རྗེ་བཙུན་མི་ལ་རས་པ།

     རྗེ་བཙུན་མི་ལ་རས་པ་ནི།   རབ་བྱུང་དང་པོའི་ལྕགས་འབྲུག（སྤྱི་ལོ་1040）ལོར་ཡབ་མི་ལ་ཤེས་རབ་རྒྱལ་མཚན་དང་ཡུལ་མྱང་ཚ་དཀར་རྒྱན་གཉིས་ཀྱི་སྲས་སུ་མང་ཡུལ་གུང་ཐར་སྐྱ་རྔ་རྩ་རུ་འཁྲུངས།   ཆུང་ངུར་ཡབ་གཤེགས་ཏེ་སྡུག་མང་པོ་མཐོང་། དེ་རྗེས་མཐུ་བསླབས་ནས་འཁོན་གླན་པར་མི་མང་པོ་བསད།   སླད་ནས་སྡིག་པ་ལ་འགྱོད་དེ་ཆོས་བྱེད་པར་ས་རྟ（སྤྱི་ལོ་1078）ལོར་ལྷོ་བྲག་ཏུ་ཕེབས་ཏེ་མར་པ་ལོ་ཙཱ་བ་ཆོས་ཀྱི་བློ་གྲོས་དང་མཇལ།   དེར་ལོ་དྲུག་ཟླ་བརྒྱད་ཙམ་བཞུགས་ཏེ་བླ་མ་དེ་ལས་དབང་དང་མན་ངག་རྫོགས་པར་བླངས།   དགུང་ལོ་ཞེ་ལྔ་བ་ཤིང་བྱ（སྤྱི་ལོ1084）ལོར་སྟོད་ཕྱོགས་སྐྱིད་གྲོང་དང་གཉའ་ནང་ཁུལ་དུ་ཕེབས་ཤིང་སྒྲུབ་པའི་དམ་བཅའ་མཛད་དེ་ལོ་དགུའི་རིང་དཀའ་སྤྱད་དྲག་པོས་བསྒོམས་པས་མཆོག་གི་དངོས་གྲུབ་ཐོབ།   དེ་ནས་ས་ཕྱོགས་གཞན་དུ་འབྱོན་བཞུད་མཛད་དེ་སྣོད་དུ་རུང་བའི་སློབ་མ་རྣམས་ལ་གསང་སྔགས་ཀྱི་གདམས་པ་ཅི་རིགས་གནང་།   རས་ཆུང་བ་དང་དྭགས་པོ་ལྷ་རྗེ་སོགས་སློབ་མ་གྲགས་ཅན་མང་པོ་བྱུང་།   ཉམས་མགུར་མང་དུ་བརྩམས་ཏེ་རྗེས་རབས་པས《རྗེ་བཙུན་མི་ལ་རས་པའི་རྣམ་ཐར་རྒྱས་པར་ཕྱེ་བ་མགུར་འབུམ》ཞེས་བྱ་བར་བསྒྲིགས། རབ་བྱུང་གཉིས་པའི་ཆུ་ཡོས（སྤྱི་ལོ་1123）ལོར་སྐུ་གཤེགས་སོ།།