ཚ་གསུར།

 མེ་ལ་རྫས་བཏབ་སྟེ་གསུར་ཕུད་སྲོལ་འདི།རྒྱལ་དབང་ལྔ་བ་སོགས་མཁས་གྲུབ་མང་བོས་མདོ་རྒྱུད་ཀྱི་ཁུངས་མ་མཐོང་བར་གསུངས་ཀྱང་།བསྟན་དར་ལྷ་རམས་པས།ལྔ་བ་ཆེན་པོས་ཚ་གསུར་ལ་ཁུངས་མེད་དུ་བཞེད་པ་མ་ཡིན་པར།རྒྱུད་སྡེ་ཉེར་སྤྱོད་ཀྱི་མཆོད་པའི་ནང་གི་བདུག་སྤོས་ཕུལ་བའི་ཚིག་ཇི་སྙེད་པ་དང་།འདོད་ཡོན་ལྔའི་དྲི་ཕུལ་བའི་ཚིག་ཇི་སྙེད་བྱུང་བ་ཐམས་ཅད་ཁུངས་སུ་བཞེད་པར་གསལ་ལོ༎
ཚ་གསུར་གཏོང་ཡུལ་ནི།གདུགས་དཀར་མཆོག་གྲུབ་མ་ལས།ཟས་སུ་དྲི་ཟ་བ་དང་།ཟས་སུ་བདུག་པ་ཟ་བ་དང་།ཟས་སུ་སྦྱིན་སྲེག་ཟ་བ་སོགས་འབྱུང་བ་ལྟར།དྲི་ཟ་སྤྱི་དང་།ཁྱད་པར་དུ་བསད་ལྕེབས་གཡང་ལ་ལྷུང་བ་དང་།བར་དོ་འཁྱམས་པའི་སེམས་ཅན་སོགས་ལ་སྦྱིན་པ་གཏོང་བ་སྟེ།པཎ་ཆེན་བློ་བཟང་ཆོས་རྒྱན་གྱི་མཛད་པའི་ཚ་གསར་གཏོང་ཚུལ་ལས།དྲི་མཆོག་འདོད་ཡོན་ལྔ་ལྡན་པའི༎ཟག་མེད་གསུར་གྱི་མཆོད་པ་འདི༎བླ་མ་ཡི་དམ་དཀོན་མཆོག་གསུམ༎མཁའ་འགྲོ་ཆོས་སྐྱོང་ཐམས་ཅད་དང་༎དྲི་ཟའི་རྒྱལ་བོ་རབ་དགའ་དང༎དྲི་ཟའི་ཚོགས་རྣམས་མ་ལུས་དང་༎མར་གྱུར་རིགས་དྲུག་སེམས་ཅན་དང་༎ཡུལ་ལྷ་གཞི་བདག་ཚོགས་རྣམས་དང་།།གསུངས་ལ།ཁྱད་པར་དུ། བར་དོ་འཁྱམས་པའི་སེམས་ཅན་ལ།འཇིགས་སྐྲག་འཁྲུལ་སྣང་དང་།ངན་འགྲོའི་སྡུག་བསྔལ་ལས་གྲོལ་ཏེ།དལ་འབྱོར་གྱི་རྟེན་བཟང་འཐོབ་པ།ས་ལམ་རིམ་བགྲོད་ཀྱིས་རྫོགས་བྱང་གི་གོ་འཕང་འཐོབ་པར་གསུངས་སོ༎

མནོལ་བསང་།
༡གྲིབ་མནོལ་ངེས་འཛིན།
ཁ་དཔེར།རྣམ་རྟོག་ཅན་ལ་འདྲེ་དགུ་འཁོར།ཞེས་པ་ལྟར། གྲིབ་ཕོག་ནས་མནོལ་བ་དེ་ཡང་།གཙོ་ཆེ་ཤས་རྣམ་རྟོག་གིས་ཀུན་ནས་བསླངས་ཏེ་ཕྱི་ནང་གསང་གསུམ་གྱི་རྒྱུ་རྐྱེན་མང་བོས་གྲིབ་ཕོག་སྟེ།ད་གཟོད་མནོལ་བ་ཡིན།དེ་ཡང་གྲིབ་མནོལ་ཞེས་པ་དམེ་བཙོག་ལ་སོགས་པར་བརྟེན་སྐྱེ་བོའི་སྲོག་ལུས་དབང་ཐང་ལ་བར་དུ་གཅོད་ཅིང་ལེགས་ཚོགས་ཀྱི་ཆ་སྒྲིབ་བྱེད་ཅིག་ཡིན།མནོལ་བསང་བྱེད་སྟངས་ཡང་།བོད་ཀྱི་གདོད་མའི་དུས་ནས་བཟུང་།ད་ལྟའི་བར་དུ་དར་བའི་དམངས་སྲོལ་ཞིག་ཡིན་ཏེ།བོན་གྱི་ཡོངས་རྩེའི་འགྲེལ་བ་ལས།གཉའ་ཁྲི་ལྷ་ཡུལ་ནས་ཕེབས་ཚུལ་གསུངས་སྐབས་སྐུ་བོན་ཡ་ངལ་དང་། མཚེ་མི།ཙོ་མི་གསུམ་ཡང་མཉམ་དུ་མངགས་པར།ཡབ་གྱི་ཞལ་ལས། གནམ་ལྷ་དོག་ལ་གཤེགས་པ་ན།མི་ཡུལ་བཙོག་དང་། མནོལ་ཆེ་བས། ཡ་ངལ་གྱིས་སྣ་དྲོངས་ཤིགམཚེ་མིའི་སྐུ་ཡི་གཡས་རྟེན་ཅིགཙོ་མིས་སྐུ་ཡི་གཡོན་རྟེན་ཅིག།ཡ་ངལ་གྱིས་སེལ་དང་སངས་གྱིས།ཞེས་པ་ལྟར།སྐབས་དེ་དུས་ནས་ལྷ་སྤྱན་འདྲེན་སྐབས།ཐོག་མར་བསང་དུད་བདུག་ནས།ཡུལ་ཁམས་ཀྱི་བཙོག་གྲིབ་སེལ་བའི་གོམས་གཤིས་ཡོད་དོ༎གཞན་གྲི་གུམ་དང་ལོང་ངམ་འཐབ་དུས་ཀྱང་།ལོང་ངམ་གྱི་ཕྲག་པ་གཡས་ལ་ཝ་རོ་དང་།གཡོན་ཁྱི་རོ་བཀལ་བས། རྒྱལ་བོའི་མགུར་ལྷ་དང་དགྲ་ལྷ།ཕོ་ལྷ་གསུམ་པོ་ཡལ་བར་གསུངས་པ་ཡང་གོང་གསལ་འདི་ལ་འབྲེལ་བ་ཆེན་པོ་ཡོད་སྙམ།བྱེ་བྲག་ཏུ།ཟས་གྲིབ། གོས་གྲིབ། བག་གྲིབ། ཡུགས་གྲིབ། དམ་གྲིབ། ནལ་གྲིབ། མནའ་གྲིབ། དམར་གྲིབ།འཁོན་གྲིབ།རོ་གྲིབ།དམེ་གྲིབ། བཙོག་གྲིབ། མཛེ་གྲིབ།ནད་གྲིབ།གདོན་གྲིབ་སོགས་བགྲང་ལས་འདས་ལ། གྲིབ་སེལ་རྟ་ནག་ཅན་ལས།འབྱུང་བ་ཆགས་པའི་སྣོད་བཅུད་ཀྱི།།དུག་ལྔ་མ་རིག་ལས་ཀྱི་གྲིབ༎ཆགས་འཁོར་ཉོན་མོངས་ཡིད་ཀྱི་གྲིབ༎མཚན་མ་ཤེས་གྲིབ་སེམས་ཀྱི་གྲིབ༎གྲིབ་ལྔའི་རྐྱེན་གྱིས་ལྟོས་ངན་དུ༎བགེགས་ལྔ་སྲེད་པའི་རང་གཟུགས་འབྱུང་།།ཞེས་ཀྱང་འབྱུང་ངོ༎གྲིབ་འདི་ལ་དབྱེ་བ་མང་དུ་མཛད་པར་མ་ཟད།རྐྱང་འཕགས་གྲིབ་སེལ་སོགས་ལས།གྲིབ་བདག་རྒྱལ་བོ་ཆེན་པོ་ཁྱོད༎སྐུ་མཆོག་ནག་པོ་མུན་པ་འདྲ་༎ཆིབས་སུ་གྲིབ་རྟ་ནག་པོ་ཆིབས༎གྲིབ་གོས་ནག་པོ་ལུས་ལ་གྱོན༎གྲིབ་ཁྱི་ནག་པོ་ཕྱི་ན་འཁྲིད༎གྲིབ་དར་ནག་པོ་ལ་ན་འཕྱར།།གྲིབ་ཞྭ་ནག་པོ་འཕྲུ་ཅན་གྱོན༎གྲིབ་བྱ་ནག་པོ་ཀླད་ན་ལྡིང་༎གྲིབ་སྒང་ནག་པོ་རྒྱབ་ཏུ་འཁུར༎ཞེས་གྲིབ་བདག་གི་སྐུ་འཁོར་དང་བཅས་གསལ་བར་བསྟན་ཡོད་དོ༎
༢ གྲིབ་མནོལ་བྱུང་སྟངས།

བོད་རིགས་འདི་གཞན་ལས་རྣམ་རྟོག་ཆེ་ཞིང་།འཛེམ་བྱ་ཧ་ཅང་མང་བ་ནི་ཀུན་གྱིས་མཁྱེན་གསལ་ཡིན།དཔེར་ན།སྦྲུམ་མས་དམར་གྲིབ་དང་།གཞན་གྱི་ཟས་གོས་སོགས་ལ་འཛེམ་པ་དང་།བྱིས་པ་སྐྱེས་དུས་ཀྱང་ཤ་དང་མགྲོན་པོ་རིགས་སྣ་ཚོགས་ལ་འཛེམ་པ་བཙས་སྐར་སོགས་ལས་གསལ་ཞིང་།གལ་ཏེ་ནང་དུ་འཁྱེར་དགོས་པ་བྱུང་ན།སྒོའི་མེ་ཕུང་གི་དུད་ཁ་ལ་འགོམས་སུ་བཅུག་སྟེ་འཁྱེར་ཡོང་བ་ཡིན།བེམ་པོ་དུར་བསྐྱལ་གྱི་སྐབས་སུ་འང་།རྡོ་དཀར་ནག་་སྟེང་དུ་ལག་པ་བཀྲུས་ནས་ཁ་རླངས་ཀྱིས་བསངས་པ་སོགས།ཆོ་ག་སྣ་ཚོགས་སྤེལ་བ་ཡང་།རོ་གྲིབ་འགོག་པ་ཡིན།དེ་བཞིན་ཐབ་སྟེང་དུ་རྐང་བ་མི་འཇོག་པ་དང་།ལུས་སྟེང་དུ་མི་འགོམས་པ་སོགས་ཀྱང་།ཐབ་ལྷ་དང་ལུས་ལྷ་སོགས་ལ་གྲིབ་མི་ཤོར་བའི་ཆེད་དུ་ཡིན། གལ་ཏེ་གྲིབ་སྐྱོན་ཤོར་བ་ཡིན་ན།ཚེ་དང་དབང་ཐང་རླུང་རྟ་དང་སྙན་གྲགས།དཔལ་དང་གཟི་བརྗིད་མ་ཟད།རང་དང་འབྲེལ་ཡོད་ཀྱི་བྱ་དངོས་སྣ་ཚོགས་ལ་མགོན་སྐྱབས་དང་དཔུང་གཉེན་བྱེད་པའི་ལྷ་དེ་དག་ཡལ་ཏེ།ཉམས་གོད་ཀྱི་བྱུར་སྣ་ཚོགས་ཡོང་བར་འདོད་དེ།མནོལ་བསང་ལྷ་ཆབ་སྔོན་མོ་ལས། ལུས་མནོལ་ལུས་ཀྱི་མདངས་ཉམས་ལུས་སྟོབས་ཤོར།།མགོ་མཇིང་རོ་སྟོད་ན་ཞིང་མིག་མི་གསལ༎ངག་མནོལ་སྐད་འགག་ལྐུགས་ཅིང་སྨྲ་མི་བདེ༎མཆིལ་སྣབས་མང་ཞིང་སྣ་འཚུབ་ལྕེ་ཐོག་བརྣངས།།ཡིད་མནོལ་ཡིད་མི་བདེ་ཞིང་ཚིག་པ་ཟ༎བརྗེད་ངས་གཉིད་འཐིབས་བྱིང་ཞིང་མཚན་མོ་ཡེར༎མགོ་མནོལ་མགོ་འཁོར་མིག་གྲིབ་རྣ་བ་འོན༎ཡན་ལག་མནོལ་བས་ཞ་གྲུམ་སྦྲིད་ཅིང་ན༎ཕོ་མཚན་མནོལ་བས་མི་འགྲེང་རྩ་དཀར་མང་༎མོ་མཚན་མནོལ་བས་སྲིད་ཀྱི་སྐྱེ་སྒོ་ཆད༎རྒྱབ་རྟེན་ལྷ་གནོལ་གཞི་ཡི་ལས་མི་འགྲུབ༎དགྲ་ལྷ་མནོལ་ན་དགྲ་སྲི་ཐང་དཀར་ལ༎བྱེས་ལྷ་མནོལ་ན་མགྲོན་འཐོམས་གྲོགས་དང་འབྲལ༎མགོན་ལྷ་མནོལ་ན་མགྲོན་རྣམས་དོན་མི་འགྲུབ།།གཞི་ལྷ་མནོལ་བས་གཞི་ལྷ་སྡོད་མི་ཚུགས༎ཡུལ་ལྷ་མནོལ་བས་ནད་འཁྲུགས་མུ་གེ་བྱུང་༎ཁང་ལྷ་མནོལ་བས་ཟག་ཅིང་ཙག་སྒྲ་འབྱུང་༎སྦྲ་ལྷ་མནོལ་བས་རུལ་ཞིང་འགྱུར་ལྡོག་མང་༎ནོར་ལྷ་མནོལ་བས་སྟོང་ཞིང་འབྱོར་མི་རྒྱས༎ཕྱུགས་ལྷ་མནོལ་བས་སྤུ་འབྱི་ལྟས་ངན་འབྱུང་༎ཞིང་ལྷ་མནོལ་བས་ཞིང་ས་ཁོལ་བུར་སྟོང་།།ཐབ་ལྷ་མནོལ་བས་བཅུད་མེད་སྟོང་ཞིང་འགོང་།།གྲོགས་ལྷ་མནོལ་བས་ཟས་ཁར་འགོང་བོ་འཇུག།གོ་མཚོན་མནོལ་བས་གོ་ལོག་རྣོ་མཚོན་རྡུགས༎རྟ་ཕོ་མནོལ་བས་རྒལ་རྡོ་འགོམ་ལམ་ཉམས༎སྒོ་ཁྱི་མནོལ་བས་སྐད་འགག་བཙན་རྫི་ཞན༎ཁ་རྗེ་མནོལ་བས་མི་རབས་ལད་མོ་ཤོར༎དབང་ཐང་མནོལ་བས་བརྗེད་ངས་དབང་བོ་ཉམས༎རླུང་རྟ་མནོལ་བས་སེམས་སྟོང་དོན་མི་འགྲུབ༎ཅེས་མནོལ་གྲིབ་ཀྱིས་གྱི་ཉམས་རྒུད་ཇི་ལྟར་འབྱུང་ཚུལ་ཞིབ་པར་འཁོད་ཡོད་དོ།
༣ མནོལ་བསང་གི་རྫས།གི་ཝང་། གླ་རྩི། ཀུར་གུམ། ཤུག་པ། སྤ་མ། བ་ལུ།མཁན་པ། ཙན་དན་དཀར་དམར།ཨ་གར། སྤང་སྤོས།རྩི་ལྗོན་དྲི་ཞིམ་པ་མང་བོ་སྡེབ་སྦྱོར་བྱ་འོ༎
༤གྲིབ་མནོལ་སེལ་ཐབས།ཟན་གྱིས་བཟོས་པའི་མདོས་གླུད་ངར་མི་མདུན་དུ་བཞག་སྟེ།གྲིབ་སེལ་བ་བོས།རོ་གྲིབ། ཡུགས་གྲིབ། མཛེ་འཁོན་གྱི་གྲིབ།གཞན་ཡང་ལྷ་ཀླུ་གཉན་གསུམ་དང་།རྒྱལ་ཐེའུ་འགོང་གསུམ།གཟའ་གདོན་འདྲེ་གསུམ།སྡེ་བརྒྱད་ཀྱི་མནོལ་གྲིབ་ཐམས་ཅད་སོལ་ཅིག་ཅེས།གྲིབ་བདག་ཆེན་པོ་ལ་བཀའ་བསྒོ་དམ་བཞག་བྱས་ཏེ།གྲིབ་སེལ་བ་བོས། རྐྱང་འཕགས་གྲིབ་སེལ་ལས་གསུངས་པ་ལྟར། ཀྱེ།རྒྱུ་འབྱོར་ཡོན་གྱི་བདག་པོ་ཀུན༎མགོ་ནད་སྤྲིན་ལྟར་གཏིབས་པ་སྟེ༎ངར་མི་རྒྱལ་བོའི་མགོ་ལ་སྤོར༎མིག་ནད་འཁྲུག་ཅིང་ན་བ་དེ༎ ངར་མི་རྒྱལ་བོའི་མིག་ལ་སྤོར༎རྣ་བ་འོན་ཞིང་འཐིབས་པ་དེ༎ངར་མི་རྒྱལ་བོའི་རྣ་ལ་སྤོར༎ཤངས་ནད་ཞི་ཞིང་འཚུབ་པ་དེ༎ངར་མི་རྒྱལ་བོའི་ཤངས་ལ་སྤོར༎ལྕེ་ནད་ལྐུགས་ཞིང་ན་བ་དེ༎ངར་མི་རྒྱལ་བོའི་ལྕེ་ལ་སྤོར།།མིད་པ་འགག་ཅིང་ན་བ་དེ༎ངར་མི་རྒྱལ་བོའི་མིད་པར་སྤོར༎སེམས་ཀྱི་འཁྲུག་བློ་མི་བདེ་བ༎ངར་མི་རྒྱལ་བོ་ཁྱོད་ལ་སྤོར༎ གློ་བ་བྱ་ལྟར་འཕུར་བ་དེ༎ངར་མི་རྒྱལ་བོའི་གློ་བར་སྤོར༎མཆིན་པ་ཉ་ལྟར་འགྱུ་བ་དེ༎ངར་མི་རྒྱལ་བོའི་མཆིན་པར་སྤོར༎ཕོ་བ་རྡོ་ལྟར་སྲ་བ་དེ༎ངར་མི་རྒྱལ་བོའི་ཕོ་བར་སྤོར༎རྒྱུ་མ་འཁྲུག་ཅིང་ན་བ་དེ༎ངར་མི་རྒྱལ་བོའི་རྒྱུ་མར་སྤོར༎ལག་པ་ན་ཞིང་ཁོལ་བ་དེ༎ངར་མི་རྒྱལ་བོའི་ལག་པར་སྤོར༎རྐང་བ་ཞ་གྲུམ་ན་བ་དེ༎ངར་མི་རྒྱལ་བོའི་རྐང་བར་སྤོར༎ཕུང་བོ་རྣམ་ལྔ་ན་བ་དེ༎ངར་མི་རྒྱལ་བོ་ཁྱོད་ལ་སྤོར༎རྣམ་ཤེས་ཚོགས་བརྒྱད་ན་བ་དེ༎ངར་མི་རྒྱལ་བོ་ཁྱོད་ལ་སྤོར༎ངར་མི་རྒྱལ་བོ་དམ་ལོངས་ཤིག།ཁྱོད་ཀྱིས་ཁུར་ན་བལ་ལས་ཡང་༎མི་བས་འཁུར་ན་གསེར་ལས་ལྗིད༎དེ་བས་ཁྱེད་ཀྱིས་ཁུར་ལ་སོང་༎ངར་མི་རྒྱལ་བོ་དམ་ལོངས་ཤིག།རྐྱེན་དང་བར་ཆད་ཞི་བར་མཛོད༎ཅེས་བདག་དང་ཡོན་གྱི་བདག་པོའི་གྲིབ་གདོན་ཐམས་ཅད་ངར་མི་རྒྱལ་བོའི་སྟེང་འཕོས་ཏེ།ཕོ་བཀྲ་ཡག་གི་མདའ་མདུང་དང་།མོ་བཀྲ་ཡག་གི་འཕང་གི་རྫོང་བ་དང་།བསང་རྫས་དུད་སྨུག་དང་བཅས་ལམ་དང་གནས་སྟོན་པ་ནི།ཉི་མ་ཤར་ཕྱོགས་ཕ་གི་ན༎མུན་པ་ནག་པོའི་ཀློང་དཀྱིལ་ན༎གྲིབ་བདག་ནག་པོ་གནས་དེར་བདེ༎གྲིབ་མཁར་ནག་པོ་རྫོང་རེ་བཙན༎གྲིབ་ཁང་ནག་པོའི་གཏིང་རིམ་ན༎ཟས་ནོར་གཡོག་འཁོར་ཕུན་སུམ་ཚོགས༎གྲིབ་བདག་ནག་པོ་དེར་སོང་ཤིག།འདི་ན་ཁྱེད་ཀྱི་གནས་མ་མཆིས༎གྲིབ་རྣམས་ཁྱེར་ལ་དེར་སོང་ཤིག།ཅེས་མི་འདོད་པའི་གྲིབ་གདོན་ཐམས་ཅད་ངར་མིར་བསྟིམས་ནས།དེས་གྲིབ་གདོན་ཐམས་ཅད་འཁྱེར་ནས།ལྷ་ཁང་ཞིག་རལ་ཅན་སོགས་སུ་བསྐྱལ་ཏེ།མཐར་མི་དམིགས་པའི་རྒྱས་འདེབས་དགོས་སོ༎
༤གྲིབ་སེལ་གྱི་ཕན་ནུས།

མནོལ་བསང་འདི་ནར་མར་གདུག་ན།སྟེང་འོག་བར་གསུམ་གྱི་གདོན་བགེགས་ཇི་སྙེད་དང་།བཙའ་སེར་སད་གསུམ། ཡམས་ནད་མུ་གེ། མཚན་ལྟས་ངན་པ།མགོ་དང་ཡན་ལག་ཞ་གྲུམ།འཐབ་རྩོད་འཁྲུག་ལོང་སོགས་སེལ་བ། ཁམས་བདེ་བག་ཕེབས་པ།ཁྱད་པར་དུ་བྱེས་ལྷ། མགྲོན་ལྷ། གཞི་ལྷ། ཡུལ་ལྷ། ཁང་ལྷ།རྦ་ལྷ།ནོར་ལྷ།ཐབ་ལྷ།གྲོགས་ལྷ་སོགས་མནོལ་བ་མཐའ་དག་སེལ་བའི་ཕན་ནུས་དང་།ལོ་རྒྱུས་ཀྱི་སྟེང་ནས་དངོས་བྱུང་བཀོད་ན་འང་།ཁྲི་སྲོང་ལྡེ་བཙན་གྱི་བཙན་མོ་མོང་བཟའ་ལྷ་ལྕམ་ལ་བཙོག་མནོལ་གྱི་བུ་ཞིག་སྐྱེས་པས།བཙུན་མོས་ས་དཔྱད་ལ་གཟིགས་པར་དུར་དུ་སྦས་བས།ས་བདག་གི་ལྟོ་བར་འཕྲད་པས།ཡུལ་ལྷ་ཐམས་ཅད་ལ་གྲིབ་ཕོག་པས་ལྷ་འཁྲུགས་བྱུང་སྟེ།བཙའ་སེར་སད་གསུམ་དང་།ནད་ཡམས་མུ་གེ་བྱུང་བ་དང་།ཁྱད་པར་དུ་རྒྱལ་བོ་ཁྲི་སྲོང་ལྡེ་བཙན་གྱི་སྐུ་ཁམས་མ་བདེ་བས།སློབ་དཔོན་པད་འབྱུང་གིས།མནོལ་བསང་ལྷ་ཆབ་སྔོན་མོ་གསུངས་ཏེ་ཆོ་ག་བསྟར་བས།རྒྱལ་བོ་སྙིང་ནད་ལས་གྲོལ་བ་དང་།ད་དུང་ཕན་ནུས་སུ། ལྷ་དང་སྲུང་མ་འཁོར།ཟས་ནོར་ལོངས་སྤྱོད་ལ་བྱིན་ཆགས།འབྱུང་བ་སྙོམས་ལ་གྲགས་དང་གཟི་བརྗིད་བསྐྱེད།ཁམས་དང་དབང་བོ་གསལ།སྣང་སྲིད་ལྷ་འདྲེ་དང་འགལ་རྐྱེན་བར་ཆད་ཀྱི་མི་གོས་པ་སོགས་ཕན་ནུས་རྒྱ་ཆེར་གསུངས་སོ༎