འཐུས་མིས་ཚྭ་མཚོའི་ཐོན་ཁུངས་ཕྱོགས་ཡོངས་ནས་གྲོན་ཆུང་དང་འཁོར་སྐྱོད་བཀོལ་སྤྱོད་བྱེད་རྒྱུའི་གྲོས་གཞི་བཏོན།
སྤེལ་དུས 2018-03-19
ཡོང་ཁུངས། ཀྲུང་གོ་བོད་ཀྱི་དྲ་བ།
རྩོམ་པ་པོ། མཁའ་མཚོ་སྐྱིད།
རྒྱལ་ཡོངས་དམངས་ཆེན་སྐབས་བཅུ་གསུམ་པའི་གྲོས་ཚོགས་ཐེངས་དང་པོར་ཞུགས་པའི་མཚོ་སྔོན་གྱི་འཐུས་མི་ཀྲང་ཡུང་ལིས་དང་མིན་ཧེ། ཨ་ཧྲིན་ཆིན་བཅས་ཀྱིས་ཚྭ་མཚོའི་ཐོན་ཁུངས་ཕྱོགས་ཡོངས་ནས་གྲོན་ཆུང་དང་འཁོར་སྐྱོད་བཀོལ་སྤྱོད་བྱེད་རྒྱུའི་གྲོས་གཞི་བཏོན།
གྲོས་གཞིའི་ཁྲོད་དུ་བཤད་རྒྱུར། མཚོ་སྔོན་ཚྭ་འདམ་གཞོང་ས་ཁུལ་དུ་ཚྭ་མཚོའི་ཐོན་ཁུངས་ཕུན་སུམ་ཚོགས་ལ། རིགས་སྣ་འཛོམས་པ་དང་རྒྱུ་སྤུས་བཟང་བ། གྲུབ་ཚུལ་ལེགས་པ། ཐོན་ལས་འབྲེལ་འདྲིས་ཟབ་པ་བཅས་ཀྱི་ཁྱད་ཆོས་ལྡན། ཉེ་བའི་ལོ་འགར་རྒྱལ་ཁབ་ཀྱི་རྒྱབ་སྐྱོར་ཆེན་པོའི་འོག་ཏུ། ཞིང་ཆེན་ཏང་ཨུ་དང་ཞིང་ཆེན་སྲིད་གཞུང་གི་འབད་བརྩོན་ལྷོད་མེད་འོག་ཏུ། མཚོ་སྔོན་གྱིས་འཁོར་སྐྱོད་དཔལ་འབྱོར་ཤུགས་ཆེན་པོས་འཕེལ་རྒྱས་སུ་བཏང་ནས། ཚྭ་མཚོའི་ཐོན་ཁུངས་གྲོན་ཆུང་དང་འཁོར་སྐྱོད་བཀོལ་སྤྱོད་བྱེད་པའི་བྱ་བ་ཧུར་ཐག་གིས་བསྒྲུབས་པས། ཅ་ལུད་འདོན་སྤྲོད་ནུས་པ་གཏན་འཇགས་སྒོས་འཕར་བ་དང་། འཁོར་སྐྱོད་ཐོན་ལས་ཀྱི་མུ་ཁྱུད་ཕལ་ཆེར་ཆགས་ཡོད་ལ། ཚན་རྩལ་གསར་གཏོད་ཀྱི་ནུས་པ་ཇེ་ཆེར་སོང་ཞིང་། ཆ་སྡེབས་རྨང་གཞིའི་སྒྲིག་ཆས་རིམ་བཞིན་འཐུས་ཚང་དུ་གྱུར་ཡོད།
ཡིན་ནའང་མཚོ་སྔོན་ནུབ་བྱང་གི་སྐམ་སར་གནས་པ་དང་། ཁོར་ཡུག་གི་ཆ་རྐྱེན་ཞན་ལ། དཔལ་འབྱོར་འཕེལ་རྒྱས་ཀྱི་ཆུ་ཚད་རྗེས་ལུས་ཡིན་པ་མ་ཟད། མ་དངུལ་གྱིས་མ་འདང་བ་དང་། ཆ་སྡེབས་ཐོན་ཁུངས་ལ་ཚད་ཡོད་པ། ཚན་རྩལ་གསར་གཏོད་ཀྱི་ནུས་པ་ཞན་པ། ཐོན་ཁུངས་གསར་སྤེལ་གྱི་དཀའ་ཁག་ཆེ་བ། མཐོ་རིམ་འཇོན་མི་དཀོན་པ་སོགས་ཀྱི་རྒྱུ་རྐྱེན་ལ་བརྟེན་ནས། མཚོ་སྔོན་གྱི་ཚྭ་མཚོའི་ཐོན་ཁུངས་ཕྱོགས་ཡོངས་ནས་གྲོན་ཆུང་དང་འཁོར་སྐྱོད་བཀོལ་སྤྱོད་བྱེད་པའི་བྱ་བའི་ཆུ་ཚད་སྔར་ལས་ཅུང་དམའ།
དེ་བས་འཐུས་མི་གསུམ་གྱིས་རྒྱལ་ཁབ་རིམ་པ་ནས་སྲིད་ཇུས་དང་དངུལ་རྩ་སོགས་ཕྱོགས་ཀྱི་རྒྱབ་སྐྱོར་བྱེད་ཤུགས་ཇེ་ཆེར་གཏོང་བ་དང་། འཕེལ་རྒྱས་ཀྱི་འགོག་རྐྱེན་སེལ་ནས། མཚོ་སྔོན་གྱི་ཚྭ་མཚོའི་ཐོན་ཁུངས་ཕྱོགས་ཡོངས་ནས་གྲོན་ཆུང་དང་འཁོར་སྐྱོད་བཀོལ་སྤྱོད་ཀྱི་བྱ་བ་ཆུ་ཚད་གསར་བ་རུ་གོང་འཕེལ་དུ་གཏོང་རྒྱུའི་གྲོས་གཞི་བཏོན།