བོད་ལུགས་གསོ་རིག་གི་རིགས་གཅིག་མཁས་ཅན་བསོད་ནམས་དངོས་གྲུབ་ལ“ཀྲུང་གོའི་སྨན་པ་བཟང་པོའི”མཚན་སྙན་ཐོབ་པ།
སྤེལ་དུས 2019-01-17
ཡོང་ཁུངས། མི་དམངས་དྲ་བ།
རྩོམ་པ་པོ། སངས་སྐྱབས་ཀྱིས་བསྒྲིགས།
མི་དམངས་དྲ་བའི་འཕྲིན། ཟླ་1ཚེས་14ཉིན། ཀྲུང་དབྱང་ཤེས་དཔལ་གཞུང་ལས་ཁང་དང་རྒྱལ་ཁབ་འཕྲོད་བསྟེན་བདེ་ཐང་ཨུ་ཡོན་ལྷན་ཁང་གིས་2018ལོའི་ཟླ་12པའི་ཟླ་འཁོར་གྱི་མི་སྣ་“ཀྲུང་གོའི་སྨན་པ་བཟང་པོ། ཀྲུང་གོའི་ནད་གཡོག་བཟང་པོ།”ཁྱབ་བསྒྲགས་བྱས་པ་རེད། ཁྱོན་ཕུལ་བྱུང་གི་སྨན་དོན་མི་སྣ་10དང་ཚོགས་པ་1ཡོད་པ་དང་། བོད་རང་སྐྱོང་ལྗོངས་སྨན་རྩིས་ཁང་གི་ཕྱི་བཅོས་ལྟེ་གནས་ཀྱི་ཀྲུང་རེན་བསོད་ནམས་དངོས་གྲུབ་དེའི་ནང་ཡོད་པ་རེད།
ཤེས་རྟོགས་བྱུང་བར་གཞིགས་ན། བསོད་ནམས་དངོས་གྲུབ་ལ་དེ་སྔོན་རྒྱལ་སྲིད་སྤྱི་ཁྱབ་ཁང་གིས་སྤྲད་པའི“རྒྱལ་ཡོངས་ཀྱི་སྔོན་ཐོན་ལས་དོན་པ”དང“རྒྱལ་ཁབ་རིམ་པའི་ཀྲུང་ལུགས་གསོ་རིག་གི་གྲགས་ཅན་སྨན་པ་རྒན་གྲས”ཀྱི་མཚན་སྙན་ཐོབ་མྱོང་ཡོད་ལ། “རྒྱལ་ཡོངས་ཀྱི་སྨན་པའི་ཀུན་སྤྱོད་མིག་དཔེ”སོགས་ཀྱི་མཚན་སྙན་ཡང་ཐོབ་མྱོང་ཡོད་པ་རེད།
བསོད་ནམས་དངོས་གྲུབ་ཀྱིས་སྔ་རྗེས་སུ་རྒྱལ་ཁབ་ཀྱི་སྨན་པ་བྱམས་པ་འཕྲིན་ལས་དང་། བོད་ཀྱི་གསོ་བ་རིག་པའི་གྲགས་ཅན་རིགས་གཅིག་མཁས་ཅན་ཁྲོ་རུ་མཚོ་རྣམ། ཐུབ་བསྟན་ཚེ་རིང་སོགས་དགེ་རྒན་བསྟེན་མྱོང་ཡོད། བོད་ཡིག་གི་བརྡ་རྙིང་དང་། རིག་གནས་ཆེ་བ་ལྔ་དང་ཆུང་བ་ལྔ། གནམ་རིག་སྐར་རྩིས་བཅས་འདུས་པའི་སྲོལ་རྒྱུན་གྱི་གཞུང་ལུགས་ཤེས་བྱ་སྦྱངས་ནས་ཁོང་དུ་ཆུབ་པ་བྱས་ཡོད་ལ། 《གསོ་རིག་རྒྱུད་བཞི》བྱང་ཆུབ་པ་ཡོད། ད་དུང་སྨན་བཅོས་ལག་ལེན་དང་སྨན་སྦྱོར་སོགས་ཐད་ལག་ལེན་རྒྱ་ཆེ་ལྡན་ཡོད་པ་རེད། ཁོང་གིས་སློབ་སྦྱོང་དང་ལག་ལེན་བྱས་པ་བརྒྱུད། བོད་སྨན་གྱི་དངུལ་ཆུ་བཙོ་སྦྱང་དང་དེ་མིན་རིན་ཆེན་རིགས་ཀྱི་སྨན་སྦྱོར། རིན་ཆེན་གྲང་སྦྱོར་སོགས་སྨན་ཀྱི་བསྡུ་སྦྱོར་གྱི་ལག་རྩལ་ཁོང་དུ་ཆུབ་པ་བྱས། ལག་ལེན་ཁྲོད་དུ་བསོད་ནམས་དངོས་གྲུབ་ཀྱིས་སྲོལ་རྒྱུན་གྱི་གསོ་བ་རིག་པའི་རྨང་གཞིའི་ཐོག་དེང་རབས་ཀྱི་གསོ་རིག་དང་ཕན་ཚུན་ལྟ་རྟོག་བྱས་ནས། རང་སྦྱོང་དང་། ཟབ་སྦྱོང་། ཞིབ་འཇུག་སོགས་ཀྱི་ཐབས་ལམ་བརྒྱུད་གསོ་བ་རིག་པའི་ཤེས་བྱ་རྒྱུན་ཆད་མེད་པར་སྦྱངས་ཡོད་པ་རེད།
ཤེས་རྟོགས་བྱུང་བར་གཞིགས་ན། 2008ལོ་ནས་བཟུང་། ཀྲུང་དབྱང་ཤེས་དཔལ་གཞུང་ལས་ཁང་གིས་རྒྱལ་ཡོངས་སུ་“ངས་འོས་སྦྱོར་བྱེད། ངས་ཉེ་འགྲམ་གྱི་མི་བཟང་པོར་དཔྱད་གླེང་བྱེད”ཅེས་པའི་བྱེད་སྒོ་སྤེལ་བ་དང་། དཔྱད་འདེམས་བྱེད་སྒོ་སྤེལ་ནས་ལོ་བཅུའི་ནང་། འཕྲོད་བསྟེན་དང་འཆར་བཙའི་ལས་དོན་པའི་ཚོགས་སྤྱིར་དམིགས་ཐེངས་ཐོག་མ་ཡིན་པས་ཀྲུང་དབྱང་ཤེས་དཔལ་གཞུང་ལས་ཁང་དང་། རྒྱལ་ཁབ་འཕྲོད་བསྟེན་བདེ་ཐང་ཨུ་ཡོན་ལྷན་ཁང་གིས་མཉམ་འབྲེལ་ཐོག་གཙོ་གཉེར་བྱས་ཏེ་རྒྱལ་ཡོངས་ཀྱི་ཀུན་སྤྱོད་མིག་དཔེ་དང་ཉེ་འགྲམ་གྱི་མི་བཟང་པོ་སྟེ་“ཀྲུང་གོའི་སྨན་པ་བཟང་པོ། ཀྲུང་གོའི་ནད་གཡོག་བཟང་པོའི”དཔྱད་འདེམས་བྱེད་སྒོ་སྤེལ་བ་རེད། དེས་འཕྲོད་བསྟེན་དང་འཆར་བཙའི་ཁོངས་གཏོགས་ཀྱི་ཕུལ་བྱུང་སྨན་དོན་མི་སྣ་དང་སྔོན་ཐོན་དཔེ་མཚོན་དྲིལ་བསྒྲགས་དང་སྔོག་འདོན་བྱ་རྒྱུར་ཕན་པ་ཡོད་པ་རེད།
