ཀྲུང་གོའི་བོད་ལྗོངས་དྲ་བའི་འཕྲིན། ཟླ10པའི་ཚེས25ཉིན། ང་དང་ལས་གྲོགས་དག་སྐྱ་རེངས་དང་མཉམ་དུ། ལྷ་ས་ནས་འགོ་ཚུགས་ཏེ་ཇོ་མོ་གླང་མའི་ཕྱོགས་སུ་བསྐྱོད་པའི་འགྲུལ་བཞུད་ཅིག་གི་ལམ་ལ་ཆས། སྟོན་ཟླ་བཅུ་པ་རུ་སླེབས་ཡོད་པས་ལམ་གྱི་གཞོགས་གཉིས་སུ་ལྗོན་ཤིང་དག་སེར་པོ་གྱུར་ཡོད་ལ། སེར་བུ་ལྡང་ཐེངས་རེར་ལོ་མ་དག་དལ་བུར་ས་རུ་ཐོར་ཅིང་། གཞུང་ལམ་དང་དེའི་གཡས་གཡོན་དག་ན་ལྗོན་ཤིང་གི་ལོ་མས་ཁེངས་པས། དངོས་གནས་གསེར་མདོག་གི་རྒྱལ་ཁམས་ཤིག་ཏུ་སླེབས་པའི་ཚོར་བ་ཞིག་ངང་གིས་ཤར་ཡོང་།
དེ་ནས་དུས་ཚོད་གཉིས་ཙམ་གྱི་ལམ་ཐག་བརྒྱུད་མཐར་ང་ཚོའི་འགྲུལ་བཞུད་ཀྱི་ས་ཚིགས་དང་པོ་སྟེ། ཡར་འབྲོག་གཡུ་མཚོའི་མཚོ་འགྲམ་ལ་སླེབས། ཡར་འབྲོག་གཡུ་མཚོ་ནི་བོད་ལྗོངས་ལྷོ་ཁ་གྲོང་ཁྱེར་སྣ་དཀར་རྩེ་རྫོང་གི་ཁོངས་སུ་ཡོད། ཉིན་དེར་གནམ་གཤིས་ཡག་པོ་ཡོད་པའི་རྐྱེན་གྱིས་གནམ་སྔོན་པོ་དང་ཉི་མའི་ལྡོག་འཕྲོ་འོག་ཏུ་ཡར་འབྲོག་གཡུ་མཚོ་ནི་གཡུ་རྡོ་ཞིག་མི་ཡུལ་གྱི་ཞིང་ཁམས་སུ་ལྷུང་བ་དང་གཉིས་སུ་མ་མཆིས། འདི་ཡིས་རྒྱང་རིང་གི་གངས་རི་དང་གཞུང་ལམ། ནོར་ལུག་དང་མཉམ་དུ་མཐོ་སྒང་འདི་རུ་མཛེས་པའི་རི་མོ་ཞིག་ལྷུན་གྱིས་གྲུབ་ཡོད།
དུས་ཚོད་ཕྱེད་ཀ་ཙམ་གྱི་དུས་ཚོད་སྤྱད་ནས་ཡུལ་ཁམས་འདི་ལ་སེམས་ཀྱི་རོལ་མྱོང་བྱས་ཤིང་། པར་ཁ་ཤས་བརྒྱབ་རྗེས་སུ་མུ་མཐུད་ནས་འགྲུལ་བཞུད་གསར་པ་ཞིག་ལ་སྐྱོད་འགོ་བརྩམས།
རྒྱང་ནས་པར་བླངས་པའི་ཡར་འབྲོག་གཡུ་མཚོ།
ཡར་འབྲོག་གཡུ་མཚོ་དང་རྒྱལ་ལམ349པ།
ཡར་འབྲོག་གཡུ་མཚོའི་ཟུར་ཞིག
འོད་ཆེམ་ཆེམ་འཕྲོ་བའི་ཡར་འབྲོག་གཡུ་མཚོ།
ཡར་འབྲོག་གཡུ་མཚོའི་འགྲམ་གྱི་ནོར་གནག
རྩོམ་སྒྲིག་པ། དཔལ་གཡང་།
