ཉེ་ཆར། གློག་བརྙན་ཞིག་དང་མི་ཞིག་གིས་ཀུན་གྱི་མིག་ཟུང་སླར་ཡང་ཀྲུང་གོའི་ནུབ་རྒྱུད་མི་མེད་ལུང་སྟོང་ཁུལ་དུ་དྲངས་པ་རེད། གློག་བརྙན་དེ་ནི2017ལོའི་ཟླ11པར་འགྲེམས་སྟོན་གནང་པའི《ཉིན་དོན་བདུན》ཞེས་པ་ཡིན་ལ། གློག་བརྙན་དུ་བྱང་ཐང་ས་ཁུལ་གྱི་མཛེས་ལྗོངས་ཀྱི་བརྗིད་ཆགས་རྣམ་པ་མངོན་ཡོད་པ་རེད། མི་དེ་ནི་རྐང་ཐང་འགྲུལ་བཞུད་ལ་དགའ་མོས་ཅན་ལིའུ་དབྱིན་ཁྲོན་རེད། གསར་ལམ་དུ་བསྒྲགས་པ་ལྟར་ན། ལིའུ་དབྱིན་ཁྲོན་སྤྱི་ལོ་2017ལོའི་ཟླ10པའི་ཚེས23ཉིན་བྱང་ཐང་མི་མེད་ལུང་སྟོང་དུ་སླེབས་རྗེས་འབྲེལ་ལམ་ཆད་ནས་ད་བར་ཧ་ལམ་ཉིན80ལྷག་ཙམ་འགོར་ཡོད་འདུག
《ཉིན་དོན་བདུན》གྱི་བརྙན་པར།
རྒྱུས་ལོན་བྱུང་པ་ལྟར་ན། ཀྲུང་གོར་མི་མེད་ལུང་སྟོང་ཆེན་པོ་བཞི་ཡོད་པ་སྟེ། ལོ་པུ་མཚེའུ་དང་ཨའར་ཅིན་རི་བོ།ཨ་ཆེན་གངས་རྒྱབ། བྱང་ཐང་བཅས་ཡིན་ལ། དེའི་ཁྲོད་དུ་ཨའར་ཅིན་རི་བོ་དང་ཨ་ཆེན་གངས་རྒྱབ། བྱང་ཐང་བཅས་སུ་རི་སྐྱེས་སྲོག་ཆགས་དང་རྩི་ཤིང་ཕུན་སུམ་ཚོགས་མོད་སྐྱེ་ཁམས་ཁོར་ཡུག་ཧ་ཅང་ཉམས་ཞན་ཡིན་པས་ན་སྲུང་སྐྱོབ་ནན་པོ་བྱེད་དགོས་པ་རེད། ཉེ་ཆར། མཚོ་སྔོན་གྱི་ཨ་ཆེན་གངས་རྒྱབ་དང་ཤིན་ཅང་གི་ཨའར་ཅིན་རི་བོ། བོད་བྱང་ཐང་གི་རྒྱལ་ཁབ་རིམ་པའི་རང་བྱུང་སྲུང་སྐྱོབ་ཁུལ་བཅས་ཀྱིས་མཉམ་འབྲེལ་ཐོག་སྡེ་ཚན་དང་མི་སྒེར་སུ་ཡིན་རུང་རང་དགར་དུ་སྲུང་སྐྱོབ་ས་ཁུལ་དུ་བསྐྱོད་ནས་ཁྲིམས་འགལ་བརྒལ་སྐྱོད་བྱེད་མི་ཆོག་པའི་སྤྱི་བསྒྲགས་སྤེལ་ཡོད་པ་རེད།
ཨར་ཅིན་རི་བོར་འཚོ་བའི་གཉན།
མཚོ་སྔོན་གྱི་ཨ་ཆེན་གངས་རྒྱབ་དང་ཤིན་ཅང་གི་ཨའར་ཅིན་རི་བོ། བོད་བྱང་ཐང་གི་རྒྱལ་ཁབ་རིམ་པའི་རང་བྱུང་སྲུང་སྐྱོབ་ཁུལ་ནི་རང་རྒྱལ་གྱི་རྒྱ་ཁྱོན་ཆེ་ཤོས་ཀྱི་རང་བྱུང་སྲུང་སྐྱོབ་ཁུལ་ཚོགས་ཡིན་ལ། མཚོ་བོད་ས་མཐོའི་རྩ་ཆེ་ཞིང་སྟོངས་ལ་ཉེ་བའི་རི་སྐྱེས་སྲོག་ཆགས་དང་རྩི་ཤིང་གི་རྒྱུད་རྒྱུའི་མཛོད་ཡིན་ཏེ། རང་བྱུང་ཁོར་ཡུག་སྲུང་སྐྱོབ་དང་སྐྱེ་དངོས་སྣ་མང་ཅན་སྲུང་སྐྱོབ། ཚན་རིག་ཞིབ་འཇུག་སོགས་ཐད་གཞན་གྱིས་ཚབ་བྱེད་ཐབས་བྲལ་བའི་ཚན་ཞིབ་དང་སྐྱེ་ཁམས་ཀྱི་རིན་ཐང་ལྡན་ཞིང་འདི་ག་ནི་སྲོག་ཆགས་དང་རྩི་ཤིང་གི་དག་ཞིང་རེད།
མཚོ་སྔོན་ཨ་ཆེན་གངས་རྒྱབ་མི་མེད་ལུང་སྟོང་གི་ལྷིང་འཇགས་ཀྱི་མཛེས་ལྗོངས་དང་། བདེ་འཇགས་འཆམ་མཐུན་གྱི་ངོ་མཚར་བཀོད་པ།
རྒྱུ་རྐྱེན་སྣ་ཚོགས་ཀྱི་དབང་གིས། སྲོག་ཆགས་ཀྱི“དག་ཞིང”འདི་དག་ལ་མིའི་རིགས་ཀྱི“བཙན་འཛུལ” ཡང་ཡང་ཐེབས་ཀྱི་ཡོད་དེ། ཉེ་ཆར། ཤིན་ཅང་གི་ལོ་པུ་མཚེའུ་རི་སྐྱེས་རྔ་མོང་རྒྱལ་ཁབ་རིམ་པའི་རང་བྱུང་སྲུང་སྐྱོབ་ཁུལ་དོ་དམ་ཅུས་ཀྱིས་རྒྱལ་ཁབ་ཀྱི་འབྲེལ་ཡོད་སྲུང་སྐྱོབ་ཁུལ་གྱི་དོ་དམ་སྲོལ་ཡིག་ལྟར། ལོ་ཧུའུ་རླངས་འཁོར་རུ་ཁག་ཁྲིམས་འགལ་ངང་ལོ་པུ་མཚེའུ་རི་སྐྱེས་རྔ་མོང་སྲུང་སྐྱོབ་ཁུལ་དུ་བསྐྱོད་པའི་དོན་རྐྱེན་ལ་གྲངས་ཚད་ཆེས་མང་ཤོས་ལྟར་ཉེས་ཆད་བཅད་པ་རེད།
མཆོངས་རྒྱུགས་བྱེད་བཞིན་པའི་རི་སྐྱེས་རྔ་མོང་།
དེང་སྐབས། ཀྲུང་གོར་འཚོ་བའི་རི་སྐྱེས་རྔ་མོང600 ཡས་མས་ཙམ་ལས་མེད་ཅིང་།རང་རྒྱལ་གྱི་རྒྱལ་ཁབ་རིམ་པ་དང་པོའི་སྲུང་སྐྱོབ་སྲོག་ཆགས་ཁོངས་སུ་གཏོགས། རི་སྐྱེས་རྔ་མོང་ནི་བྱེ་ཐང་ཁོར་ཡུག་དང་འཚམས་མཐུན་ཡོད་པའི་རྨིག་པ་ཅན་གྱི་སྲོག་ཆགས་ཆེས་ལེགས་ཤོས་ཡིན་ལ། ཉེ་བའི་ལོ་ཤས་རིང་། མིའི་རིགས་ཀྱི་བྱེད་སྒོ་རྒྱ་སྐྱེད་པ་དང་ཕྱུགས་འཚོ་བ། གཏེར་ཁ་སྔོག་འདོན། ལམ་བཟོ་བ་བཅས་ཀྱིས་རི་སྐྱེས་རྔ་མོང་གི་འཚོ་གནས་ལ་འཇིགས་སྐུལ་ཆེན་པོ་ཐེབས་ཡོད་ལ། རི་སྐྱེས་རྔ་མོང་གི་འཚོ་གནས་ཁུལ་ལའང་སྔར་བས་གནོན་ཤུགས་ཆེན་པོ་ཐེབས་ཡོད་པ་རེད།
རི་སྐྱེས་རྔ་མོང་ཁྱབ་ཚུལ་རི་མོ།
སྲོག་ཆགས་ཀྱི“དག་ཞིང”འདི་དག་སྲུང་སྐྱོབ་བྱེད་ཆེད། རྒྱལ་ཁབ་ཀྱིས་སྒྲིག་སྲོལ་ལམ་ལུགས་མང་པོ་བཏོན་པའི་དུས་མཚུངས་སུ་སྲུང་སྐྱོབ་ཁུལ་གྱི་ལྟ་ཞིབ་སྐོར་ཞིབ་ལ་ཤུགས་སྣོན་བྱས་ཡོད་པ་སྟེ། དཔེར་ན། 2016 ལོའི་ལོ་མཇུག་ཏུ། བྱང་ཐང་རྒྱལ་ཁབ་རིམ་པའི་རང་བྱུང་སྲུང་སྐྱོབ་ཁུལ་གྱིས་དོ་དམ་སྲུང་སྐྱོབ་ས་ཚིགས72 བཙུགས་པ་དང་། བོད་ལྗོངས་ཀྱི་ནག་ཆུ་དང་མངའ་རིས་ས་ཁུལ་གྱི་སྲུང་སྐྱོབ་ཁུལ་གྱི་མཐའ་འཁོར་དུ་འཚོ་སྡོད་བྱེད་པའི་ཞིང་འབྲོག་མང་ཚོགས2000 ལ་ཉེ་བ་ཙམ གྱིས་རི་སྐྱེས་སྲོག་ཆགས་སྲུང་སྐྱོབ་ཀྱི་སྟོབས་ཤུགས་ནུས་ལྡན་ཞིག་བཙུགས་པ་རེད།
བྱང་ཐང་རང་བྱུང་སྲུང་སྐྱོབ་ཁུལ་ནས་ཡོང་བའི་གཙོད་ཅིག་གིས་རྒྱང་ལ་ཅེར་པ།
ཡ་ཞིན་དྲ་བ་ཞེས་པའི་གནས་ཚུལ་སྤེལ་བར་གཞིགས་ན། ཤིན་ཅང་ལོ་པུ་མཚེའུ་དང་ཨའར་ཅིན་རི་བོ་སོགས་རྒྱལ་ཁབ་རིམ་པའི་རང་བྱུང་སྲུང་སྐྱོབ་ཁུལ4ཡི་མངའ་ཁོངས་ནང་གི་གཏེར་རི་དང་ཁྲིམས་འགལ་གྱིས་སྔོག་འདོན་བྱེད་པའི་ཁེ་ལས་ཚང་མ་སྒོ་གཏན་ནས་ཕྱིར་འཐེན་བྱེད་རྒྱུ་ཡིན་པ་དང་།སླར་ཕྱིན། གསར་དུ་བཙུགས་པའི་གཏེར་ལས་དབང་ཆ་གང་ཡང་གོང་གསལ་སྲུང་སྐྱོབ་ཁུལ་དུ་ཡོང་མི་ཆོག་གོ
ཨའར་ཅིན་རི་བོའི་རྒྱལ་ཁབ་རིམ་པའི་རང་བྱུང་སྲུང་སྐྱོབ་ཁུལ་ནང་གི་ཡུལ་ལྗོངས།
འདི་ནི་སའི་གོ་ལའི་ས་གཙང་གནས་གཙང་ཡིན་ལ། འདི་ནི་སྲོག་ཆགས་ཀྱི་དག་ཞིང་ཡིན་པས་མིའི་རིགས་ཀྱིས་གཅེས་སྐྱོང་བྱེད་དགོས། ཡངས་ཤིང་རྒྱ་ཆེ་བའི་ལྷིང་འཇགས་ཀྱི་ས་སྟེང་དུ་མཛེས་སྡུག་ལྡན་པའི་སེམས་ཅན་མང་པོ་ཞིག་འཚོ་སྡོད་བྱས་ཡོད་ལ། དེ་དག་ནི་གནས་འདིའི“བདག་པོ”ངོ་མ་རེད།
མཛེས་ཤིང་ཡིད་དུ་འོང་པའི་གཙོད།
