུང་ལ་བལྟས་ནས་རྒྱ་སྐད་དུ་ཕར་བསྒྱུར་བ་འདི་ཉེན་ཚབས་ཤིན་ཏུ་ཆེ་བ་ཞིག་ཏུ་གསུངས་འདུག་ནའང་། ད་ཆ་རྒྱ་གར་གྱི་ན་ལེན་དྲ་སློབ་གྲྭ་ཆེན་མོ་སོགས་སུ་བོད་ཡིག་ནས་ལེགས་སྦྱར་སྐད་ལ་ནང་པའི་གཞུང་མང་པོ་བསྒྱུར་དང་སྒྱུར་བཞིན་པ་ཡིན་སྐད་ཐོས་རྒྱུ་འདུག་པ་མ་ཟད། བསྒྱུར་བ་དག་ཀྱང་སྤུས་ཤིན་ཏུ་དག་པོ་ཡོད་པར་ཡང་གྲགས། གཞན་ཡང་དེ་ལྟའི་སྔོན་དཔེ་འཇིག་རྟེན་འདི་ན་མང་དུ་མཆིས་ཏེ། དཔེར་ན། གནའ་བོའི་ཀེ་རི་སེའི་རླབས་ཆེན་གྱི་མཚན་ཉིད་རིག་པ་བ་ཨེ་རུའེ་སི་ཏོ་ཏེས་ཀེ་རི་སེའི་ཡི་གེ་ནས་བརྩམས་པའི་གསུང་རྩོམ་མཐའ་དག་དུས་དབང་གིས་ཡོངས་སུ་འཇིག་ནས་སྐབས་ཤིག་རིང་སུས་ཀྱང་མི་ཤེས་པར་གྱུར་མོད། ཨི་ཀྲ་ལིའི་རིག་རྩལ་བསྐྱར་དར་གྱི་སྐབས་སུ་ཨ་རབ་ཀྱི་སྐད་དུ་བསྒྱུར་བའི་གང་དེའི་གསུང་རྩོམ་འགྱུར་མ་གཏེར་ནས་རྙེད་པ་དག་སླར་ཀེ་རི་སེ་དང་། ཨི་ཀྲ་ལི་ལ་སོགས་པའི་ཡི་གེར་ཕྱིར་བསྒྱུར་བས། ད་གཟོད་ཁོང་གི་རླབས་ཆེན་དགོངས་པའི་འོད་ཟེར་ནུབ་ཕྱོགས་རྒྱལ་ཁབ་ཁག་གི་ས་གཞི་ཆེན་པོར་སླར་ཁྱབ་ནས། ནུབ་ཕྱོགས་པ་ཡར་རྒྱས་གོང་འཕེལ་འགྲོ་བར་ནུས་པ་བསམ་གྱིས་མི་ཁྱབ་པ་ཐོན་པ་བཞིན་ནོ། །
ལོ་ཆེན་དགེ་འདུན་ཆོས་འཕེལ་གྱིས་གསུངས་པའི་དོན་ཐོབ་གཙོ་བོར་བསྒྱུར་བ་དང་ཚིག་ཟིན་ལ་བསྒྱུར་བ་གཉིས་སོ་སོར་མངའ་བའི་ཁྱད་ཆོས་སམ། དགེ་སྐྱོན་རྣམས་སྟབས་བདེར་བསྟན་ན་འདི་ལྟ་སྟེ།
༡.དོན་ཐོབ་གཙོ་བོར་བསྒྱུར་ན། འགྱུར་གུ་ཡངས་པ་དང་། ཚིག་འཇམ་པ། དོན་གསལ་བ་བཅས་ཀྱི་དགེ་མཚན་ལྡན་ཡོད་པ་དང་། འགྱུར་ལུགས་དེའི་སྐྱོན་ནི་རྒྱ་སྐད་ལ་སྦྱོར་མི་བདེ་བ་སྟེ། རྒྱ་བོད་ཤན་སྦྱར་གྱི་བལྟ་དེབ་འདྲ་པོ་ཞིག་བཟོ་མི་བདེ་བ་དང་། བོད་ཡིག་ལ་བསྒྱུར་ཟིན་པ་རྣམས་སླར་ལེགས་སྦྱར་ལ་བསྒྱུར་ན་ཐོག་མའི་མ་ཡིག་ལྟར་མི་འབྱུང་བའོ།
༢.ཚིག་ཟིན་ལ་བསྒྱུར་ན། སྙན་དངགས་བཟང་དུ་སོང་བ་འདྲ་བ་སྟེ། མ་ཡིག་གི་རྩོམ་གཤིས་མ་ཉམས་སོར་གནས་ཡོང་བ་དང་། ལེགས་སྦྱར་གྱི་གཞུང་དང་ཐད་ཀ་ཐད་ཀར་སྦྱོར་བདེ་བ། རྒྱ་བོད་ཤན་སྦྱར་གྱི་བལྟ་དེབ་འདྲ་པོ་བཟོ་བདེ་བ། བོད་ཡིག་ལ་བསྒྱུར་ཟིན་པ་རྣམས་སླར་ལེགས་སྦྱར་གྱི་ཡི་གེར་བསྒྱུར་དུས། ཐོག་མའི་ལེགས་སྦྱར་གྱི་མ་ཡིག་ལྟར་འབྱུང་བདེ་བའི་དགེ་མཚན་ཡང་ཡོད་པ་དང་། འགྱུར་ལུགས་དེའི་སྐྱོན་ནི། དོན་གྱི་ངོ་བོ་གོ་དཀའ་རུ་འགྲོ་བ་དང་། ཚིག་གྱོང་དུ་འགྲོ་བ་དེའོ། །
འོན་ཏེ་གཙོ་བོ་སྒྱུར་མཁན་གྱི་ཆུ་ཚད་དང་སྒྱུར་རྩལ་བཟང་ལོས་ལའང་བལྟ་རྒྱུ་ཡོད་དེ། འབྲུ་རེ་རེ་བཞིན་ཚིག་ཟིན་ལ་བསྒྱུར་ལེགས་པོ་བྱུང་ན་སྙན་དངགས་བཟང་དུ་སོང་བ་ལྟ་བུ་ཞིག་ཡོང་བ་དགེ་འདུན་ཆོས་འཕེལ་གྱིས་ཀྱང་བཞེད་ལ། མ་ཡིག་གི་རྩོམ་ལུས་ཀྱི་ཕྱིའི་རྣམ་པ་ཚུད་པའི་དང་པོའི་རྩོམ་ཉམས་སམ་རྩོམ་གཤིས་ཁྱད་ཆོས་མ་ཉམས་པ་ཡོང་གི་ཡོད་པར་སྣང་སྟེ། དཔེར་ན་༼སྤྲིན་གྱི་ཕོ་ཉ་༽ལྟ་བུའོ།།
ཕྱིས་ཀྱི་ཚིག་ཟིན་ལ་སྒྱུར་མཁན་ལོ་ཆེན་མང་པོའི་དམིགས་ཡུལ་ཡང་མ་ཡིག་གི་རྩོམ་ཉམས་སམ་རྩོམ་གཤིས་ཁྱད་ཆོས་དེ་མི་ཉམས་པའི་ཆེད་དུ་ཡིན་ལ། དེ་ཡིག་སྒྱུར་གྱི་འཕེལ་འགྲོས་དང་ཡང་ཤིན་ཏུ་ནས་མཐུན་པར་སྣང་ངོ་། དེ་ཡང་ཡིན་ཏེ་རྒྱལ་ཁབ་དང་མི་རིགས་གང་འདྲ་ཞིག་ཡིན་རུང་། དེས་ཡུལ་གཞན་ནས་རིག་གནས་གསར་པ་ཞིག་ཚུར་ལེན་དུས། ཡིག་སྒྱུར་ལ་མི་བརྟེན་ཐབས་མེད་ཡིན་པ་དང་། ཡིག་བསྒྱུར་དེ་ཡང་དུས་རིམ་མི་འདྲ་བ་གཉིས་བརྒྱུད་དགོས་པ་སྟེ། ཐོག་མར་ངོ་སྤྲོད་རོབ་ཙམ་སྐབས་ཀྱི་ཡིག་སྒྱུར་དུས་རིམ་དང་། ཁྱོན་ཡོངས་ནས་ངོ་སྤྲོད་དང་ཞིབ་འཇུག་རྒྱ་ཆེ་གཏིང་ཟབ་བྱེད་པའི་ཡིག་སྒྱུར་གྱི་དུས་རིམ་གཉིས་དེ་ཡིན། ཡིག་སྒྱུར་གྱི་དུས་རིམ་དང་པོའི་ནང་གི་བདེའི་ཕྱིར་དོན་ཐོབ་གཙོ་བོར་བསྒྱུར་གྱི་ཡོད་པ་སྟེ། དཔེར་ན། བཻ་རོ་ཙ་ནས་བོན་ཆོས་འདྲེས་མར་བསྒྱུར། ཞེས་གྲགས་པ་ལྟར་ཡིན་པ་དང་། ཡིག་སྒྱུར་གྱི་དུས་རིམ་གཉིས་པའི་ནང་མ་ཡིག་གི་ཁྱད་ཆོས་མི་ཉམས་པའི་ཆེད་དུ་གཙོ་བོ་ཚིག་ཟིན་ལ་བསྒྱུར་གྱི་ཡོད་པ་རེད། རང་རེ་བོད་ལ་ནང་པའི་དཔེ་ཆ་བསྒྱུར་བའི་ཐད་ལ་ཡང་དུས་རིམ་དེ་གཉིས་ཀ་བརྒྱུད་ཡོད་ལ། དུས་རིམ་དང་པོ་སྟེ་སྔ་འགྱུར་གྱི་སྐབས་སུ་དོན་ཐོབ་གཙོ་བོར་བསྒྱུར་བ་དང་། དུས་རིམ་གཉིས་པ་སྟེ་ཕྱི་འགྱུར་གྱི་སྐབས་སུ་ཚིག་ཟིན་ལ་གཙོ་བོར་བསྒྱུར་གནང་མཛད་པ་དེ་ནི་ཡིག་བསྒྱུར་འཕེལ་འགྲོས་དང་ཡོངས་སུ་མཐུན་པ་ཞིག་ཡིན་སྟབས། ལོ་ཆེན་དགེ་འདུན་ཆོས་འཕེལ་གྱིས་ཡིག་སྒྱུར་འཕེལ་འགྲོ་ཀྱི་ཆོས་ཉིད་དེ་གཟིགས་རྟོགས་ཐུབ་པ་བྱུང་བ་དེ་ནི་ཚན་རིག་དང་ཡོངས་སུ་མཐུན་ལ། བོད་ཀྱི་ཡིག་སྒྱུར་རིག་པའི་ཐད་བྱས་རྗེས་ཤིན་ཏུ་ཆེ་བ་ཞིག་འཇོག་སྣང་མཛད་པ་རང་རེད།
ཡིག་སྒྱུར་གྱི་དུས་རིམ་དང་པོའི་སྐབས་སུ་དོན་ཐོབ་གཙོ་བོར་བསྒྱུར་བའི་དམིགས་ཡུལ་གཙོ་བོ་ནི་མ་ཡིག་གི་ནང་དོན་དག་ཤིན་ཏུ་གསལ་ཞིང་གོ་བདེ་པོར་བུ་ཡིག་བལྟ་ཀླག་མཁན་ལ་ངོ་སྤྲོད་མྱུར་སྟབས་སུ་བྱ་ཕྱིར་ཡིན་པ་ལས། མ་ཡིག་གི་རྩོམ་གཤིས་ལ་སོགས་པ་ཉམས་མེད་སོར་གནས་ཐུབ་པ་བྱ་རྒྱུ་དེ་མིན་པ་དང་། ཡིག་སྒྱུར་གྱི་དུས་རིམ་གཉིས་པའི་སྐབས་སུ་ཚིག་ཟིན་ལ་བསྒྱུར་བའི་དམིགས་ཡུལ་གཙོ་བོ་ནི་མ་ཡིག་གི་ནང་དོན་དག་བུ་ཡིག་བལྟ་ཀློག་མཁན་གྱིས་ཚེགས་མེད་དུ་རྟོགས་ཐུབ་མིན་ལ་མ་ལྟོས་པར། མ་ཡིག་གི་ནང་དོན་ཙམ་མ་ཟད། མ་ཡིག་ནང་ཡོད་པའི་རྩོམ་གཤིས་ལ་སོགས་ཆ་འཕྲིན་གཞན་དག་ཡོངས་རྫོགས་བུ་ཡིག་གི་ནང་དུ་ཉམས་མེད་སོར་གནས་ཐུབ་པ་བྱ་རྒྱུ་དེ་ཡིན་པ་གོང་སྨྲོས་དག་ལས་རོབ་ཙམ་ཤེས་ནུས་སོ། །
གཞན་ཡང་འབྲུ་དོན་རེ་རེ་བཞིན་ཚིག་ཟིན་ལ་སྒྱུར་མཁན་ལ་རིགས་གཉིས་ཡོད་དེ། གཅིག་ནི་བསྒྱུར་བའི་དུས་རིམ་གཉིས་པར་སླེབས་པའམ། ཡང་ན་དགོས་པ་པ་ཁྱད་པར་བ་ཞིག་གི་དབང་གིས་དེ་ལྟར་བསྒྱུར་བ་དང་། གཅིག་ཤོས་ནི་ཡིག་སྒྱུར་མ་ཤེས་པའམ། ཆུ་ཚད་ཞན་པའམ། ཉམས་མྱོང་མེད་པའི་དབང་གིས་དེ་ལྟར་བསྒྱུར་དགོས་ཐུག་པ་ཞིག་ཡིན་ཏེ། དོན་ཐོབ་གཙོ་བོར་བསྒྱུར་རྒྱུ་དེ་ནི་ལོ་ཙཱ་བ་མཁས་པས་མ་གཏོགས་བསྒྱུར་མི་ཐུབ་ཅིང་། གལ་ཏེ་ཡིག་སྒྱུར་ལ་མི་མཁས་པ་ཞིག་གིས་དོན་ཐོབ་གཙོ་བོར་བསྒྱུར་ཁུལ་བྱས་པ་ཡིན་ན། དེ་ནི་འཆལ་བར་བསྒྱུར་བ་ཞིག་ལས་དོན་ཐོབ་གཙོ་བོར་བསྒྱུར་བ་ཞིག་ནི་མ་ཡིན་པས། དེ་གཉིས་མ་ནོར་བ་བྱ་རྒྱུ་གལ་ཤིན་ཏུ་ཆེའོ། །
ཡང་ལ་ལས་དོན་ཐོབ་གཙོ་བོར་བསྒྱུར་བ་དང་དོན་སྒྱུར་གཉིས་དོན་གཅིག་པ་དང་། ཚིག་ཟིན་ལ་བསྒྱུར་བ་དང་ཐད་སྒྱུར་གཉིས་དོན་གཅིག་ཡིན་ཞེས་སྨྲ་བར་སྲིད་ཀྱང་། དེ་ལྟ་མིན་ཏེ། སྒྲ་སྒྱུར་དང་། དོན་སྒྱུར་དང་། ཐད་སྒྱུར་དང་། ཐད་ལོག་སྒྱུར་དང་བཅས་པ་བཞི་ནི་བསྒྱུར་བའི་ཐབས་ཡིན་པ་དང་། དོན་ཐོབ་གཙོ་བོར་བསྒྱུར་བ་དང་། ཚིག་ཟིན་ལ་བསྒྱུར་བ་གཉིས་ནི་བསྒྱུར་བའི་ལུགས་ཡིན་ནོ། བསྒྱུར་བའི་ལུགས་མི་འདྲ་བ་རེ་ལ་ཐབས་ཙམ་གྱིས་མི་ཚད་པར། ད་དུང་བསྒྱུར་ལུགས་དེ་རང་གི་རྩ་དོན་དང་། བསྒྱུར་ལུགས་དེ་རང་གི་ལམ་མམ་ཡོན་ཏན་ལ་སོགས་པ་ཡང་ཆ་ལག་ཚང་བ་རེ་ཡོད་པ་དང་། དོན་སྒྱུར་ནི་སྒྲ་སྒྱུར་ལ་ལྟོས་པ་དང་། ཐད་སྒྱུར་ནི་ཐད་ལོག་སྒྱུར་ལ་ལྟོས་པ་རྟོགས་སླའོ། །
ལོ་ཆེན་དགེ་འདུན་ཆོས་འཕེལ་གྱིས་དོན་ཐོབ་གཙོ་བོར་བསྒྱུར་བ་དང་། ཚིག་ཟིན་ལ་བསྒྱུར་བའི་ལུགས་གཉིས་དབར་གྱི་འབྲེལ་བ་ཐག་གཅོད་ཡང་དག་པ་བྱེད་དགོས་པའི་གནད་འགག་འགའ་ཡང་གསུངས་པ་འདི་ལྟ་སྟེ།
༡.ཕྱིས་ཀྱི་འབྲུ་རེ་རེ་བཞིན་ཚིག་ཟིན་ལ་སྒྱུར་མཁན་གྱིས་སྔོན་གྱི་ལོ་ཆེན་རྣམས་ཀྱིས་དོན་ཐོབ་གཙོ་བོར་བསྒྱུར་བ་དེ་ལ་ཞུས་དག་དང་བཅོས་བརྒྱབ་པར་ཐུགས་མ་དགྱེས་པ་དེ་ཡང་༼དགེ་འདུན་ཆོས་འཕེལ་གྱི་གསུང་རྩོམ་༽ཞེས་པའི་ནང་། “དེས་ན་ཕྱིས་ཀྱི་སྒྲ་པ་རྣམས། བི ཨཱ ཨནུ་སོགས་པའི་ཉེར་བསྒྱུར་རེ་རེ་ལ་ཞིབ་ཚགས་བྱས་ཏེ་དཔང་ལོ་ལྟ་བུའི་མཁས་པ་དག་གིས་བསྒྱུར་བའང་བཅོས་འདུག་པ་ནི་ཤིན་ཏུ་ཡང་མི་འཚམས་པར་སེམས་སོ་” ༨ཞེས་གསུངས་པ་དེ་ནི་བདེ་གཏམ་ཞིག་ཡིན་ཏེ། ཇོ་ལྟར་རི་གཤམ་ཁོ་ནར་སྡོད་པ་ལས་རི་སྐེད་ཙམ་ཡང་འཛེགས་མ་མྱོང་མཁན་ཞིག་ལ་རི་མཐོན་པོའི་རྩེ་མོའི་ཐད་ཆེ་བཤད་ཆུང་བཤད་བྱེད་པའི་འོས་ཐོབ་གཏན་ནས་མེད་དེ། མི་དེས་རི་མཐོན་པོའི་རྩེ་ཡི་རྣམ་པ་ངོ་མ་རྩ་བ་ནས་མི་ཤེས་པས་སོ། །
༢.ལོ་ཆེན་རེ་རེ་ལ་གཞན་ཀུན་དང་ཤིན་ཏུ་ནས་མི་འདྲ་བའི་རང་རང་གི་བསྒྱུར་ལུགས་དང་ཁྱད་ཆོས་རེ་རེ་འདོན་རྒྱུ་ཡོད་པར་དགོངས་པ་ནི་༼དགེ་འདུན་ཆོས་འཕེལ་གྱི་གསུང་རྩོམ་༽ནང་། “འདིར་ཡང་ལྷ་མོའི་སྐད་དོད་ཨུརྦཤཱི བྱ་བ་དེ། འཆི་མེད་མཛོད་དུ་ལྷའི་སྨད་འཚོང་དབང་ཆེ་ཞེས་བསྒྱུར་བ་ལ། ལོ་ཆེན་（ས་སྐྱ་པ་གྲགས་པ་རྒྱལ་མཚན།—རྩོམ་པ་པོའི་མཆན་）གྱིས་དོ་གལ་མེད་པར་མཛད་དོ། སྤྱིར་ལོ་ཆེན་འདི་དང་། པ་ཚབ་དང་། དཔང་ལོ་གསུམ་གྱིས་བསྒྱུར་ལུགས་ཤིན་ཏུ་འདྲ་ཞིང་། ངོ་མཚར་ཤིན་ཏུ་ནས་ཀྱང་ཆེ། ལོ་ཆེན་རིན་བཟང་གིས་གསང་འདུས་བསྒྱུར་ལུགས་དེ་ཡང་དེ་དག་དང་མི་མཐུན་པ་ཞིག་འདུག ཡར་ཀླུང་གྲགས་རྒྱན་གྱིས་དེ་སུ་གང་དང་ཡང་མི་མཐུན་ཞིང་ཁོང་རང་གི་ལུགས་ཤིག་འདུག ཕྱིས་ཀྱིས་བསྒྱུར་པ་རྣམས་ནི་ཚིག་སྤྱིའི་གོ་བ་ལ་བསམ་བློ་མེད་པར་བྱིངས་འགའ་ཞིག་ལ་བསམ་ནས་བསྒྱུར་བ་སྟེ།” ༩ཞེས་གསུངས་པ་ལས་ཤེས་ནུས།
༣.ཕྱིས་ཀྱི་ལོ་ཆེན་འགའ་ཞིག་གིས་ལེགས་སྦྱར་གྱི་མ་དཔེ་དེ་གོ་བདེ་མིན་ཅི་འདྲ་ཞིག་ཡོད་རུང་། བོད་སྐད་ལ་བསྒྱུར་དུས་ཤིན་ཏུ་གོ་དཀའ་བར་མཛད་པ་འདི་དང་གོ་དཀའ་བ་ཞིག་གོ་བདེར་གཏོང་རྒྱུའི་ཁོང་གི་དགོངས་པ་གཉིས་འགལ་བས་ཐུགས་མ་དགྱེས་པ་དེ་ཡང་༼དགེ་འདུན་ཆོས་འཕེལ་གྱི་གསུང་རྩོམ་༽ནང་། “དེས་ན་ཕྱིས་ཀྱི་ལོ་ཆེན་འགའ་ཞིག་གིས་བསྒྱུར་བའི་གཞུང་རྣམས་ཤིན་ཏུ་ཟབ་པ་འདྲ་ཞིག་སྣང་བ་དེ། དོན་ལ་འགྱུར་དེ་ཟབ་དྲག་པའི་རྐྱེན་ཡིན་ནོ། འདི་དག་དབང་མེད་དུ་ཤོར།” ༡༠ཞེས་གསུངས་འདུག
༤.ཐ་སྙད་བསྒྱུར་སྐབས་གོང་འོག་གི་ཡིག་ཕྲེང་ཁ་ཤས་ལ་བསྟུན་ནས་གོ་བ་བླངས་ཏེ་བསྒྱུར་དགོས་པར་བཞེད་པ་༼མཁས་དབང་དགེ་འདུན་ཆོས་འཕེལ་གྱི་གསུང་རྩོམ་ཕྱོགས་སྒྲིག༽ཅེས་པའི་ནང་། “རྩ་འགྲེལ་གང་ཡིན་ཀྱང་ཡང་ན་སྟོད་ནས་ཡིག་ཕྲེང་ལྔ་དྲུག་ཙམ། ཡང་ན་སྨད་ནས་ཁ་ཤས་བློ་ཐོག་ནས་བཏོན་ཏེ་གོ་བ་དེའི་སྟེང་ནས་དོད། ཚིག་གཅིག་རྐྱང་པས་གོ་མི་ཐུབ། སྤྱིར་མདོ་སྔགས་རིག་གནས་གང་ཡིན་ཀྱང་རང་གི་རིག་རྩལ་གྱི་ཁྱད་ཆོས་རེ་འདོན་ཐུབ་དགོས། གཞན་གྱི་རྗེས་ཟློས་ཀྱིས་ཕན་མི་ཐོགས། རིས་མལ་རིས་རྒྱུག་གིས་གར་ཡང་མི་སླེབས་གསུངས་ཀྱི་ཡོད།” ༡༡ཅེས་འཁོད།
༥.ཡི་གེ་བསྒྱུར་དུས་ལོ་ཙཱ་བ་རེ་རེ་ཁེར་རྐྱང་མ་ཡིན་པར་ལོ་པཎ་གཉིས་ཀྱིས་མཉམ་དུ་བསྒྱུར་ནས་ཞུས་དག་ཡང་ཡང་གཏོང་དགོས་པ་དང་། སླད་ཁུངས་ལྡན་གྱི་དཔེ་ལ་གཏུགས་ནས་སླར་བཅོས་ཏེ་གཏན་ལ་འབེབས་དགོས་པའི་དགོངས་པ་ནི་༼དགེ་འདུན་ཆོས་འཕེལ་གྱི་ལོ་རྒྱུས་༽ནང་། “དེ་ཡང་རང་སྒྱུར་ལྟ་བུར་སྣང་བ་གང་དྲན་མིན་པར་སྔར་གྱི་ལོ་ཙཱ་བ་རྣམས་ཀྱི་སྲོལ་བཟུང་ནས། བསྒྱུར་བྱང་མཛད་པར་ཡང་། འཕགས་པ་གནས་བརྟན་པ་རྣམས་ཀྱི་མདོ་སྡེའི་སྡེ་སྣོད་དུ་བསྡུས་པ་ལས། ཕྲན་ཚེགས་ཀྱི་མདོ་ཕྲན་གཉིས་པ་ཆོས་ཀྱི་ཚིགས་སུ་བཅད་པ་རྫོགས། འདྲེན་པ་ཆེན་པོ་གནས་བརྟན་དྷརྨ་ནནྡའི་ཞབས་དྲུང་དུ་ཞུས་ཏེ། སི་ངྒ་ལ་དཔལ་རལ་གྲིའི་རི་བོའི་དགོན་པར་དགེ་འདུན་ཆོས་འཕེལ་གྱིས་བསྒྱུར་བ་རྫོགས་སོ། ཞེས་དང་། རིང་ནས་འདྲིས་པའི་རང་ཁྱིམ་ངོས་ཟིན་ཅིང་། །ཚེ་རབས་སྔ་མའི་ལས་ཀྱི་འཕྲོ་སད་དེ། །དུས་ཀྱི་མཐར་ཡང་རྫོགས་པའི་སངས་རྒྱས་གསུང་། །གསར་དུ་བསྒྱུར་བའི་དགའ་བ་གང་གིས་མཚོན། །ཞེས་མཆོག་ཏུ་སྤྲོ་བ་སྐྱེས་ཚུལ་གསལ་བར་བསྟན་པར་མཛད་དོ།” ༡༢ཞེས་དང་། “སྔར་གྱི་ལོ་ཙཱ་བ་ཚོས་བཀའ་བསྟན་བསྒྱུར་སྐབས། རྒྱ་གར་གྱི་མཁན་པོ་འདི་དང་འདི་བྱ་བ་དང་། བོད་ཀྱི་ལོ་ཙཱ་བ་འདི་དང་འདི་ཞེས་བྱ་བ་ནས་ཞུས་ཏེ་གཏན་ལ་ཕབས་གསུངས་པའི་ཞུས་ཟེར་བ་འདི། གསོལ་རས་ཞུས་ཟེར་བ་མིན། ལོ་པཎ་གཉིས་ཀས་ཞུས་དག་ཡང་ཡང་བཏང་བ་ལ་གོ་དགོས་པ་རེད། ལོ་པཎ་ཉི་ཟླ་དང་འདྲ་བ་དེ་ཚོས་ཀྱང་ཞུས་དག་བཏང་ཡོད་ཅེས་གསུངས་དེ་ལ་ཡིད་ཆེས་བྱས། ཡང་དུས་ཕྱིས་རྒྱ་གར་གྱི་མཁན་པོ་འདི་དང་འདི་ཞེས་བྱ་བ་དང་ལོ་ཙཱ་བ་འདི་དང་འདི་ཞེས་བྱ་བས། ཁུངས་ལྡན་གྱི་དཔེ་འདི་དང་འདི་ལ་གཏུགས་ནས་བཅོས་ཏེ་གཏན་ལ་ཕབས་གསུངས་པ་དེ་ཚོའི་ཐོག་ལ་ཞིབ་ཏུ་བལྟས་ན། ཁོང་རྣམ་པ་ཚོས་རེ་རེ་ཁེར་རྐྱང་ཡིན་མ་གསུངས་པར། ལོ་པཎ་གཉིས་རྟག་པར་ཕྱག་ལས་མཉམ་དུ་གནང་བ་ཡིན་གསུངས་པ་འདི་ཙམ་ལ་དཔྱད་ན། དྭང་བ་དང་ཡི་རངས་སྐྱེ་དགོས་པ་ཞིག་དང་། བསྒྱུར་བ་ཡིན་ཟེར་བ་གང་བྱུང་གི་འོལ་ཚོད་བྱེད་ནུས་པ་ཞིག་མེད། བྱས་ཙང་། ཁྱོད་རང་སྔོན་ལ་བོད་ཡིག་ཁུངས་འཕེར་ཞིག་བསླབ་ན། བསླབ་སྟངས་འདི་འདྲ་རེད།” ༡༣ཅེས་གསུངས་པ་ལྟར་རོ། །
༦.སྐད་ལུགས་སོ་སོའི་ཕྲད་རྣམ་དབྱེ་སྦྱོར་ལུགས་ཤིན་ཏུ་ནས་མི་འདྲ་བའི་དགོངས་པ་བཞེད་ཚུལ་༼དགེ་འདུན་ཆོས་འཕེལ་གྱི་གསུང་རྩོམ་༽ནང་། “འདིར་ཨབསྱ བྱ་བ་དྲུག་པའི་མཐའ་ཡིན་ཡང་བོད་སྐད་ལ་འདི་ནི་བྱ་བ་ལས་བསྒྱུར་མ་གཏུབ་ཅིང་། སྤྱིར་རྒྱ་སྐད་ཀྱི་རྣམ་དབྱེ་དྲུག་པ་ཕལ་ཆེར་བོད་སྐད་ལ་གཉིས་པ་དང་དང་པོ་ཁོ་ན་ཡིན་ཅིང་། པ་ཚབ་སོགས་ཀྱིས་དེ་ལྟར་བསྒྱུར་འདུག་པས་སྔོན་གྱི་བསྒྱུར་རྣམས་གོ་བདེ་བའི་རྒྱུ་མཚན་གཅིག་དེ་ཡིན་ལ། ཡར་ཀླུངས་གྲགས་པ་རྒྱལ་མཚན་གྱི་འགྱུར་རྣམས་གོ་དཀའ་བ་ཡང་རྣམ་དབྱེ་རྣམས་ཇི་ལྟ་བ་བཞིན་བསྒྱུར་བ་ཡིན། འདིར་དོན་ཐོབ་ལ་གཉིས་ཡིན་ཀྱང་། དམིགས་བསལ་གྱིས་དྲུག་པ་སྦྱར་སོགས་ཟེར་བ་ཡང་། སྐད་ལུགས་སོ་སོའི་རྣམ་དབྱེ་སྦྱོར་ལུགས་ཤིན་ཏུ་མི་འདྲ་བ་རྒྱུས་མེད་པ་སྟེ། ལེགས་སྦྱར་ལ། ཆུ་ཡིས་གང་བའི་བུམ་པ་བྱ་བ་ལ་ཆུ་ཡི་གང་བའི་བུམ་པ་དང་། ཝ་ར་ན་སིའི་རྒྱལ་པོ་བྱ་བར། ཝ་ར་ན་སི་ན་རྒྱལ་པོ་སོགས་རྟག་ཏུ་འོང་བས་བོད་སྐད་དང་ཡེ་མ་འདྲ། བོད་སྐད་དང་རྒྱ་ནག་དབུས་ཀྱི་སྐད་ལྟ་བུ་གཉིས་བསྡུར་དང་ཡང་རྣམ་དབྱེ་སྦྱོར་ལུགས་མི་འདྲ་བ་ཤེས་ཡོང་། སྐད་དེ་ལ་སྦྱོར་ལུགས་དེ་དོན་ཐོབ་ཡིན་གྱིས་དམིགས་བསལ་ག་ལ་ཡིན། དེས་ན་གོང་གི་ཚིག་འདི། གང་བདག་མཐོང་བ་འདི་ནི་དེར་ང་ཞེས་ཞེན་པ་པོ་ཡིན་ནོ། ཞེས། གང་དང་འདི་དང་ཞེན་པ་གསུམ་གཞི་གཅིག་ལ་བསྡུ་དགོས་སོ།” ༡༤ཞེས་གསུངས་ནས། དོན་ཐོབ་གཙོ་བོར་བསྒྱུར་བ་དེ་གོ་བདེ་པོ་ཡོང་བའི་རྒྱུ་མཚན་གཅིག་ནི་ལོ་ཙཱ་བས་སྐད་ལུགས་སོ་སོའི་ཕྲད་རྣམ་དབྱེའི་སྦྱོར་ལུགས་ཤིན་ཏུ་ནས་མི་འདྲ་བ་དེ་མཁྱེན་ཅིང་། དེ་ཉིད་གཙིགས་ཆེ་བར་མཛད་པའི་སྟབས་ཀྱིས་ཡིན་པ་དང་། ཚིག་ཟིན་ལ་བསྒྱུར་བ་དག་གོ་དཀའ་བར་གྱུར་དོན་གཅིག་ནི་ལོ་ཙཱ་བས་སྐད་ལུགས་སོ་སོའི་ཕྲད་རྣམ་དབྱེ་སྦྱོར་ཚུལ་ཤིན་ཏུ་ནས་མི་འདྲ་བ་དེ་མ་མཁྱེན་པའམ། ཡང་ན་མཁྱེན་རུང་དོ་གལ་ཆེ་བར་མ་མཛད་པའི་སྟབས་ཀྱིས་ཡིན་ཚུལ་བསྟན་གནང་ཡོད།
༧.ལོ་ཆེན་དགེ་འདུན་ཆོས་འཕེལ་ནི་སྔ་འགྱུར་གྱི་ལུགས་ལ་མོས་ཤིང་། ཕྱི་འགྱུར་གྱི་ཚིག་ཟིན་ལ་བསྒྱུར་བའི་ཚུལ་དེར་ཅུང་མ་མཉེས་ཀྱང་། སྔ་འགྱུར་དང་ཕྱི་འགྱུར་གཉིས་ལ་རང་རང་གི་ཁྱད་ཆོས་རེ་ཡོད་པ་ཁས་ལེན་གནང་ཡོད། དེ་ཡང་སྔ་འགྱུར་གྱི་ལོ་ཆེན་ཚོས་སྔོན་ལ་མ་ཡིག་ཧྲིལ་པོར་གོ་བ་རིལ་གྱིས་ལོན་པ་གནང་རྗེས། དེ་བོད་སྐད་རང་གི་ཐོག་ནས་ཕབ་བསྒྱུར་གནང་སྟངས་དེ་ལ་ལོ་ཆེན་དགེ་འདུན་ཆོས་འཕེལ་ཉིད་མཉེས་པོ་གནང་གི་ཡོད་པ་དང་། དེ་བཞིན་༼དགེ་འདུན་ཆོས་འཕེལ་གྱི་གསུང་རྩོམ་༽ནང་། “དེས་ན་རྣམ་འགྲེལ་དང་དུས་འཁོར་ལྟ་བུའི་གཞུང་བོད་སྐད་ལ་གོ་དཀའ་བ་རྣམས། ལེགས་སྦྱར་གྱི་གཞུང་དང་ཐད་ཀ་ཐད་ཀར་སྦྱོར་བདེ་ལ། སྤྱོད་འཇུག་དང་འདུལ་བ་ལུང་ལྟ་བུའི་སྔ་དར་སྐབས་ཀྱི་འགྱུར་བོད་སྐད་ལ་གོ་བདེ་བ་རྣམས་སྐབས་མང་པོར་རྒྱ་སྐད་ལ་སྦྱོར་མི་བདེ་ཡང་དོན་གྱི་གོ་བ་ཇི་ལྟ་བ་བཞིན་ཐོན་པས་ཤིན་ཏུ་ངོ་མཚར་ཏེ།” ༡༥ཞེས་གསུངས་པ་འདི་ལས་དོན་དངོས་ཐོག་ཚིག་ཟིན་ལ་ལེགས་པོ་བསྒྱུར་བའི་ཡོན་ཏན་གཅིག་ཞོར་དུ་བསྟན་གནང་བ་སྟེ། སྔར་ལེགས་སྦྱར་ནས་བོད་ཡིག་ལ་ཚུར་བསྒྱུར་བ་རྣམས་ཡང་བསྐྱར་ཕར་ལེགས་སྦྱར་གྱི་སྐད་ལ་བསྒྱུར་དགོས་དུས། འབྲུ་དོན་རེ་རེ་བཞིན་ཚིག་ཟིན་ལ་བསྒྱུར་བ་དེ་ཕྱིར་བསྒྱུར་ན་དང་པོའི་མ་ཡིག་ལྟར་བསྒྱུར་ཐུབ་ཀྱི་ཡོད་པ་དེའོ། །
གཞན་ཡང་༼དགེ་འདུན་ཆོས་འཕེལ་གྱི་གསུང་རྩོམ་༽ནང་། “འདིའི་ཤཱརྡུལ བྱ་བ་དེ་རང་རེ་རྣམས་ཀྱིས་སེང་གེ་རྐང་བརྒྱད་བྱ་བ་ཞིག་གི་མིང་ཡིན་ཟེར། འདིར་སྟག་ཏུ་བསྒྱུར། འཆི་མེད་མཛོད་དུ་ཡང་སྟག་ཏུ་བསྒྱུར། རྒྱ་གར་བ་ཞིག་ལ་དྲིས་པས། གཟིག་ཡིན་ཡང་ཟེར། སྤྱང་ཀི་སྐྱ་ཡུག་ལྟར་འདུག སྤྱིར་ལོ་ཆེན་གྱིས་ཚིག་དོ་གལ་ཆུང་བ་འདི་འདྲའི་རིགས། གོ་བདེ་ཙམ་དུ་མཛད་པ་ཡང་ཡོད་སྣང་སྟེ། （དོན་དུ་འདི་ནི་དོན་ཐོབ་གཙོ་བོར་བསྒྱུར་བའི་ཁྱད་ཆོས་ཀྱི་གྲས་ཤིག་སྟེ། སྣོན་འཕྲི་སྤོར་བཅོག་བྱ་དགོས་ཞེས་པའང་དོན་འདི་རང་ཡིན་ནོ།）”ཞེས་དང་། “……ངས་འདི་འདྲ་སྨྲ་བ་ལོ་ཆེན་ལ་སྐྱོན་བརྗོད་པ་ཡིན་སྙམས་ན། སྙམ་པ་དེ་སྙམ་མཁན་བླུན་པོར་གོ་བའི་ཚུལ་གསུམ་དུ་ཐེ་ཚོམ་མེད་དོ།” ༡༦ཞེས་དང་། “མདོ་སྡེ་རྒྱན་འདི་དོན་ཐོབ་གཙོ་བོའི་འགྱུར་ཤིན་ཏུ་གུ་ཡངས་པ་ཞིག་ཡོད་འདྲ་ན་ཡང་བོད་གཞུང་མ་རྙེད་པས་ལེགས་པར་མ་ཤེས་” ༡༧ཞེས་འཁོད། ༼མཁས་དབང་དགེ་འདུན་ཆོས་འཕེལ་གྱི་གསུང་རྩོམ་ཕྱོགས་སྒྲིག་༽ནང་། “སྤྱིར་བོད་འགྱུར་སྔ་ཕྱི་གཉིས་ལ་ཁྱད་པར་བསམ་གྱིས་མི་ཁྱབ། སྔར་བཻ་རོ། ཀ་ཅོག་སོགས་ཀྱིས་བསྒྱུར་བའི་རྒྱ་དཔེ་རེ་གཉིས་མཇལ་བས་ཤིན་ཏུ་ཡ་མཚན། ཆེན་པོ་ཕར་ཞོག འབྱུང་པོ་གང་དག་འདིར་ནི་ལྷགས་གྱུར་ཏམ། ཞེས་པའི་ཚིགས་བཅད་འདིའི་རྒྱ་དཔེ་ཞིག་མཐོང་བས་དེའི་ནང་ནས་བོད་སྐད་ཚིགས་བཅད་འདི་བཻ་རོས་ག་འདྲས་བཏོན་པ་ཡིན་ནམ་སྙམ་ང་ནི་ཧ་ལས་གསུངས། ཕྱག་ཐལ་མོ་སྦྱར། ཚུལ་མདོའི་མཆོད་བརྗོད་འདིའི་རྒྱ་དཔེ་ལ། （རཏྣ་ཀོ་ཥ）ཡོད་པ་ཐག་ཆོད། དེས་ན་རིན་ཆེན་མཛོད་པ་མི་ཟེར་བར། དཀོན་མཆོག་མཛོད་ཅིའི་ཕྱིར་ཟེར། ནོར་བུ་དང་ཆོས་མཚུངས་རྟག་པ་སྦྱར་ག་ལ་དགོས། འདི་ནི་རི་བོང་གི་མཆོངས་སྟངས་ཡིན་པ་འདྲ་གསུངས་ནས་བཞད་ཆ་མཛད།” ༡༨ཅེས་གསུངས་འདུག
༨.སྔོན་གྱི་ལོ་ཆེན་རྣམས་ལ་མོས་གུས་ཆེན་པོ་གནང་བ། དེ་ཡང་༼དགེ་འདུན་ཆོས་འཕེལ་གྱི་ལོ་རྒྱུས་༽ནང་། “སྔར་གྱི་འཕགས་བོད་ཀྱི་མཁས་གྲུབ་ཚོས་མདོ་སྔགས་ཀྱི་དགོངས་པ་འགྲེལ་ཚུལ་འདི་ཚོ་བསམ་ཞིང་བསམ་ན་ཧ་ལས་རྒྱུ་དང་། དེའི་ནང་ནས་ང་རང་ཚོའི་ལོ་ཙཱ་བ་རྣམས་ནས་སྐད་གཞན་པ་ཞིག་གི་ཐོག་ནས་ཚིག་དོན་ལ་ནོར་འཁྲུལ་ཏིལ་ཙམ་མེད་པར་ཇི་མ་ཇི་བཞིན་བསྒྱུར་ཐུབ་པ་འདི་འདྲ་བོད་ཙམ་ལ་མ་གཏོགས་བྱུང་མེད་ཅེས་བསྐྱར་ལྡབ་ཏུ་གསུངས་བྱུང་” ༡༩ཞེས་དང་། “ལྷག་པར་འཇིགས་བྱེད་བདག་བསྐྱེད་ནང་། རིག་མ་ལ་བིངྱཱ། ཞེས་མོའི་སྒྲ་ཡོད་བཞིན་དུའང་ཁྲོ་བོ་དང་རིག་པའི་ཚོགས་ཞེས་བོད་སྐད་དུ་རིག་པ་ཞེས་ཕོའི་སྒྲར་བཀོད་པར་མཛད་པ་ལའང་། ཟུང་འཇུག་གི་གོ་བ་ཡོད་མཁན་ཞིག་ཡིན་ན་གོ་རྒྱུ་ཆེན་པོ་ཡོད་ཙང་། སྐབས་འདིར་རིག་མ་ལ་རིག་པ་ཞེས་བྲིས་གནང་བ་རེད། ང་ཚོའི་ལོ་ཙཱ་བ་དང་སྔ་རབས་ཀྱི་མི་ཚོས་ནོར་མི་ཡོང་” ༢༠ཞེས་དང་། “ཡང་སྐབས་རེ་སྔར་གྱི་མཁས་གྲུབ་རྣམ་དག་གཅིག་ཙམ་ཞིག་དང་། ལོ་ཙཱ་བ་གཅིག་རང་ད་ལྟ་ཞལ་བཞུགས་རོགས་བྱས་ཡོད་ན། ང་ལ་བཀའ་དྲིན་ཞུ་རྒྱུ་མང་པོ་ཞིག་འདུག་གསུངས་ནས་སྐྱོ་སྣང་ཡང་གནང་བགྱི་འདུག་” ༢༡ཅེས་འཁོད་འདུག
བཞི་པ། ཞར་བྱུང་སྐད་དང་ཡི་གེའི་ཐད་ཀྱི་དགོངས་པ།
༡.ནང་པ་སངས་རྒྱས་ཡིན་ཟེར་ནས་མཛུབ་མོ་འཛུགས་ས་ཡོད་པ་དང་། བོད་མི་རིགས་ཟེར་ནས་མཛུབ་མོ་འཛུགས་ས་ཞིག་ད་ལྟ་བར་ཡོད་པ་དེ་སློབ་དཔོན་ཐུ་མིས་མཛད་པའི་ཡི་གེ་འདིའི་དྲིན་ཡིན་པས། བརྡ་སྤྲོད་ཀྱི་གཞུང་ལུགས་ལ་གཅེས་སྤྲས་བྱེད་དགོས་པ་དང་། གཞུང་གིས་སྤྱི་ཁྱབ་ཏུ་བཀས་བཅད་བྱེད་དགོས་པའི་དགོངས་པའི་སྐོར་ལ་༼དགེ་འདུན་ཆོས་འཕེལ་གྱི་རབ་བྱེད་༽ནང་། “དེའི་རྗེས་ཉིན་གཅིག་རྒྱལ་བ་ཙོང་ཁ་པ་ལྟ་བུ་ཞིག་ང་ཚོ་བོད་ལ་བྱོན་མེད་ན་བོད་པ་ཡོད་པ་མ་རེད། ག་ས་ག་ལ་འཐོར་སོང་བ་རེད་འདུག་གསུངས། དེའི་རྗེས་ཙོང་ཁ་པའི་དྲིན་གྱིས་ཆོས་ཀྱི་ཐོག་ནས་མི་རྣམས་ཀྱི་སེམས་ཤུགས་གཅིག་ཏུ་བསྒྲིལ་བ་རེད་གསུངས་སོང་། རྒྱལ་བ་ཙོང་ཁ་པས་ཤིང་གི་སྒང་ལ་དཔར་བརྐོས་ནས་དཔེ་ཆ་དཔར་རྒྱག་པའི་ལུགས་སྲོལ་ཞིག་བཙུགས་པ་རེད། རྒྱལ་བ་ཙོང་ཁ་པའི་རྗེས་ལ་བོད་ཀྱི་སྐད་ཡིག་གཉིས་ལ་འགྱུར་བ་རྩ་བ་ནས་སོང་ཡོད་པ་མ་རེད་གསུངས་སོང་།” ༢༢ཞེས་དང་། “ཉིན་གཅིག་དགེ་འདུན་ཆོས་འཕེལ་གྱིས་གསུང་ཡག་ལ་བོད་ཀྱི་ཆོས་རྒྱལ་སྲོང་བཙན་སྒམ་པོ་དང་ཐུ་མི་སཾབྷོཊ་གཉིས་བྱས་པ་ཡིན་ན་ཆོས་རྒྱལ་སྲོང་བཙན་སྒམ་པོའི་མཛད་པ་དེ་སྐུ་ཚེ་གཅིག་ལ་གྲུབ་པ་རེད། ཐུ་མི་སཾབྷོཊའི་མཛད་པ་དེ་ད་དུང་འཛམ་གླིང་འདིའི་ནང་ཁྱབ་ནས་བསྡད་ཡོད་པ་རེད། ནུབ་ལ་དྭགས་ནས་བཟུང་སྟེ་མདོ་སྨད་སོག་པོ་ལ་ཐུག་གི་བར་ནང་པ་སངས་རྒྱས་པ་ཟེར་ནས་བོར་བརླགས་མེད་པའི་ཐོག་ནས་འཛིན་ཐུབ་པ་དང་། ལྷག་པར་བོད་མི་རིགས་ཟེར་ནས་མཛུབ་མོ་བཙུགས་ས་ཡོད་པ་ཞིག་ཁོང་གིས་ཡི་གེ་དེ་བརྩམས་པ་ལ་བརྟེན་ནས་བོད་ཟེར་མཁན་དེ་མ་འཐོར་བར་བསྡད་པ་འདི་བྱུང་མོད། བྱས་ཙང་ཚང་མས་སུམ་རྟགས་ལ་གཅེས་སྤྲས་ཡག་པོ་ཞིག་མ་གནང་བ་ཡིན་ན། ཁྲོམ་ལ་ཧྲོམ་ཟེར་བ། བྲག་ལ་བག་ཟེར་བ། བྲེ་ལ་བེ་ཟེར་བ། རེད་དོ་རེད་དོ་ལ་རེད་ཀོ་རེད་ཀོ་ཟེར་བ། ཡིན་ནོ་ལ་ཡིན་གོ་ཟེར་བ་འདྲ་པོའི་བོད་ཀྱི་རིག་གཞུང་ལ་གནོད་སྐྱོན་འགྲོ་ཡག་མང་པོ་ཞིག་དེང་སང་ཁྱབ་འགྲོ་གི་ཡོད་པ་རེད། འདི་ལ་མཁས་པ་ཚོས་གཟབ་གཟབ་མ་གནང་བ་ཡིན་ན་སྔ་མོའི་སྐད་བརྡ་རིམ་པས་བརླགས་ནས་གསུང་རབ་དེ་ཚོ་ཧ་མ་གོ་བར་བྱས་གླེགས་བམ་གྱི་ཕུང་པོ་ཞིག་ཆགས་ཀྱི་རེད། གཞུང་གིས་ངེས་པར་དུ་རྒྱབ་སྐྱོར་དགོས་ཀྱི་རེད། གཞུང་གིས་རྒྱབ་སྐྱོར་མེད་ན་མཁས་པ་རེ་གཉིས་ཀྱིས་བྲིས་པ་ལ་བརྩི་མཁན་ཡོད་པ་མ་རེད། གཞུང་གིས་སྤྱི་ཁྱབ་ཏུ་མངའ་བདག་ཁྲི་རལ་པ་ཅན་གྱི་སྐབས་བཀས་བཅད་གནང་བ་ནང་བཞིན་རིག་གཞུང་ཚང་མ་ཐམས་ཅད་གཏན་ལ་ཕབ་སྟེ་དེ་དང་འགལ་མི་ཆོག་ཅེས་དེ་འདྲིའི་བཀའ་ཞིག་བྱུང་བ་ཡིན་ན། སངས་རྒྱས་ཀྱི་བསྟན་པ་ཡུན་རིང་དུ་གནས་པ་དང་བོད་ཀྱི་མི་རིགས་ཟེར་བ་མི་བརླག་པ་ལ་ཕན་ཐོགས་ཡོང་གི་རེད། ཅེས་དེ་འདྲ་ཞིག་གསུངས་སོང།” ༢༣ཞེས་འཁོད་དོ། །
༢.ཡི་གེའི་གཞུང་དང་རྩ་བ་ནས་སྒྲ་གདངས་མ་འཕྲོད་པ་དང་། ཡི་གེའི་ཐོག་ནས་བརླག་པའི་ཕལ་སྐད་ལ་ངོ་རྒོལ་དང་། ཡི་གེའི་སྟེང་ནས་ཡོངས་སུ་མ་བརླག་པར་ཟུར་ཆག་ལྟ་བུ་དང་། གནའ་བོའི་ཀློག་སྟངས་ལྟར་གནས་པའི་བོད་རིགས་འདུས་སྡོད་ཁུལ་ཡོངས་ཀྱི་ཕལ་སྐད་ལ་ཡུལ་གྱི་ཕྱོགས་རིས་མེད་པའི་ཉམས་ཞིབ་དང་། དེའི་སྙིང་པོ་དང་ལེགས་ཆ་དག་ཚད་ལྡན་གྱི་སྤྱི་སྐད་ཀྱི་ནང་དུ་བསྡུ་ལེན་བྱེད་དགོས་པའི་དགོངས་པའི་སྐོར་ལ་༼དགེ་འདུན་ཆོས་འཕེལ་གྱི་རབ་བྱེད་༽ནང་། “སྐད་ཀྱི་སྐོར་ལ་ཞེ་དྲག་ངོ་རྒོལ་གནང་གི་རེད། ལྷག་པར་དུ་ལྷ་སའི་ཕལ་སྐད་དེ་ཞེ་དྲག་སྡུག་ཅག་རེད། ཡི་གེའི་གཞུང་དང་རྩ་བ་ནས་སྒྲ་གདངས་མ་འཕྲོད་པ། སྐད་དེ་ཡི་གེའི་ཐོག་ནས་མ་བརླག་པ་བྱེད་དགོས་ཀྱི་རེད་གསུངས་ནས་ཤུགས་ཆེན་པོ་ཞིག་གསུང་གི་འདུག་” ༢༤ཅེས་དང་། “དགེ་འདུན་ཆོས་འཕེལ་གྱིས་དེ་དུས་དབྱིན་ཇིའི་སྐད་ནས་བོད་སྐད་ལ་བསྒྱུར་བའི་སྐབས་ཨ་མདོའི་སྐད་ཁ་ཤས་ཤིག་དང་ཁམས་སྐད་ཁག་གཅིག་མ་བཅུག་པ་དེ་ནོར་བཞག་གསུང་གི་འདུག ལྷག་པར་ཨ་མདོའི་སྐད་དེ་རྫིག་པོ་ཞིག་རེད། དམག་རྩེད་བརྩེད་པའི་སྐབས་ལ་ལམ་སེང་ཧ་གོ་ཆོག་ཆོག་མེད་པར་རྫིག་པོ་ཞིག་དགོས་ཀྱི་རེད། ང་ཚོས་ཨ་མདོའི་སྐད་ཁ་ཤས་བརྒྱབ་ན་ཡག་པོ་འདུག དཔེར་ན། ཧ་ར་ར་སོང་། ཟེར་བའི་སྐབས་གང་ག་ཧྲག་ཧྲག་འགྲོ་ཡག་འདྲ་པོ། ཚུར་ར་ཤོག ཟེར་བའི་སྐབས་ལ་ཚུར་ཡོང་ཡག་འདྲ་པོ་དང་། དམག་འདྲ་པོ་ཞིག་ལ་ཆ་བཞག་ན་དམག་རྒྱག་སར་སླེབས་པའི་སྐབས་སུ་མཛོག་མགོ་སྒྲེངས། ཟེར་བའི་སྐབས་ལ་མེ་མདའི་སྤོར་ཏོག་དཀྲུགས་ནས་བརྒྱབ་ཆོག་ཆོག་བཟོ་ཡག་འདྲ་པོའི་ཨ་མདོའི་སྐད་དང་ཁམས་སྐད་འགའ་ཤས་་མ་བཅུག་པ་ནོར་བཞག རྒྱབ་བསྒྱུར། ཟེར་བ་འདྲ་པོ་སྐྱོ་སྐད་འདྲ་པོ་ཞིག་ཆགས་འདུག་གསུང་གིས།” ༢༥ཞེས་དང་། ཡང་༼དགེ་འདུན་ཆོས་འཕེལ་གྱི་ལོ་རྒྱུས་༽ནང་། “ཐ་ན་ལུང་ཁུག་གི་ཁ་རྒྱུན་ཐེབ་ཆག་ཅིག་གསར་དུ་གསན་ན་ཡང་། དེ་ལ་ཏོག་ཙམ་དགོངས་པ་བཞེས་ནས། ཚིག་དེ་ཡིན་རྒྱུ་ནི་བརྡ་རྙིང་འདི་འདྲ་ཞིག་ཟུར་ཆག་པ་རེད་ཅེས། རང་རེས་དེང་སང་ཕལ་སྐད་ཟེར་བ་འདི་ལ་དགེ་ཆོས་རིན་པོ་ཆེ་ནས་མང་ཆེ་བ་ཟུར་ཆག་གི་ཐ་སྙད་བཏགས་ནས་གསུངས་པ་ལ་ད་ལྟ་ཞིབ་ཏུ་དཔྱད་སྐབས་གོ་རྒྱུ་ཆེན་པོ་ཞིག་འདུག་སྙམ།” ༢༦ཞེས་དང་། “དེ་ལྟར་དགེ་ཆོས་རིན་པོ་ཆེ་དང་བཀའ་མོལ་ཞུ་སྐབས། རྒྱུན་དུ་ཁ་ནས་ཤོད་བཞིན་པ་ལ་ཡི་གེར་འབྲི་སྲོལ་ནུབ་པ་དེ་འདྲ་ཐོན་ནས་དོགས་གཅོད་ཞུས་ན། འདི་ཚིག་འདི་འདྲ་ཞིག་ཟུར་ཆག་པ་ཡིན་འདུག དེང་སང་ཡུལ་སྐད་འདི་འདྲ་ཞིག་ལ་འདི་འདྲ་ཟེར་སྲོལ་འདུག་སོགས། བོད་ཀྱི་སྐད་དང་བརྡ་ཡིན་ཕྱིན་ཆད་ལ་ཕལ་སྐད་ཀྱི་ཕྱོགས་ལྷུང་མི་གནང་བར། སོ་སོ་སོ་སོའི་ཁུངས་བཙལ་ནས། བཤད་སྟངས་འདི་ལ་འདི་འདྲ་ཞིག་བྱུང་ན་སོགས་གསུང་དུས། ངག་ལ་དབང་འབྱོར་ཟེར་བ་འདི་འདྲ་ཡིན་བགྱི་རེད་སྙམ་པ་ཡོང་རྒྱུ་འདུག” ༢༧ཅེས་འཁོར། མདོར་ན་ལོ་ཆེན་དགེ་འདུན་ཆོས་འཕེལ་གྱི་སྐད་དང་ཡི་གེའི་ཐད་ཀྱི་དགོངས་པ་གཙོ་བོ་ཞིག་ནི། སྐད་དང་ཡི་གེའི་བར་ཐག་ཇེ་ཐུང་དུ་གཏོང་རྒྱུ་དེ་དང་། སྐད་དང་ཡི་གེ་གཉིས་ལུས་དང་གྲིབ་མ་བཞིན་རྟག་ཏུ་འབྲལ་མེད་འགྲོགས་རྒྱུ། སྐད་དང་ཡི་གེ་གཉིས་རོ་གཅིག་ཏུ་འདྲེས་ཨེ་ཐུབ་ལ་རེམ་རྒྱུ་དེ་བཅས་ཡིན་པར་སྣང་ངོ་།། །།
མཆན་འགྲེལ།
༡
བཀྲས་མཐོང་ཐུབ་བསྟན་ཆོས་དར་གྱིས་བྲིས་པའི་༼ དགེ་འདུན་ཆོས་འཕེལ་གྱི་ལོ་རྒྱུས་ ༽ ཤོག་གྲངས་༡༣༨、༡༣༤-༡༣༥、༡༥༠、༦༩、༡༣༩、༦༡、༡༣༤-༡༣༦、༡༢༡、༢༣༨-༢༣༩、༢༤༥、༡༥༠-༡༥༡、༡༦༤བཅས་ནང་གསལ།
༢
བཀྲས་མཐོང་ཐུབ་བསྟན་ཆོས་དར་གྱིས་བྲིས་པའི་༼ དགེ་འདུན་ཆོས་འཕེལ་གྱི་ལོ་རྒྱུས་ ༽ ཤོག་གྲངས་༡༣༨、༡༣༤-༡༣༥、༡༥༠、༦༩、༡༣༩、༦༡、༡༣༤-༡༣༦、༡༢༡、༢༣༨-༢༣༩、༢༤༥、༡༥༠-༡༥༡、༡༦༤བཅས་ནང་གསལ།
༣
བཀྲས་མཐོང་ཐུབ་བསྟན་ཆོས་དར་གྱིས་བྲིས་པའི་༼ དགེ་འདུན་ཆོས་འཕེལ་གྱི་ལོ་རྒྱུས་ ༽ ཤོག་གྲངས་༡༣༨、༡༣༤-༡༣༥、༡༥༠、༦༩、༡༣༩、༦༡、༡༣༤-༡༣༦、༡༢༡、༢༣༨-༢༣༩、༢༤༥、༡༥༠-༡༥༡、༡༦༣༤བཅས་ནང་གསལ།
༤
བཀྲས་མཐོང་ཐུབ་བསྟན་ཆོས་དར་གྱིས་བྲིས་པའི་༼ དགེ་འདུན་ཆོས་འཕེལ་གྱི་ལོ་རྒྱུས་ ༽ ཤོག་གྲངས་༡༣༨、༡༣༤-༡༣༥、༡༥༠、༦༩、༡༣༩、༦༡、༡༣༤-༡༣༦、༡༢༡、༢༣༨-༢༣༩、༢༤༥、༡༥༠-༡༥༡、༡༦༤བཅས་ནང་གསལ།
༥
བཀྲས་མཐོང་ཐུབ་བསྟན་ཆོས་དར་གྱིས་བྲིས་པའི་༼ དགེ་འདུན་ཆོས་འཕེལ་གྱི་ལོ་རྒྱུས་ ༽ ཤོག་གྲངས་༡༣༨、༡༣༤-༡༣༥、༡༥༠、༦༩、༡༣༩、༦༡、༡༣༤-༡༣༦、༡༢༡、༢༣༨-༢༣༩、༢༤༥、༡༥༠-༡༥༡、༡༦༤བཅས་ནང་གསལ།
༦ ༼ མཁས་དབང་དགེ་འདུན་ཆོས་འཕེལ་གྱི་གསུང་རྩོམ་ཕྱོགས་སྒྲིག ༽ སི་ཁྲོན་མི་རིགས་དཔེ་སྐྲུན་ཁང་གིས་བསྐྲུན། ཤོག་གྲངས་༡༥、༡༢ནང་གསལ།
༧
༼ དགེ་འདུན་ཆོས་འཕེལ་གྱི་གསུང་རྩོམ་ ༽ དེབ་གསུམ་པ། ཤོག་གྲངས་༣༩༥ནང་གསལ། བོད་ལྗོངས་བོད་ཡིག་དཔེ་རྙིང་དཔེ་སྐྲུན་ཁང་ནས་བསྐྲུན། ཤོག་གྲངས་༣༩༥、༤༢༡-༤༢༢、༤༦༡-༤༦༢、༤༦༢-༤༦༣ ༣༧༠-༣༧༡、༤༢༠、༣༦༦-༣༦༧、༣༩༠བཅས་ནང་གསལ།
