གཅིག སློབ་གླིང་ངོ་སྤྲོད།
ཀྲུང་གོ་བོད་བརྒྱུད་མཐོ་རིམ་ནང་བསྟན་སློབ་གླིང་ནི་ཀུན་གཟིགས་པཎ་ཆེན་སྐུ་ཕྲེང་བཅུ་པ་ཆེན་མོ་མཆོག་དང་ཀྲུང་གོ་ནང་བསྟན་མཐུན་ཚོགས་ཀྱི་ཚོགས་གཙོ་ཟུར་པ་སྐུ་ཞབས་ཀྲའོ་པུའུ་ཁྲུའུ་རྣམ་གཉིས་ཀྱི་གྲོས་འགོའི་འོག་ཏང་ཀྲུང་དབྱང་དང་རྒྱལ་སྲིད་སྤྱི་ཁྱབ་ཁང་ནས་ཆོག་མཆན་གནང་བ་བརྒྱུད། ཀྲུང་གོ་ནང་བསྟན་མཐུན་ཚོགས་ཀྱིས་གཙོ་གཉེར་བྱས་པའི་བོད་བརྒྱུད་ནང་བསྟན་གྱི་མཐོ་རིམ་སློབ་གླིང་ཞིག་ཡིན། སློབ་གླིང་འདི་ཉིད1987ལོའི་ཟླ9པའི་ཚེས1ཉིན་པེ་ཅིང་དུ་དབུ་བརྙེས་པ་དང་། བོད་བརྒྱུད་ནང་བསྟན་གྱི་དེང་རབས་སློབ་གསོའི་སློབ་གླིང་མཐོ་ཤོས་ཡིན། སློབ་གླིང་གིས“ཆབ་སྲིད་ཐད་བློས་འཁེལ་ལ། ཆོས་ལུགས་ཐད་སྐུ་ཡོན་ཆེ་བ་དང་། ཀུན་སྤྱོད་ཐད་དམངས་མགུ་བ། འགག་རྩའི་དུས་སུ་ནུས་པ་ཐོན་ཐུབ་པའི”རྒྱལ་གཅེས་ཆོས་གཅེས་ཀྱི་བྱང་ཚད་མཐོ་བའི་ཕུལ་བྱུང་དགེ་འདུན་གསོ་སྐྱོང་བྱ་རྒྱུ་དམིགས་ཡུལ་དུ་བཟུང་ཞིང་། མཐོ་རིམ་ཡོན་གནས་སློབ་གསོ་གཉེར་བ་དང་མཐོ་རམས་པའི་ཡོན་གནས་སྤྲོད་ཆོག་པའི་ཉིན་ཧྲིལ་པོའི་ལམ་ལུགས་ཀྱི་མཐོ་རིམ་སློབ་གླིང་ཉག་ཅིག་ཡིན། པཎ་ཆེན་སྐུ་ཕྲེང་བཅུ་པ་ཆེན་མོ་མཆོག་གིས་གླིང་གཙོ་ཨང་དང་པོའི་ཐུགས་འགན་བཞེས་གནང་མྱོང་བ་དང་། མིག་སྔར་ཀུན་མཁྱེན་འཇམ་དབྱངས་བཞད་པ་སྐུ་ཕྲེང་དྲུག་པ་བློ་བཟང་འཇིགས་མེད་ཐུབ་བསྟན་ཆོས་ཀྱི་ཉི་མ་མཆོག་གིས་གླིང་གཙོའི་ཐུགས་འགན་བཞེས་བཞིན་ཡོད། སློབ་གླིང་ནི་པེ་ཅིང་གྲོང་ཁྱེར་ཁྲའོ་དབྱང་ཁུལ་དགོན་སེར་ནུབ་མར་ཆགས་པ་དང་། སློབ་སྦྱོང་གི་ཁོར་ཡུག་ཉམས་དགའ་ཞིང་མཐུན་རྐྱེན་ཚང་བ་དང་། དགེ་རྒན་གྱི་དཔུང་ཁག་བཟང་པོ་ཡོད། 2004ལོར་བོད་བརྒྱུད་ནང་བསྟན་གྱི་ཡོན་གནས་ལམ་ལུགས་གསར་པ་འཛུགས་སྐྱོང་དང་ལག་བསྟར་བྱས་ཚུན། སློབ་གླིང་གིས་ཁྱོན་བསྡོམས་མཐོ་རམས་པ335དང་། འབྲིང་རམས་པ150གསོ་སྐྱོང་བྱས་ཡོད།
གཉིས། སློབ་བསྡུའི་འཆར་གཞི།
2024ལོར་སློབ་གླིང་གིས་མཐོ་རམས་པ་འཛིན་གྲྭར་ཁྱོན་སློབ་མ39བསྡུ་འཆར་ཡོད། དེར་དགེ་ལུགས་པ13དང་། བཀའ་བརྒྱུད་པ13དང་། རྙིང་མ་བ13བཅས་བསྡུ་རྒྱུ་ཡིན། དེ་ཡང་ས་ཁུལ་དང་གྲུབ་མཐའ་ཁག་ནས་བསྡུ་རྒྱུའི་འཆར་གཞི་གཤམ་གསལ།
གསུམ། སློབ་བསྡུའི་ཁྱབ་ཁོངས།
ངེད་སློབ་གླིང་གི་སློབ་བསྡུའི་ཁྱབ་ཁོངས་ནི་བོད་བརྒྱུད་ནང་བསྟན་སློབ་གླིང་གི་འབྲིང་རམས་པའི་ཡོན་གནས་ཐོབ་མཁན་དང་། གཞུང་བཀའ་པོད་ལྔར་སློབ་གཉེར་ཟིན་ཞིང་སྲོལ་རྒྱུན་གྱི་མཐོ་རིམ་མཚན་གནས་ཐོབ་མཁན་གྱི་ཕུལ་བྱུང་དགེ་འདུན་པ་ཡིན་དགོས།
བཞི། མིང་ཐོ་འགོད་པའི་ཆ་རྐྱེན།
1.ཀྲུང་གོ་གུང་ཁྲན་ཏང་གི་དབུ་ཁྲིད་ལ་བརྩི་བཀུར་དང་། སྤྱི་ཚོགས་རིང་ལུགས་ཀྱི་ལམ་ལུགས་ལ་དགའ་ཞེན། མེས་རྒྱལ་གོང་བུ་གཅིག་གྱུར་དང་མི་རིགས་མཐུན་སྒྲིལ་ལ་སྲུང་སྐྱོང་། མི་རིགས་ཁ་ཕྲལ་ལ་ངོ་རྒོལ་བཅས་དང་།
2.རྒྱལ་གཅེས་ཆོས་གཅེས་དང་། སྒྲིག་བཀུར་ཁྲིམས་སྲུང་། དད་པ་བརྟན་ལ་ཚུལ་ཁྲིམས་གཙང་བ།
3.ནང་བསྟན་རིག་པའི་ཡོན་ཚད་མཐོ་ལ། གཞུང་བཀའ་པོད་ལྔར་སློབ་གཉེར་མཐར་ཕྱིན་བྱས་མྱོང་བ།
4.བོད་ཡིག་གི་རྩོམ་འབྲིའི་ནུས་པ་ཡོད་ལ་རྒྱལ་ཁབ་ཀྱི་ཐུན་མོང་སྐད་ཡིག་སྤྱད་ནས་གླེང་མོལ་དང་འབྲི་ཀློག་བྱེད་པའི་རྨང་གཞི་ངེས་ཅན་ལྡན་པ།
5.གཅོང་ནད་དང་འགོས་ནད་སོགས་མེད་པར་ལུས་པོ་བདེ་ཐང་ཡིན་དགོས་པ།
6. བོད་བརྒྱུད་ནང་བསྟན་ཆོས་ལུགས་ལས་རིགས་མི་སྣའི་དཔང་ཡིག་གམ་སྤྲུལ་སྐུའི་ལག་ཁྱེར་འཛིན་དགོས་པ།
7.རྒྱུགས་འབུལ་བའི་ལོ་ཚོད་དེ་གཞི་རྩའི་ཆ་ནས་རང་ལོ30ནས55བར་ཡིན་དགོས།
ལྔ། མིང་ཐོ་འགོད་ཐབས།
1.རང་ཉིད་ཀྱི་རེ་ཞུ་འདོན་ནས་ཐོ་ཁུངས་ཡོད་སའི་དགོན་སྡེའི་མཚམས་སྦྱོར་ཡི་གེ་དང་རྫོང་རིམ་པ་ཡན་གྱི་འཐབ་ཕྱོགས་གཅིག་གྱུའུ་པུའུ་ནས་ངོ་སྤྲོད་ཡི་གེ་ལེན་དགོས།
2.ཞིང་ཆེན་ནང་བསྟན་སློབ་གླིང་གི་ལོ་འདིའི་འབྲིང་རམས་པའི་ཡོན་གནས་འཛིན་གྲྭའི་སློབ་ཐོན་སློབ་མ་ངེད་སློབ་གླིང་ལ་རྒྱུགས་སྤྲོད་པར་གོང་གི་ཆ་རྐྱེན་ཕུད། ནང་བསྟན་སློབ་གླིང་ནས་འོས་སྦྱོར་ཡི་གེ་མཁོ་འདོན་བྱ་དགོས་ཤིང་ངེད་སློབ་གླིང་གི་སློབ་འགོ་མ་ཚུགས་གོང་ལ་འབྲིང་རམས་པའི་ཡོན་གནས་ཐོབ་པ་དགོས།
3.ངེད་སློབ་གླིང་གི་དྲ་ཐོག་ཐོ་འགོད་མ་ལག་བརྒྱུད་ཐོ་བཀོད་བྱས་ཆོག
4.རྒྱུགས་སྤྲོད་པས་གོང་གསལ་ཡིག་ཆ་དང་ཚོན་གཅིག་ཅན་གྱི་པར་གསུམ་རེ་བཅས་ཁྱེར་ཏེ་རྒྱུགས་རར་ཐོ་འགོད་དུ་ཡོང་དགོས།
དྲུག རྒྱུགས་ར་བཀོད་སྒྲིག་དང་རྒྱུགས་ལེན་དུས་ཚོད།
2024ལོའི་སློབ་མ་བསྡུ་ལེན་ལ་བོད་ལྗོངས་ལྷ་ས་དང་། སི་ཁྲོན་དཀར་མཛེས་རྫོང་། ཀན་སུའུ་ཀླུ་ཆུ་རྫོང་། མཆོ་སྔོན་ཁྲི་ཀ་རྫོང་བཅས་སུ་རྒྱུགས་ར་ཁག་བཞི་བཀོད་སྒྲིག་བྱས་ཡོད།
1.རྒྱུགས་ར་དང་པོ། བོད་ལྗོངས་ནང་བསྟན་སློབ་གླིང་དུ་བཀོད་སྒྲིག་བྱས་ཡོད། དེ་གའི་རྒྱུགས་ལ་ཞུགས་མཁན་དགེ་ལུགས་པ་དང་བཀའ་བརྒྱུད་པ། རྙིང་མ་བའི་དགེ་འདུན་པ་ཡིན་དགོས། རྒྱུགས་རར་འབྱོར་ཐོ་འགོད་པའི་དུས་ཚོད་ནི2024ལོའི་ཟླ6པའི་ཚེས12དང13ཉིན་དང་། རྒྱུགས་ལེན་པའི་དུས་ཚོད་ནི་ཟླ6པའི་ཚེས14ནས17བར་ཡིན།
2.རྒྱུགས་ར་གཉིས་པ། སི་ཁྲོན་དཀར་མཛེས་རྫོང་ནགས་གཙང་དགོན་དུ་བཀོད་སྒྲིག་བྱས་ཡོད། དེ་གའི་རྒྱུགས་ལ་ཞུགས་མཁན་དགེ་ལུགས་པ་དང་། བཀའ་བརྒྱུད་པ། རྙིང་མ་བའི་དགེ་འདུན་པ་ཡིན་དགོས། རྒྱུགས་རར་འབྱོར་ཐོ་འགོད་པའི་དུས་ཚོད་ནི2024ལོའི་ཟླ6པའི་ཚེས12དང13ཉིན་དང་། རྒྱུགས་ལེན་པའི་དུས་ཚོད་ནི་ཟླ6པའི་ཚེས14ནས17བར་ཡིན།
3.རྒྱུགས་ར་གསུམ་པ། མཚོ་སྔོན་ཞིང་ཆེན་ནང་བསྟན་སློབ་གླིང་དུ་བཀོད་སྒྲིག་བྱས་ཡོད། དེ་གའི་རྒྱུགས་ལ་ཞུགས་མཁན་དགེ་ལུགས་པ་དང་བཀའ་བརྒྱུད་པའི་དགེ་འདུན་པ་ཡིན་དགོས། རྒྱུགས་རར་འབྱོར་ཐོ་འགོད་པའི་དུས་ཚོད་ནི2024ལོའི་ཟླ6པའི་ཚེས20དང21ཉིན་དང་། རྒྱུགས་ལེན་པའི་དུས་ཚོད་ནི་ཟླ6པའི་ཚེས22ནས25བར་ཡིན།
4.རྒྱུགས་ར་བཞི་པ། ཀན་སུའུ་ཞིང་ཆེན་ཀླུ་ཆུ་རྫོང་ཤིས་ཚང་དགོན་དུ་བཀོད་སྒྲིག་བྱས་ཡོད། དེ་གའི་རྒྱུགས་ལ་ཞུགས་མཁན་ནི་དགེ་ལུགས་པའི་དགེ་འདུན་པ་ཡིན་དགོས། རྒྱུགས་རར་འབྱོར་ཐོ་འགོད་པའི་དུས་ཚོད་ནི2024ལོའི་ཟླ6པའི་ཚེས20དང21ཉིན་དང་། རྒྱུགས་ལེན་པའི་དུས་ཚོད་ནི་ཟླ6པའི་ཚེས22ནས25བར་ཡིན།
རྒྱུགས་སྤྲོད་པ་རྣམས་ཀྱིས་འབྲེལ་ཡོད་མཚམས་སྦྱོར་ཡིག་ཆ་ཁྱེར་ནས་ཐག་གང་ཉེའི་རྒྱུགས་རར་ཕེབས་ནས་རྒྱུགས་ལ་ཞུགས་ཆོག ཡུན་ནན་ཞིང་ཆེན་གྱི་རྒྱུགས་སྤྲོད་པ་རྣམས་གཅིག་གྱུར་ཐོག་བོད་རང་སྐྱོང་ལྗོངས་ཀྱི་རྒྱུགས་རར་ཡོང་དགོས།
རྒྱུགས་ལེན་དུས་ཚོད་ལ་འགྱུར་ལྡོག་བྱུང་ཚེ། སློབ་གླིང་གི་སྐད་འཕྲིན་སྤྱི་སྟེགས་ཐོག་ལོགས་སུ་བརྡ་ཐོ་གཏོང་རྒྱུ་ཡིན་པས། རྒྱུགས་འབུལ་བ་རྣམས་ཀྱིས་དུས་ཐོག་ཏུ་མཁྱེན་རྟོགས་ཡོད་པ་ཞུ།
བདུན། རྒྱུགས་ཀྱི་ནང་དོན་དང་རྒྱུགས་ལེན་ཐབས།
（གཅིག）རྒྱུགས་ཀྱི་ནང་དོན་ལ་ནང་བསྟན་རིག་པ་དང་། སྲིད་ཇུས་དང་ཁྲིམས་སྲོལ་ཤེས་བྱ། སྐད་ཡིག་དང་རིག་གནས་སྐོར་བཅས་ཁག་གསུམ་ཡོད།
1.ནང་བསྟན་རིག་པར་ཚད་མ་དང་། ཕར་ཕྱིན། དབུ་མ་གསུམ་ཆ་ཚང་དང་། མཛོད་གནས་དང་པོ་ནས་བཞི་པ་བར། འདུལ་བ་གཞི་སྟོད་ཡན་ཆད་བཅས་རྩོད་རྒྱུགས་ལེན་རྒྱུ།
2.སྲིད་ཇུས་དང་ཁྲིམས་སྲོལ་ཤེས་བྱར་《ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་རྩ་ཁྲིམས་》དང་སྐབས་དོན་ཆབ་སྲིད་ཀྱི་ནང་དོན་འབྲི་རྒྱུགས་ལེན་རྒྱུ།
3.སྐད་ཡིག་དང་རིག་གནས་སྐོར་ལ་རྒྱལ་ཁབ་ཀྱི་ཐུན་མོང་སྐད་ཡིག་དང་། སུམ་རྟགས་དང་རྩོམ་འབྲི་བཅས་འབྲི་རྒྱུགས་ལེན་རྒྱུ་ཡིན།
（གཉིས།）རྒྱུགས་ལེན་ཐབས།
1.རྒྱུགས་སྤྲོད་པ་རྣམས་ཚད་མ་དང་། ཕར་ཕྱིན། དབུ་མ་གསུམ་ལ་དམ་བཅའ་ཐེངས་རེ་བཞུགས་དགོས་ལ། དེ་ལ་རིགས་ལུང་བས་རྟགས་གསལ་གཏོང་རྒྱུ་དང་། དེ་ནས་དབུ་ཚད་ཕར་གསུམ་ལས་ཤོག་བྱང་གཅིག་འཐེན་ཏེ་རྒྱུགས་སྤྲོད་པ་ནང་ཕན་ཚུན་རྟགས་གསལ་གཏོང་རྒྱུ། མཛོད་འདུལ་གཉིས་རྟགས་གསལ་ཤོག་བྱང་འཐེན་ནས་རྒྱུགས་སྤྲོད་པ་ནང་ཕན་ཚུན་གཏོང་རྒྱུ།
2.སྲིད་ཇུས་དང་ཁྲིམས་སྲོལ་ཤེས་བྱའི་འབྲི་རྒྱུགས་ལ་དཔྱད་གཞིའི་ཡིག་ཆ་བལྟ་ཆོག་པ་དང་། སྐད་ཡིག་དང་རིག་གནས་ཀྱི་འབྲི་རྒྱུགས་ལ་དཔྱད་གཞིའི་ཡིག་ཆ་བལྟ་མི་ཆོག
བརྒྱད། སློབ་མ་བསྡུ་ཐབས།
མཐོ་རམས་པ་གསོ་སྐྱོང་གི་ཚད་གཞི་དང་མཐུན་ལ་རྒྱུགས་འབྲས་ཕུལ་དུ་བྱུང་བ་རྣམས་བསྡུ་རྒྱུ་དང་། གལ་སྲིད་རྒྱུགས་འབྲས་འདྲ་མཚུངས་གཉིས་ལས་གཅིག་བདམས་དགོས་བྱུང་ན་འབྲིང་རམས་པ་སྔོན་ལ་བསྡུ་རྒྱུ་ཡིན།
དགུ། སློབ་ཁྲིད་ཀྱི་ནང་དོན།
མཐོ་རམས་པ་འཛིན་གྲྭའི་སློབ་ཡུན་ལོ་གསུམ（2024ལོའི་ཟླ9པ་ནས2027ལོའི་ཟླ6པའི་བར）ཡིན།
སློབ་ཁྲིད་ཀྱི་ནང་དོན་ལ་ནང་རིག་བརྒྱ་ཆ60དང་། ཐུན་མོང་སློབ་ཚན་བརྒྱ་ཆ40བཅས་བཀོད་སྒྲིག་བྱས་ཡོད།
1.ནང་རིག་སློབ་ཁྲིད་ལ་དབུ་མ་སྨད་ཆ་སྟེ་སེམས་བསྐྱེད་དྲུག་པ་ནས་མཇུག་བར་དང་། མཛོད་གནས་དང་པོ། གཉིས་པ། ལྔ་པ། བདུན་པ་བཅས་གཙོ་བོར་བཟུང་ནས་ཁྲིད་རྒྱུ། འདུལ་བ་ཆ་ཚང་བཅས་དང་། ཚད་མ་དང་ཕར་ཕྱིན་གྱི་དཀའ་གནད་བསྐྱར་སྦྱོང་བྱ་རྒྱུ།
2.ཐུན་མོང་སློབ་ཚན་གྱི་ཁྲིད་བྱའི་ནང་དོན་གཙོ་བོ་ནི་ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་བསམ་བློ་ཡིན་ཏེ། ཞིབ་ཕྲའི་སློབ་ཚན་ལ《ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་རིགས་པའི་གཞུང་ལུགས་སྤྱི་བཤད།》དང་། 《ཀྲུང་གོའི་ཉེ་རབས་དང་དེང་རབས་ལོ་རྒྱུས།》《རྩ་ཁྲིམས་དང་བཅའ་ཁྲིམས་ཀྱི་རྨང་གཞི།》《སྐབས་དོན་ཆབ་སྲིད།》《རྒྱལ་ཁབ་ཀྱི་ཐུན་མོང་སྐད་ཡིག》སོགས་བཀོད་སྒྲིག་བྱས་ཡོད།
3.ཡུལ་དངོས་ཀྱི་སློབ་ཁྲིད། པེ་ཅིང་གྲོང་ཁྱེར་དང་ཉེ་འཁོར་གྱི་རྒྱལ་གཅེས་རིང་ལུགས་ཀྱི་སློབ་གསོའི་རྟེན་གཞི་དང་། རིག་དངོས་གནའ་ཤུལ། དངོས་མང་བཤམས་སྟོན་ཁང་། དེང་རབས་ཅན་གྱི་ཁེ་ལས་སོགས་ཡུལ་དངོས་སུ་སློབ་ཁྲིད་དུ་འཁྲིད་ཀྱི་ཡོད།
4.ཕྱི་ཕྱོགས་དང་སྤེལ་རེས། སློབ་མ་རྣམས་ཆོས་དོན་དགོངས་འགྲེལ་སོགས་རིག་གཞུང་བགྲོ་གླེང་ཚོགས་འདུ་དང་། མངའ་ཁོངས་ཕྱི་ནང་གི་ཆོས་ལུགས་སློབ་གླིང་དང་རིག་གཞུང་ཚན་པ་དང་སྤེལ་རེས་བྱེད་ཀྱི་ཡོད་ཅིང་། མཐར་མ་ཕྱིན་སྔོན་ལ་མཐར་ཕྱིན་སྤེལ་རེས་སློབ་སྦྱོང་ལ་འཁྲིད་ཀྱི་ཡོད།
བཅུ། ཡོན་གནས་སྤྲོད་པའི་ཆ་རྐྱེན།
（གཅིག）མཐོ་རིམ་ཡོན་གནས་འཛིན་གྲྭ་ནས་མཐར་ཕྱིན་རྗེས། མཐོ་རམས་པའི་ཡོན་གནས་རྒྱུགས་འབུལ་ལ་རེ་ཞུ་བྱེད་ཆོག དེ་ཡང་རྒྱུགས་ལེན་ཐོབ་ཐང་ཞིབ་བཤེར་དང་དཔྱད་རྩོམ་བགྲོ་གླེང་། ཡོན་གནས་རྩོད་རྒྱུགས་སོགས་ཀྱི་ཚད་གཞི་ལོན་ཚེ་ད་གཟོད་མཐོ་རམས་པའི་ཡོན་གནས་སྤྲོད་རྒྱུ། མཐོ་རིམ་ཡོན་གནས་འཛིན་གྲྭའི་མཐར་ཕྱིན་དཔང་ཡིག་མ་ཐོབ་ཚེ། ཡོན་གནས་རྒྱུགས་ལ་ཞུགས་མི་ཆོག
（གཉིས།）མཐར་ཕྱིན་རྗེས་ཀྱི་འགྲོ་ཕྱོགས། སློབ་མ་རྣམས་མཐར་ཕྱིན་རྗེས་རང་དགོན་དུ་ལོག་དགོས། དེ་ཡང་སློབ་གླིང་གིས་ཕྱོགས་བསྡུས་བྱང་ཚད་མཐོ་བ་དང་། མཚོན་ཚུལ་བཟང་བ་རྣམས་འབྲེལ་ཡོད་ཚན་པར་མཚམས་སྦྱོར་བྱ་རྒྱུ།
བཅུ་གཅིག འབྲེལ་ཡོད་གསལ་བཤད།
1.སློབ་བསྡུའི་རྒྱུགས་ལ་ཞུགས་མཁན་དགེ་འདུན་པ་རྣམས་རྒྱུགས་གཏོང་རིང་གི་ལམ་གླ་དང་། ཟས་མལ་སོགས་ཀྱི་འགྲོ་སོང་རང་ཉིད་ནས་གཏོང་དགོས།
2.རྒྱུགས་འཕྲོད་དེ་སློབ་གླིང་དུ་བསྡུས་རྗེས། སློབ་བསྡུའི་བརྡ་ཐོ་དང་འབྲེལ་ཡོད་དཔང་ཡིག་ཁྱེར་ནས་གཏན་འཁེལ་གྱི་དུས་ཚོད་ལྟར་འབྱོར་ཐོ་འགོད་དགོས།
3.སློབ་གྲྭར་སློབ་གཉེར་བྱེད་རིང་སློབ་ཡོན་དང་ཟས་མལ་གྱི་རིན་པ་མི་བསྡུ་ལ་མི་གཉིས་རེར་ཉལ་ཁང་གཅིག་རེ་བཀོད་སྒྲིག་བྱ་རྒྱུ་དང་། འབྲེལ་ཡོད་གཏན་འབེབས་ལྟར་ལོ་རེར་ལམ་གླའི་ཁ་གསབ་རོགས་དངུལ་སྤྲོད་ཀྱི་ཡོད།
4.སློབ་མ་རྣམས་སློབ་གྲྭར་ཞུགས་རྗེས་སློབ་གླིང་གི་སྒྲིག་ལམ་དང་འབྲེལ་ཡོད་གཏན་འབེབས་ཁག་ལ་བརྩི་སྲུང་ནན་ཏན་ཞུ་དགོས། སློབ་གླིང་ལ་ཞུགས་རྗེས་དགོན་པའི་བྱ་བར་ཞུགས་མི་ཆོག
5.སློབ་གླིང་གིས་སྦྱངས་འབྲས་ལེགས་པའི་སློབ་མར་འབྲེལ་ཡོད་གཏན་འབེབས་ལྟར། བྱ་དགའི་དངུལ་སྤྲོད་རྒྱུ་ཡིན།
བཅུ་གཉིས། འབྲེལ་གཏུག་བྱེད་ཐབས།
1.བོད་ལྗོངས་དང་མཚོ་སྔོན་གྱི་རྒྱུགས་རའི་འབྲེལ་གཏུག་པ། སངས་རྒྱས་བཀྲ་ཤིས། 18010230586
2.སི་ཁྲོན་དང་ཀན་སུའུ་ཡི་རྒྱུགས་རའི་འབྲེལ་གཏུག་པ། རྡོ་རྗེ་ཚེ་རིང་། 13051261376
3.ཀྲུང་གོ་བོད་བརྒྱུད་མཐོ་རིམ་ནང་བསྟན་སློབ་གླིང་གི་སློབ་མ་ཁྲུའུ།（སློབ་བསྡུ་གཞུང་ལས་ཁང་།）
སངས་རྒྱས་སྐྱབས། （010）58334617，18910877508
ཕུར་བུ་དོན་གྲུབ། （010）58334665，13691223033
ས་གནས། པེ་ཅིན་གྲོང་ཁྱེར་ཁྲའོ་དབྱང་ཁུལ་དགོན་སེར་ལམ་ཆེན་སྒོ་རྟགས་ཨང11པ།
བརྙན་སྐྱེལ།（ 010-58350922）
དྲ་ཚིགས། http://zyxgjfxy.cn
རྩོམ་སྒྲིག་པ། མང་ག་མཚོ།
