རི་སྐྱེས་ཤ་མོའི་དུག་འགོག་ཤེས་བྱ།

          ད་སྔ་ཆར་པ་འབབ་པའི་དུས་ཚིགས་སུ་སླེབས་ཤིང་རི་སྐྱེས་ཤ་མོ་སྣ་ཚོགས་སྐྱེ་བའི་དུས་ཡིན་ལ།　རི་སྐྱེས་ཤ་མོ་འཐུ་ནོར་དང་བཟའ་ནོར་སོང་ནས་དུག་ཕོག་པའི་དུས་ཚིགས་ཀྱང་ཡིན་པ་རེད།　གལ་ཏེ་དུག་ཡོད་ཤ་མོ་བཏུས་ནས་བཟས་པ་ཡིན་ན།　དུག་ཕོག་སླ་ཞིང་ཚབས་ཆེན་ཡིན་ན་ཚེ་སྲོག་ལ་ཉེན་ཁ་ཡོད་པས་ཡིད་གཟབ་མི་བྱེད་ཀ་མེད་རེད།　

          གཅིག　རང་གིས་ཟ་མ་མྱོང་པ་དང་ངོ་མི་ཤེས་པ།　ཞིང་སྨན་དང་ལུད་རྫས་འདྲེས་བའི་ས་ཞིང་ནས་སྐྱེས་པའི་ཤ་མོ་དེ་ཚོ་གང་མོས་འཐུ་བ།　འཚོང་བ་དང་ཉོ་བ་བཅས་བྱེད་མི་ཉན།　ལྷག་པར་དུ་ཁ་དོག་ཚོན་མདངས་རྣམ་པར་བཀྲ་བ་དང་ཆུང་ངུ་ངོ་མི་ཤེས་པ།　ཡང་ན་སྨིན་ནས་རུལ་པའི་ཤ་མོ་དེ་དག་འཐུ་མི་ཉན།

          གཉིས།　རི་སྐྱེས་ཤ་མོ་ལས་སྣོན་དང་གཡོས་སྦྱོར་བྱེད་དུས་ངེས་པར་དུ་དོ་སྣང་བྱ་རྒྱུ་ནི་ཤ་མོ་རྗེན་ཟ་བྱེད་མི་རུང་ཞིང་བརྔོས་བཙོས་ཡག་པོ་བྱས་རྗེས་གཞི་ནས་བཟའ་དགོས།　ཐེངས་རེར་ཤ་མོ་སྣ་གཅིག་མ་གཏོགས་ལས་སྣོན་དང་བཟའ་མི་རུང་།　རི་སྐྱེས་ཤ་མོ་ཟ་དུས་ཆང་འཐུང་མི་ཉན།

          གསུམ།　བཟའ་བཏུང་ཚོང་གཉེར་སྡེ་ཚན་གྱིས་རི་སྐྱེས་ཤ་མོ་ཉོ་སྒྲུབ་བྱེད་པའི་སྐབས་སུ་ཞིབ་བཤེར་ནན་ཏན་བྱ་དགོས།　ལས་སྣོན་གཟབ་ནན་དང་མ་རྒྱུ་ཉར་ཚགས་བྱས་ནས་ཞིབ་བཤེར་བྱ་རྒྱུའི་གྲ་སྒྲིག་བྱས་ཏེ་འཛད་སྤྱོད་པའི་བཟའ་བཅའི་བདེ་འཇགས་འགན་ལེན་བྱ་དགོས།　　རྒྱ་ཆེ་བའི་འཛད་སྤྱོད་པས་རང་ཉིད་སྲུང་སྐྱོབ་ཀྱི་འདུ་ཤེས་ཆེ་རུ་གཏང་དགོས་ཤིང་།　ཟ་མ་མ་བཟའ་སྔོན་ལ་ཚོང་གཉེར་ཐོབ་ཐང་ཡོད་མཁན་ཟ་ཁང་བདམས་ནས་ཞབས་ཞུ་པའི་ཁྲིད་སྟོན་འོག་ཟ་སྤྱོད་བྱ་དགོས།　

          བཞི།　སློབ་གྲྭའི་ཟ་ཁང་དང་།　ཐུན་མོང་གི་ཟ་ཁང་།　གཉེན་སྟོན་དང་འདས་མཆོད།　གྲོས་ཚོགས་ཆེན་པོ་སོགས་ཐུན་མོང་འཛོམས་སྟོན་སྐབས་སུ་རི་སྐྱེས་ཤ་མོ་ལས་སྣོན་དང་གཡོས་སྦྱོར་བྱེད་མི་ཆོག　མང་ཚོགས་རང་བཞིན་གྱི་ཟས་དུག་ཕོག་པའི་དོན་རྐྱེན་མི་ཡོང་བ་སྔོན་འགོག་བྱ་དགོས།　

          ལྔ།　གལ་སྲིད་རི་སྐྱེས་ཤ་མོ་བཟས་རྗེས་སྐྱུག་ལངས་བ་དང་།　　མགོ་ན་བ།　ཕོ་བ་ན་བ།　ཁོག་པ་བཤལ་བ།　སེམས་ཁམས་མི་བདེ་བ་དང་འཕྲུལ་སྣང་སོགས་ཀྱི་ནད་རྟགས་བྱུང་ན།　མྱུར་དུ་ཉེ་འགྲམ་གྱི་སྨན་ཁང་དུ་ཕྱིན་ནས་སྨན་པ་བསྟེན་པ་དང་། འོ་སྣུན་བུད་མེད་ལ་གོང་གསལ་གྱི་ནད་རྟགས་བྱུང་ན་ཕྲུ་གུར་འོ་མ་སྣུན་མཚམས་བཞག་ནས་ཕྲུ་གུའི་བདེ་འཇགས་སྲུང་སྐྱོབ་བྱ་དགོས།