ལྷ་ས་ནས་མ་བུ་བདེ་སྲུང་མཐུན་ཚོགས་བཙུགས་པ།
སྤེལ་དུས 2017-08-28
ཡོང་ཁུངས། མཚོ་སྔོན་བོད་སྐད་རླུང་འཕྲིན།
རྩོམ་པ་པོ། བདེ་ལྷ་མོས་བསྒྲིགས།
ལྷ་སའི་མེ་འཁོར་འབབ་ཚིགས་ཀྱི"མ་བུའི་རླངས་འཁོར་སྒུག་སར"དྲོལ་ཁོལ་གྱིས་ཁེངས་འདུག
ཟླ་གསུམ་པའི་ཚེས་བཅུ་གསུམ་ཉིན། ལྷ་ས་གྲོང་ཁྱེར་མ་བུ་བདེ་སྲུང་མཐུན་ཚོགས་དངོས་སུ་བཙུགས་པ་དང་། རྒྱུས་ལོན་བྱུང་བའི་གནས་ཚུལ་ལྟར་ན། མ་བུ་བདེ་སྲུང་མཐུན་ཚོགས་དེར་ད་ལྟ་ཚོགས་མི་ལྔ་བཅུ་ཡོད་པ་དང་། ཚོགས་པའི་ཚོགས་མི་གཉིས་ཡོད་ལ། མཐུན་ཚོགས་ཀྱི་བྱེད་སྒོའི་གཙོ་གཉེར་ལས་ཁུངས་ནི་ལྷ་ས་གྲོང་ཁྱེར་འཕྲོད་བསྟེན་ཅུའུ་ཡིན་པ་དང་། ལས་ཁུངས་དེས་རང་འགུལ་སྒོས་བྱེད་སྒོའི་མཛུབ་སྟོན་དང་ཁྲིམས་ལག་བསྟར་བྱེད་པའི་ལྟ་རྟོག་དང་ལེན་བྱེད་རྒྱུ་རེད། ལྷ་ས་གྲོང་ཁྱེར་འཕྲོད་བསྟེན་ཅུའུ་ཡིས་མཐུན་ཚོགས་དེས་རྗེས་ཕྱོགས་ཀྱི་ལོ་གསུམ་གྱི་ནང་སྙེ་མོ་རྫོང་གི་ཞང་བདུན་དང་གྲོང་རྡལ་གཅིག་ཏུ་བྱ་བ་གཙོ་བོ་སྒྲུབ་ཏེ། མ་བུ་བདེ་སྲུང་གི་ལས་གཞི་ས་ཚིགས་འཛུགས་དགོས་པའི་བསམ་འཆར་བཏོན།
མ་བུ་བདེ་སྲུང་ལྷན་ཚོགས་ཀྱི་ལས་འཛིན་དཔོན་པོ་པད་མ་དབྱངས་ཅན་གྱིས་གསར་འགོད་པར་བཤད་པ་ལྟར་ན། ལྷ་ས་གྲོང་ཁྱེར་གྱི་འཕྲོད་བསྟེན་ལས་རིགས་དབྱར་མཚོ་རྒྱས་པ་བཞིན་འཕེལ་རྒྱས་དང་སྨན་བཅོས་ཆ་རྐྱེན་ལེགས་བཅོས་བྱས་པ་དང་བསྟུན་ནས། རོང་འབྲོག་ཁུལ་མང་ཚོགས་ཀྱི་ལུས་པོ་བདེ་ཐང་དང་འཚོ་བའི་ཆ་རྐྱེན་ཇེ་ལེགས་སུ་སོང་ཡང་། རོང་འབྲོག་ཁུལ་མང་ཚོགས་ཀྱི་བསམ་བློ་རྙིང་ཞེན་ཆེ་བ་དང་། རང་སྲུང་འདུ་ཤེས་དམའ་བ།སྡོད་ཁུལ་ཁ་འཐོར་དུ་གནས་པ་སོགས་ཕྱི་རོལ་ཡུལ་གྱི་རྐྱེན་གང་མང་ཞིག་གིས། ས་ཆ་མང་ཆེ་བ་ཞིག་ཏུ་སྦྲུམ་མས་རང་ཁྱིམ་དུ་བྱིས་པ་སྐྱེ་བའི་གནས་ཚུལ་ཡོད་པས། སྦྲུམ་མ་དང་བྱིས་པ་འཆི་བའི་སྣང་ཚུལ་འབྱུང་སླ། དེ་བས་ལས་གཞི་འདི་ལག་བསྟར་བྱས་པ་བརྒྱུད། དུས་ཡུན་ཐུང་ངུའི་ནང་ཕྱོགས་ཡོངས་ནས་ཕན་འབྲས་ཐོན་པར་བརྩོན་ལེན་བྱེད་རྒྱུ་རེད།