མཆོད་རྟེན་སྐེ་དགའ་ལྡན་བཀྲ་ཤིས་དར་རྒྱས་གླིང་།

སྐུ་ཕྲེང་ལྔ་བ་ནེའུ་ལུང་བསྟན་འཛིན་མཆོག་ལྡན་ཚུལ་ཁྱིམས་རྒྱ་མཚོ་ནི། རབ་ཡིད་ལྕགས་སྟག་ཕྱི་ལོ་༡༨༣༠ལོར་སྒོ་མེ་ལྕང་རའི་ནང་ཚན་ནེའུ་ལུང་སྡེ་བར་འཁྲུངས། དགུང་ལོ་བདུན་པ་ལ་རང་དགོན་མཆོད་རྟེན་སྐེ་ནས་གདན་སར་བཀོད། བཅོ་ལྔའི་སྟེང་སྐུ་འབུམ་རང་སྒར་དུ་གདན་དྲངས་ཤིང་། དཔལ་ལྡན་བཤད་སྒྲུབ་གླིང་གི་ཆོས་སྒོར་ཞུགས་ཏེ་བཀའ་པོད་ཀྱི་གཞུང་ལ་ཐུགས་གཉེར་མཐར་ཕྱིན་མཛད། རྒྱུད་གྲྭར་ཞུགས་ཏེ་རྒྱུད་པའི་བླ་མ་དབུ་མཛད་ཀྱི་གོ་སར་བཞུགས་ནས་འགྲིག་ལམ་ཐད་རྟིང་སྐུལ་དང་། སྨན་པ་སློབ་དཔོན་དང་རྒྱུད་པའི་ཁྲིར་རིམ་གྱིས་བཞུགས་ཏེ་ཆོས་སྲིད་གཉིས་ཀྱི་སྒོ་ནས་དོ་དམ་གང་ལེགས་མཛད། སྐྱབས་རྗེ་ཤིང་བཟང་རིན་པོ་ཆེ་དང་། གྲུབ་དབང་རྡོ་རྗེ་འཆང་གི་མདུན་ནས་མི་ཏྲ་རྡོར་ཕྲེང་སོགས་བཀའ་ཆོས་མང་དུ་གསན། ཕྱིས་མཚོ་སྔོན་དུ་དུས་འཁྲུག་བྱུང་སྐབས། རི་བོ་རྩེ་ལྔ་དང་ཨ་བ་གྷ་སོགས་སུ་ཕེབས་ཏེ་དད་ལྡན་གདུལ་བྱ་མང་པོར་འདོད་ཆོས་མང་དུ་བསྩལ། རབ་ཚེས་མེ་གླང་ཕྱི་ལོ་༡༨༧༧ལོར་སྐུ་འབུམ་ཁྲི་ཆེན་ལ་བཞུགས་ནས་ལུགས་གཉིས་ཀྱིས་འཛིན་སྐྱོང་བླ་ལྷག་ཏུ་གནང་། དགུང་ལོ་ང་བརྒྱད་པ་རབ་ཚེས་མེ་ཕག་ཕྱི་ལོ་༡༨༨༧ལོར་གཟུགས་སྐུའི་བཀོད་པ་ཆོས་དབྱིངས་སུ་བསྡུས་སོ།།

སྐུ་ཕྲེང་དྲུག་པ་ནེའུ་ལུང་བློ་བཟང་བསྟན་འཛིན་རབ་རྒྱས་ནི། རབ་ཚེས་ལྕགས་སྟག་ཕྱི་ལོ་༡༨༩༠ལོར་སྒོ་མེ་གཡུ་རྩར་འཁྲུངས། ཁ་རག་སྒོམ་ཆེན་ཞེས་པའི་བླ་མས་ཁྱེའུ་འདི་གཞན་དང་མི་འདྲ་བ་ཞིག་ཡིན་པས་གཙང་སྦྲ་གལ་ཆེ་ཚུལ་གསུངས་ཤིང་། མིང་ལ་དཔལ་འབུམ་བཀྲ་ཤིས་ཞེས་བཏགས། སྐྱབས་རྗེ་ཆུ་བཟང་རིན་པོ་ཆེ་་བློ་བཟང་ཐུབ་བསྟན་བཤད་སྒྲུབ་གཉི་མས་གོང་མའི་ཡང་སྤྲུལ་དུ་ངོས་འཛིན་གནང་། དགུང་ལོ་བདུན་པལ་མཆོད་རྟེན་སྐེ་ནས་གདན་སར་བཀོད། རྗེ་ཞྭ་དམར་པཎྜི་ཏ་ལས་རབ་བྱུང་དང་དབང་ལུང་རྗེས་གསུམ་གྱི་བཀའ་ཆོས་མང་དུ་གསན། དགུང་ལོ་བཅུ་གཅིག་པ་ནས་འཇིགས་བྱེད་ཀྱི་ལས་རུང་བསྙེན་པ་ཆག་མེད་གནང་། ཕྱིས་སྐུ་འབུམ་ཆོས་གྲྭར་ཞུགས་ཏེ་གཞུང་ལ་གསན་སྦྱོང་མཛད། སོ་ལྔ་བ་རབ་ཚེས་ཤིང་བྱི་ཕྱི་ལོ་༡༩༢༤ལོར་ཞི་བར་གཤེགས་སོ།།

སྐུ་ཕྲེང་བདུན་པ་ནེའུ་ལུང་བློ་བཟང་ལུང་རྟོགས་རྒྱལ་མཚོ་ནི། རབ་ཚེས་ཤིང་གླང་ཕྱི་ལོ་༡༩༢༥ལོར་དཀར་བརྗིད་ཚོ་བདུན་གྱི་ནང་ཚན་སུམ་བྷ་སྡེ་རུ་སྐུ་འཁྲུངས། དགུང་ལོ་བརྒྱད་པ་ལ་མཆོད་རྟེན་སྐེ་རུ་གདན་སར་བཀོད། བཅུ་བ་ལ་ལྡི་ཚ་བཀྲ་ཤིས་ཆོས་གླིང་གི་ཆོས་གྲྭར་ཞུགས་ཏེ་བཀའ་པོད་ཀྱི་གཞུང་ལ་གསན་སྦྱོང་མཛད། ཉེར་གསུམ་སྟེང་རང་དགོན་མཆོད་རྟེན་སྐེའི་ཁྲིར་བཞུགས། སུམ་ཅུའི་སྟེང་ཡང་བསྐྱར་ཁྲི་ལ་བཞུགས་ནས་སྐྱོང་བཀུར་གང་ལེགས་མཛད། སོ་ལྔ་བ་རབ་རྒྱལ་ས་ཁྱི་ཕྱི་ལོ་༡༩༥༨ལོར་སྤྱི་ཚོགས་སྒྱུར་བཀོད་སྐབས་རྐྱེན་དབང་གིས་རང་ཡུལ་དུ་བཞུགས། སྐབས་དེར་ཡང་བཟོ་རིག་སྣ་ཚོགས་དང་གསོ་རིག་གི་གཞུང་ལ་སྦྱངས་ཤིང་། རབ་རྒྱལ་ལྕགས་སྤྲེལ་ལོར་མཆོད་རྟེན་སྐེ་དགའ་ལྡན་བཀྲ་ཤིས་དར་རྒྱས་གླིང་གི་ཆོས་སྒོ་གསར་དུ་འབྱེད་སྐབས་སླར་གདན་སར་ཕེབས་ནས་དགོན་པའི་བསྐྱར་བཞེངས་ཀྱི་བྱ་བའི་དབུ་བརྥམས་ཏེ་དགོན་པ་དོ་དམ་ལྷན་ཚོགས་ཀྱི་འགན་འཛིན་དང་། མཚོ་ལྷོ་ཁུལ་དང་ཁྲི་ཀ་རྫོང་སྲིད་གྲོས་ཀྱི་ཁོངས་མི་བཅས་ཀྱི་འགན་བཞེས། དེ་ནས་ཁོང་གི་ཐུགས་བཀོད་འོག་དད་ལྡན་མང་ཚོགས་ཀྱིས་འདུ་ཁང་གི་ཁྱམས་རའི་ཀ་བ་དང་དང་འདུ་ཁང་སོགས་གཞི་ནས་སླར་གསོ་གནང་ཞིང་། ཆོས་ཐོག་གི་རྒྱུན་ཡང་བཙུགས་པ་དང་ཅུང་མ་འགོར་བར་འཆང་ཡང་འཁྲབ་ཐུབ་པ་བྱུང་ལ། ཁོང་ཉིད་ཀྱིས་ལྷ་བཟོའི་སྒྱུ་རྩལ་ལ་བརྟེན་ནས་སྒོ་ཆེན་གཡས་གཡོན་དུ་རྒྱལ་ཆེན་བཞི་དང་སྲིད་པའི་འཁོར་ལོ་སོགས་དང་། ནང་གི་གཡས་གཡོན་དུ་མགོན་པོ་དང་ལྷ་མོ། ཆོས་རྒྱལ། རྣམ་སྲས་སོགས་ཀྱི་སྐུ་འདྲ་གང་མ་བཞེངས། ལྕགས་རྟ་ལོར་འདུ་ཁང་སྟེང་གི་ལོ་པཎ་རྣམས་གསར་དུ་སྤོར་བ་དང་དབྱིབས་རྒྱ་ཕིབས་བྱས། འདུ་ཁང་ལྟག་རྒྱབ་ཀྱི་མཆོད་རྟེན་བརྒྱད་དང་རྒོད་རྩེ་རྫ་འདབས་རི་ཁྲོད་ཀྱི་རྟེན་བརྟེན་པ་གསར་བཞེངས། སྔོན་གྱི་ཆོས་ཐོག་ཉམས་གསོ་སོགས་ཐུགས་ཀྱི་བཞེད་པ་མཐའ་དག་ལྷན་གྱིས་གྲབ་མཐར་འགན་གཙོའི་གའན་གཞན་ལ་སྤྲད་ནས་སྐུ་འབུམ་རང་སྒར་དུ་བཞུགས། མཆོད་རྟེན་སྐེའི་སྔོན་གྱི་ཁང་བ་གྱན་སོ་ལྔ་ཙམ་དགོན་པར་ཕུལ་བ་དང་། མཆོད་རྫས་དང་བཀའ་བསྟན་འགྱུར་སོགས་སྤྱི་ལ་ཕུལ། ལོ་རེར་མགོན་པོ་དང་ཆོས་རྒྱལ་གཏོར་སྒྲུབ་གཉིས་རེས་མོས་བྱས་ནས་གཏོང་བཞིན་པ་བཅས་ལུགས་གཉིས་ཀྱིས་དགོན་པ་ལེགས་པར་སྐྱོང་བ་དང་ཁྲི་ཀ་རྫོང་སྲིད་གྲོས་ཀྱི་དབུ་བཞུགས་གཞོན་པའི་འགན་བཞེས་བཞིན་པའི་སྐབས་ལགས་སོ།།

གཞན་བསྟན་འཛིན་གྱི་སྐྱེས་ཆེན་དུ་མས་བྱིན་གྱིས་བརླབས་པའི་ཚུལ་ལ། ༧.གོང་ས་རྒྱལ་དབང་བཅུ་གསུམ་པའི་རིགས་ཀྱི་ཅོད་པན་རྗེ་ཞྭ་དམར་པཎྜི་ཏ་དགེ་འདུན་བསྟན་འཛིན་རྒྱ་མཚོ་དཔལ་བཟང་པོས་སྡེ་འདིར་སྔ་ཕྱི་བར་གསུམ་དུ་ཞབས་ཀྱི་བཅགས་ཤིང་བྱིན་གྱིས་བརླབས་ནས་མདོ་སྔགས་ཟབ་རྒྱས་ཀྱི་ཆོས་རྒྱུན་དང་ཟབ་ཁྲིད་མན་ངག་སོགས་ཀྱི་ཆོས་ཆར་ཡང་ཡང་ཕབ་པར་མ་ཟད། སྐབས་སྔ་ཕྱི་དུ་མར་ཀུན་སྤངས་རི་ཁྲོད་པའི་ཚོགས་གདན་དྲངས་ནས་ཡོན་ཆབ་དང་མར་མེ་ཁྲི་ཕྲག་དུ་མ་དང་། མཆོད་པའི་རྣམ་གྲངས་རྒྱ་ཆེར་ཕུལ་ཏེ་འཁོར་བ་ཇི་སྲིད་བར་རྒྱལ་བའི་དམ་ཆོས་འཛིན་པའི་ཐུགས་སྨོན་མཛད། སྐབས་འདིར་དགོན་པས་གཟིམ་ཆུང་ཞིག་གསར་བཞེངས་བགྱིས་ཏེ་དགོན་གྲོང་སྤྱི་ནས་གསོལ་སྟོན་དང་མཇལ་ཁ་ཞུས། སེར་སྐྱ་རྒན་གྲགས་རྣམས་ཀྱིས་གཟིམ་ཆུང་འདི་རྗེ་ཉིད་ལ་ཆེད་དམིགས་ཀྱིས་བཞེངས་པ་ཡིན་པས་ཉིད་ནམ་རྒྱུན་འདིར་བཞུགས་དགོས་ཀྱི་ཞུ་ནན་ཕུལ་བ་བདག་གིར་བཞེས་ཏེ་དེར་བཅད་རྒྱ་དང་དབང་ལུང་ཁྲིད་གསུམ་སོགས་མང་དུ་གནང་། འདིའི་སྐབས་སུ་དགོན་པ་དང་སྔགས་པ་ཕན་ཚུན་མི་མཐུན་ཞིང་། སྐབས་སྐབས་སུ་རྩོད་གླེང་འབྱུང་བཞིན་འདུག་པར་བན་སྔགས་ཀུན་ལ་བསླབ་སྟོན་དང་ཉེ་གནས་ཀྱི་མི་མངགས་ཏེ་རྩོད་པ་ཆོས་ཕྱོགས་སུ་ཞི་བར་མཛད། གྲུབ་དབང་རྗེ་འཇིགས་མེད་བསམ་གཏན་རིན་པོ་ཆེ་སྐུ་སྔ་ཕྱི་ཡང་གདན་ས་འདིར་ཆིབས་ཞལ་བསྒྱུར་དབང་ལུང་མན་ངག་ཟབ་ཆོས་དུ་མའི་ཆོས་རྒྱུན་ཡང་ཡང་བསྩལ་བ་སོགས་བསྟན་འགྲོར་སྨན་པའི་བྱ་བ་རླབས་ཆེན་མཛད། གཞན་ཡང་ལྷོ་རྒྱུད་བསྟན་པའི་སྒྲོན་མེ་བླ་ཁོ་རིན་པོ་ཆེ་འཇིགས་མེད་འཕྲིན་ལས་རྒྱ་མཚོ་དཔལ་བཟང་པོ་དེ་ཉིད་གདན་ས་འདིར་སྔ་ཕྱིར་ཆིབས་བསྒྱུར་གནང་སྟེ་མདོག་སྔགས་ཀྱི་ཆོས་རྒྱུན་དུ་མ་བསྩལ་བས་གདུལ་བྱ་མཐའ་དག་སྨིན་གྲོལ་གྱི་ལམ་ལ་བཀོད། འདི་ཉིད་མཁན་ཁྲི་འདུས་སྤྱི་ཐུན་མོང་གིས་གསོལ་བ་བཏབ་པ་ལྟར་ཁོང་གིས་བཅའ་ཡིག་ཆེན་མོ་གསར་རྩོམ་གནང་སྟེ་འགྲིག་ཀུན་སྤྱོད་དང་འཆད་ཉན་ཡར་ལྡན་དུ་བསྐྱངས་པ་སོགས་བསྟན་པའི་བྱ་བ་རྒྱ་ཆེན་མཛད། དེ་མཚུངས་སུ་འགྲོ་མགོན་ཐར་ཤུལ་རིན་པོ་ཆེ་རྗེ་དགེ་ལེགས་དབང་ཕྱུག་ཆོས་སྐྱོང་རྒྱ་མཚོ་དཔལ་བཟང་བོ། ཨ་རོལ་བློ་བཟང་ལུང་རྟོགས་བསྟན་པའི་རྒྱལ་མཚན། ལྭ་མོ་གསེར་ཁྲི་སོགས་མཁས་གྲུབ་རིམ་བྱོན་དུ་མས་ཞབས་ཀྱིས་བཅགས་ཤིང་སྐལ་ལྡན་གྱི་གདུལ་བྱ་མང་པོར་ཟབ་རྒྱས་ཆོས་ཀྱི་དགའ་སྟོན་རྒྱ་ཆེར་བསྩལ། རབ་རྒྱལ་མེ་བྱི་ཕྱི་ལོ་༡༩༣༦ལོའི་ཟླ་ལྔ་བར་ཀུན་གཟིངས་སྣང་བ་མཐའ་ཡས་པཎ་ཆེན་ཐམས་ཅད་མཁྱེན་པ་བློ་བཟང་ཐུབ་བསྟན་ཆོས་ཀྱི་ཉི་མ་དེ་ཉིད་ཞི་དྲག་གི་འཁོར་ཚོགས་རྒྱ་ཆེན་པོ་དང་བཅས་ཁྲི་ཀའི་གསེར་ལྗོངས་འཛིན་མའི་ཁྱོན་འདིར་ཆིབས་ཞལ་ཐོག་མར་བསྒྱུར་བའི་ཚེ། གདན་ས་འདི་གཙོས་གཞིས་བྱེས་ཀྱི་དགེ་འདུན་པ་མང་པོས་བསུ་སྒཻང་ངོ་མཚར་བ་དང་བཅས་སྤྱན་དྲངས་ཏེ་འདུ་ཁང་ཆེན་མོའི་ཆོས་ཀྱི་ཁྲི་འཕང་མཐོན་པོར་ཞབས་ཟུང་བཀྲ་ཤིས་ཀྱི་རི་མོ་རྣམ་པར་བཀོད་དེ། ཡུལ་གྲུ་འདི་གཙོས་ཕྱོགས་ཀྱི་བླ་སྤྲུལ་བཤེས་གཉེན་རྣམས་དང་། དད་ལྡན་སེར་སྐྱ་ཁྲི་ཕྲག་ལས་བརྒལ་བ་ལ་དབང་ལུང་དུ་མ་བསྩལ་བ་དང་། རྟེན་རྣམས་ལ་བཀྲ་ཤིས་ཀྱི་བྱིན་ཆར་ཕབ་པ་སོགས་ཀྱི་བཀའ་དྲིན་བརྗོད་ལས་འདས། ཕྱིས་སྡེ་འདི་ཆུ་བཟང་རིན་པོ་ཆེར་ཕུལ་བ་ཁོང་གིས་བདག་གིར་བཞེས་ཏེ་བཅའ་ཡིག་ཆེན་མོ་གསར་རྩོམ་གནང་ནས་འགྲིག་ཀུན་སྤྱོད་དང་འཆད་ཉན་སོགས་ཡར་ལྡན་དུ་བསྐྱངས་ཤིང་སྐུ་ཕྲེང་ཕྱི་མ་རིམ་བྱོན་གྱིས་འཛིན་བདག་བྱེད་བཞིན་ཡོད་ལ་ཁྲི་ཡང་སྐྱོང་། སྐེ་བའི་དགའ་ལྡན་དགོས་པའི་བླ་མ་སྐུ་ཞབས་ཨ་རིན་ཚང་སྐུ་སྔ་ཕྱི་རྣམས་སྡེ་འདིར་བཀའ་དྲིན་ཤིན་ཏུ་ཆེ་ཞིང་། འདི་བའི་སྐུ་ཕྲེང་བདུན་པའི་མཚན་མི་ངེས་ཤིང་གྲྭ་སྲི་ལངས་བཅད་པར་གྲགས། གཞན་ཡང་ཆོས་སྡེ་འདིའི་མཁན་ཁྲིར་བཞུགས་པའི་བླ་མ་གཞན་དག་སྐོར་ལ། མཚན་སྒྲོགས་མཁན་ཆེན་བློ་བཟང་བཀྲ་ཤིས་ཉི་མ་དང་དགེ་འདུན་བསྟན་པའི་ཉི་མ། མདོ་བ་མཁན་ཆེན་བློ་བཟང་དབང་ཕྱག་རྒྱུ་མཚོ། ཅོ་ནེ་ཞབས་དྲུང་སྐལ་བཟང་བསྟན་འཛིན་ཉི་མ། དྲེང་ཁོག་ཟི་ལིང་སྒར་དཔོན་ཚང་གི་དགེ་བཤེས་བྱ་ཁྱུང་གཟིམ་ཁང་ཚང་། ཇོ་མོ་རི་ཕྱི་ཚང་། ཆག་ཀ་ཞབས་དྲུང་སོགས་གདན་ས་འདིའི་མཁན་ཁྲིར་རིམ་གྱིས་བྱོན་ནས་ཕྱག་རྗེས་ཆེ་ཆུང་ཅི་རིགས་ཀྱིས་སྐྱོང་བཀུར་གང་ལེགས་སྒོས་ཕྱི་འདུལ་བའི་བཅས་ཁྲིམས་དང་ནང་ཉམས་ལེན་གྱི་རིམ་པ་སོགས་བཤད་སྒྲུབ་ཟུང་གི་བྱ་བ་མཐའ་དག་ཡར་རྒྱས་གོང་འཕེལ་ཡོང་བའི་ཐུགས་ཁུར་དང་དོ་དམ་གང་ལེགས་མཛད་པ་བརྗོད་ཀྱིས་མི་ལང་། ཕྱིས་སྒོ་མེ་ལྷ་རམས་པས་ཀུན་མཁྱེན་བློ་རྟགས་སོགས་རྩིས་བཞག་གནང་ནས་མཚན་ཉིད་སླར་གསོ་བྱས་ཏེ་མྱུ་གུ་བརླན་དང་འཕྲད་པའི་དཔེ་བཞིན་སླར་སོར་ཆུད་པ་བྱུང་། སྔར་བཀྲ་ཤིས་ཆོས་གླིང་གི་སྐབས་སུ་བྱ་ཁྱུང་མཁན་རབས་བཅུ་བདུན་པ་སྒོ་མེ་ཨ་ཛོ་དཔལ་ལྡན་རྒྱ་མཚོ་ནི། ལྕང་རཱའི་སྐེ་ཀྱཱ་ཨ་ཛོ་ཚང་དུ་འཁྲུངས། ཁོང་ཉིད་བཀྲ་ཤིས་ཆོས་གླིང་དུ་བཞུགས་ཤིང་དེ་གར་སྒར་བའང་ཡོད་སྐད།