མཚོ་སྔོན་གྱི་འཐུས་མི་ཤ་བོ་སྒྲོལ་མ་དང་ཁོང་ཆིན་ཅུའུ། པད་རྒྱལ་བཀྲ་ཤིས་བཅས་ཀྱིས་མཚོ་སྔོན་གྱི་ས་གནས་སོ་སོའི་ལུས་རྩལ་ཁང་འཛུགས་སྐྲུན་བྱ་བར་རྒྱབ་སྐྱོར་བྱེད་དགོས་པའི་གྲོས་གཞི་བཏོན།
སྤེལ་དུས 2018-03-19
ཡོང་ཁུངས། མཚོ་སྔོན་བོད་སྐད་རླུང་འཕྲིན།
རྩོམ་པ་པོ། སྒྲོལ་མས་བསྒྲིགས།
རྒྱལ་ཡོངས་དམངས་ཆེན་སྐབས་བཅུ་གསུམ་པའི་གྲོས་ཚོགས་ཐེངས་དང་པོར་ཞུགས་པའི་མཚོ་སྔོན་གྱི་འཐུས་མི་ཤ་བོ་སྒྲོལ་མ་དང་ཁོང་ཆིན་ཅུའུ། པད་རྒྱལ་བཀྲ་ཤིས་བཅས་ཀྱིས། མཚོ་སྔོན་གྱི་ས་གནས་སོ་སོའི་ལུས་རྩལ་ཁང་འཛུགས་སྐྲུན་བྱ་བར་མ་དངུལ་འབོར་ཆེན་བཏང་ནས་རྒྱབ་སྐྱོར་བྱེད་དགོས་པའི་གྲོས་གཞི་བཏོན།
གྲོས་གཞིའི་ཁྲོད་བཤད་རྒྱུར། འདས་པའི་ལོ་ལྔའི་རིང་ལ། མཚོ་སྔོན་ཞིང་ཆེན་གྱིས་ཁྱོན་བསྡོམས་ཞིང་བའི་ལུས་སྦྱོང་བཟོ་སྐྲུན་སྟོང་ལྔ་དང་སུམ་བརྒྱ་བཅུ་དྲུག་ལག་བསྟར་བྱས་ཏེ། ཞིང་ཆེན་ཡོངས་ཀྱི་ཞང་དང་གྲོང་རྡལ་དང་སྲིད་འཛིན་སྡེ་བ། གཞིས་ཁུལ། དགོན་སྡེ་བཅས་ཀྱི་ལུས་རྩལ་དང་ལུས་སྦྱོང་ལ་དམིགས་བཙུགས་ནས། མང་ཚོགས་ལ་ཕྱི་རོལ་ནས་ལུས་སྦྱོང་བྱེད་པར་འཚམ་པའི་སྒྲིག་ཆས་འདོན་སྤྲོད་བྱས་ཡོད་ནའང་། ཞིང་ཆེན་ནང་ཁུལ་གྱི་ལུས་རྩལ་ཁང་འཛུགས་སྐྲུན་གྱིས་ས་གནས་མང་ཚོགས་ཀྱི་དགོས་མཁོ་སྔར་ལས་སྐོང་ཐུབ་ཀྱིན་མེད་པ་དང་། ས་གནས་སོ་སོའི་ལུས་རྩལ་ཁང་གིས་མང་ཚོགས་ཀྱིས་ལུས་རྩལ་ཁང་གི་ནང་ནས་ལུས་སྦྱོང་བྱེད་པའི་དགོས་མཁོ་སྐོང་ཐུབ་མེད། མཚོ་སྔོན་གྱི་ས་གནས་མང་ཆེ་བར་མཚོན་ན་དགུན་དུས་རིང་ཞིང་གྲང་ངར་ཆེ་ལ། དབྱང་དབུགས་ཉུང་བའི་མི་རིགས་ས་ས་ཁུལ་ཡིན་པས། ལུས་རྩལ་ཁང་གི་ནང་ནས་ལུས་སྦྱོང་བྱེད་པའི་དགོས་མཁོ་སྔར་ལས་ཆེ་བ་ཡིན།
གོང་གསལ་གནད་དོན་དེར་དམིགས་ནས། མཚོ་སྔོན་གྱི་འཐུས་མི་གསུམ་གྱིས་མཚོ་སྔོན་ཞིང་ཆེན་གྱི་ས་གནས་སོ་སོའི་ལུས་རྩལ་ཁང་འཛུགས་སྐྲུན་བྱ་བར་མ་དངུལ་འབོར་ཆེན་བཏང་ནས་རྒྱབ་སྐྱོར་བྱེད་དགོས་པ་དང་། ལོ་རེར་མཚོ་སྔོན་ནས་རྫོང་རིམ་པའི་དམངས་ཡོངས་ཀྱི་ལུས་སྦྱོང་ལྟེ་གནས་འཛུགས་པའི་ལས་གཞི་བརྒྱད་ནས་བཅུ་གཉེར་དགོས་ལ། ཁྱད་པར་དུ་རང་བྱུང་ཁོར་ཡུག་ཞན་ལ་གྲང་ངར་ཆེ་བའི་མཐའ་འཁོབ་ས་ཁུལ་ལ་རྒྱབ་སྐྱོར་བླ་ལྷག་བྱས་ཏེ། ལོ་གསུམ་ནས་ལྔའི་བར་དུ་དམངས་ཡོངས་ཀྱི་ལུས་སྦྱོང་ལྟེ་གནས་ཀྱིས་ཁེབས་པར་བྱེད་པའི་དམིགས་འབེན་མངོན་དུ་འགྱུར་བར་བྱེད་དགོས། ཞིང་ཆེན་ཡོངས་ཀྱི་གྲོང་ཁྱེར་དང་རྫོང་སོ་སོར་དམངས་ཕན་གྱི་ཁང་བའི་ནང་ནས་ལུས་སྦྱོང་བསྟེན་ཆོག་པའི་ས་ཆ་འདོན་སྤྲོད་བྱས་ཏེ། སྔར་ལས་ལྷག་པའི་སྒོ་ནས་ས་བབ་མཐོ་ལ་གྲང་ངར་ཆེ་ཞིང་། མི་རིགས་ས་ཁུལ་གྱི་མང་ཚོགས་ཀྱི་ཉིན་རེ་བཞིན་ཇེ་དྲག་ཏུ་འཕེལ་བཞིན་པའི་ལུས་སྦྱོང་དགོས་མཁོ་བསྐང་དགོས་པའི་གྲོས་གཞི་བཏོན།