ཚོགས་ཆེན་བཅུ་དགུ་པའི་དགོངས་དོན་མཛུབ་ཁྲིད་དུ་བྱས་ཏེ། ཆོས་ལུགས་དང་སྤྱི་ཚོགས་རིང་ལུགས་ཀྱི་སྤྱི་ཚོགས་གཉིས་འཚམ་མཐུན་ཡོང་པ་བྱ་དགོས། ནུབ་བྱང་དགེ་འོས་སློབ་ཆེན་གྱིས་དགེ་འོས་སློབ་མ་བགྲང་ལས་འདས་པ་བསྐྱངས་པ། གཞིས་རྩེ་གྲོང་ཁྱེར་གྱི་གཞུང་ལམ་ཐོག་རླངས་འཁོར་ཤར་གཏོང་ཐུབ་ཚད་སྤྱི་ལེ་ཁྲི་1.7ཟིན་པ། ལོ་རྒྱུས་ཡུན་རིང་ལྡན་པའི་ཞོ་ལེགས་ཀྱི་བོད་ཤོག བོད་ལྗོངས་གཞིས་རྩེས་གླུ་ལེན་གར་འཁྲབ་ཀྱིས་གནམ་ལོ་གསར་པ་བསུ་བ། ལྕགས་ལམ་སྡེ་ཁག་གིས་སྦྲེལ་མཐུད་དྲ་བ་བརྒྱུད་ནས་ཟས་རིགས་མངག་ཉོའི་ཞབས་ཞུ་རིམ་སྤོར་བྱས་ཏེ། མེ་འཁོར་མ་བསྐོར་གོང་གི་ཆུ་ཚོད་གཅིག་གི་སྔོན་དུ་མངག་ཉོ་བྱས་ཆོག་པ། ལྷ་སའི་ཚོགས་འདུ་གཉིས། ལྷ་ས་གྲོང་ཁྱེར་མི་དམངས་འཐུས་ཚོགས་སྐབས་བཅུ་གཅིག་པའི་ཚོགས་འདུ་ཐེངས་གསུམ་པར་གྲོས་གཞི་106འབྱོར། ལོ་གསར་གྱི་ཚོང་ར་འཁྲུག་ཆ་དོད་པོར་འགྱུར་བཞིན་ཡོད་པ། ཁྲོན་བོད་ལྕགས་ལམ་ལྷ་ས་ནས་ཉིང་ཁྲི་བར་གྱི་ལམ་བུའི་བསམ་གྲུབ་གླིང་ཕུག་ལམ་ཤར་བགྲོད་ཐུབ་པ། ཧྥ་རན་སེའི་ཙུང་ཐུང་མཱ་ཁེ་ལུང་གིས་དེ་རིང་ནས་བཟུང་རང་རྒྱལ་ལ་རྒྱལ་དོན་འཚམས་འདྲི་བྱེད་པ།
ཀྲུང་གོའི་བོད་ལྗོངས་དྲ་བ། > གསོ་རིག > འཕྲོད་བསྟེན་རྒྱུན་ཤེས།

མ་རིག་པ་ནད་ཀྱི་རྒྱུར་བཞག་རུང་གི་གོ་བདེའི་ཟིན་བྲིས།

སྤེལ་དུས 2018-01-30 ཡོང་ཁུངས། ཀྲུང་གོ་བོད་ཀྱི་དྲ་བ། རྩོམ་པ་པོ། རྔོག་བུ་བདུད་མགོན་ཚེ་རིང་།
རྔོག་བུ་བདུད་མགོན་ཚེ་རིང་།
          མ་རིག་པ་ཞེས་གང་ཟག་སོ་སོ་བའི་སེམས་དང་སེམས་བྱུང་གི་རྟེན་འབྲེལ་གྱི་ཆོས་ཉིད་ལས་རང་བཞིན་དུ་གནས་བའམ། བག་ལ་གཞའ་བའི་ཚུལ་དུ་ཡོད་པའི་ནང་གི་བྱེད་པ་ཅིག་ལ་གོ 
          དེ་ཡང་སེམས་དང་སེམས་བྱུང་གི་འབྲེལ་བ་དེ་ཇི་ལྟར་ཡིན་སྙམ་ན་དབུས་མཐའ་རྣམ་འབྱེད་ལས། དེ་ལ་དོན་མཐོང་རྣམ་པར་ཤེས།། དེ་ཡི་ཁྱད་པར་སེམས་ལས་བྱུང་།། ཞེས་དོན་གྱི་ངོ་བོ་རགས་པ་མཐོང་བའམ་འཛིན་པ་སེམས་དང་ཡུལ་གྱི་ངོ་བོའི་བཟང་ངན་དང་སྦོམ་ཕྲའི་ཁྱད་པར་མཐོང་ངམ་འཛིན་པ་སེམས་བྱུང་ཡིན།
          འོ་ན་དེ་ཉིད་ནད་ཐམས་ཅད་ཀྱི་རྒྱུ་རུ་ཇི་ལྟར་བཞག་རུང་ངམ་སྙམ་ན་མདོ་ལས།  སེམས་ཀྱི་གླང་བོ་ཡན་བཏང་བས།། མནར་མེད་གནོད་པ་བྱེད་པ་ལྟར།། འདི་ལྟར་འཇིག་པ་ཐམས་ཅད་དང་།། སྡུག་བསྔལ་དཔག་ཏུ་མེད་པ་ཡང་།། སེམས་ལས་བྱུང་བ་ཉིད་ཡིན་ནོ།།ཞེས་དང་། གློ་བུར་མ་རིག་དྲི་མས་སྒྲིབ།། དེ་བསལ་བས་ན་སངས་རྒྱས་དངོས།། ཞེས་སོགས་ནང་སེམས་ཀྱི་བདག་རྐྱེན་ལས་ཆགས་པ། སྡང་བ། བར་མ་སོགས་སེམས་བྱུང་གི་ཤེས་བྱེད་སྐྱེད་ལ། དེ་ལ་བརྟེན་ནས་ཕྱི་ལུས་ངག་ཡིད་ཀྱི་བྱ་བྱེད་འགུལ་བསྐྱོད་ལ་བཀོད་འདོམས་བྱས་ཏེ་ལུས་སེམས་གཉིས་ཆར་གནོད་བྱེད་ཀྱི་ལས་སྣ་ཚོགས་པ་མ་རིག  མ་ཤེས།  མ་གསལ་བར་ངང་ངམ་ཤུགས་ཀྱིས་བརྩམས་པ་དང་རྩོལ་བ་ལས་ནད་ཀྱི་རྒྱུར་བཞག་རུང་བ་ཡིན། དཔེར་ན་མ་ཡི་ནུ་ཞོ་ལ་འགོས་ནད་སོགས་ཡོད་པ་བྱིས་པ་དེས་དེ་ཉིད་ནད་ཅན་དུ་རྟོགས་པའི་བློ་མེད་པར་ལོངས་སུ་སྤྱོད་པ་ནི་མ་རིག་པའོ། མ་ཡིས་ནད་ཅན་ཡིན་པ་ཤེས་བཞིན་དུ་བྱིས་པའི་ལྟོགས་སྐོམ་ལ་སྙིང་རྗེ་བའི་ངང་ནུར་འཇུག་པ་ནི་ནད་ཀྱི་ཤེས་བྱ་མེད་པས་མ་རིག་པའོ། སྨན་པས་མ་ཡི་ནུ་ཞོ་ལས་སྐྱེད་པའི་ནད་དུ་ངོས་མ་ཟིན་པར་ནད་གཞན་དུ་གསོ་བ་ནི་སྨན་དཔྱད་ཀྱི་དོན་མ་རིག་པའོ། དཔེ་དེ་བཞིན་དུ་གང་ཟག་རང་རང་གི་ངོས་ནས་སེམས་ཀྱིས་མ་རིག་པས་སེམས་བྱུང་ལ་བདག་རྐྱེན་བྱས།  སེམས་བྱུང་དེས་དབང་བོ་དང་ཡན་ལག་ལ་མ་རིག་བཞིན་དུ་བདག་རྐྱེན་བྱས། ཡན་ལག་གིས་གནོད་བྱེད་དེ་ཉིད་ཇི་བཞིན་ལག་བསྟར་བྱུང་བ་ནི་གནོད་བྱེད་དམ་ཉེས་བྱེད་ཀུན་གྱི་རྩ་བ་ཡིན་པས་མ་རིག་པ་ནད་ཀྱི་རྒྱུར་བཞག་རུང་ངོ་།
          གཡུ་ཐོག་རྙིང་མ་ཡོན་ཏན་མགོན་པོས།  སོ་སོ་སྐྱེ་བོ་གཞིར་བཞག་ལ།།མ་རིག་ནད་བྲལ་ཡོད་མ་ཡིན།། རིང་རྒྱུའི་དབང་བྱས་ནད་བྲལ་མེད།། ཉེ་རྒྱུའི་དབང་བྱས་ནད་མེད་ཡོད།། ཞེས་པའང་སོ་སོ་སྐྱེ་བུ་ཐ་མལ་བ་རྣམས་ལ་བྱ་དངོས་ཀྱི་ནུས་སྟོབས་ཡོན་ཏན་སོགས་མ་བསླབ་པས་མཁྱེན་ཡོང་བ་གཅིག་ཀྱང་མེད་པ་དང་། བསླབ་ནས་ཀྱང་དོན་མི་ཤེས། མི་གོ  མི་འཁྲོལ་བ་ནི་མ་རིག་པའི་ཁྱད་ཆོས་ཡིན། ཁྱད་ཆོས་དེ་ལྡན་གྱི་སོ་སྐྱེ་རྣམས་ལ་ནི་དུས་ནམ་གྱི་ཞར་ཡང་ནད་འབྱུང་བའི་རྒྱུ་ཡོངས་སུ་རང་སྟེང་ལ་ཚང་ངམ་ཚོགས་པ་ཡིན་པས་ནད་དང་བྲལ་བ་མེད་དོ་ཞེས་པ་དང་། ཡང་རྒྱུ་དེ་ལ་སྐྱེད་བྱེད་ཉེར་ལེན་གྱི་རྐྱེན་དང་མ་ཕྲད་ན་སོ་སྐྱེས་རང་ལུས་ལ་ནད་ཡོད་པ་མི་མཁྱེན་པས་རེ་ཞིག་བདེ་ཐང་གི་ཚུལ་དུ་གནས་པ་ལ་ནད་མེད་ཟེར། དཔེར་ན་མགོ་ན་བའི་རྒྱུ་མགོ་རང་ཉིད་ལ་ཚོགས་པ་ཡིན་ཡང་རྐྱེན་དང་མ་ཕྲད་ན་མགོ་ན་བའི་མངོན་ཚུལ་ཕྱིར་མི་མངོན་པའི་སྐབས་ལ་ང་ཚོས་མགོ་མི་ན་ཀི  མགོ་བདེ་ཐང་རེད་སྙམ་གྱི་ཡོད་པ་ནི་མགོ་ནད་ཀྱི་རྒྱུ་མ་རིག་པ་ཡིན་པས་གནས་སྐབས་ནད་མེད་དུ་བཞག་རུང་། ནམ་ཞིག་རྐྱེན་དང་ཕྲད་ཚེ་མགོ་ན་ཀི  མགོ་ཡུ་འཁོར་ཀི་ལྟ་བུ་ནི་ནད་ཅན་གྱི་རྟགས་དང་མཚན་མ་ཡོངས་སུ་མངོན་འོང་བའི་སྐབས་དེ་ནི་ནད་ཅན་དུ་བཞག་པའོ། དེ་བས་རིང་རྒྱུ་མ་རིག་པའི་དབང་དུ་བྱས་ན་མི་ཐམས་ཅད་ནད་ཅན་ཤ་སྟག་ཡིན་པ་དང་། ཉེ་རྒྱུའི་དབང་དུ་བྱས་ན་ནད་མེད་ཀྱང་ཡོད་ཅེས་པའི་དོན་ནོ། རྒྱུད་ལས། དཔེར་ན་བྱ་ནི་མཁའ་ལ་ལྡིང་གྱུར་ཀྱང་།།རང་གི་གྲུབ་མ་ལུས་དང་མི་འབྲལ་བཞིན།།འགྲོ་ཀུན་བདེ་བར་གནས་ཤིང་སྤྱོད་ན་ཡང་།།མ་རིག་ལྡན་པས་ནད་འབྲལ་མི་སྲིད།།ཞེས་ཀྱང་ངོ་།
          མདོར་ན་མ་རིག  མ་གོ  མ་ཤེས་སོགས་ཀྱི་སེམས་དང་སེམས་བྱུང་གི་དབང་གིས་སྐྱེད་པའི་བྱ་བྱེད་ལས་བསགས་པའམ་འབྱུང་བའི་སྡུག་བསྔལ་གྱི་ཚོར་བ་ཕྲ་རག་ཐམས་ཅད་འབྱུང་ཁུངས་ལ་ལྟོས་ནས་མ་རིག་པ་ནད་ཀྱི་རྒྱུར་བཞག་པ་ཡིན་པར་འདོད། དེ་ལ་རྗེ་ཙོང་ཁ་བས། འཇིག་རྟེན་རྒུད་པ་ཇི་སྙེད་པ།། དེ་ཡི་རྩ་བ་མ་རིག་པ།། ཞེས་པ་ལྟར་ཕྱི་སྣོད་ཀྱི་འཇིག་རྟེན་དང་ནང་བཅུད་ཀྱི་སེམས་ཅན་གང་ཡང་རྒུད་བྱེད་ཀྱི་རྩ་བ་མ་རིག་པ་ཡིན་པར་བསྟན་ཡོད་པ་དེའང་རྒུད་ཀྱི་འབྱུང་ཁུངས་སེམས་ལ་རག་ལས་ཡོད་པས་ཡིན།