བྱང་ཤ་ར།
སྤེལ་དུས 2019-03-20
ཡོང་ཁུངས། རྗེ་ཙོང་ཁ་པའི་དྲ་བ།
རྩོམ་པ་པོ། བསྟན་འཛིན་ཡེ་ཤེས།
ལྷ་ས་གྲོང་ཁྱེར་ལྷུན་གྲུབ་རྫོང་ཐང་འགོ་ཤང་ཁུངས་གཏོགས་སྒྲེང་ཤོག་ཆེན་བཅུ་གཉིས་ཀྱི་ཡ་གྱལ་གཙང་གཞུང་གྲོང་ཚོའི་ཁུངས་སུ་གནས་ཡོད། ས་འདི་བརྒྱུད་ཀྱི་སྤྱི་མིང་དུ་སྔོན་པ་ཚབ་རོམ་པོ་ཞེས་འབོད་པ་ལོ་རྒྱུས་སུ་གསལ།བྱེ་བྲག་ས་ཆའི་མིང་སྔོན་དང་ད་ལྟ་གཅིག་མཚུངས་ཏེ་བྱང་ཤ་ར་ཞེས་ཟེར་བ་དང་།འདིར་དགེ་བཤེས་ཤ་ར་བའི་ཡུམ་ཕྱུགས་འཚོ་སྐབས་རྡོ་ལེབ་ཆེན་པོ་ཞིག་གི་སྟེང་དུ་ཁོང་སྐུ་འཁྲུངས་པས་ཁོང་གི་མཚན་ལའང་ཤ་ར་བ་ཞེས་ཡུལ་གྱི་མིང་གང་ཟག་ཐོག་པ་ཡིན་ནམ་སྙམ། དགེ་བཤེས་ཤ་ར་བ་སྐུ་འཁྲུངས་རྗེས་རྡོ་ལེབ་ཐོག་ཞབས་རྗེས་བཞག་པ་ད་ལྟའང་མཇལ་རྒྱུ་ཡོད་པ་མ་ཟད་ཤ་ར་བའི་འཁྲུངས་ས་ཞེས་ཕྱག་མཆོད་ཀྱི་གནས་སུ་ལྷ་ཁང་དང་།དགེ་བཤེས་ཤ་ར་བའི་སྐུ་འདྲ།མཆོད་རྟེན་བཅས་བཞེངས་ཏེ། དེར་བདག་པོ་བྱེད་མཁན་གྱི་རབ་བྱུང་ཡང་བཞུགས། དེ་ནི་རྭ་སྒྲེང་གི་སྡེ་ཁུངས་ཡིན་ནོ། །
རྗེ་ཙོང་ཁ་པའི་དྲ་བའི་འགན་འཛིན་དགེ་བཤེས་བློ་བཟང་ཡར་རྒྱས་མཆོག་གིས་སྐུལ་དོན་བཞིན།གཟིམ་འོག་བསྟན་འཛིན་ཡེ་ཤེས་ཀྱིས།བོད་རབ་བྱུང་༡༧མེ་སྤྲེལ་བོད་ཟླ་༡ཚེས་༣༠ཉིན།
