སྲོག་རྩ་བརྟན་པོར་བསྲུངས་ནས་རྒྱལ་ཡོངས་ཀྱི་མི་རིགས་མཐུན་སྒྲིལ་ཡར་ཐོན་གྱི་དཔེ་སྟོན་གྲོང་ཁྱེར་ཧུར་ཐག་གཏོད་དགོས།
སྤེལ་དུས 2018-06-06
ཡོང་ཁུངས། ཀྲུང་གོའི་བོད་ཀྱི་གསར་འགྱུར་དྲ་བ།
རྩོམ་པ་པོ། ཁྲེན་ཀྲེ་ཆང་གིས།
དུས་རབས་གསར་པར་སླེབས་ཚུན་མི་རིགས་མཐུན་སྒྲིལ་གྱི་འགན་འཁྲི་གསར་པ་དང་ལས་འགན་གསར་པ་སྤྲད་པས་མི་རིགས་མཐུན་སྒྲིལ་གྱི་ནུས་པ་དེ་བས་མངོན་གསལ་དོད་ལ་ལས་འགན་ཡང་དེ་བས་དཀའ་ཚེགས་ཆེ་བ་དང་། འཁུར་དགོས་པའི་འགན་འཁྲི་དེ་བས་ལྕི་ལ་བླང་བྱ་དེ་བས་མཐོ་པོ་ཡོད། ཆབ་མདོ་གྲོང་ཁྱེར་གྱིས་ཐོག་མཐའ་བར་གསུམ་དུ་མི་རིགས་མཐུན་སྒྲིལ་དེ་མི་རིགས་ཁག་གི་སྲོག་རྩར་བརྩིས་ནས་ཐུན་མོང་གི་བསམ་བློ་ཆབ་སྲིད་ཀྱི་རྨང་གཞི་བརྟན་དུ་མཐའ་གཅིག་ཏུ་བཏང་ནས་རྒྱལ་ཡོངས་ཀྱི་མི་རིགས་མཐུན་སྒྲིལ་ཡར་ཐོན་གྱི་དཔེ་སྟོན་གྲོང་ཁྱེར་གཏོད་རྒྱུར་སྐུལ་མ་གཏོང་རྒྱུའི་ཐད་ཕན་འབྲས་གསར་པ་ཐོན་ཡོད། རྒྱལ་ཡོངས་ཀྱི་མི་རིགས་མཐུན་སྒྲིལ་ཡར་ཐོན་གྱི་དཔེ་སྟོན་གྲོང་ཁྱེར་གཏོད་པའི་ལས་དོན་ལ་སྔར་བས་སྐུལ་མ་གཏོང་བར་སྨྱུག་འཛིན་པས་གཤམ་གསལ་གྱི་ཕྱོགས་ཁག་ནས་ལག་བསྟར་བྱེད་དགོས་པའི་ངོས་འཛིན་བྱས་ཤིང་།
གཅིག་ནས་ཆབ་མདོ་གྲོང་ཁྱེར་གྱི་རྫོང(ཆུས)ཨུད་དང་སྲིད་གཞུང་ཁག་གིས་གཏོད་འཛུགས་ལས་དོན་གྱི་འགོ་ཁྲིད་ཚོགས་ཆུང་དང་ལས་ཀའི་ཆེད་དོན་འཛིན་གྲྭ་བཙུགས་ནས་སྐུལ་གཏོང་ཚོགས་འདུ་འཚོགས་ཏེ་ཞིབ་འཇུག་བཀོད་སྒྲིག་ནན་ཏན་བྱེད་པ་དང་། ལས་ཀའི་ཇུས་གཞི་ཞིབ་ཚགས་སུ་གཏོང་བ། འགན་འཁྲི་ཁག་བགོས་ཁ་གསལ་བྱེད་པ་བཅས་བྱས་ཏེ་མི་ཤུགས་དང་། ནོར་ཤུགས། དངོས་ཤུགས་བཅས་ཐད་ནས་ནུས་ཤུགས་ཡོད་རྒུས་འགན་ལེན་གྱིས་གནས་ཚད་མཐོ་པོས་གཏོད་འཛུགས་ལས་དོན་ལ་སྐུལ་མ་བཏང་ཐོག་ཆབ་མདོ་གྲོང་ཁྱེར་གྱི་རྒྱལ་ཡོངས་ཀྱི་མི་རིགས་མཐུན་སྒྲིལ་ཡར་ཐོན་གྱི་དཔེ་སྟོན་གྲོང་ཁྱེར་གཏོད་པའི་ལས་དོན་ལ་དཔྱད་དཔོག་དང་ཞིབ་བཤེར་རྩིས་ལེན་ཐོབ་པ་བྱེད་དགོས་པ་དང་།
གཉིས་ནས་བརྙན་འཕྲིན་དང་། དྲ་ཚུགས། སྐད་འཕྲིན་གྱི་སྤྱི་རྟགས་སོགས་བརྒྱུད་དྲིལ་བསྒྲགས་རྒྱ་ཁྱབ་ངང་བྱས་ནས་གྲོང་ཁྱེར་ཡོངས་ཀྱི་རྫོང་དང་ཆུས་ཁག་གི་འགྲིམ་འགྲུལ་བགྲོད་ལམ་གཙོ་བོ་དང་། མི་སྣ་འདུ་འཛོམས་ཆེ་བའི་ཁུལ། ལས་ཁུངས(ཁེ་ལས་དང་བྱ་གཞག་ཚན་པ) གྲོང་ཚོ(གྲོང་ལྷན) སློབ་གྲྭ། དགོན་སྡེ། དམག་སྒར། མཛེས་ལྗོངས་ཁུལ་སོགས་སུ་དྲིལ་བསྒྲགས་བྱ་ཡུལ་འཛུགས་པ་དང་། དྲིལ་བསྒྲགས་བྱང་བུ་དང་བརྡ་ཆའི་བྱང་བུ་ཆེ་གྲས་འཛུགས་པ། དྲིལ་བསྒྲགས་སྦྱར་ཡིག་ལེགས་འདེམས། གསར་འགྱུར་འཕྲིན་སྤེལ་བྱེད་པ་སོགས་ཀྱི་ལས་དོན་སྤེལ་ནས་མི་རིགས་མཐུན་སྒྲིལ་དྲིལ་བསྒྲགས་ཀྱི་ནང་དོན་གང་སར་མཐོང་རྒྱུ་ཡོད་པ་དང་། དུས་དང་རྣམ་པ་ཀུན་ཏུ་ཁྱབ་ཐུབ་པ། རྣམ་པ་ཟབ་མོ་ཞིག་གཏོད་པ་བཅས་བྱེད་དགོས་པ།
གསུམ་ནས་ལས་དོན་སྤེལ་རྒྱུ་དེ་ཁྱབ་ཁོངས་ཁག་ཏུ་སྣུར་སྲིང་དང་མང་ཚོགས་ཚང་མར་ཁྱབ་པ་བྱེད་པ་དང་ལྷག་པར་དུ་སྒོ་དབྱེ་བསྟུན་མཁས་གྱི་འདུ་ཤེས་མཐའ་འཁྱོངས་བྱས་ནས་ཕྱི་ནས་ཡོང་བའི་མི་དང་ཕྱོགས་མིར་རྣམ་པ་སྣ་ཚོགས་དང་གོ་བདེ་ཤེས་སླའི་དྲིལ་བསྒྲགས་སློབ་གསོ་བརྒྱབ་སྟེ་ཁོང་ཚོས་བོད་ཀྱི་ཡུལ་སྲོལ་གོམས་གཤིས་དེ་བས་ལེགས་པའི་སྒོ་ནས་ཤེས་རྟོགས་ཐུབ་པ་བྱས་ཏེ་ཆབ་མདོ་གྲོང་ཁྱེར་གྱི་མི་རིགས་ཁག་གི་མང་ཚོགས་དང་ཞི་མཐུན་མཉམ་གནས་ཐུབ་པ་བྱེད་དགོས་པ་བཅས་སོ། །