སྒྲུང་པ་གྲགས་ཅན་གུ་རུ་རྒྱལ་མཚན།

༡ གུ་རུ་རྒྱལ་མཚན་དང་མཇལ་སྐོར་བླ་མ།
   སྒྲུང་པ་གྲགས་ཅན་གུ་རུ་རྒྱལ་མཚན1986ལོར་རྨ་ཆེན་གངས་རིར་མཇལ་སྐོར་སོང་།   ཁོང་གིས་དཀའ་བ་བརྒྱ་ཕྲག་སྣང་མེད་དུ་བཞག་ནས་གངས་སྐོར་བགྱིད་སྐབས།   ལས་དང་བསོད་ནམས་ཀྱི་དབང་གིས་ཟི་ཁྲོན་ནས་ཕེབས་པའི་མཇལ་སྐོར་བླ་མ་ཞིག་དང་འཕྲད།   གེ་སར་སྒྲུང་ཤིན་རུ་ཐུག་མ་ཐག་སྤྲོད་བ་སྐྱེས་ཏེ་བླ་མ་དཀོན་མཆོག་གསུམ་ལ་སྐྱབས་འཇུག་ཞུ་བ་དང་གསོལ་བ་བཏབ་པ་ན།   གུ་རུ་རྒྱལ་མཚན་ལ་གེ་སེར་སྒྲུང་འབྲི་བའི་གཏེར་སྒོ་ཕྱེ་བ་ལྟ་བུའི་སྣང་ཚུལ་གསར་བ་ཞིག་ཤར་ཞིང་།   ཡིད་ཀྱི་མེ་ལོང་ངོས་ལ་སྔར་དང་མི་མཚུངས་པར་གསལ་ཞིང་དག་པའི་གཏམ་རྒྱུད་སྣ་ཚོགས་ཡང་ནས་ཡང་དུ་ཤར་བ་དང་གཏམ་རྒྱུད་འབྲི་འདོད་ཀྱི་ཀུན་སློང་ཡང་ཟློག་ཏུ་མེད་པ་ཞིག་སྐྱེས།
༢ གུ་རུ་རྒྱལ་མཚན་དམངས་ཁྲོད་ལས་ཐོན་པ།
  1987ལོའི་ཟླ5བར་མགོ་ལོག་ཁུལ་གེ་སར་སྒྲུང་མྱུར་སྐྱོབ་གཞུང་ལས་ཁང་གིས་ཁྱད་མཚར་ཅན་གྱི་ན་གཞོན་པ་གུ་རུ་རྒྱལ་མཚན་གྱི་མིང་ཐོས་པ་ན།   འཕྲལ་དུ་མི་སྣ་རྩ་འཛུགས་བྱས་ཏེ་དགའ་བདེ་རྫོང་ལ་ཆས་ནས་གུ་རུ་རྒྱལ་མཚན་གྱི་རྒྱུ་མཚན་ཡོངས་ཁྱབ་ནས་རྒྱུས་ལོན་བྱས་ཤིང་།   ཁོར་གེ་སར་སྒྲུང་ལས་འབྲུ་སྒ་སྡེ་ཆོས་སྐྱོང་བེར་ནག་གི་བསྟོད་པ་ཞིག་དང་།  འབྲི་ཤེས་པའི་སྒྲུང་གི་དཀར་ཆག་ཅིག་ཕྲིས་ཟེར་བ་ན།  དེ་མ་ཐག་བསྟོད་ཚིག་སྙན་ཞིང་དོན་ལྡན་པ་ཞིག་དང་སྒྲུང་མིང120བྲིས་ཏེ་ཁོ་ཚོར་སྤྲད་པས་ཚང་མ་ངོ་མཚར་བར་གྱུར་ཅིང་།  ཆེད་ལས་མཁས་པ་དག་རྩ་འཛུགས་བྱས་ནས་ཁོས་བྲིས་པའི་སྒྲུང་ལ་དཔྱད་པ་བཏང་རྗེས། ཚང་མས་མགྲིན་གཅིག་ཏུ་གུ་རུ་རྒྱལ་མཚན་གྱིས་བྲིས་པའི་སྒྲུང་ནི་ནང་དོན་ཁ་ཚང་ཞིང་གོ་རིམ་ལྡན་ལ། རྗོད་ཚིག་སྙན་ཞིང་གོ་བདེ་བར་མ་ཟད། ཁྱད་པར་ཅན་གྱི་རྩོམ་རིག་གི་རིན་ཐང་དང་ཞིབ་འཇུག་གི་རིན་ཐང་ཡོད་ཅེས་གདེང་འཇོག་ཚད་མཐོན་པོ་གནང་ངོ་།།
༣ གུ་རུ་རྒྱལ་མཚན་གྱི་སྙན་གྲགས་ཀུན་ལ་ཁྱབ།
      1987ལོའི་ཟླ8པར་མགོ་ལོག་རྟ་བོ་རུ་བསྡུས་པའི་ཁུལ་གེ་སར་སྒྲུང་བཤད་ཚོགས་འདུའི་སྟེང་དུ་གུ་རུ་རྒྱལ་མཚན་གྱིས་རང་གིས་བྲིས་པའི་སྒྲུང་སྙན་མོ་དབྱངས་སུ་བཀུག་ནས་བཤད་པའི་མོད་ལ། མི་ཚང་མས་མགོ་ལོག་རྩྭ་ཐང་གི་གེ་སར་སྒྲུང་བྲིས་ནས་རྫོགས་རྒྱུ་མེད་པའི་སྒྲུང་མཁན་རེད་ཟེར་ནས་མཚན་སྙན་རང་ཤུགས་སུ་ཕྱོགས་བཞི་མཚམས་བརྒྱད་ལ་ཁྱབ་ཅིང་།   1987ལོའི་ཟླ9པར་མཚོ་སྔོན་པོའི་འགྲམ་རྒྱུད་དུ་བསྡུས་པའི་མཚོ་སྔོན་ཞིང་ཆེན་གྱི་ཐེངས་དང་པོའི་གེ་སར་སྒྲུང་གི་དམངས་ཁྲོད་སྒྲུང་པའི་ཚོགས་ཆེན་སྟེང་དུ་བྱ་དགའ་ཨང་དང་པོ་ཐོབ། ཁོར་གཟི་བརྗིད་ཀྱི་མཚན་སྙན་དང་བྱ་དགའ་དག་ཐོབ་ཀྱང་ང་རྒྱལ་སྤུ་ཙམ་ཡང་མེད་པར་སྔར་ལས་ལྷག་པའི་སྡུག་རུས་ཀྱིས་སྒྲུང་དཔེ་མུ་མཐུད་དུ་བྲིས་པར་བརྟེན།   ད་ལྟ་སྒྲུང་དཔེ་གསར་བ«ལི་ཁྲིའི་རྟ་རྫོང»དང«སྨུག་པོ་ལྡོང་གི་རྒྱལ་རབས»བཅས་སྒྲུང་ཁག་བཅུ་ལྷག་བྲིས་ཡོད་ལ།   དེ་དག་ལས«སྨུག་པོ་ལྡོང་གི་རྒྱལ་རབས»ཞེས་པ་དེ་མཚོ་སྔོན་མི་རིགས་དཔེ་སྐྲུན་ཁང་ནས་དངོས་སུ་པར་སྐྲུན་བྱས། 1991ལོའི་ཟླ11པར་ཀྲུང་གོའི་སྤྱི་ཚོགས་ཚན་རིག་ཁང་དང་།   ཀྲུང་གོའི་དམངས་ཁྲོད་རིག་རྩལ་མཐུན་ཚོགས་བཅས་ཀྱིས་གེ་སར་རྒྱལ་པོའི་སྒྲུང་པ་གྲགས་ཅན་ཞེས་པའི་མཚན་སྙན་གནང་།
༤ གུ་རུ་རྒྱལ་མཚན་གྱི་སྒྲུང་བཤད་ཀྱི་ཁྱད་ཆོས།
    གུ་རུ་རྒྱལ་མཚན་གྱི་སྒྲུང་བཤད་ཀྱི་ཁྱད་ཆོས་ཀྱང་གཞན་དང་མི་མཚུངས་པ་སྟེ།ཐོག་མར་ཡི་གེར་འབྲི་བ་དང་ཕྱིས་སུ་ཡི་གེར་བལྟས་ནས་བཤད་པ།གལ་ཏེ་ཡི་གེ་དང་བྲལ་ན་བློ་ནས་བཤད་མི་ཤེས་པ་ཡིན་པས། ཁོ་ཡང་བབས་སྒྲུང་རིགས་ཀྱི་སྒྲུང་པ་ཚོ་དང་འདྲ་བར་རང་ཉིད་ཀྱིས་བྲིས་པའི་སྒྲུང་དཔེ་ལ་ངོ་མཚར་ཞིང་གསང་བ་འགྲེལ་དཀའ་བའི་སྣང་བ་ཞིག་ནམ་ཡང་ཤར་འདུག ཁོས་བཤད་པ་ལྟར་ན།སྒྲུང་གི་གཏམ་རྒྱུད་དང་གོ་མི་སྣ་སོགས་སྒྲུང་འབྲི་འགོ་མ་བརྩམས་པའི་སྔོན་ལ་ཡིད་ལ་ཅི་ཡང་ཤར་རྒྱུ་མེད། གལ་ཏེ་སྨྱུ་གུ་ལག་ཏུ་འཕྲད་པའི་ཚེ། ཡིད་ལ་གློག་བརྙན་དུ་ཤར་བ་ལྟར་གཏམ་རྒྱུད་དང་གོ་རིམ། ཐ་ན་རྗོད་བྱེད་ཀྱི་ཚིག་ཀྱང་གཅིག་རྗེས་གཉིས་མཐུད་དུ་གསལ་ལེར་ཤར་ཞིང་། ལག་གི་སྨྱུ་གུ་ལ་གཟུགས་མེད་ཀྱི་སྟོབས་ཤུགས་གཞན་གྱིས་བཀོད་འདོམས་བྱེད་པ་ལྟར་རང་དབང་མེད་པར་ཤར་ཤར་དུ་བྲིས་བྱུང་ཟེར་ལ། གལ་སྲིད་ལག་གི་སྨྱུ་གུས་འབྲི་མཚམས་བཞག་པ་ན། སྔོན་ལ་ཅི་ཞིག་བྲིས་པ་ཐམས་ཅད་ཡིད་ལ་ཅི་ཡང་མི་དྲན། ཕལ་ཆེར་སྔོན་ལ་བྲིས་པ་ཡོད་ཚད་བརྗེད་སོང་བ་འདྲ་ཟེར། ཁོ་བོས་དེ་སྔ་ཁོས་བྲིས་པའི་སྒྲུང་དཔེ«སྨུག་པོ་ལྡོང་གི་རྒྱལ་རབས»ཞེས་པར་བལྟས་མྱོང་ཞིང་། བྲིས་པའི་ཡིག་གཟུགས་དེ་འདྲ་ལེགས་པོ་ཞིག་མིན་ཡང་། ཤོག་སྟེང་གཙང་ཞིང་གཞན་གྱི་མ་ཡིན་ལས་སོ་མ་བཤུས་པ་བཞིན་ཡི་གེ་གཅིག་ཀྱང་བསུབས་མེད། 
༥ གུ་རུ་རྒྱལ་མཚན་གྱིས་འབྲི་ཤེས་པའི་སྒྲུང་དཔེ།
  གུ་རུ་རྒྱལ་མཚན་གྱིས་འབྲི་ཤེས་པའི་སྒྲུང་དཔེ་ནི«སྨུག་པོ་ལྡོང་གི་རྒྱལ་རབས» དང«རྟ་རྒྱུག་ནོར་བུ་ཆ་བདུན» «གནམ་ལྕགས་འཕྲལ་རྫོང» «འཛམ་གླིང་གཡུལ་རྒྱལ་རྫོང»སོགས་སྒྲུང་དཔེ120ལྷག་ཡོད་དོ།།