ཁྲུང་ཆིང་གྲོང་ཁྱེར་ཝན་ཀྲོའུ་ཁུལ་འབྲི་ཆུའི་ཟམ་ཆེན་གཉིས་པའི་སྟེང་བགྲོད་པའི་སྤྱི་སྤྱོད་རླངས་འཁོར་ཞིག་འབྲི་ཆུའི་ནང་དུ་ལྷུང་བ། མཚོ་སྔོན་གོར་མོ་གྲོང་ཁྱེར་འབྲི་ཆུའི་ཆུ་འགོ་གྲོང་ཚོར་ཕར་རོགས་ཚུར་གཅེས་ཀྱིས་བདེ་སྐྱིད་ལྡན་པའི་འཚོ་བ་སྐྱེལ་བ། དཔལ་དགེའི་ཆུ་བསྐྱིལ་མཚེའུའི་འཕྲིན་གསར། འབྲི་ཆུའི་འགག་འཁྱིལ་མཚེའུ་གཞི་རྩའི་ཆ་ནས་རྒྱུན་རྣམ་སླར་གསོ་བྱུང་བ་དང་རོགས་སྐྱོབ་གོ་རིམ་ལྡན་པའི་ངང་བྱེད་བཞིན་ཡོད་པ། གནས་མཆོག་ལྷ་སར་མཐུན་སྒྲིལ་མེ་ཏོག་རབ་ཏུ་བཞད་། ཆོས་དབྱིངས་སྐྱིད་ཀྱིས་ཡང་རྒྱལ་སྤྱིའི་འགྲན་སྡུར་ལས་ཨང་དང་པོ་བླངས། ཀྲུང་གོའི་མི་རིགས་སྐད་ཡིག་ཡིག་སྒྱུར་ཅུས་ཀྱིས་བོད་ཡིག་རིག་ནུས་ཡིག་སྒྱུར་མཉེན་ཆས་ཁྱབ་སྤེལ་ཚོགས་འདུ་སྤོས་ལྡན་གྲོང་དུ་འཚོགས་པ། ཚོགས་ཆེན་བཅུ་དགུ་པའི་དགོངས་དོན་མཛུབ་ཁྲིད་དུ་བྱས་ཏེ། ཆོས་ལུགས་དང་སྤྱི་ཚོགས་རིང་ལུགས་ཀྱི་སྤྱི་ཚོགས་གཉིས་འཚམ་མཐུན་ཡོང་པ་བྱ་དགོས། ནུབ་བྱང་དགེ་འོས་སློབ་ཆེན་གྱིས་དགེ་འོས་སློབ་མ་བགྲང་ལས་འདས་པ་བསྐྱངས་པ། གཞིས་རྩེ་གྲོང་ཁྱེར་གྱི་གཞུང་ལམ་ཐོག་རླངས་འཁོར་ཤར་གཏོང་ཐུབ་ཚད་སྤྱི་ལེ་ཁྲི་1.7ཟིན་པ།
ཀྲུང་གོའི་བོད་ལྗོངས་དྲ་བ། > མདུན་ཤོག > ཆོས་ལུགས་ཀུན་སྨོན།

གཙང་བཀྲ་ཤིས་ལྷུན་པོ་དགོན།

སྤེལ་དུས 2019-01-29 ཡོང་ཁུངས། གངས་ལྗོངས་ཉི་གཞོན་དྲ་བ། རྩོམ་པ་པོ། མི་གསལ།
             ལྟ་བས་མི་ངོམས་གཟི་བརྗིད་ཅན། །མཚུངས་པ་མེད་པའི་བཀྲ་ཤིས་གནས། །བཀྲ་ཤིས་ལྷུན་པོ་རྒྱལ་གྱུར་ཅིག །འདོད་དགུ་འབྱུང་བའི་རིན་པོ་ཆེ། དེ་དང་མཐུན་པ་དཔག་བསམ་ཤིང་། དགོས་འདོད་འབྱུང་བའི་བཀྲ་ཤིས་གནས།  །བཀྲ་ཤིས་མཆོག་རབ་རྒྱས་གྱུར་ཤོག  །མཚན་རྒྱས་པར་བཀྲ་ཤིས་ལྷུན་པོ་དཔལ་གྱི་སྡེ་ཆེན་ཕྱོགས་ཐམས་ཅད་ལས་རྣམ་པར་རྒྱལ་བའི་གླིང་ཞེས་ཞུ།  བཀྲ་ཤིས་ལྷུན་པོ་ནི་ལྷ་དང་བླ་མས་ལུང་བསྟན་པའི་མཚན་ཡིན་པ་དང་།  དཔལ་གྱི་ཕྱོགས་ཐམས་ཅད་ལས་རྣམ་པར་རྒྱལ་བའི་གླིང་ཞེས་པ་ནི་རྗེ་དགེ་འདུན་གྲུབ་ལགས་ཀྱིས་མཚན་གསོལ་གནང་བ་ཡིན།
             དགོན་དེ་ནི་སྤྱི་ལོ་1447 ལོར་རྗེ་དགེ་འདུན་གྲུབ་ཀྱིས་ཕྱག་བཏབ་ཅིང་དེའང་རྗེ་དགེ་འདུན་གྲུབ་སྣར་ཐང་ནས་འཇམ་དཔལ་མཚན་བརྗོད་གསུང་བཞིན་ཡར་མར་ཕེབས་སྐབས་ད་ལྟའི་དགོན་གནས་ཆགས་ཡུལ་དེར་ཕེབས་འབྱོར་བྱུང་ལ། ཆོས་ཀྱི་རྒྱལ་མཚན་ལེགས་པར་འཛུགས་ཞེས་པའི་ཚིག་མཚམས་དང་རྟག་ཏུ་འཁེལ་བས་ཐོག་མའི་རྟེན་འབྲེལ་འགྲིག  གཞན་ཡང་རྭ་ལོ་ཙཱ་བ་ཁྲོ་ཕུར་བཞུགས་པའི་སྐབས་ཤིག་རི་རྩེར་སྐྱོ་སངས་དུ་བྱོན་པའི་ཚེ་ཤར་དུ་ཕྱག་མཛུབ་བསྟན་ཏེ།  མ་འོངས་པ་ན་ས་ཕྱོགས་ཕ་ཀིར་སྤྱན་རས་གཟིགས་ཀྱི་སྤྲུལ་པ་ཞིག་གིས་དགོན་པ་བཀྲ་ཤིས་མིང་ཅན་ཞིག་བཏབ་སྟེ་འགྲོ་དོན་དཔག་མེད་འབྱུང་བ་འདུག་ཅེས་གསུངས།   ཡང་རྗེ་དགེ་འདུན་གྲུབ་འབྲས་སྤུངས་དགེ་འཕེལ་རིར་སྐུ་མཚམས་སུ་བཞུགས་པའི་སྐབས་ཤིག་མནལ་ལམ་དུ།  ད་ལྟའི་བཀྲ་ཤིས་ལྷུན་པོའི་རྒྱབ་རི་འདྲ་བ་ཞིག་གི་རྩེ་མོར་རྗེ་ཙོང་ཁ་པ་དང་།  སྐེད་པར་སེམས་དཔའ་ཆེན་པོ་འདུལ་འཛིན་པ།  གཤམ་དུ་རྗེ་རང་ཉིད་བཅས་བཞུགས་ཡོད་པ་ལ་འདུལ་འཛིན་པས།  དགེ་འདུན་གྲུབ་ཡར་རྣ་བ་གཏད་ནས་ཉོན་དང་།  ཙོང་ཁ་པས་རང་རེ་ལ་ལུང་བསྟན་མང་པོ་གནང་གི་འདུག་ཅེས་གསུངས་པས།  གསུང་གི་སྒྲ་དབྱངས་མང་པོ་སྒྲོག་པའི་ཁྲོད་དགེ་འདུན་གྲུབ། ཚད་མ་རྣམ་འགྲེལ་གྱི་བསྟན་པ་རྒྱས་པར་གྱུར་ཅིག་ཅེས་གསུངས་པ་ཞིག་གསལ་བར་གསན་པས་སྐུ་ལུས་ཀྱི་བ་སྤུ་གཡོས།  དེ་བཞིན་རྗེ་ཤེས་རབ་སེང་གེ་བསམ་གྲུབ་རྩེ་ནས་སྣར་ཐང་དུ་ཕེབས་པའི་སྐབས་སུ་བཀྲ་ཤིས་ལྷུན་པོ་ཆགས་པའི་ཕྱོགས་དེར་ཕྱག་མཛུབ་བསྟན་ནས།   གནས་ཕ་གི་ན་དགེ་འདུན་གྲུབ་མགོ་སྐྱ་ཡེར་ཡེར་ཆོས་འཆད་བཞིན་འདུག་པའི་ཉམས་ཤིག་ང་ལ་རྟག་ཏུ་འོང་གི་འདུག་ཅེས་ཉེ་གནས་ལ་གསུངས་པ་སོགས་སྔོན་ནས་རྟེན་འབྲེལ་དེ་ལྟ་བུ་འགྲིགས།  དེ་ནས་རྗེ་ཤེས་རབ་སེང་གེ་དགོངས་པ་གཞན་དོན་དུ་ཕེབས་རྗེས་དགོངས་རྫོགས་མཆོད་འབུལ་ལ་དམིགས་ཏེ་ཐུབ་དབང་གི་ལུགས་སྐུ་ཞིག་བཞེངས་པར་དགོངས།  སྦྱིན་བདག་ཕྱུག་པོ་དར་རྒྱས་ཞེས་པ་དང་། རྡོ་རིང་པ། བྲང་ཚལ་པ། རྒྱ་བར་བ་སོགས་ཀྱིས་གསེར་གྱི་གའུ་རེ་ཕུལ་བའི་ཐོག་དྲངས་གསེར་ཟངས་ཀྱི་འབུལ་བ་མང་པོ་དང་།  ནས་ཁལ་སྟོང་གཅིག་ལྷག་ཙམ་ཉིན་གཅིག་ཁོ་ནར་ཕུལ་བ་བཅས་ཀྱིས་གཞིས་ཀ་བསམ་གྲུབ་རྩེའི་བྲག་དམར་བླ་བྲང་དུ་བཟོ་བོ་མཁས་པ་སྣར་ཐང་པ་ཆོས་སྐྱོང་དར་གྱིས་ལུགས་ཐོག་མར་བཏང་བ་མ་འཐེབས་པས།  རྗེ་ཉིད་ཀྱིས་ཐུབ་པའི་བསྟོད་པ་(བདུད་དཔུང་ཕྱེ་མར་འཐག་པ།) ཞེས་བྱ་བ་ལྗགས་རྩོམ་གནང་སྟེ་ཐོག་མར་ལུགས་མར་ལུགས་ཕུད་ལ་རྗེ་བཙུན་སྒྲོལ་མའི་སྐུ་བརྙན་ཞིག་བཞེངས་གནང་མཛད།  དེ་ནས་ལུགས་བཏང་བས་སྟོན་པའི་སྐུ་བརྙན་རྒྱབ་མཐོ་ཉེར་ལྔ་པ་བྱིན་རླབས་ཀྱི་གཟི་འོད་འབར་བ་ངོ་མཚར་ཅན་ཞིག་བྱོན།  རྟེན་དེའི་ཐུགས་ཀར་རྒྱལ་བ་ཙོང་ཁ་པ་ཆེན་པོས་དབུས་བླ་མ་དང་།  སངས་རྒྱས་བྱང་སེམས་ཀྱི་རིང་བསྲེལ་མང་པོས་གཏམས་པའི་དངུལ་གྱི་རྒྱལ་བ་འོད་དཔག་མེད་ཀྱི་སྐུ་བརྙན་ཞིག་དང་།  རྗེ་བཙུན་ཤེས་རབ་སེང་གེའི་དབུ་ཐོད་རིན་པོ་ཆེ་སྣ་ཚོགས་ཀྱིས་བཀང་བ་བཅས་བཞུགས།  སྐུའི་སྨད་ཆར་གཟུངས་སྔགས་དང་འདུལ་བའི་གླེགས་བམ།  རྗེ་ཙོང་ཁ་པའི་མཐིང་གོས་བཅས་རྟེན་འབྲེལ་ཁྱད་པར་ཅན་དུ་མ་བཅས་ལ་དམིགས་ཏེ་དུས་ཡུན་ལོ་གཅིག་ཙམ་ལ་ཐུབ་པ་བདུད་འདུལ་མ་ཞེས་ཞུ་བ་དེ་ཉིད་ཡོངས་སུ་འགྲུབ་པར་གནང་བའོ། །དེ་ནས་ཐུབ་པ་བདུད་འདུལ་མའི་བཞུགས་གནས་གཏན་མི་འཁེལ་བའི་མཚམས་དེར་སྔོན་གྱི་རྟེན་འབྲེལ་གྱི་རྟགས་རིམ་བྱུང་དང་གཅིག   གཉིས་སུ་ས་བཀྲ་ལེགས་པ།  གསུམ་དུ་གནས་དེར་ཕྱུག་གཞུང་དར་རྒྱས་པའི་ས་ཁོངས་ཡིན་པ་བཅས་ཀྱིས་མཐར་ཐུབ་པའི་བཞུགས་ཡུལ་གནས་དེར་བསྐྲུན་རྒྱུར་ཐུགས་ཐག་བཅད།  ཕྱུག་གཞུང་དར་རྒྱས་པས་སྦྱིན་བདག་ཞུ་རྒྱུར་ཁས་བླངས།  རྗེ་དགེ་འདུན་གྲུབ་པ་དགུང་གྲངས་57དགའ་ལྡན་དགོན་བཏབ་ནས་ལོ་39སྟེ་གོང་གསལ་སྤྱི་ལོའི་ལོ་ཁམས་དེར་དགོན་དེ་བཏབ་གནང་མཛད།  ཐོག་དབུབ་པའི་ཚེ་ནམ་མཁའ་ནས་ཀ་བ་ལྟར་གྱི་འཇའ་ཟུག་པ་སོགས་ཀྱི་རྟེན་འབྲེལ་འགྲིག  འདུ་ཁང་ཁྱམས་སྟོད་ཀ་བསྟར་གཉིས་ལེགས་པར་འགྲུབ་རྗེས་བསམ་གྲུབ་རྩེ་ནས་ཐུབ་པ་བདུད་འདུལ་མའི་སྐུ་བརྙན་གདན་དྲངས་ཏེ་གཙང་ཁང་དབུས་མའི་རྟེན་གཙོར་བཞུགས་སུ་གསོལ།  རྗེས་སུ་ཐུབ་པའི་གཡས་གཡོན་དུ་ཉན་ཐོས་གཉིས་དང་གཡས་སུ་ཚེ་དཔག་མེད། གཡོན་དུ་སྨན་པའི་རྒྱལ་པོ།  ཤར་ནུབ་གཉིས་སུ་དགེ་འདུན་གྲུབ་པའི་ཕྱག་བཟོ་ཡིན་ཞེས་ཞུ་བའི་ཉེ་སྲས་བརྒྱད།  གཙང་ཁང་ནུབ་དུ་གསེར་ཟངས་བལ་བཟོའི་རྒྱལ་བ་བྱམས་པ་ཐོག་སོ་གཉིས་ལྷག་གཡས་སུ་འཇམ་དབྱངས་དང་།  གཡོན་དུ་སྤྱན་རས་གཟིགས།  གཙང་ཁང་གི་ཤར་དུ་སྒྲོལ་མ་ལྷ་ཁང་ནང་གསེར་ཟངས་ཀྱི་སྒྲོལ་དཀར་གཙོ་བཞུགས་གཡས་གཡོན་དུ་སྒྲོལ་མའི་སྐུ་བརྙན།  དེའི་རྒྱབ་ཏུ་སྒྲོལ་མ་གསུང་བྱོན་མའི་ལྡེབས་རིས་ཤིག་ཡོད་པ་དེས་རྗེ་དགེ་འདུན་གྲུབ་དགོངས་པ་གཞན་དོན་དུ་ཕེབས་རྗེས་ཚོགས་གཞུང་ནས་རྗེའི་གསོལ་འདེབས་གསུང་བའི་སྐབས་དགེ་འདུན་གྲུབ་ཅེས་པའི་མཚན་མཚམས་སུ་དགེ་འདུན་ཡོངས་ཐུགས་སྐྱོ་ནས་མཚན་མ་ཐོན་པར་འཇམ་ཐིང་ངེར་བཞུགས་པའི་སྐབས།   བུད་མེད་ཅིག་གིས་སྐད་ཕྲ་ལ་སྙན་པའི་ཐོག་ནས་བློ་བཟང་དགེ་འདུན་གྲུབ་ཅེས་གསུང་སྟེ་གྱང་ལ་ཐིམ།  རྗེས་སུ་དགེ་འདུན་གྲུབ་པའི་གསོལ་འདེབས་ནམ་གསུང་རྗེའི་མཚན་མཚམས་དེར་སླེབས་སྐབས་གསུང་མཐོན་པོར་བཏེགས་ཏེ་གསུང་སྲོལ་ཡང་དེ་ནས་དར་བ་ཡིན།  འདུ་ཁང་ནུབ་བློ་བཟང་སྦུག་ཅེས་པར་ལྷ་མོ་དམག་ཟོར་དམ་སྦྱར་མ།  ཡང་སྟེང་གཉེར་གཏད་གནས་བཅུ་ལྷ་ཁང་ནང་གནས་བཅུ་བྲག་རི་མ།  སྦུག་ཏུ་ལྷ་མོ་དམག་ཟོར་མ། བྱམས་ཁང་སྟེང་ཞལ་རས་ལྷ་ཁང་དང་།  སྒྲོལ་མ་ལྷ་ཁང་སྟེང་ལྷ་ཁང་མཐོང་བ་དོན་ལྡན་ནང་རྗེ་དགེ་འདུན་གྲུབ་ཀྱི་དངུལ་གདུང་།  པཎ་ཆེན་སྐུ་ཕྲེང་བཞི་པ་ནས་རྒྱ་བསྐྱེད་གནང་སྟེ་སེང་གཡབ་རྒྱབ་དང་ལྕང་ར་ལྷ་ཁང་།   གྲིབ་སེལ་ལྷ་ཁང་ངུར་སྨྲིག་ལྷ་ཁང་།   རིན་ཆེན་ལྷ་ཁང་། རྒྱ་ནག་ལྷ་ཁང་བཅས་པར་རྟེན་དང་རྟེན་པར་བཅས་པ་བཞུགས་སུ་གསོལ།  དེ་ནས་རྗེ་ཉིད་གཙུག་ལག་ཁང་གི་ཁྱམས་སུ་རས་གུར་ནང་བཞུགས་པའི་ཐོ་རེངས་ཤིག་ལ་སྔར་ལུང་བསྟོན་མཁན་གྱི་བུད་མེད་དེའི་སྐད་འདྲ་བ་ཞིག་གིས་་་དགོན་པའི་མིང་ལ་བཀྲ་ཤིས་ལྷུན་པོ་གྱིས་ཞེས་ལྷང་ངེར་འབོད་པ་བྱུང་བ་མཁའ་འགྲོའི་བརྡ་སྐད་ཡིན་པར་མཁྱེན་ཏེ་དེ་ནས་བཟུང་དགོན་པའི་མཚན་ལ་བཀྲ་ཤིས་ལྷུན་པོ་ཞེས་གསོལ་བ་ཡིན།   དགོར་དེར་གྲྭ་ཚང་བཞི་ཡོད་པ་ནི་ཤར་རྩེ་གྲྭ་ཚང་།  དཀྱིལ་ཁང་གྲྭ་ཚང་།  ཐོས་བསམ་གླིང་གྲྭ་ཚང་།  སྔགས་པ་གྲྭ་ཚང་བཅས་ཡིན།
             ཤར་རྩེ་གྲྭ་ཚང་གི་ཚོམས་ཆེན་ཀ་བ་16གི་གཙང་ཁང་ལྡེབས་རིས་སུ་རྗེ་ཙོང་ཁ་པ་ཐོག་ཚད་མ་དང་།   གསེར་བཟང་གི་ཐུབ་དབང་ཐོག་ཚད་མ་སྨན་འདམ་གྱི་སྡེམ་དང་བཅས་པ།  སྲུང་མའི་གཙོ་བོ་མགོན་པོ་ཕྱག་དྲུག་པ་ལ་སོགས་རྟེན་གསུམ་ཇི་སྙེད་བཞུགས།  ཁྲོན་སྦུག་པ་བློ་བཟང་བསྟན་འཛིན་ནས་བློ་བཟང་ཆོས་འབྱོར་བར་  (སྤྱི་ལོ་1960ཡན།) བླ་རབས་ལྔ་བཅུ་ཐམ་པ་བྱོན།  འཆད་ཉན་གྱི་གཙོ་བོ་ནི་ཀུན་མཁྱེན་ལེགས་པ་དོན་གྲུབ་ཀྱིས་མཛད་པའི་(བཀའ་པོད་ལྔ་ཡི་ཐལ་འཕྲེང་།) དང་། བློ་གྲོས་ལེགས་བཟང་གིས་མཛད་པའི་(དབུ་ཕར་གཉིས་ཀྱི་སྤྱི་དོན།)གཞན་ཡང་པོ་ཏི་བཞིའི་གཞུང་འགྲེལ་སོགས་ཡིན། ཤར་རྩེ་གྲྭ་ཚང་ལ་མི་མཚན་6ཡོད་པ་ནི་(མི་མཚན་ཞེས་པ་ནི་སྐྱེས་ཡུལ་འབབ་གཞིར་བཟུང་ནས་ཐོགས་པ་ཡིན།)  ཁྲོན་སྦུག ལྷ་ཁང་པ།  བ་ཤེས་བ། གནས་གསེར།  ཤར་བྱང་།  ལས་སྟོདབཅས་སོ། 
             དཀྱིལ་ཁང་གྲྭ་ཚང་གི་འདུ་ཁང་རྒྱ་ཁྱོན་ཀ་བ་24གཙང་ཁང་ཀ་བ་བཞིའི་རྟེན་གཙོ་བོར་སྨན་འཇིམ་གྱི་ཐུབ་དབང་ཐོག་ཚད་མ་ལ་ཉེ་སྲས་བརྒྱད་ཀྱིས་བསྐོར་བ་དང་།  གནས་བཅུ་བྲག་རི་མ་བཅས་བཞུགས། མགོན་ཁང་གཉིས།  གཙང་ཁང་ཀ་བཞིའི་སྟེང་གི་ལྷ་ཁང་ནང་རྟེན་གཙོ་ཐུབ་དབང་དང་། མཐའ་འཁོར་དུ་འཕགས་བོད་བླ་མ་མང་པོའི་སྣང་བརྙན།  ངོ་མཚར་ཆེ་བའི་ལྡེམ་རིས་།  སྲུང་མའི་གཙོ་བོ་ལྕམ་སྲིང་དང་དེའི་ཞལ་འབག་གཏེར་མར་གྲགས་པ།  བླ་རབས་དང་པོ་དཔལ་ལྡན་ཆོས་སྐྱོང་ནས་ཨོ་རྫོང་པ་མཁན་ཆེན་བློ་བཟང་བཟོད་པ་བར་(སྤྱི་ལོ་ 1960ལོ་ཡན།)  བླ་རབས་57སོང་། ཆད་ཉན་ཡིག་ཆ་ནི་ཤནྟི་པས་མཛད་པའི་(དབུ་མ།) དང་(ཕར་ཕྱིན་།) (རྣམ་འགྲེལ།)  བཅས་ཀྱི་ཊིཀྐ་དང་། འདུལ་ཊིཀྐ་ལྟ་བའི་སྒྲོལ་མེ།  མངོན་པ་མཛོད་འགྲེལ་སོགས་ཡིན།  གྲྭ་ཚང་འདིའི་ཁོངས་མི་མཚན་བཅུ་ཡོད་པ་ནི།  གུ་གེ།  སྟག་མོ། དཔེ་ཐུབ་མདངས་ཆེན། འདར་པ།  ལ་ཁ།  ལྷུན་གྲུབ་རྩེ།  རོག་མཚོ།  གནས་རྙིང་ཟུར་ཁང་པ།  རིང་མཁར་མི་མཚན་བཅས་ཡིན།
             ཐོས་བསམ་གླིང་གྲྭ་ཚང་གི་ཚོམས་ཆེན་རྒྱ་ཁྱོན་ཀ་བ་24དང་།  གཙང་ཁང་ཤར་ནུབ་གཉིས་ལ་རྒྱ་ཁྱོན་ཀ་བ་གཉིས་རེ། གཙང་ཁང་ནུབ་མའི་རྟེན་གཙོ་སྨན་འཇིམ་གྱི་ཐུབ་དབང་ཐོག་ཚད་མ་མཆོག་ཟུང་དང་བཅས་པ།   ཐུགས་རྗེ་ཆེན་པོ་བཅུ་གཅིག་ཞལ།  ཕྱག་རྡོར་འབྱུང་པོ་འདུལ་བྱེད་ཐོག་ཚད་མ་བཅས་དང་། ཤར་མར་སྨན་འཇིམ་གྱི་ཐུབ་པ་གཙོ་འཁོར་གསུམ་བཅས་བཞུགས།  སྲུང་མའི་གཙོ་བོ་ལྷ་མོ་གསུང་བྱོན་མ་ཡིན། གྲྭ་ཚང་དེར་གདན་རབས་དང་ཀུན་མཁྱེན་ཆོས་འབྱོར་དཔལ་བཟང་ནས་བློ་བཟང་རྒྱལ་པོའི་བར་(སྤྱི་ལོ་1960ཡན་ལ།) བླ་རབས་ཞེ་དགུ་བྱུང་།  འཆད་ཉན་ཡིག་ཆ་ནི། བྱང་ཕྱོགས་རྣམ་པ་ཀུན་མཁྱེན་ཆོས་འབྱོར་དཔལ་བཟང་གིས་མཛད་པའི་(ཕར་ཕྱིན་བསམ་འཕེལ་དབང་རྒྱལ།) དང་འཇམ་དབྱངས་བློ་བཟང་བཤེས་གཉེན་གྱིས་མཛད་པའི་(འདུལ་བའི་སྤྱི་དོན་དང་། མཛོད་འགྲེལ་ཉི་མའི་དཀྱིལ་འཁོར།)  བྱང་སྟོན་བརྩོན་འགྲུས་རྒྱལ་མཚན་གྱིས་མཛད་པའི་(དབུ་མ།) དང་(བློ་རྟགས།) སོགས་ཚད་མའི་སྐོར་།  རྟ་ནག་ཕྱོགས་པ་རྣམས་སེ་ར་རྗེ་བཙུན་པ་དང་མཁས་གྲུབ་དགེ་འདུན་བློ་བཟང་ཡབ་སྲས་ཀྱིས་མཛད་པའི་(དབུ་ཕར་འདུལ་མཛོད་རྣམ་འགྲེལ་བཅས་ཀྱི་མཐའ་དཔྱོད།)  བཅས་ཡིན་། གྲྭ་ཚང་དེའི་ཁོངས་ལ་མི་མཚན་བཅུ་ཡོད་པ་ནི། ལེགས་གླིང་དང་། གཅེན་ལུང་འབྲོང་རྩེ།  བདེ་འབྱོར། གནས་ཆོས།  གནས་པ།  རྟ་ནག་པ།  ལྷུན་པོ་རྩེ།  ནོར་དགའ།  བྱང་སྤང་བཅས་ཡིན། 
             སྔགས་པ་གྲྭ་ཚང་ནི།  རྒྱལ་མཆོག་དགེ་འདུན་གྲུབ་པ་ཉིད་ཀྱིས་རྗེ་བཙུན་ཤེས་རབ་སེང་གེའི་བཀའ་དྲིན་གསབ་ཕྱིར་རྒྱུད་གྲྭ་འཛུགས་པར་བཞེད་ཀྱང་སྐབས་མ་འཁེལ།  རྗེས་སུ་ཤིང་ཡོས་སྤྱི་ལོ་1615ལོར་པཎ་ཆེན་བློ་བཟང་ཆོས་ཀྱི་རྒྱལ་མཚན་གྱིས་གསར་འཛུགས་མཛད།  འདུ་ཁང་རྒྱ་ཁྱོན་ཀ་བ་བཅུ་དྲུག་དང་དབུས་ཀྱི་ལྡེབས་ཞལ་ཐོག་དང་པོའི་སངས་རྒྱས་རྡོ་རྗེ་འཆང་སོགས་ཡི་དམ་ལྷ་ཚོགས་མང་པོའི་ལྡེབས་རིས་དང་།  དབུས་སུ་རྡོ་རྗེ་སློབ་དཔོན་གྱི་བཞུགས་ཁྲི།  རྡོ་རྗེ་འཛིན་པ་དཀོན་མཆོག་རྒྱལ་མཚན་གྱི་སྐུ་གདུང་རིལ་བུ་བཞུགས་པའི་དངུལ་གྱི་གདུང་རྟེན། མགོན་ཁང་ནང་སླེའུ་ཆུང་མར་གྲགས་པའི་ལི་མའི་རྡོ་རྗེ་འཇིགས་བྱེད་དཔའ་བོ་གཅིག་པས་གཙོས་ལི་དང་རྡོ་ནག་སྨན་འཇིམ་བཅས་ལས་གྲུབ་པའི་ལྷ་སྲུང་ཁག་གི་སྐུ་བརྙན་སོགས་བཞུགས།   གྲྭ་ཚང་དེར་ཕེབས་པའི་རྡོ་རྗེ་སློབ་དཔོན་རིམ་བྱུང་ནི།  ཇོ་རྫོང་བློ་བཟང་བསྟན་པའི་རྒྱལ་མཚན་ནས་ལྷོ་པ་སྐུ་སྐྱེ་དཔལ་ལྡན་ཤེས་རབ་སེང་གེ། (སྤྱི་ལོ་1960ལོ་ཡན།)བར་རྡོ་རྗེ་སློབ་དཔོན་སོ་དྲུག་ཕེབས།  འཆད་ཉན་ཡིག་ཆ་ནི་གསང་བ་འདུས་པའི་རྒྱུད་ཀྱི་འགྲེལ་པ་བཞི་སྦྲགས་(བསྐྱེད་རིམ་དངོས་གྲུབ་རྒྱ་མཚོའི་སྙིང་པོ་དང་།  རྫོགས་རིམ་རིམ་ལྔ་གསལ་སྒྲོན་སྙིང་པོ།)སོགས་རྒྱུད་སྡེ་བཞིའི་རྒྱུད་དང་དགོངས་འགྲེལ་རྣམས་ལ་འཆད་ཉན་མཛད་པ་ཡིན། པཎ་ཆེན་སྐུ་ཕྲེང་དགུ་པའི་དུས་(སྤྱི་ལོ་1914ལོར།) བཞེངས་གནང་བའི་བྱམས་ཁང་ཆེན་མོའི་ནང་གསེར་ཟངས་ཀྱི་རྒྱལ་བ་བྱམས་པ་ཐོག་སོ་དགུ་ཐོག་ཅན་ནི་འཛམ་གླིང་ཐོག་བྱམས་པའི་སྐུ་བརྙན་ཆེ་ཤོས་དེ་ཡིན་པ་དང་། མཆོད་ཁང་ནུབ་ལ་སྐུ་ཕྲེང་དྲུག་པའི་གདུང་རྟེན།  སྲིད་གསུམ་རྣམ་རྒྱལ་ལྷ་ཁང་ནང་སྐུ་ཕྲེང་བཅུ་པའི་གདུང་རྟེན།  སྐུ་ཕྲེང་དུས་བཞེངས་གནང་པའི་ཤག་སྒོར་སྟེང་རྒྱ་ནག་ལྷ་ཁང་དང་དེའི་སྦུག་ཏུ་ལྷན་འཛོམས་གཟིམ་སྦུག་བཅས་ཡོད།  སྔོན་དགེ་འདུན་5000ལྷག་གིས་རི་བོ་དགེ་ལྡན་ལུགས་ཕྱག་ལེན་གནང་བ་ཡིན།   ད་ལྟ་མཆོད་ཁང་ནུབ་ལྷ་ཁང་ནང་པཎ་ཆེན་སྐུ་ཕྲེང་བཅུ་པའི་གསེར་གདུང་གསུམ་ཐོག་ཅན་དང་རྩེ་ཐོག་ཏུ་དུས་འཁོར་གྱི་བློས་བླངས་དཀྱིལ་འཁོར་གསེར་དངུལ་ལས་གྲུབ་པ།   མཆོད་ཁང་གི་མཚན་ལ་སྲིད་གསུམ་རྣམ་རྒྱལ་ཞེས་གསོལ་ཡོད།   ལྷ་ཁང་དེའི་བཟོ་བཀོད་ནི་མཆོད་ཁང་ཤར་ལ་དཔེ་བྱས་ནས་བཞེངས་གནང་བ་ཡིན།   དེ་ལྟ་བཞེངས་དགོས་དོན་ནི་མཆོད་ཁང་ཤར་ནི་པཎ་ཆེན་སྐུ་ཕྲེང་བཅུ་པ་སྐུ་ངོ་མས་ལྗགས་བཀོད་གནང་བ་ཞིག་ཡིན་པ་ནི་མཆོད་ཁང་གི་ཕྱིའི་བཀོད་པ་དང་།  ནང་གི་གདུང་རྟེན་ལྔ་ལྷན་བཞུགས་གནང་བ།  ལྡེབས་རིས་ཀྱི་བཀོད་པ་དང་ལྷག་པར་དུ་ཐུན་མོང་མ་ཡིན་པ་ཞིག་ནི་ཐོག་ལ་རྒྱུད་སྡེ་ཁག་གི་དཀྱིལ་འཁོར་ཁོ་ན་བྲིས་སུ་འཇུག་གནང་བ་དང་མཆོད་ཁང་གི་མཚན་ལའང་བཀྲ་ཤིས་རྣམ་རྒྱལ་ཞེེས་སྐུ་ཉིད་ངོ་མས་གསོལ་གནང་བ་བཅས་ཡིན། བཀྲ་ཤིས་ལྷུན་པོའི་དགའ་ཚལ་དུ། །བཀྲ་ཤིས་ལྷ་མོ་རྣམ་བརྒྱད་ཀྱིས་། །བཀྲ་ཤིས་གླུ་དབྱངས་རྟག་ལེན་པས། །བཀྲ་ཤིས་དགེ་མཚན་འབར་གྱུར་ཅིག །