མཚོ་སྔོན་པཎྜི་ཏ་ཀུང་སིས་བོད་ཁུལ་གྱི་སློབ་གསོར་བཅངས་པའི་བརྩེ་བ།
སྤེལ་དུས 2020-03-31
ཡོང་ཁུངས། ཀྲུང་དབྱང་རླུང་འཕྲིན་བརྙན་འཕྲིན་སྤྱི་ཁྱབ་ལས་ཁུངས།
རྩོམ་པ་པོ།
ད་ལོའི་ལོ་སྟོད་ལ། གློ་བུར་དུ་བྱུང་བའི་གློ་ཚད་རིམས་ནད་ཀྱིས་སློབ་གྲྭའི་རྒྱུན་ལྡན་གྱི་སློབ་ཁྲིད་འཆར་གཞི་ལ་འགོར་འགྱངས་བཟོས་ཡོད། ཁྲིད་མཚམས་བཞག་ཀྱང་བསླབ་མཚམས་མི་འཇོག་པར་འགན་ལེན་བྱ་ཆེད། བོད་རིགས་ས་ཁུལ་ཁག་གིས་ཀྱང་མགྱོགས་མྱུར་སྒོས་དྲ་ཐོག་སློབ་ཁྲིད་བྱ་ཐབས་སྤྱད་པ་རེད། དེ་ལྟ་བུའི་ལས་ཀར་རྒྱབ་སྐྱོར་བྱེད་ཆེད། མཚོ་སྔོན་པཎྜི་ཏ་ཆ་འཕྲིན་ཚན་རྩལ་ཚད་ཡོད་ཀུང་སིས་ཁྱོན་བསྡོམས་མ་དངུལ་སྒོར་ཁྲི41.5ཟིན་པའི་པཎྜིཏ་སློབ་གསོ་ཆ་འཕྲིན་ཅན་མ་ལག་དང་པཎྜིཏ་ལག་ཐོག་རྩིས་འཁོར་ཞལ་འདེབས་སུ་ཕུལ་ནས། བྱིས་པ་རྣམས་ཀྱིས་དུས་ཐོག་ཏུ་སློབ་ཁྲིད་ཉན་ཐུབ་རྒྱུར་རོགས་འདེགས་བྱས་ཡོད་པ་རེད།
དེ་ཡང་མཚོ་སྔོན་པཎྜི་ཏ་ཆ་འཕྲིན་ཚན་རྩལ་ཚད་ཡོད་ཀུང་སིས་མཚོ་སྔོན་ཞིང་ཆེན་མཚོ་ལྷོ་བོད་རིགས་རང་སྐྱོང་ཁུལ་སློབ་གསོ་ཅུད་ལ་རིན་ཐང་སྒོར་ཁྲི30ཟིན་པའི་པཎྜི་ཏ་སློབ་གསོ་ཆ་འཕྲིན་ཅན་མ་ལག་དང་པཎྜིཏ་ལག་ཐོག་རྩིས་འཁོར200ཞལ་འདེབས་སུ་ཕུལ་ནས། མཚོ་ལྷོ་བོད་ཁུལ་གྱི་སློབ་མ་ཁག་གཅིག་དྲ་ཐོག་སློབ་ཁྲིད་ནང་ཞུགས་པའི་གནད་དོན་ཐག་གཅོད་བྱེད་རོགས་བྱས་ཡོད་པ་རེད། ཀུང་སིའི་འགན་འཛིན་པ་དཔའ་རྒོད་ཚེ་རིང་གིས། ཐེངས་འདིའི་རིམས་ནད་སྔོན་འགོག་གི་དམིགས་བསལ་དུས་སྐབས་སུ། སློབ་གྲྭའི་རིམས་འགོག་གི་འགན་འཁྲི་ཧ་ཅང་ལྕི་སྟབས། རང་ཉིད་ཁེ་ལས་པ་ཞིག་གམ་སློབ་གསོ་སྡེ་ཁག་གི་མི་ཞིག་ཡིན་པའི་ངོས་ནས་ངེས་པར་ཏུ་འགན་འཁྲི་འཁུར་རོགས་བྱས་ནས་རང་རེའི་ཞིང་ཆེན་གྱི་རིམས་ནད་སྔོན་འགོག་ཚོད་འཛིན་ཐད་ལ་རང་ནུས་ཅི་ལྕོགས་ཀྱིས་ནུས་པ་འདོན་དགོས་ངེས་ཡིན་ཞེས་གསུངས། མཚོ་སྔོན་ཞིང་ཆེན་མཚོ་ལྷོ་བོད་རིགས་རང་སྐྱོང་ཁུལ་གྱི་འབྲེལ་ཡོད་འགོ་ཁྲིད་ནས་ཞལ་འདེབས་ཕུལ་བའི་བྱ་སྤྱོད་ལ་ཁས་ལེན་གང་ལེགས་དང་ལྷག་བསམ་ཟོལ་མེད་ཀྱིས་ཐུགས་རྗེ་ཆེ་ཞུས་ཡོད་པ་རེད།
པཎྜིཏ་ཀུང་སིས་མཚོ་སྔོན་མཚོ་ལྷོ་ཁུལ་ལ་ཆ་འཕྲིན་ཅན་གྱི་མ་ལག་ཞལ་འདེབས་ཕུལ་བ།
མཚོ་སྔོན་པཎྜི་ཏ་ཆ་འཕྲིན་ཚན་རྩལ་ཚད་ཡོད་ཀུང་སིས་ད་དུང་མཚོ་སྔོན་ཞིང་ཆེན་ཡུལ་ཤུལ་བོད་རིགས་རང་སྐྱོང་ཁུལ་རྫ་སྟོད་རྫོང་སློབ་གསོ་ཅུད་ལ་རིན་ཐང་སྒོར་ཁྲི་7.5ཟིན་པའི་པཎྜི་ཏ་སློབ་གསོ་ཆ་འཕྲིན་ཅན་མ་ལག་དང་པཎྜིཏ་ལག་ཐོག་རྩིས་འཁོར50ཞལ་འདེབས་སུ་ཕུལ་དང་། བོད་ལྗོངས་གཞིས་རྩེ་གྲོང་ཁྱེར་བཞད་མཐོང་སྨོན་རྫོང་སློབ་གསོ་ཅུད་ལ་རིན་ཐང་སྒོར་ཁྲི་4ཟིན་པའི་པཎྜི་ཏ་སློབ་གསོ་ཆ་འཕྲིན་ཅན་མ་ལག་དང་པཎྜིཏ་ལག་ཐོག་རྩིས་འཁོར10ཞལ་འདེབས་སུ་ཕུལ་ནས་དམངས་གཉེར་ཁེ་ལས་ཀྱིས་བོད་ཁུལ་གྱི་སློབ་གསོའི་བྱ་གཞག་ལ་བཅངས་པའི་བརྩེ་བ་མཚོན་པར་བྱས་ཡོད།
པཎྜིཏ་ཀུང་སིས་མཚོ་སྔོན་ཡུལ་ཤུལ་འབྲི་སྟོད་རྫོང་ཞལ་འདེབས་འབུལ་བ།
བོད་ལྗོངས་བཞད་མཐོང་སྨོན་རྫོང་སློབ་གསོ་ཅུད་ཀྱི་ཐུགས་རྗེ་ཆེ་ཞུ་ཡིག
མཚོ་སྔོན་པཎྜིཏ་ཆ་འཕྲིན་ཚན་རྩལ་ཚད་ཡོད་ཀུང་སི་ནི་སྤྱི་ལོ་2013ལོའི་ཟླ་1པོའི་ནང་དཔའ་རྒོད་ཚེ་རིང་དང་སངས་རྒྱས་དོན་གྲུབ་སོགས་མི་བཞི་ཡིས་བཙུགས་ཤིང་གཙོ་གཉེར་ཁྱབ་ཁོངས་རྩིས་འཁོར་དང་། དྲ་རྒྱའི་ལག་རྩལ། ཆ་འཕྲིན་ཞབས་ཞུ། མཉེན་ཆས་གསར་གཏོད། བརྡ་ཁྱབ་ཇུས་འགོད་སོགས་ཡིན་པའི་ཚན་རྩལ་རང་བཞིན་གྱི་ཁེ་ལས་གསར་གྲས་ཤིག་རེད།
པཎྜིཏ་ཀུང་སིའི་དྲ་ཐོག་མཉེན་ཆས་ཁག་གཅིག
