སྙིང་རུས་གཏན་འཁྱོངས་ཀྱིས་མཛེས་སྡུག་ལྡན་པའི་གྲོང་གསེབ་སྐྲུན་དགོས།
སྤེལ་དུས 2020-03-04
ཡོང་ཁུངས། ཀྲུང་གོའི་བོད་ཀྱི་གསར་འགྱུར་དྲ་བ།
རྩོམ་པ་པོ།
གྲོང་གསེབ་མཛེས་པོ་ཡོད་མེད་གཅིག་ནས་ཁོར་ཡུག་ལ་ལྟ་དགོས་པ་དང་གཉིས་ནས་དམངས་སྲོལ་ལ་ལྟ་དགོས། གྲོང་གསེབ་བཅོས་སྒྲིག་གི་འགག་རྩ་མི་ལ་ཐུག་ཅིང་། ཞིང་པའི་ཤེས་དཔལ་གྱི་བྱང་ཚད་དང་རིག་གནས་ཀྱི་བྱང་ཚད་མཐོ་རུ་སོང་ཚེ། ཕྱུག་འགྱུར་འཇོན་ཐང་ཡང་ཆེ་རུ་འགྲོ་སྲིད། གྲོང་གསེབ་འཛུགས་སྐྲུན་གྱི་རྨང་གཞི་བརྟན་དུ་གཏོང་བ་ནས་འགོ་བཙུགས་ཏེ་གནད་སྨིན་ཤུགས་འདོན་དང་འབད་འཐབ་ལྷོད་མེད་བྱེད་དགོས། དེའི་ཐད་སྨྱུག་འཛིན་པས་གཤམ་གསལ་གྱི་གྲོས་འགོ་ཁག་འདོན་རྒྱུ་སྟེ།
གཅིག་ནས་རྨང་གཞིའི་སྒྲིག་བཀོད་འཛུགས་སྐྲུན་དང་སྤྱི་པའི་ཞབས་འདེགས་ཞུ་བར་ཤུགས་སྣོན་རྒྱག་པར་དམིགས་དགོས། རྨང་གཞིའི་སྒྲིག་བཀོད་འཛུགས་སྐྲུན་རྗེས་ལུས་ཡིན་པ་དང་སྤྱི་པའི་ཞབས་འདེགས་ནི་གྲོང་གསེབ་འཕེལ་རྒྱས་ལ་འགོག་རྐྱེན་བཟོ་བའི་མངོན་གསལ་དོད་པའི་ཞན་ཆ་རེད་ལ། གྲོང་གསེབ་ཀྱི་དམངས་འཚོ་ལེགས་སུ་གཏོང་བར་འགོག་རྐྱེན་བཟོ་བའི་མངོན་གསལ་དོད་པའི་གནད་དོན་ཞིག་ཀྱང་རེད། དེས་ན། སེམས་ཐག་ཆོད་པོས་མ་དངུལ་འབོར་ཆེན་གཏོང་བ་དང་འབད་འཐབ་ལྷོད་མེད་ཀྱིས་ཞན་ཆ་སེལ་བ་དང་གནད་དོན་ཐག་གཅོད་བྱེད་དགོས། ཚན་རིག་དང་མཐུན་པའི་འཆར་འགོད་དང་བྱེད་པོ་མང་པོས་ཐེ་ཞུགས་བྱས་ཏེ། གྲོང་གསེབ་ཀྱི་ལམ་དང་། ཆུ། གློག རླངས། དྲ་བ་སོགས་རྨང་གཞིའི་སྒྲིག་བཀོད་ལེགས་སུ་ཏན་ཏིག་གཏོང་བ་དང་། གྲོང་གསེབ་ཀྱི་སློབ་གསོ་དང་། སྨན་བཅོས་འཕྲོད་བསྟེན། སྤྱི་པའི་འགན་སྲུང་། རྒན་གསོ། རིག་གནས་ལུས་རྩལ་སོཌ་སྤྱི་པའི་ཞབས་འདེགས་ཀྱི་ཆུ་ཚད་མཐོ་རུ་ནུས་ལྡན་གཏོང་དགོས།
གཉིས་ནས་གྲོང་གསེབ་ཀྱི་སྡོད་མལ་ཁོར་ཡུག་ལེགས་སུ་གང་མགྱོགས་གཏོང་བར་དམིགས་དགོས། སྣོད་བཅུད་སྡོད་མལ་ནི་གྲོང་གསེབ་དར་རྒྱས་ཀྱི་གཞི་རྩའི་བླང་བྱ་རེད། ཡུལ་བབ་དང་བསྟུན་ནས་སྣ་མང་ཅན་གྱི་འཁོར་རྒྱུག་བྱེད་ཐབས་འཚོལ་ཞིབ་དང་། འགན་འཁྲི་དང་ལས་དོན་གྱི་ལམ་སྲོལ་འཐུས་ཚང་། གད་སྙིགས་དང་བཙོག་ཆུ་གཙང་སེལ། “གསང་སྤྱོད་གསར་བརྗེ” གྲོང་གསེབ་ཀྱི་ཁོར་ཡུག་མཛེས་སུ་གཏོང་བ་བཅས་ཀྱིས་གཙོས། “གྲོང་གསེབ་ཀྱི་སྡོད་མལ་ཁོར་ཡུག་བཅོས་སྒྲིག་གི་ལོ་གསུམ་གྱི་བྱ་སྤྱོད”ཕྱོགས་ཡོངས་ནས་དོན་འཁྱོལ་བཅས་བྱས་ནས་གྲོང་གསེབ་ཀྱི་སྡོད་མལ་ཁོར་ཡུག་ལེགས་སུ་ཏན་ཏིག་གཏོང་དགོས།
གསུམ་ནས་ཞིང་པའི་ཐོབ་ཚོར་དང་། བདེ་སྐྱིད་ཚོར་སེམས། བདེ་འཇགས་ཚོར་སེམས། བློ་ཡིད་ཚིམ་ཚད་བཅས་ཆེ་རུ་གཏོང་རྒྱུར་སྣང་ཆེན་བྱེད་དགོས། གྲོང་གསེབ་བཅོས་སྒྲིག་ལ་ཤུགས་སྣོན་དང་ལེགས་སུ་གཏོང་བར་ཕན་འབྲས་དངོས་ཐོན་མིན་གྱི་མཐའ་མའི་བརྡས་ཐག་གཅོད་དབང་ཞིང་པ་རྣམས་ལ་ཡོད། གྲོང་གསེབ་བཅོས་སྒྲིག་དང་། སྒྱུར་བཅོས། གསར་གཏོད་བཅས་དང་སྲིད་ཇུས་ཀྱི་བྱེད་ཐབས་ཚང་མ་དང་གྲོང་གསེབ་བཅོས་སྒྲིག་གི་བྱ་སྤྱོད་ཚང་མས་ཞིང་པའི་ཐོན་སྐྱེད་དང་འཚོ་བའི་ཐད་ཀྱི་ཁ་ཚ་དགོས་གཏུགས་ཀྱི་དགོས་མཁོ་དང་འདུན་པ་ཟབ་མོར་དམ་པོར་དམིགས་ཏེ། ཞིང་པའི་འདོད་འདུན་ལ་བརྩི་བཀུར་དང་། ཞིང་པའི་བསམ་འཆར་དང་གྲོས་འགོ་ཉན་པ། ཐམས་ཅད་ཞིང་པའི་རྩ་བའི་ཁེ་ཕན་ནས་འགོ་འཛུགས་པ། ཐམས་ཅད་ཞིང་པ་བློ་ཡིད་ཚིམ་མིན་དང་། ཞིང་པས་དགའ་པོ་བྱེད་མིན། ཞིང་པས་ཁས་ལེན་མིན་བཅས་མཐའ་མའི་ཚད་གཞིར་བརྩི་བ་བཅས་བྱས་ནས་སྙིང་རུས་གཏན་འཁྱོངས་ཀྱིས་མཛེས་སྡུག་ལྡན་པའི་གྲོང་གསེབ་འཛུགས་སྐྲུན་བྱེད་དགོས།