ཀྲུང་གོའི་བོད་ལྗོངས་དྲ་བའི་འཕྲིན། “གཞོན་ནུའི་ལང་ཚོ་གསེར་ལས་དཀོན། མེ་འཁོར་བསྡད་ནས་ལྷ་སར་སྐྱོད”ཅེས2024ལོའི“དགུན་དུས་བོད་ལྗོངས་སུ་ཡུལ་སྐོར”གྱི་བྱེད་སྒོ་སྤེལ་ཚུན་ལྷ་ས་མེ་འཁོར་འབབ་ཚུགས་ཀྱིས་ལས་དོན་ཧུར་ཐག་སྤེལ་ནས་མི་རིགས་ཁག་གི་མི་དམངས་ལ“བདེ་འཇགས་དང་། སྟབས་བདེ། དྲོ་སྐྱིད་ལྡན་པའི་ངང་ཕྱིར་སྐྱོད་པའི”ལྕགས་ལམ་ཞབས་ཞུ་ཧུར་ཐག་སྤེལ་ནས་བོད་ལྗོངས་ཀྱི་ཡུལ་སྐོར་ལ་ལེགས་སྐྱེས་ཕུལ་ཡོད།
ལྷ་ས་མེ་འཁོར་འབབ་ཚུགས་ཀྱི་ལས་དོན་པས་ས་ཚིགས་སུ་མེ་འཁོར་སྒུག་བཞིན་པ།
སྔར་ནས་ད་བར་མཚོ་བོད་ལྕགས་ལམ་ནི་ཡུལ་སྐོར་བ་ཚོ་བོད་ལྗོངས་སུ་ཡོང་བའི་བགྲོད་ལམ་གལ་ཆེན་ཞིག་ཡིན་ཞིང་། ལྷ་ས་མེ་འཁོར་འབབ་ཚུགས་དེ་ཉིད་མཚོ་བོད་ལྕགས་ལམ་གྱི་ས་ཚིགས་གལ་ཆེན་ཞིག་ཡིན་པའི་ངོས་ནས་དགུན་དུས་བོད་ལྗོངས་སུ་ཡོང་མཁན་གྱི་ཡུལ་སྐོར་བ་མེ་འཁོར་དུ་སྡོད་པའི་ཉམས་ལེན་སྔར་ལས་ཡག་པོ་ཡོང་བའི་འགན་ལེན་བྱ་ཆེད། མེ་འཁོར་འབབ་ཚུགས་ཀྱིས་ཉེ་དུས་འགྲུལ་པའི་ཐོགས་མེད་བགྲོད་ལམ་འཐུས་སྒོ་ཚང་དུ་བཏང་བ་དང་། འབབ་ཚུགས་སུ་སྐྱོད་པའི་བགྲོད་ལམ་དང་བདེ་འཇགས་ཞིབ་བཤེར་གྱི་བགྲོད་ལམ་མང་དུ་བཏང་བས་འགྲུལ་པ་བང་སྒྲིག་ཡུན་ཐུང་དུ་ཕྱིན་ཡོད། སྤ་སེ་འཚོང་བ་དང་། མེ་འཁོར་སྒུག་པ། མེ་འཁོར་ལ་སྡོད་པ་དང་འབབ་པ། འབབ་ཚུགས་ནས་ཕར་འགྲོ་ཚུར་འོང་བྱེད་པ་སོགས་ཀྱི་ལྷུ་ཚིགས་ཁག་ལ་ཁྲིད་སྟོན་དང་ཞབས་འདེགས་ཞུ་ཤུགས་ཆེ་རུ་གཏོང་གི་ཡོད།
མེ་འཁོར་འབབ་ཚུགས་ཀྱི་ལས་དོན་པས་ཡུལ་སྐོར་བར་བོད་ལྗོངས་སུ་ཡོང་སྐབས་དོ་སྣང་བྱེད་དགོས་པའི་གནད་དོན་གསལ་བཤད་བྱེད་བཞིན་པ།
ལྷ་ས་མེ་འཁོར་འབབ་ཚུགས་ཀྱིས་སྤུས་རྟགས་ཀྱི་ཤུགས་རྐྱེན་ནུས་པ་འདོན་སྤེལ་གང་ལེགས་བྱས་ནས་དམངས་ཕན་དང་། གཙོ་གནད། ཁྱད་ལྡན། ཁྱད་པར་ཅན་སོགས་སྤུས་ལེགས་ཞབས་ཞུའི་ཐད་རྒྱུན་ཆད་མེད་པར་གསར་གཏོད་ཀྱི་གསོན་ཤུགས་རྒྱས་པར་བྱས་ཡོད། རྒན་རྒོན་དང་། བྱིས་པ། ནད་པ། དབང་པོ་སྐྱོན་ཅན། སྦྲུམ་མ་བཅས་དང་དེ་བཞིན་ཡོ་བྱད་ལ་བརྟེན་ནས་འགྲོ་མཁན་གྱི་གཙོ་གནད་འགྲུལ་པར་ཆེད་དམིགས་ཀྱི་འགྲོ་ལམ་བཟོས་ཏེ་འབབ་ཚུགས་ནས་འགྲོ་འོང་དང་རླངས་འཁོར་ནས་བབས་པར་རོགས་སྐྱོར་ཞབས་ཞུ་བྱས་ནས་རྒན་རྒོན་དང་དྲ་རྒྱ་ནས་བྲལ་བའི་ཚོགས་སྤྱིར་སྟབས་བདེའི་ཕྱིར་སྐྱོད་ཞབས་ཞུ་མཁོ་འདོན་དང་། འགྲུལ་པས་མེ་འཁོར་འབབ་ཚུགས་ཀྱི་ཞབས་ཞུའི་ཐད་སྦྲེལ་ཁ་པར་རམ་ཡང་ན12306གི་ཞབས་ཞུའི་ཁ་པར་བརྒྱབ་ནས་རྐུབ་སྟེགས་འཁོར་ལོ་ཅན་དང་འགྲོ་འོང་ས་ཚིགས་སོགས་ཀྱི་སྟབས་བདེའི་ཞབས་ཞུ་སྔོན་མངགས་བྱེད་ཐུབ་ཀྱི་ཡོད།
བོད་ལྗོངས་སུ་ཡུལ་སྐོར་བྱེད་པའི་འགྲིམ་འགྲུལ་བྱ་ཐབས་གཙོ་བོའི་གྲས་ཤིག་ཡིན་པའི་ངོས་ནས་ལྕགས་ལམ་སྡེ་ཚན་གྱིས་དུས་བཀག་ལྟར་མེ་འཁོར་ལ་ཞིབ་བཤེར་ཉམས་གསོ་དང་སྲུང་སྐྱོང་ནན་པོ། ཞིབ་དཔྱད་ཚད་ལེན་དང་སྙོམས་སྒྲིག་ཚོད་ལྟ་བྱས་ནས་མེ་འཁོར་བདེ་འཇགས་ངང་འཁོར་སྐྱོད་བརྟན་པོ་ཡོང་བའི་འགན་ལེན་བྱས་ཏེ། ཡུལ་སྐོར་བས་ལྷ་སའི་མེ་འཁོར་ལ་བློ་བདེ་པོའི་ངང་སྡོད་ཆོག་པ་དང་། མེ་འཁོར་འབབ་ཚུགས་ཀྱི་བཀོད་པ་ལེགས་སུ་བཏང་ནས་སྤ་སེ་ཉོ་བའི་ཚོམས་ཆེན་ནས་མེ་འཁོར་སྒུག་ས་སོགས་གསལ་པོ་འགོད་ཐུབ་པ་བྱས་ཏེ་ལྷུ་ཚིགས་ཚང་མར་ལས་དོན་པས་ཁྲིད་སྟོན་ཧུར་ཐག་བྱས་ནས་ཡུལ་སྐོར་བ་འགྲུལ་བཞུད་བདེ་བླག་ཡོང་བའི་འགན་ལེན་བྱེད་པ་དང་། མེ་འཁོར་བོད་ལྗོངས་སུ་སྐྱོད་པའི་ལམ་བར་དུ་གནད་དོན་གང་རུང་འཕྲད་ཚེ་དུས་དང་། རྣམ་པ་ཀུན་ཏུ་ལྕགས་ལམ་ལས་དོན་པ་དང་འབྲེལ་གཏུག་བྱས་ཏེ། འཛུམ་དམུལ་དམུལ་དང་ཆེད་ལས་ཀྱི་ཞབས་ཞུའི་རྣམ་འགྱུར་ལ་བརྟེན་ནས་ལྷ་སར་སྐྱོད་མཁན་གྱི་ཡུལ་སྐོར་བ་ཚང་མར་དྲོ་སྐྱིད་དང་ཐུགས་ཁུར་ཚོར་བ་བྱ་རྒྱུ་རེད།
