2024ལོའི་ཟླ10པའི་ཚེས13ཉིན། རྒྱལ་ཁབ་རིམ་པའི་མཐོང་དཀོན་ཁྱད་འཕགས་ཅན་གྱི་ཆེད་དོན་རིག་གཞུང་ཚོགས་པའི་རྣམ་གྲངས་ཏེ། བོད་ལུགས་གསོ་རིག་གི་ནད་མེད་ཚེ་བསྲིང་རིག་པའི་དཔེ་རྙིང་ཡིག་ཆ་འཚོལ་བསྡུ་དང་ཕྱོགས་བསྡུས་ཞིབ་འཇུག་ལས་གཞིའི་ཁ་བྱང་སྙན་ཞུའི་ཚོགས་འདུ་མཚོ་སྔོན་ཟི་ལིང་དུ་འཚོགས།
ཐེངས་འདིའི་ཚོགས་འདུའི་ཐོག ཁ་བྱང་སྙན་ཞུའི་ཚོགས་འདུའི་ཆེད་མཁས་པའི་ཚོགས་ཆུང་གི་ཚོགས་གཙོ། སྐབས་བཅུ་གསུམ་པའི་རྒྱལ་ཡོངས་མི་དམངས་འཐུས་མི་ཚོགས་ཆེན་མི་རིགས་ཨུ་ཡོན་ལྷན་ཁང་གི་ཀྲུའུ་རེན་ཨུ་ཡོན་གཞོན་པ། ཀྲུང་དབྱང་མི་རིགས་སློབ་ཆེན་གྱི་དགེ་རྒན་ཆེན་མོ་དོན་གྲུབ་དབང་འབུམ་དང་། པེ་ཅིང་སློབ་ཆེན་གྱི་དགེ་རྒན་ཆེན་མོ་ཀྲེན་ཁྲེང་སོགས་བོད་རིག་པ་དང་གསོ་བ་རིག་པའི་ཆེད་མཁས་པ་གདན་དྲངས་ཡོད།
ཚོགས་འདུའི་ཐོག མཚོ་སྔོན་སློབ་ཆེན་གྱི་སློབ་སྤྱི་གཞོན་པ་རེན་ཡན་མིང་གིས། རྣམ་གྲངས་འདི་ནི་མཚོ་སྔོན་ཞིང་ཆེན་གྱི་རྒྱལ་ཁབ་རིམ་པའི་མཐོང་དཀོན་ཁྱད་འཕགས་ཅན་གྱི་ཞིབ་འཇུག་ཆེད་དོན་རིག་གཞུང་ཚོགས་པའི་རྣམ་གྲངས་དང་པོ་དེ་ཡིན་པས། སློབ་གྲྭའི་ཚན་ཞིབ་ལས་དོན་ལ་སྐུལ་འདེད་ཀྱི་ནུས་པ་ཆེན་པོ་ལྡན་པར་མ་ཟད། རྣམ་གྲངས་དེར་མཚོན་བྱེད་རང་བཞིན་གྱི་རིག་གཞུང་གྲུབ་འབྲས་ཁག་གཅིག་ཐོན་རྒྱུའི་རེ་བ་ཡོད་ཅེས་གསུངས།
རྣམ་གྲངས་ཀྱི་དབུ་བཞུགས་ཆེད་མཁས་པ་དགེ་རྒན་ཆེན་མོ་དཀོན་མཆོག་རྒྱལ་མཚན་གྱིས་ཞིབ་འཇུག་ལས་གཞིའི་རིག་གཞུང་གི་རིན་ཐང་དང་ད་ལྟའི་གནས་ཚུལ། ཞིབ་འཇུག་གི་ཐབས་ལམ་དང་དོན་སྙིང་སོགས་ཀྱི་ཐད་སྙན་ཞུ་ཞིབ་ཕྲ་གནང་བ་དང་། ཁོང་གིས། “ནད་མེད་ཚེ་བསྲིང”ནི་བོད་ལུགས་གསོ་རིག་གི་མངོན་གསལ་དོད་པའི་ཁྱད་ཆོས་དང་བཟང་ཆ་ཞིག་ཡིན་ལ། བོད་ལུགས་གསོ་རིག་རིག་གནས་ཀྱི་ལྟ་བའི་རིན་ཐང་ཞིག་ཀྱང་ཡིན། ཞིབ་འཇུག་བྱ་གཞི་འདིས་བོད་ཡིག་དཔེ་རྙིང་དང་ཚད་ལྡན་ཡིག་ཆ་ཞིབ་འཇུག་བྱ་གཞིར་བཟུང་ཐོག རིག་ཚན་མང་པོའི་ཕྱོགས་བསྡུས་ཞིབ་འཇུག་གི་བཟང་ཆ་འདོན་སྤེལ་གང་ལེགས་བྱས་ནས། བོད་ལུགས་གསོ་རིག་གི་ནད་མེད་ཚེ་བསྲིང་རིག་པའི་འབྲེལ་ཡོད་ཤེས་བྱའི་མ་ལག་གོ་རིམ་ལྡན་པའི་ངང་གསེད་དཀྲོལ་བྱེད་པ་དང་། ནད་གཞི་མ་ཐོན་གོང་ནས་སྔོན་འགོག་བྱེད་ཐབས་སྔོག་འདོན་དང་ལེགས་སྒྲིག་བྱེད་པ་ཞིག་ཡིན་པས། བོད་ལུགས་གསོ་རིག་གི་ནད་མེད་ཚེ་བསྲིང་རིག་ཚན་འཕེལ་རྒྱས་དང་བདེ་ཐང་གི་ཀྲུང་གོ་བསྐྲུན་རྒྱུར་རིག་གཞུང་གི་རིན་ཐང་དང་ལག་ལེན་གྱི་དོན་སྙིང་གལ་ཆེན་ལྡན་ཡོད་ཅེས་གསུངས།
ཡན་ལག་ཞིབ་འཇུག་བྱ་གཞི་ཁག་གི་འགན་འཁུར་བ་སོ་སོས་རང་ངོས་ཀྱི་ཞིབ་འཇུག་བྱ་གཞིའི་ཐད་གསལ་བཤད་གནང་བ་དང་། ཉེ་བའི་ལོ་ཤས་རིང་ཞིབ་འཇུག་ཚོགས་པར་བོད་ལུགས་གསོ་རིག་གི་ལུས་གསོ་རིག་པའི་རིག་ཚན་འཛུགས་སྐྱོང་དང་། ཤེས་ལྡན་མི་སྣ་གསོ་སྐྱོང་། ནད་འགོག་སྨན་བཅོས་ཚན་ཁག་འཛུགས་སྐྱོང་བཅས་ཀྱི་ཐད་གྲུབ་འབྲས་མངོན་གསལ་དོད་པོ་ཐོབ་ཚུལ་ངོ་སྤྲོད་གནང་ཡོད།
ཆེད་མཁས་པ་དག་གིས་རྣམ་གྲངས་ཚོགས་པའི་སྙན་ཞུར་གཟབ་ནན་ངང་གསན་རྗེས། མགྲིན་གཅིག་ཏུ་དེར་དོན་སྙིང་གལ་ཆེན་ལྡན་པའི་ངོས་འཛིན་གནང་བ་དང་། རྣམ་གྲངས་ཚོགས་ཆུང་གི་དུས་འགོའི་གྲུབ་འབྲས་དང་། ཚན་ཞིབ་ཀྱི་སྟོབས་ཤུགས། རྣམ་གྲངས་སྤྱི་ཡོངས་ཀྱི་ཇུས་འགོད་དང་བསམ་ཕྱོགས། ཞིབ་འཇུག་བྱ་ཐབས། དེ་བཞིན་སྔོན་དཔག་གི་གྲུབ་འབྲས་བཅས་ལ་ཁས་ལེན་གང་ལེགས་གནང་ཡོད།
ཁ་བྱང་སྙན་ཞུའི་ཚོགས་འདུའི་ཆེད་མཁས་པའི་ཚོགས་ཆུང་གི་ཚོགས་གཙོ། དགེ་རྒན་ཆེན་མོ་དོན་གྲུབ་དབང་འབུམ་གྱིས་རྣམ་གྲངས་ཚོགས་ཆུང་ལ་གསར་གཏོད་ཐད་ཤུགས་བརྒྱབ་ནས་སྤུས་ཚད་མཐོ་པོའི་ངང་ལེགས་གྲུབ་ཡོང་བ་བྱ་རྒྱུར་འགན་ལེན་བྱེད་དགོས་པའི་སྐུལ་ལྕག་གནང་བ་དང་། དགེ་རྒན་ཆེན་མོ་བན་ཁོ་དང་ཀྲེན་ཁྲེང་སོགས་མཁས་དབང་དག་གིས་གསོ་རིག་དང་སྨན་རྫས་རིག་པ་དང་། མི་རིགས་རིག་པ། མཚན་ཉིད་རིག་པ་སོགས་ཀྱི་ཟུར་ཚད་ཐོག་ནས་ཞིབ་འཇུག་གི་ནང་དོན་དང་ཐབས་ལམ་སོགས་ཀྱི་ཐད་རྩ་ཆེའི་དགོངས་འཆར་དང་གྲོས་འགོ་བཏོན་པ་དང་། རྗེས་མཐུད་ཞིབ་འཇུག་ལ་ཞིབ་ཕྲའི་མཛུབ་ཁྲིད་གནང་ཡོད།
ཆེད་མཁས་པ་དག་གི་གཏམ་བཤད་ལ་གསན་རྗེས། ཞིབ་འཇུག་བྱ་གཞི་ཚོགས་ཆུང་གི་ཁོངས་མིར་ཇུས་གཞི་འཐུས་སྒོ་ཇེ་ཚང་དུ་གཏོང་རྒྱུ་དང་ཞིབ་འཇུག་བྱ་ཐབས་གསར་གཏོད་བྱ་རྒྱུ། ཕུན་སུམ་ཚོགས་པའི་དཔྱད་གཞིའི་ཡིག་ཆ་གསོག་འཇོག་བྱ་རྒྱུ་བཅས་ཀྱི་ཐད་རྔོ་ཆེན་པོ་ཐོགས་ཤིང་། ཤུགས་རྐྱེན་ལྡན་པའི་རིག་གཞུང་ཞིབ་འཇུག་གི་རིན་ཐང་བརྩོན་ལེན་བྱ་རྒྱུའི་བློ་བསྐྱེད་ཐོབ་ཡོད་པ་རེད།
