ཚེ་སྨོན་གླིང་དགོན་པ་དེ་ལྷ་ས་གཙུག་ལག་ཁང་གི་བྱང་ངོས་སུ་གནས་ཡོད་ཅིང་། དེ་ཡང་ལྷ་སའི་གླིང་ཁག་བཞིའི་ཡ་རྒྱལ་ཡིན་པ་དང་། ཐོག་མར་ཚེ་སྨོན་གླིང་སྐུ་ཕྲེང་དང་པོ་ངག་དབང་ཚུལ་ཁྲིམས་ནི་ཏཱ་ལའི་བླ་མ་སྐུ་ཕྲེང་བདུན་པ་སྐུ་གཤེགས་རྗེས་བོད་ཀྱི་སྲིད་སྐྱོང་གནང་ནས་ཏཱ་ལའི་བླ་མ་སྐུ་ཕྲེང་བརྒྱད་པར་ལོ་ངོ་ཉི་ཤུ་ཙམ་གྱི་རིང་ཕྱག་རོགས་ཞུས་མྱོང་ཡོད་པ་མ་ཟད། མན་ཆིང་གོང་མ་ཆན་ལུང་གི་བཀའ་ཕབ་པ་ལྟར་པེ་ཅིང་དུ་ཕེབས་པས་རྒྱ་བོད་མི་རིགས་གཉིས་ཀྱི་མཛའ་མཐུན་ལ་ཕན་འབྲས་དང་མཛད་རྗེས་བླ་ན་མེད་པ་འཇོག་གནང་མཛད། ཚེ་སྨོན་གླིང་སྐུ་ཕྲེང་གཉིས་པ་འཇམ་དཔལ་ཚུལ་ཁྲིམས་མཆོག་གིས་ཚེ་སྨོན་གླིང་དགོན་པ་ཕྱག་བཏབ་པ་མ་ཟད་རབ་བྱུང་བཅུ་བཞི་པའི་ས་ཡོས་སྤྱི་ལོ་༡༨༡༩ལོ་ནས་རབ་བྱུང་བཅུ་བཞི་པའི་ཤིང་འབྲུག་སྤྱི་ལོ་༡༨༤༤ལོ་སྟེ་ལོ་ཉི་ཤུ་རྩ་ལྔའི་རིང་བོད་ཀྱི་སྲིད་སྐྱོང་གནང་བ་དང་དགའ་ལྡན་ཁྲི་པ་ཡང་གནང་ཐུབ་པ་བྱུང་ཡོད། མཐའ་བསྐོར་དུ་ཐོག་ས་གཉིས་ལྡན་གྱི་ཤག་སྐོར། ཤར་གཙུག་ལག་ཁང་ལ་ཕོ་བྲང་དཀར་པོ་དང་། ནུབ་ཀྱི་གཙུག་ལག་ཁང་ལ་ཕོ་བྲང་དམར་པོ་ཀ་བ་ཉི་ཤུ་ཡོད་པའི་འདུ་ཁང་དང་། ལྷ་ཁང་། དགོན་ཁང་། མཛོད་ཁང་། སྒོ་འཕྱོར། དཀར་ཆ་འདོད་པའི་རབ་གསལ་སོགས་བཟོ་བཀོད་ཤིན་ཏུ་ལེགས་པོ་ཡོད་པ་དང་། ད་དུང་ཕྱག་དཔེ་ཁང་གི་ཀུན་དགའ་རྭ་བའི་སྟེང་། བཀའ་འགྱུར་དང་། བསྟན་འགྱུར། གསུང་འབུམ། ལོ་རྒྱུས། རིག་གནས་སོགས་ཀྱི་རྩ་ཆེའི་ཕྱག་དཔེ་ཉིས་ཁྲི་ལྷག་ཡོད་པར་གྲགས། དེ་མིན་སྐུ་གསུང་ཐུགས་རྟེན་ནི་བརྗོད་ཀྱི་མི་ལངས་པ་ཡོད་པ་སྟེ། དངུལ་ལས་གྲུབ་པའི་སྒྲོལ་མ་དང་། གསེར་ཟངས་ལས་གྲུབ་པའི་རྒྱལ་བ་བྱམས་པ། རྗེ་ཙོང་པ་སོགས་ཀྱི་སྐུ་བརྙན་དང་། ཡི་དམ་དང་སྲུང་མ་རྟ་མགྲིན་བཅས་པའི་སྐུ་བརྙན། ཚེ་སྨོན་གླིང་སྐུ་ཕྲེང་གཉིས་པ་འཇམ་དཔལ་ཚུལ་ཁྲིམས་ཀྱི་དངུལ་གདུང་དང་། སྐུ་ཕྲེང་གསུམ་པ་བསྟན་པའི་རྒྱལ་རྒྱལ་མཚན་གྱི་དངུལ་གདུང་ཐོག་ཚད་ལོན་པ། སྐུ་ཕྲེང་བཞི་པ་ཐུབ་བསྟན་མཁས་གྲུབ་མཆོག་གི་གསེར་གདུང་། སྐུ་ཐང་ཚེམ་གྲུམ་མ་སོགས་གྲངས་ལས་འདས་པ་ཡོད་པར་གྲགས། ཚེ་སྨོན་གླིང་དེ་ལོ་རྒྱུས་ཐོག་གཙོ་གནད་ཆེ་བ་ཞིག་ཡིན་པ་སྟེ། སྐུ་ཕྲེང་དང་པོ་ངག་དབང་ཚུལ་ཁྲིམས་དང་། སྐུ་ཕྲེང་གཉིས་པ་འཇམ་དཔལ་ཚུལ་ཁྲིམས། སྐུ་ཕྲེང་བཞི་པ་ངག་དབང་བློ་བཟང་བསྟན་པའི་རྒྱལ་མཚན་བཅས་ཀྱིས་ལོ་མང་རིང་བོད་ཀྱི་སྲིད་ཚབ་གནང་མྱོང་ཡོད་ལ་སྐུ་ཐོག་གཉིས་པ་དང་བཞི་པ་རྣམ་གཉིས་དགའ་ལྡན་ཁྲི་པ་ཡང་གནང་མྱོང་ཡོད།
